1 Ábaya lagumeserun Hesusu adimureha houn lau hénpulu, aba lariñagun houn:

2 —Anihánya aban hénpulu luáguti arúeihani le lánina sielu: Ñeinñein aban urúei adügüti aban fedu lubá lamarieidun lisaani. 3 Aba lóunahaniña lumusuniña óugaña amisurahóutiña, máhatiña amisurahóutiña hayabin. 4 Ábaya lóunahan amu musu, aba lariñagun houn: "Ariñaga humá houn amisurahóutiña luagu aranseli lan éigini. Áfaragüda naaña bágasu hama nilügüniña animaalugu dibunetiña, aranseli sun katei; lun hayabin maríeirugun". 5 Madügüntiña amisurahóutiña gasu. Aba lidin aban hádangiñe licharirugu, ñüdün aban adüga amu wadagimanu, 6 ha híbiri, aba hárügüdüniña lumusuniña urúei, aba hóuseruniña wuriba, aba háfaraguniña hilagubei. 7 Ábati lagañidun urúei saragu, aba lóunahaniña lisudaranigu áfaraguaña gáfarahatiña hagía hilagubei luma águdei hageira. 8 Aba lariñagun houn lumusuniña: "Aranseli sun katei lun maríei, ani amisurahóutiña hagüra madünamatiña lun hamisurahóuniwa. 9 Heiba lubeiti luagu burí larigei üma, ábame hamisurahaniña sun ha úmatiña hadunragua". 10 Aba houdin musu ǘmadarugu, aba hóundaruniña sun ha úmabaña hadunragua, buítiña hama wuribatiña, aba tabuinchun muna hau gürigia.

11 «Ábati lebelurun urúei arihaña amisurahóutiña, aba larihin aban wügüri le masansiragunti kei lubá aban maríei ñein. 12 Aba lariñagun lun: "Numada, ida liñagia bebelurunbei ñahoun masansiragunga kei lubá aban maríei?" Maní ligía. 13 Aba lariñagun urúei houn ha etenirubaña lun burí dábula: "Güragua huméi lugudi luma lúhabu, fui huméi lidoun luburiga le bóugudibei, le ñeinba lubéi layahuaha, akünrinhame lari". 14 Aba lariñagun Hesusu houn ha aganbubalin: Gíbetiña aguarútiña lun hebelurun lidoun larúeihan Bungiu, gama lumoun míbetiña anuadirútiña».

15 Aba houdin fariséugu, aba húaradun ariha kaba lan gayara lan hadügün lun hariñagagüdüni Hesusu katei le uáguti gayara lan hadarirun lidurun. 16 Ábati hóunahan hádangiñe hánigu úara hama hádangiñe lánigu Erodesi, ariñaga lun Hesusu:

—Máisturu, subudi wamuti luagu inarüni lan bariñagubei, luagu giñe arufuda bani lémeri Bungiu lau inarüni, manufudeuga ni ka uéi, ladüga ni kata lan luéirigun gürigia bun. 17 Rubei lubeiti baritagun woun: Buiti san lun lafayeirúniwa seinsu lun urúei Rómana odi mabuidunti?

18 Aríagu liña Hesusu lun luriban haritagun, aba lariñagun houn:

—Biangua tigibu huguya le Ka uagu híchaaha sádara nubá? 19 Arufuda huméi seinsu le aubei lafayeihóua liseinsuna gumadi nun.

Aba hanügün aban gáwanaü lun. 20 Dan larihinbalin, aba lálügüdüniña:

—Ka iyawa le luágubei seinsu le, luma iri le bürüwañubei luagu?

21 Aba hariñagun lun:

—Liyawa luma liri urúei Rómana.

Ábati lariñagun Hesusu houn:

—Ru humeiti lani urúei lun urúei, ru humeime lani Bungiu lun Bungiu.

22 Dan haganbunbalin le, aba taweiridun hanigi, aba hígiruni, aba houdin.

23 Weyuméme ligía, aba houdin fiu saduséugu arihei Hesusu. Hariñahare saduséugu luagu ua lan ásaaruni lídangiñe óunweni. Ábati hariñagun lun Hesusu:

24 —Máisturu, ariñagati meha Moisesi luagu anhein lan ounwe aban wügüri le maríeiti masaaniguga tau lúmari, lunti lan lamarieidun lamulen tuma würi to ueiboun lounwe, lun gadügawagun lan íbugañaü le hilaalibei. 25 Weli, ñéinñanu méhati sedü gamulenuguátiña ya wadan; aba lamarieidun le furumiñeti, aba lounwen. Kei masaanigu lubéi tau lúmari, aba lígirunu lun lamulen. 26 Ligiaméme susereti lun habiaman, lárigiñe lun háürüwan darí lumoun hasedün. 27 Lárigiñe, aba giñe tounwen würi. 28 Dánmeti hásaarun lídangiñe óunweni, kábati úmari würi tuguya hádangiñe sedü gamulenuguátiña ha, lárigiñe maríei hamá sun hagía tuma?

29 Aba lariñagun Hesusu houn:

—Bulíeiguatün ladüga libidiñe tuáguti Lererun Bungiu hun, ni luáguti lubafu Bungiu. 30 Danme le hásaarun hilaaña lunya habagaridun, ámuhalime habagari; mamarieidun haba, míchugun hamañame hasaanigu lun maríei, keisi mamarieidun hamá ánheligu sielu. 31 Ánheinti luagu sará hamá hilaaña lunya habagaridun, maliihan humagili san le lariñagubei Bungiu guánarügü hun? Lariñahare: 32 "Au Lubungiutebei Abüraámü, Lubungiute Isaakü, Lubungiute Hakobu". Ítara liña lubeiti, anhein hamuga hilañu haña lubéi wügüriña hagía lun sun dan, mariñagunti hamugati Bungiu luagu Habungiute lan, ladüga mama Habungiute hilaguaaña Bungiu, Habungiute wínwangiña.

33 Dan haganbunbalin gürigia katei le, aba taweiridun hanigi lau le larufudahabei.

34 Dan le hasubudirunbalin fariséugu luagu manigüda laaña lan Hesusu saduséugu, aba hóundaragun; 35 ñeinñein aban hádangiñe le arufudahati lilurudun Moisesi, abusenruti lóuchaguni Hesusu, aba lariñagun lun:

36 —Máisturu, ka san gumadi wéirigutimabei lidan lilurudun Bungiu?

37 Aba lariñagun Hesusu lun:

—Hínsiñela Babureme le Bubungiute bun tau sun banigi, tau sun buani luma lau sun bisaminan. 38 Anihán gumadi wéirigutimabei, furumiñeti giñe lídangiñe sun lugumadin Bungiu. 39 Ani le libiaman lidan uéiriguni lenege le; ítara liña: "Hínsiñe hamá bíbirigu bun kei bínsiñegua bungua". 40 Bián gumadi le, ligía ébuubei lun sun lilurudun Moisesi luma harufudahan profetagu.

41 Sun añaha lan fariséugu óundaragu, 42 aba lariñagun Hesusu houn:

—Ka san haritagubei libügürü Kristu le lanúadirubei Bungiu lun lasalbaruniña gürigia? Ka san adügawagun?

Aba hariñagun lun:

—Ladügawagun Dawidi.

43 Ábati lariñagun Hesusu houn:

—Ida liñati lagúarunbalin Dawidi kei Aburemei, lau lubafu Sífiri Sandu? Ariñagatiga Dawidi:

44 Lariñahare Bungiu lun Nabureme:

«Ñuruba luéigiñe nóunwenren

darí níchuguniña báganiñu lábugiñoun bugudi».

45 Ida lubati ladügawagun lan Dawidi Kristu anhein wa lubalin Dawidi guánarügü Kristu Nabureme?

46 Úati ni aban gayaraati lóunabun ni aban dimurei; lúmagiñeti weyu ligía, manigiti ni aban lun liabin álügüdaguei.