1 Dan le lásurunbei lariñaguni Hesusu le lunbei hadügüni lani disipulugu, aba lidin ñéingiñe lun larufudahan, apurichiha ligíame lidan burí fulasu geyegua lau uburugu le Kafarünaumu.

2 Dan ligía, furisunruguñein Huan; aba laganbun luagu sun le ladügübei Kristu. 3 Aba lóunahan bián hádangiñe lani disipulugu arihei Hesusu lun hálügüdüni ítara:

—Buguya san Krístubei le lunbei liabin odi lunti wagurabahan amu?

4 Aba lariñagun Hesusu houn: "Heiba hariñageime le harihubei luma le haganbubei lun Huan. 5 Habahüdaguáme lun luagu arihaaña lan ha meha marihinbaña, éibuga ha meha méibugunbaña, areidagua hagía ha meha gawagubaña lépüra, aganba ha meha maganbunbaña, sará hagía hilaaña, apurichihóua uganu buiti le lánina asalbaruni houn gudemetiña. 6 Ani fuleseiwati le madariti lébuna achugeraguni nidan!"

7 Dan le hóudinbei, aba lagumeserun Hesusu adimureha houn gürigia luagu Huan, aba lariñagun:

—Ka san hídinbei meha ariha lidan fulasu mageirawati? Aban wügüri le mederaguagüdünti laritagun keisi aban maburu le lánhingichun garabali? 8 Anhein mama lubéi liña, kati hídinbei ariha? Aban wügüri wéndetu ladaüragun? Subuseti hun luagu ha lan wéndebaña adaüragun, tídanñanu lan haban urúeigu. 9 Káteiti hídinbei ariha? Aban profeta? Anha, ligía, ani aban wügüri wéiriguti sügǘ lau aban profeta Huan. 10 Ladüga ligía uágubei tariñaga Lererun Bungiu:

"Nóunahañein nóunagüle bubaragiñe,

lun laransehani üma bubá".

11 Ninarün hau, hadan sun gürigia, úagili ni aban wéiriguti luéi Huan le abadiseihabei; lau sun lira, le ǘnabutimabei lidan arúeihani le siélubei wéirigutimati luéi.

12 Lúmagiñe dan le liábinbei Huan le abadiseihabei darí lumoun dan le, lau áfaaguni hebelura gürigia lidoun larúeihan Bungiu ani hárügüñanu hanarimebei áfaagun ebelura lidoun. 13 Darí lumoun lidaani Huan, adimurehatiña meha profetagu luma lilurudun Moisesi luagu larúeihan Bungiu. 14 Ánheinti busén hubéi hafiñerun, Huan ligía profeta Elíasi le meha lunbei liabin lubaragiñe liabin arúeihani ligía. 15 Ha garigeirugubaña lun haganbun, aganba hamá.

16 «Kaba san uma núaradaguagüdaña gürigia ha lánina dan le? Magundantiña ni ka au; ítara haña kei irahüñü ha añuurubaña adibiriha párükerugu, aba hagúarahan houn híbirigu ítara: 17 "Íñaahatiwa fidu hun, mabinahantün; eremuha wagía uremu híruti hun, mayahuntün". 18 Ladüga liabin Huan meigin liña buidu kei leigin furumiñeguarügü, matun, aba hariñagun luagu anihein lan sífiri wuribati lidan. 19 Lárigiñe, aba niabin, au le Wügüri Garaüwarügüti; hou au kei leigin furumiñeguarügü, gurá, aba hariñagun luagu géigadi nan, gátadi, hamada lan au gafigountiña hama aguburahatiña liseinsuna gumadi. Weli, ha chúbaña au, subudi hamuti luagu buidu lan le ladügübei Bungiu lau lichú lau».

20 Ábati lagumeserun Hesusu adeinha houn gürigia lidan fulasu burí le ñein lubéi meha ladügei liibe-agei lani milaguru, ladüga masansirun hamagili lan hóuserun. Aba lariñagun:

21 «Fugiabu huguya Korasínna! Fugiabu huguya Betüsáidana! Lun hamuga lidan lan uburugu le gíribei Tiru luma Sidón ladügǘwa milaguru burí le adügǘbei haganagua, binarü hamuga lasansiragua hagaburi lílana, aba hamuga harufuduni lau hadaüragun daüguaü súsutu luma híchaagun baligi hábulugu. 22 Nariñahare hun luagu danme lan lachülürün luéyuri aguseruni, wéiritimabei habeichún sügǘ hau ha Tíruna hama ha Sidonna. 23 Buguyati uburugu le Kafarünaumu, haritaguatibu luagu wéirigubadibu lan keisi sielu? Maweirigúnbadibu ítara kei maweirigun lan máfiougati. Ladüga lun hamuga lidan lan uburugu Sodoma ladügǘwa milaguru le adügǘbei bidan, aniheingua hamuga fulasu ligía lumoun dan le. 24 Nariñahare hun luagu lidan lanme luéyuri aguseruni, wéiritimabei habeichún sügǘ hau Sodomana».

25 Lidan dan ligía, aba lariñagun Hesusu lun Bungiu: «Adimurehatina buiti buagu, Núguchi le Laburemebei sielu luma ubóu, ladüga baramuduni burí katei le hawéi chu tau hama gunfurandatiña, aba barufuduni houn ha mafurendeirungiñabaña keisi irahüñü. 26 Anha, Núguchi, ladüga ítara liña lan babusenruni».

27 «Derege laali Núguchi sun katei nun. Ibidiñeti Bungiu Irahü ni ka un buidu buidu luéidigia lun Bungiu Úguchili; ibidiñeti giñe Bungiu Úguchili ni ka un buidu buidu luéidigia lun Bungiu Irahü hama ha únbaña labusenra Bungiu Irahü lasubudiragüdüni. 28 Higougu numoun, sun huguya ha buchaañabaña uagu lárigi huádigimari luma lihürü hanügün, emeraaguagüda náamugaün. 29 Resibi huméi narufudahan, furendei huguyame númagiñe; lau gaguraasun nan, ñulú tuguya nanigi, ábame hadarirun emeraaguni tun huani. 30 Ménrengunti lun heseriwidun nun, huáliti giñe anügüni le níchugubei hun lun hanügüni».