1 Aba hachülürün loubafurugun lagunu lidoun fulasu le gíribei Gadara. 2 Lárigiñerügü láfuridun Hesusu tídangiñe ugunei, aba liabin aban gürigia gawaguti aban sífiri wuribati luagun, gürigia ligía gabusandugiñe láfurida, 3 ladüga ñein lan laganóua ani úati ni aban gayaraati lagüraguni, ni lau güringüri. 4 Lau sun güraguañaha hamaali lan lugudi luma lúhabu lau güringüri, súnwandan látumuraguni; úati ni aban gayaraati lagalumaruni. 5 Súnwandanha léibugun áriebu wéyuagu agúaraheina luagu burí wübü luma burí gabusandu íbaagueina ligía lungua lau dübü. 6 Dan le larihinbalin gürigia ligía Hesusu dísegiñe, aba léibaagun lubaroun, aba láhuduragun ligibugiñe, 7 aba lagúaragun lun:

—Ka san uagu bemetera numoun, Hesusu Liráü Bungiu le Íñutimabei? Ayumuraguatina bun luagu liri Bungiu lun masufuriragüdün bánina.

8 Lariñagunbei ítara ladüga gumeseeli lan Hesusu ariñaga lun:

—Sífiri wuribati, ígirabei gürigia le!

9 Aba lálügüdüni Hesusu:

—Ka biri?

Aba lóunabun, lariñaga:

—Lehión niña ladüga gíbetiwa.

10 Aba hayumuragun sífirigu hagía lun Hesusu lun móunahan lániña bóugudin luéi fulasu ligía. 11 Keiti ñéinñanu lubéi saragu buíruhu eiga ñein luagu wübü, 12 aba hayumuragun sífirigu wuribatiña hagía lun, hariñaga lun:

—Óunahabawa hadoun buíruhu hara; ruba üma woun lun webelurun hadoun.

13 Ábati líchugun Hesusu üma houn, aba háfuridun luéi gürigia ligía, aba hebelurun hadoun buíruhu. Ñéinñanu hawara bián-milu buíruhu. Aba háguragun buíruhu hagía houngua luéigiñe wübü, aba hábürühan baranahoun, aba hañaradagun.

14 Ábati hanufudedagun ha óunigirubaliña buíruhu hagía, aba héibaagun abahüdaguei le asuseredubei uburugu luma áraabu. Aba hayabingua gürigia arihei ka lan asuseredubei. 15 Dan le hachülürünbei le ñein lubéi Hesusu, aba harihini gürigia le meha gawagubei sífirigu wuribatiña ñun liña, tauñein giñe ladaüragun, areidaguaali; aba hanufudedagun. 16 Hati arihubalin, aba habahüdaguni le asuseredubei lun gürigia le buga gawagubei sífirigu wuribatiña luma hawaguti buíruhu, houn. 17 Ábati hayumuragun lun Hesusu lun láfuridun lídangiñe hageira.

18 Dan le ládinunbei Hesusu tidoun ugunei, aba layumuragun wügüri le bugaha gawagubei sífirigu wuribatiña lun lun lidin luma; 19 máhati Hesusu, ariñagarügüti lun:

—Beiba búbiñoun hamoun biduheñu, ábame babahüdaguni sun le ladügübei Babureme Bungiu buagu lau lugudemehabu bun.

20 Aba lidin, aba lagumeserun abahüdaguei sun le ladügübei Hesusu luagu lidan sun fulasu Dekapolisi; aba taweiridun hanigi súngubei.

21 Dan le lagiribudunbei Hesusu tidan ugunei loubafurugun duna, aba hayabingua bürübünu gürigia le ñeinhin lubéi, aba lerederun ñein laru duna. 22 Ábati liabin aban hádangiñe tábuti haligilisin huríu, gíriti Hairu. Dan le larihinbalin wügüri le Hesusu, aba láhuduragun lubadu lugudi, 23 aba layumuragun lun, lariñaga:

—Anuhein niráü tounwe; keimoun bíchigei búhabu tuagu, areidagua táamuga ani gabagari tuguyame.

24 Aba lidin Hesusu luma, saraguhaña gürigia afalarutiña; aba buriti hámurudaguni Hesusu. 25 Hádanti saragu gürigia ha, ñeinñoun aban würi sánditu, duusu irumu tau lau lésehan hitaü tídangiñe. 26 Súfuriharu saragu hámagiñe surusiagu ani wesi taali sun le túmati, mareidaguntu, gánwoungueinarügü ligía tisandi. 27 Aba taganbun ladimurehóun luagu Hesusu, aba tiabin lanagangiñe hadan saragu gürigia, aba taguurunu ladaüragun, 28 ladüga tariñagun túnguarügü: «Láurügüme naguurunu ladaüragun nareidaguba». 29 Lidan oura ligía, aba lerederun lésehan hitaü tuéi, aba tasandiragun tungua luagu areidaguaaru lan. 30 Ábati lasandiruni Hesusu luagu areidaguagüdaali lan gürigia lau lubafu, aba lagararaagun hawagun gürigia ha lanagangiñebaña, aba lálügüdahan, lariñaga:

—Ka aguurubei tuagu nadaüragun?

31 Aba hariñagun lani disipulugu lun:

—Aríagubiñatia lun hiibe gürigia ya luagu murugu haña lan, álügüdahagidibu ka lan aguurubei buagu?

32 Aba laríagun Hesusu geyegua lau áluaha ka lan aguurubei luagu. 33 Aba tiabin würi tuguya adadagareina lau anufudei, subudiñutéi le asuseredubei tun; aba táhuduragun ligibugiñe, aba tariñaguni sun inarüni lun. 34 Aba lariñagun Hesusu tun:

—Niráü, areidaguaadibu ladüga bafiñen. Beiba lau darangilaü, areidaguñu lídangiñe bisandi.

35 Ñéingili Hesusu adimureha, ligía hayabin lúbiñegiñe wügüri le buga ñǘdünbei ougei luagu tisandi liráü, aba hariñagun lun túguchi irahü tuguya:

—Hilatia biráü, ígiragubeibei Máisturu lungua guentó.

36 Aganba lumuti Hesusu le hariñagubei, aba lariñagun lun wügüri ligía:

—Manufudedabá, afiñerügübá.

37 Máhatiti houdin amu luma luéidigia Féduru, Santiagu luma Huan le lamulen Santiagu. 38 Dan le lachülürünbei lúbiñoun wügüri ligía, aba larihini chagaguaü hama gürigia ha ayahubaña, agúaraha. 39 Aba lebelurun, aba lariñagun houn:

—Ka san uagu hareincha, ayahuaha burí huguya ítara? Móunwentutia irahü to, tarumugarügüña.

40 Aba héherahan lau. Ábati láfuridagüdüniña Hesusu súngubei ñéingiñe, aba lanügüni túguchi irahü tuma túguchu hama ha ñǘdünbaña luma, aba lebelurun le ñeinhin tubéi irahü. 41 Aba lárügüdüni túhabu, aba lariñagun tun:

—Talita kumi (mini lan lira: Niráü, bun nariñaga, saraba).

42 Lidan oura ligía, aba tásaarun irahü tuguya, aba téibugun. Wéiriaraüharu, duusu irumu tau. Aba taweiridun hanigi gürigia ha ñéinbaña. 43 Aba líchugun Hesusu dimurei héreti houn lun mabahüdagun hamani ni ka un, aba giñe lariñagun houn lun híchugun éigini tun.