1 Aba lidin Hesusu ñéingiñe, aba lagiribudun lageiroun; aba houdin lani disipulugu luma. 2 Dan lachülürünbei luéyuri emeraaguni, aba larufudahan tidan haligilisin huríu; saraguhaña gürigia aganbei, aba taweiridun hanigi lau larufudahan, aba hariñagun:

—Halía funa san lafurendeirei gürigia le sun le? Ka san luwuyeri lichú aau le luágubei? Ida liña san gayara lubéi ladaagun milaguru? 3 Sarafangeiga le tiráü María le, líbugaña Santiagu, Hosé, Húdasi luma Simón; ani wámañanu giñe lítunu.

Aba híchugun mabahüdǘni luagu. 4 Aba lariñagun Hesusu houn:

—Gúndaatiña sun gürigia lau aban profeta, mámarügaali ligía lídangiñeti hageira o haduhe lan o tílana lan haban.

5 Ligía lásiñarunbei ladügün amu milaguru ñein luéidigia líchugun lúhabu hawagu bianraü sánditiña, aba lareidaguagüdüniña. 6 Wéirituti lanigi lau mafiñen hamá.

Lárigiñe, aba léibuguni lirahüñü fulasu, arufudaheina.

7 Aba lóunahan hawagu duusu lani disipulugu lun lagumeserun óunahaña bián bián; aba líchugun ubafu houn lun gayara lan hasagahan sífirigu wuribatiña. 8 Ruti dimurei houn lun manügün hamá ni kata luagu héibugun luéidigia badun; moun lumuti giñe hanügün ni fein, ni sagü, ni seinsu, 9 lun geidi tan hasabadun, lun mabiaman tan hasimisin. 10 Ariñagati giñe houn:

—Danme le hebelurun tidoun aban muna apusaraha, redei humá ñein tídanmeme muna tuguya darí háfuridun lídangiñe fulasu ligía. 11 Ánhaünti meresibirúniwa lidan aban fulasu, maha hagía haganbunün, furí humá ñéingiñe, ábame háfuruduni kaliki luéigiñe hugudi, liseininme magundani hau lílana fulasu ligía, ígira humaña kei hadariragun houngua. Ninarün hau luagu danme lan lachülürün luéyuri Bungiu lun laguseragüdüniña sun gürigia, maweirinbei habeichúniwa Sodomana hama Gomorana kei lílana fulasu le meresibirunbalün.

12 Ábati háfuridun, aba hapurichihan houn gürigia luagu lunti lan hasansiruni ligaburi hóuserun. 13 Sagatiña giñe saragu sífirigu wuribatiña hawéi gürigia, hurugua hagía garaba hawagu saragu sánditiña, aba hareidaguagüdüniña.

14 Keiti aganbahóuaali lubéi luagu Hesusu lidan sun fulasu, aba giñe lachülürün larigeirugun urúei Erodesi. Saragu haña ariñagutiña: «Saraya Huan le abadiseihabei lídangiñe óunweni, ligía luéirinbei lubafu».

15 Híbiri ariñaga: «Elíasi le meha profeta le».

Híbiri ariñaga: «Aban profeta kei ha binadu».

16 Dan le laganbunbalin Erodesi sun le, aba lariñagun:

—Huan le meha nadürüragüdübei ichügü le, saraya lídangiñe óunweni.

17 Le meha asuseredubei, óunahaali meha Erodesi adaürei Huan, aba lagüraguni lau güringüri furisunrugu tadüga Erodíasi. Würi tuguya, lani meha Felipe, le lamulen Erodesi, weiriou; aba lanügünu Erodesi lúmarime. 18 Aba meha lariñagun Huan lun Erodesi: «Moun lumuti bagamaridunu lúmari bamulen».

19 Aba layereegudun Huan tun Erodíasi, aba tabusenrun táfaruni hilagubei; 20 gama lumoun siñá tumuti ladüga hanufudeti meha Erodesi luéi, ladüga aban lan wügüri richaguati ani sánduti Huan, ábatiha lóunigiruni. Lau sun dan lan laganbuni Erodesi le lariñagubei Huan aba lerederun ibidiñounga lun kaba lan ladüga, aganba lumuti lau ugundani. 21 Aba tadariruni Erodíasi tichansin dan le lagunfulirunbei Erodesi irumu, aba ladügün fedu houn gumadimatiña hama hábutigu súdaragu hama amu burí gürigia wéirigutiña ha Galiléabaña. 22 Aba tebelurun tiráü Erodíasi ñein lubéi fedu le, aba tabinahan; gúndaatiti Erodesi hama sun ha ñéinbaña eiga luma lau tabinahan irahü to, aba lariñagun tun:

—Amuriahabéi le babusenrun numa, níchugubei bun.

23 Ru lumuti lererun tun luagu líchugubei lan furumiñeguarügü katei le tamuriahan luma tun, íbini lan tamuriahaní lamidan larúeihan. 24 Aba táfuridun, aba tariñagun tun túguchu:

—Kaba san namuriaha luma?

Aba tariñagun tun:

—Amuriahabéi lichügü Huan le abadiseihabei luma.

25 Aba tebelurun irahü to furese le ñeinhin lubéi urúei, aba tariñagun lun:

—Busentina lun bíchuguni lichügü Huan le abadiseihabei nun lidan aban asiedu guenlé guenlé.

26 Aba lírudagun urúei saragu; gama lumoun kei ru laali lubéi lererun ani aganbagu haña amisurahóutiña lun, máhati lun michu lubéi lan le tamuriahabei luma tun. 27 Furese furese, aba lóunahan urúei aban súdara lau dimurei lun lanügüni lichügü Huan lun. 28 Aba lidin súdara ligía furisunrugu, aba ladürürüni lichügü Huan, aba lanügüni lidan aban asiedu. Aba líchuguni tun irahü tuguya, aba tíchuguni tun túguchu.

29 Dan le haganbunbalin lánigu Huan, aba hayabin lun hanügüni lúgubu, aba hábununi.

Ítara liña lounwen Huan

30 Lárigiñe hagiribudun lani Hesusu apostolugu lídangiñe hapurichihan, aba hóundaragun luma, aba habahüdaguni sun le hadügübei luma le harufudahabei, lun. 31 Aba lariñagun Hesusu houn:

—Higougu, keimoun wemeraagua lidan aban fulasu le darangilati.

Lariñagunbalin lira ladüga ñéinñanu lan saragu gürigia, híbiri ñüdün, híbiri ñübuin, darí lun madaani lan Hesusu hama lani disipulugu ni lun heigin. 32 Aba lubeiti houdin tidan aban ugunei lidoun aban fulasu mageirawati. 33 Gama lumoun saragu haña hádangiñe ha arihibalin houdin asubudirútiña, ábati hayabingua lídangiñe sun lirahüñü fulasu éibugeina, aba hachülürün lubaragiñe lachülürün Hesusu hau lani disipulugu. 34 Dan le lararirunbei Hesusu tídangiñe ugunei, aba larihin luagu hagurabahañein lan saragu gürigia, aba hagudemedagun lun ladüga ítara haña lan kei mudún ha móuniritiña. Aba lagumeserun arufudaha saragu katei houn. 35 Dan le tárühali, aba hayabin lani disipulugu, aba hariñagun lun:

—Tárühalitia ani úatiña aganóutiña lidan fulasu le. 36 Óunahabaña gürigia ha lun houdin lidoun burí lirahüñü fulasu le yarafabei lun hagañeihan fein, ladüga úati ni kata ya lun heigin.

37 Aba lariñagun Hesusu:

—Ru humá éigini houn.

Aba hariñagun lun:

—Gayaraati funagia woudin agañeiha fein houn? Busenwati hamuga lebegi bián-san weyu wadagimanu lun tagañeihóun fein houn súngubei.

38 Lariñaga Hesusu houn:

—Átiriñoungia fein huma? Heiba arihoun.

Dan le harihinbarun, aba hariñagun lun:

—Seingü fein hama bián úduraü.

39 Aba lañuuragüdüniña gürigia sagadirugu. 40 Aba hañuurun san san luma dimí dimí-san, keisi lariñagun houn. 41 Aba lanügünu Hesusu seingü fein to lúhaburugu hama bián úduraü ha, aba larihin sielun, aba leteingiruni Bungiu tuagu, aba lagubachagunu; lárigiñe, aba lamurusuhanu lun líchugunu houn lani disipulugu lun hafanreinhanu hadan gürigia hagía; fánreingua hamaña giñe bián úduraü hagía hadan súngubei. 42 Hóutiña sun hagía kimule. 43 Lárigiñe, aba habuinchagüdün duusu faniñe lau tife fein luma úduraü ígiraguti. 44 Séingüñanu-milu wügüriña éigitiña, bóugudin hawéi würiña hama irahüñü.

45 Aba ládinagüdüniña Hesusu lani disipulugu tidoun ugunei lun hánhiñuragun lubá lun hachülürün Betüsáida, sun anihán lan ayouragua houn gürigia. 46 Dan le ñǘdünhaña, aba lidin luagun wübü afurieida lun Bungiu. 47 Dan le laguñeedunbei, lamidanharu duna ugunei hau disipulugu, Hesusurügaali buga lábugua múarugu. 48 Aba larihin luagu hénrenguhaali lan houn lun hénheunhan ladüga habarounñein lan garabali. Lubá larugan, aba lidin Hesusu hawagun éibugeina ligibuagu duna, lásügüra yebe hau. 49 Dan le harihinbalin éibuga ligibuagu duna, aba haritagun luagu ufiaü lan; aba hagúaragun, 50 ladüga sun hagía ariha hamuti, aba hanufudedagun. Aba ladimurehan houn, aba lariñagun:

—Ganigi humá! Manufudeda humá, au le!

51 Aba ládinun tidoun ugunei hamoun, aba lagalumarun garabali. Aba taweiridun hanigi lau, 52 ladüga úagili lan gunfuranda hamani milaguru le ladügübei tau fein, luagu gabafu lan lun sun katei; deregiru hanigi.

53 Aba hánhiñuraguni duna, aba hachülürün Henesarétün, aba hagüürünu ugunei laru duna. 54 Kei le aubei harariragun tídangiñe ugunei, ítara hasubudiruni lílana fulasu luagu Hesusu lan. 55 Aba héibaagun lidoun sun fulasu ariñaga luagu chülühali lan, aba hagumeserun gürigia anaaha sánditiña tidan habarari le ñeinhin lubéi haganba luagu anihein lan Hesusu ñein. 56 Sunti fulasu ñeinhin lumuti lebelura, uburugu yebe, lirahüñü yebe fulasu, áraabu yebe, aba híchaahoun sánditiña ǘmada, aba hamuriahan luma lun lígiruniña lúnrügü haguurun sánditiña hagía luagu taru ladaüragun. Sunti ha aguurubaña luagu, areidaguátiña.