1 Átiri weyu lárigiñe, ábaya lagiribudun Hesusu uburugun Kafarünaumu, aba haganbun gürigia luagu giribuhali lan. 2 Aba hóundaragun saragu gürigia darí lun mabaraaña lan ni bénabu; aba lapurichihani uganu buiti lúmagiñeti Bungiu houn. 3 Ábati hayabin gádürü wügüriña barüina hagía aban wügüri le deregüdaali lúgubu. 4 Keiti siñá lubéi hachülürün le ñein lubéi Hesusu ladüga hiibe gürigia, aba hagidarun murusun luéigiñe tábulugu muna lóugiñe le ñein lubéi Hesusu, aba harariragüdüni sánditi ñéingiñe tidan lubarari. 5 Dan le larihinbalin Hesusu hafiñen, aba lariñagun lun le sándibei:

—Niráü, ferudunawaali bifigoun.

6 Ñéinñanu hádangiñe arufudahatiña lilurudun Moisesi ha ñúnbaña ñein, aba hasaminarun: 7 «Ka san uagu ladimureha ítara? Lanabaguñeinga le Bungiu, ladüga úati ni aban gayaraati feruduna lan figóu luéidigia Bungiu». 8 Subudi lumutiti Hesusu le hasaminarubei, aba lariñagun houn:

—Ka san uagu hasaminara ítara? 9 Káteitima san ménrengubei lariñawagún lun sánditi le: "Ferudunawaali bifigoun", o lariñawagún lun: "Saraba, budaboun bubarari, beiba?" 10 Narufudaaliti hun luagu gabafu nan, au le Wügüri Garaüwarügüti lun feruduna nan figóu.

Aba lariñagun lun sánditi:

11 —Saraba, budaboun bubarari, beiba búbiñoun.

12 Aba lásaarun sánditi lidan oura ligía, aba labudunu lubarari, aba láfuridun ñéingiñe, aríagu sun ha ñéinbaña lun. Wéiritu hanigi ha ñéinbaña lau katei le, aba híchugun uéiriguni lun Bungiu, ariñageina:

—Marihinñahágidiwa katei ítara buriti kei le!

13 Ñéingiñe, ábaya lidin Hesusu larun duna; dan le hayarafadunbei saragu gürigia lubadun, aba larufudahan houn. 14 Lásurun larufudahan houn, aba lasigiruni léibugun; aba larihini Lewí, le liráü Alüféu, ñun liña le ñein lubéi laguburahóua liseinsuna gumadi. Aba lariñagun lun:

—Falabana.

Aba lásaarun Lewí, aba lafalaruni.

15 Lárigiñeti, ñeinñein Hesusu eiga lúbiñe Lewí; ñéinñanu gíñeti saragu aguburahatiña liseinsuna gumadi, hama amu gafigountiña ñun luagu dábula úara luma, hama lani disipulugu, ladüga saragu haña afalaruti. 16 Dan le harihinbalin arufudahatiña lilurudun Moisesi, ha fariséugu ka lan uma leiga, aba hariñagun houn lani disipulugu:

—Ida liña san léiginbei humaisturun hama aguburahatiña liseinsuna gumadi luma hama gafigountiña?

17 Dan le laganbunbalin Hesusu katei le, aba lariñagun:

—Ha masandibaña memegeiruntiña surusia; ha sándibaña, hagía mégeibaña surusia. Mama lubeiti niábiña áluaha gürigia richaguatiña, niábiña áluahaña ha gafigounbaña.

18 Luagu aban weyu, dan le hayunarun lánigu Huan hama fariséugu lun hagunfulirun luma Bungiu, aba hayabin fiu gürigia álügüdei Hesusu, hariñaga lun:

—Ka san uagu hayunara lánigu Huan hama fariséugu lun hagunfulirun luma Bungiu, ánhaña bani disipulugu mayunaruntiña?

19 Aba lóunabun Hesusu:

—Gayaraati funagia hayunarun amisurahóutiña lidoun aban maríei dan le anihein lan adari ñein hama? Anhein anihein lubéi adari ñein, siñati hayunarun, lunti heigin. 20 Lachülürüba dan lun lanügǘniwa adari hámagiñe; ligíameti hadaani lun hayunarun.

21 «Máfadahountu daüguaü binaduharu tau gamisa iseri, ladüga lememe tife gamisa to iserigiru taheiridaguboun to binaduharuboun danme le tadiñuragun, laweiridatimabati héiriti. 22 Meserúnwatu giñe diwéin to iserigiru lidoun aban agei gueru le binaduhali ladüga tabouchagubei diwéin iseri gueru binadu danme le tiñurun. Féridimeti diwéin, féridi gueru. Ligía lubeiti lunti teserúniwa diwéin iseri lidoun gueru iseri».

23 Luagu aban luéyuri emeraaguni, éibugeina liña Hesusu hau lani disipulugu labadinagua nadü, aba hátühan lani disipulugu türigu dan le hásügürün. 24 Aba hariñagun fariséugu lun Hesusu:

—Arihabá houn bánigu! Ka san uagu hadüga wadagimanu le moun lumuti ladügǘniwa lidan luéyuri emeraaguni?

25 Aba lariñagun houn:

—Maliihangidün luagu le meha ladügübei Dawidi luagu aban dan, dan le lalamachunbei, ligía hau sun líbirigu? 26 Aba lebelurun lúbiñoun Bungiu dan le Abiatárü lan fádiribei le íñutimabei, aba léiginu fein to sagüráuboun, to máhawaboun héiginu amu gürigia haweidigia fádirigu según lilurudun Moisesi; ani ru ligía houn gürigia ha lúmabaña.

27 Aba giñe lariñagun Hesusu houn:

—Lun wügüri ladügǘwa luéyuri emeraaguni, mama wügüri adügǘbei lun weyu ligía. 28 Ligía gabafutina giñe, au le Wügüri Garaüwarügüti luagu luéyuri emeraaguni.