1 Lidoun dan ligía, aba liabin Huan le abadiseihabei apurichiha lidan fulasu mageirawati, Hudéa; 2 aba lariñagun lidan lapurichihan: «Asaküriha humá, ladüga yarafaali larúeihan Bungiu!»

3 Huan le, ligía le uágubei meha labürüha profeta Isaíasi ítara:

«Aganbúati lumalali aban gürigia agúaraha lidan fulasu mageirawati ítara:

"Aranse humá üma lubá Wabureme,

dará humá üma suruti lubá" ».

4 Lautu lura kameyu ladaüragun Huan; liabin lagürüga liranaagua, gueru; chagagaru léigibaña luma sírudu le áraabuna. 5 Ábaha hayabin uburugugiñe Herusalén, Hudeagiñe luma lubadugiñe duna Hordán aganbei lapurichihan; 6 dántiha le hagufeseruni hafigoun, aba labadiseiruniña lidan duna le gíribei Hordán.

7 Dan le larihinbei Huan luagu saragu haña lan gürigia lídangiñetiña hadamurin fariséugu hama saduséugu ñǘbuintiña lun habadiseirún, aba lariñagun houn: «Harasan hewe huguya le! Ka awisarubalün lun hanurahan luéi lanarime abeichúni luagu figóu le lunbei liabin? 8 Óusera humá buidu, arihúa láamuga furangu luagu asakürihaadün lan. 9 Masaminaradügü humá hídangua: "Ladügawagun Abüraámü wagía", ladüga nariñahare hun luagu gayara lan ladügün Bungiu ladügawagun Abüraámü lídangiñe dübü le, 10 aranseru harawa lun láchuahoun tídibu wewe, ani sun wewe le mabuidunti lin, cháünwati, aba lagudún. 11 Au, lau duna nabadiseiraün, arufudei luagu asakürihaadün lan; ánheinti le lunbei liabin nárigi, labadiseirubadün lau Sífiri Sandu luma lau watu gemeti. Gabafuti nuéi darí lun madüna nan ni lun nanügünu ligeidin lau. 12 Anuheinharu lichobulin lúhaburugu, larumadagüdübei türigu, ábame lanúadahani lídangiñe sagadi mábeihali. Ábame lareiduni türigu, gudaléime sagadi le mábeihali lidan watu gemeti le méñeguchadibei».

13 Dan le liábinbei Hesusu Galiléagiñe, aba lachülürün luagun duna le gíribei Hordán le ñein lubéi Huan lun labadiseiruni. 14 Máhati yebeti Huan labadiseiruni, aba lariñagun lun Hesusu:

—Au lunbei babadiseirunina; buguya lubéi ñübuin nun lun nabadiseirunibu?

15 Aba lariñagun Hesusu lun:

—Ítara luba guentó, ladüga lunti wadügüni le lubeibei Bungiu.

Aba labadiseirágüdüni Huan Hesusu; 16 lárigiñe labadiseirún Hesusu, aba láfuridun dúnarugugiñe. Sódini aba lánhunrenchagun sielu, aba larihini Hesusu Sífiri Sandu lararirun kamá aban unhun liabin luagun. 17 Aba laganbún lariñagun aban umalali siélugiñe: "Anihán niráü le hínsiñebei nun, le aubei óunwenbu lan nugundan".