1 Lidan dan ligía, aba laganbun Erodesi, le agumadihabei lidan fulasu le gíribei Galiléa, luagu Hesusu; 2 aba lariñagun houn ha lúmabaña: «Huan le abadiseihabei le; sará hádangiñe hilaaña, ligía gabafu lubéi lun ladaagun milaguru».

3 Le meha susereelibei, daü lumuti meha Erodesi Huan, aba lagüraguágüdüni lau güringüri tuéigiñe Erodíasi to meha lúmari Felipe, le lamulen. 4 Ariñagaali meha Huan lun Erodesi luagu moun lani lagamaridunu lúmari lamulen, gama lumoun madügünti Erodesi gasu lau.

5 Busenti yebeti Erodesi láfaruni Huan hilagubei; gama lumoun madügün lumuti meha ladüga lanufude hawéi gürigia, ladüga sun lan gürigia afiñetiña luagu profeta lan Huan. 6 Danti le efeduhani luagu lagunfulirun Erodesi irumu, aba meha tiabin tiráü Erodíasi, aba tabinahan hagibugiñe amisurahóutiña; leti línsiñe tabinahan lun Erodesi, 7 aba meha lariñagun tun lau fiñún luagu líchugubei lan furumiñeguarügü katei le tamuriahan luma tun. 8 Ábati tariñagun túguchu tun lun tamuriahani lábulugu Huan le abadiseihabei, lun híchuguni tun lidan aban asiedu; aba tamuriahani luma ítara.

9 Aba lírudagun Erodesi luéigiñe katei le; gama lumoun kei ariñaga laali lan lau fiñún, aganba haméi amisurahóutiña, aba lariñagun lun lichugúniwa tun. 10 Ábati lariñagun lun ladürürǘniwa lábulugu Huan furisunrugu; 11 aba hanügüni lidan aban asiedu, aba lichugúniwa tun irahü tuguya, aba tíchuguni tun túguchu.

12 Ábati hayabin lánigu Huan, aba hanügüni lúgubu, aba hábununi; lárigiñe, aba houdin awisarei Hesusu.

13 Dan laganbunbalin Hesusu katei le, aba lidin ñéingiñe háurügü lani disipulugu tidan aban ugunei lidoun aban fulasu mageirawati. Aba hasubudiruni gürigia, aba háfuridun lídangiñe burí aüdü, aba houdin lárigi, eibu. 14 Dan lararirunbei Hesusu tídangiñe ugunei, aba larihin luagu saragu haña lan gürigia hagía; aba hagudemedagun lun, aba lareidaguagüdüniña ha sándibaña hadan. 15 Keiti aguñedeinaali lubéi, aba hariñagun lani Hesusu disipulugu lun:

—Dárühalitia ani úatiña gürigia aganóutiña lidan fulasu le. Óunaha baña gürigia ha, ñüdün hamaamuga lidoun burí lirahüñü fulasu yarafa agañeiha éigini lun heigin.

16 Aba lariñagun Hesusu houn:

—Mídinbaña, ru humá éigini houn.

17 Aba hariñagun lun:

—Séingürügüñoun fein wama ya, hama bián úduraü.

18 Aba lariñagun Hesusu houn:

—Barǘ humóun nun ñahoun.

19 Aba lariñagun houn gürigia lun hañuurun luagu híduru. Aba lanügünu seingü fein hama bián úduraü hagía lúhaburugu; aba larihin sielun, aba leteingiruni Bungiu tuagu. Ábati lagubachagunu fein, aba líchugunu houn lani disipulugu, aba hafanreinhanu hadan gürigia. 20 Sun hagía hóutiña kimule; lárigiñe, aba habuinchagüdün duusu faniñe tau to ígiragutu. 21 Séingüñanu milu wügüriña éigitiña, bóugudin hawéi würiña hama irahüñü.

22 Aba lóunahaniña Hesusu lani disipulugu lubá tidan ugunei tuguya lun hánhiñuragun loubafurugun sun anihán lan óunahaña gürigia águyu. 23 Lásurun lóunahaniña, aba lamudeirun lábugua luagun wübü afurieida lun Bungiu. Dan le laguñeedunbei, ñeinñein Hesusu lábugua, 24 sun anungura tan ugunei lamidan duna. Aba láfarahan lugudi barana tuagu ugunei ladüga tubarounñein lan garabali. 25 Aba liabin Hesusu hawagun lubá larugan, éibugeina ligibuagu duna. 26 Dan harihinbalin lani disipulugu éibugeina ligibuagu duna, aba hanufudedagun, aba hagúaragun lau anufudei:

—Úfiaü!

27 Aba ladimurehan Hesusu houn, aba lariñagun houn:

—Gaguraasun humá; au le, manufudeda humá!

28 Aba lariñagun Féduru lun:

—Nabureme, anhein buguya lubéi, éibugagüda bana giñe ligibuagu duna chülǘ le ñein bubéi.

29 Aba lariñagun Hesusu lun:

—Higabuti.

Aba lararirun Féduru tídangiñe ugunei, aba lagumeserun éibuga le ñeinhin lubéi Hesusu ligibuagu duna. 30 Dan le lasandirunbalin lere garabali aba lanufudedagun, aba lagumeserun abulucha; aba lagúaragun, lariñaga:

—Sefu bana Nabureme!

31 Aba lárügüdüni Hesusu lúhabu, aba lariñagun lun:

—Lóuguati giñe bafiñen! Ka uagu lalouguadúnbei bafiñen?

32 Dan hádinunbei tidoun ugunei, aba lagalumadun garabali. 33 Hati buga tídanbaña ugunei, aba háhuduragun ligibugiñe Hesusu, aba hariñagun:

—Inarüni luagu Liráü ban Bungiu.

34 Aba hánhiñuraguni duna, aba hachülürün Henesarétü. 35 Dan le híchugunbei lílana fulasu fe luagu Hesusu lan, aba haburuchaguagüdüni lidan sun fulasu ligía, aba hanügüniña sun sánditiña le ñeinhin lubéi. 36 Aba hayumuragun lun lun lígirun lúnrügü haguuruni taru ladaüragun; sun ha aguurubarun, areidaguátiña.