1 Aba hayabin fariséugu hama hádangiñe arufudahatiña lilurudun Moisesi ha ñǘbuinbaña Herusaléngiñe, luagun Hesusu. 2 Aba harihin luagu añahein lan hádangiñe disipulugu magunfuliruntiña lau échuni le lánina arumaduni ligibugiñe Bungiu, hóuntiña machibunga haméi háhabu. 3 (Falá hamuti fariséugu hama híbiri huríu binadu hagaburi hagüchagu lun meigin hamá, magunfulirunga hagía lau échuni le lánina lachibún úhabu kei lubudubu. 4 Dan le hayabin mágidurugugiñe, méiginbaña machibunga haméi háhabu. Anihein burí giñe saragu luwuyerigu échuni hafalarun, kei burí lachibúniwa weru, sóudieru, boulu, asiedu.) 5 Ábati hálügüdüni fariséugu hama arufudahatiña lilurudun Moisesi hagía, Hesusu, hariñaga lun:

—Ka san uagu mafala habalin bani disipulugu binadu hagaburi wagüchagu, héiginbei lau liwiye háhabu?

6 Aba lóunabuniña Hesusu:

—Linarün profeta Isaíasi, dan le lariñagunbei huagu luagu biangua lan higibu. Lariñahare:

"Gürigia ha, hayumárurügüñein híchiga inebesei nun,

ánhounti hanigi, dísetu nuéi.

7 Málati háhuduragun nun,

ladüga lérügüñein hagumadin wügüriña harufudaha".

8 Aba lariñagun Hesusu: Ígira humaali lugumadin Bungiu lun hafalaruni binadu hagaburi binadu gürigia: Lachibúniwa sóudieru, weru luma katei líbeina lira.

9 —Maísturugu giñe buítiña huguya, ígira humuti lugumadin Bungiu lun hafalaruni binadu higaburi! 10 Ariñagati meha Moisesi: "Inebe hamá bagübürigu bun; le anabagutiña lagübürigu, hilala". 11 Ánheinti huguya, ariñagatün luagu gayara lan lariñagun aban gürigia lun lúguchi o tun lúguchu: "Siñati níderagunibu ladüga sun le númabei ariñagaadina luagu lun lan níchuguni lun Bungiu", 12 luagu furumiñeguarügü lan le ariñaguti ítara, mámaali lan lunti líderaguniña lagübürigu. 13 Lau lira, mebegigüda humaali lugumadin Bungiu lun hafalaruni binadu higaburi; adüga huguya saragu katei líbeina lira.

14 Ábaya lagúarun Hesusu houn gürigia ha ñéinbaña, aba lariñagun houn:

—Aganba humana, sun huguya, gunfuranda humaname: 15 Úati ni kata ebeluruti lidoun gürigia lun lawiyedagüdüni ligibugiñe Bungiu; le áfuridubei tídangiñe lanigi gürigia, ligía awiyedagüdübalin ligibugiñe Bungiu.

17 Dan le lígiruniña Hesusu gürigia hagía, aba lebelurun múnadoun, aba hálügüdüni lani disipulugu luagu hénpulu le. 18 Aba lariñagun houn:

—Úati san giñe gunfuranda humá? Úati san gunfuranda humani luagu sun lan le ebelurubei bóugudigiñe lidoun gürigia siñá lan lawiyedagüdüni ligibugiñe Bungiu 19 ladüga mebeluti tidoun lanigi; lurageirugun lebelura, ñéingiñe ábaya láfuridun lídangiñe?

Lau lira lariñaguña luagu haruma lan sun éigini ligibugiñe Bungiu. 20 Ariñagati giñe:

—Anati le áfuridubei lídangiñe gürigia, wíyedagüda lumuti ligibugiñe Bungiu, 21 ladüga lídangiñe gürigia o tídangiñe hanigi láfurida lagübüri saminaü, agabarahani, salufuri, áfarahani, 22 íweruhani, igaaduaü, iyereehabúni, iyeeni, maricharagun lan ibagari, gimugaü, marasualugú, anaaguni unguaü, libidiounigan aau. 23 Sun burí katei wuribati le, tídangiñe hanigi gürigia liabin, ligíati awiyedagüdübaliña.

24 Aba lidin Hesusu ñéingiñe lóubawagun Tiru luma Sidón. Aba lebelurun tidoun aban muna ani mabusenrunti yebe lun lasubudiruni ni aban. Gama lumoun siñati laramudagun; 25 furese furese, aba taganbun aban würi luagu, túguchu aban irahü gawagutu aban sífiri wuribati. Aba tiabin, aba táhuduragun ligibugiñe Hesusu. 26 Würi tuguya, mama huríu, Siru-Fenisiana. Aba tamuriahan luma Hesusu lun lasagaruni sífiri wuribati le tuéi tiráü. 27 Aba lariñagun Hesusu tun:

—Lunti níderaguniña numutuniña ha huríu furumiñe; mabuidunti lun tagidarúniwa fein hawéi isaanigu lun tichugúniwa houn ounli.

28 Aba tóunabuni, tariñaga:

—Anha Nabureme; gama lumoun íbini ounli ha lábugiñebaña dábula gayaraati giñe heigin tídangiñe tife fein to háguhaboun isaanigu.

29 Ábati lariñagun Hesusu tun:

—Adimurehaadibu buidu; gayaraahali bidin, furiha sífiri wuribati tídangiñe biráü.

30 Dan le tachülürünbei múnada, aba tadarirunu irahü gabanarugu; furihali sífiri wuribati tídangiñe.

31 Aba láfuridun Hesusu lóubawagugiñe Tiru, aba lásügürün Sidongiñe luma lídangiñe burí fulasu lánina Dekapolisi, aba lachülürün luagun lagunu Galiléa. 32 Ñein hanüga aban wügüri maganbaditi, dagadaga lererun; aba hamuriahan luma lun líchuguni lúhabu luagu lun lareidaguagüdüni. 33 Aba ladiñurun Hesusu ñéingiñe lau hawéi gürigia, aba ládaruni bián lirahüñü lúhabu larigeirugun, aba lásuerun, aba láhurudunu liñeñe lau arürei. 34 Aba larihin sielun, aba lagúaragun, aba lariñagun:

«Efatá!» (Mini lan lira: «Daraba!»)

35 Aba ladaarun larigeirugu maganbaditi ligía, aba tánhingichun liñeñe lun ladimurehan buidu. 36 Aba lariñagun Hesusu houn lun mabahüdagun hamani ni ka un; dántima lariñagun houn lun mabahüdagun hamani, ligíatima habahüdaguni. 37 Ábati burí taweiridun hanigi saragu, aba hariñagun: «Adüga lumuti sun katei buidu, darí lun laganbagüdüniña maganbaditiña, adimuregüda laña mariñagaditiña!»