1 Luagu aban weyu le emeraaguagülei éibugeina liña Hesusu hama lani disipulugu labadinagua nadü. Aba halamachun lani disipulugu, aba hátühan lílewe türigu, aba héigini lila. 2 Dan le harihinbalin fariséugu katei le, aba hariñagun lun Hesusu:

—Añahatia bani disipulugu adüga wadagimanu le moun lumuti ladügǘn lidan luéyuri emeraaguni.

3 Aba lariñagun houn:

—Maliihangidün san luagu le meha ladügübei Dawidi luagu aban dan, dan le lalamachunbei, ligía hama ha úarabaña luma? 4 Aba lebelurun tidoun luban Bungiu, aba leigin tídangiñe fein to sagüráuboun to moun lubóun yebe léiginu, ni ligía ni ha úarabaña luma; fádirigurügüñanu lun héiginu fein tuguya según lilurudun Moisesi; ani mámati figóu le ladügübei Dawidi ligibugiñe Bungiu. 5 Odi maliihangidün lidan lilurudun Moisesi luagu nadagimein hamá fádirigu tidan luban Bungiu lidan luéyuri emeraaguni ani mama figóu? 6 Nariñahare hun luagu anihein lan aban wéiriguti sügǘ tau luban Bungiu ya. 7 Huguya, úagili gunfuranda humani le lariñagubei Bungiu tidan Lererun: «Himei numuti lun gudemehabu humá sügǘ lau hadagaragüdün animaalugu nun». Lun hamuga gunfuranda humani, madimurehantün hamuga wuribati hawagu gürigia ha madügünbaña ni kata wuribati. 8 Gabafutina giñe, au le Wügüri Garaüwarügüti, lun nariñagun kaba lan gayara ladügǘniwa lidan luéyuri emeraaguni.

9 Aba lidin Hesusu ñéingiñe, aba lebelurun tidoun haligilisin huríu. 10 Ñeinñein aban wügüri hilaali aban lúhabu; keiti busén hamá fariséugu hama arufudahatiña lilurudun Moisesi hadarirun lidurun Hesusu, aba hariñagun lun:

—Gayaraati san lagaranihóun lun aban sánditi lidan weyu le emeraaguagülei?

11 Aba lariñagun Hesusu houn:

—Ka hídangiñe, anhein galügün lubéi aban mudún, aba téiguadun lidoun aban fusu lidan luéyuri emeraaguni, lun mídinbei lan asagaroun? 12 Ma gebegitimati aban wügüri sügǘ tau aban mudún! Gayaraati lubeiti ladügǘn buiti lidan luéyuri emeraaguni.

13 Aba lariñagun lun wügüri ligía:

—Tulebei búhabu.

Dan le látulerunbalin, aba lareidagun kei le aban. 14 Aba háfuridunga fariséugu, aba hagumeserun áluaha ida luba lan háfaruni Hesusu hilagubei.

15 Dan lasubudirunbalin Hesusu katei le, aba lidin ñéingiñe; aba hafalaruni saragu gürigia, aba lareidaguagüdüniña sun sánditiña. 16 Ábaha lariñagun houn lun mariñagun hamani káteiñein lan. 17 Lasuseredunbei lira lun lagunfulirun le meha lariñagubei profeta Isaíasi:

18 «Anihán nubúein le nanúadirubei lun leseriwidun nun,

le hínsiñebei nun, le aubei nagundaara, liña Bungiu.

Níchugubei nani Sífiri luagu,

ábame larufudahan houn néchanigu

ida luba lan gayara lan húaradun nigibugiñe.

19 Mageindagunbei, magúaragun,

mareinchunbei ǘmada.

20 Gudemehabubei houn gürigia ha gudemebaña

keisi aban maburu le baruguaali,

luma houn ha débilibaña lidan hafiñen

keisi aban lanpu le ñegumemeeli.

Ítarameme luba darime adüga laali larúeihan le úaraguabei.

21 Ábame híchuguni néchanigu hemenigin luagu».

22 Ábati lanügǘniwa aban wügüri lun Hesusu, marihin liña, madimurehan, lauñein aban sífiri wuribati. Aba lasagaruni Hesusu sífiri wuribati ligía lídangiñe, aba larihin, adimureha ligía. 23 Aba taweiridun hanigi sun ha ñéinbaña, aba hariñagun: «Anihán funa san ladügawagunbei Dawidi?»

24 Dan le haganbunbalin fariséugu katei le, aba hariñagun: «Wügüri le, lau lubafu Belisebú, le Mafia, le hábuti sífirigu wuribatiña lasagahaña».

25 Kei subudi lubalin Hesusu le haritagubei, aba lariñagun houn: Furumiñeguarügü arúeihani le afanreinraguti lun hageindagun hámagua, lagünrinchaguba; ánhaña giñe afanreinragua lílana aban uburugu o aban lan iduheñu ladüga wuribu, siñabei hadurarun. 26 Ítara liña giñeti, anhein lasagara Mafia mafia líledi, ligía guánarügü afanreinragubei, ani ida lubati ladurarun lubafu ítara? 27 Huguya, ariñagatün luagu lau lan lubafu Belisebú, o Mafia, nasagaha sífirigu wuribatiña; anhein ítara liña lubéi, kati íchugubei ubafu houn ha hánigu lun hasagahaniña, Mafia odi Bungiu? Hagía guánarügü arufuda hamuti luagu bulíeigua humá. 28 Au, lau lubafu lani Bungiu Sífiri nasagaha sífirigu wuribatiña. Arufuda lumuti lira luagu chülühali lan larúeihan Bungiu humoun.

29 Ida lubagia gayara lan lebelurun aban gürigia lúbiñoun aban wügüri héreti lun lanügüni lílagu anhein magüragun lan furumiñe? Ítararügüñein lun gayara lan lanügüni lílagu.

30 Le mámabei númagiñe, náganiñein; le móundaraguagüdünbei numa, chagaguagüdati.

31 Huguya ariñagatün luagu lau lan lubafu Mafia nasagaha sífirigu wuribatiña, ani lau lubafu Sífiri Sandu nasagahaña. Ligía nariñagunbei hun luagu gayara lan ferudunawa lan sun figóu luma sun wuribati le hariñagubei gürigia; anhein lun hadimurehan wuribati luagu Sífiri Sandu, siñabei ferudunawa lan figóu ligía. 32 Furumiñeguarügü giñe le ariñaguti furumiñeguarügü katei wuribati nuagu, au le Wügüri Garaüwarügüti, gayaraati ferudunawa lan; ánheinti le adimurehati wuribati luagu lubafu Sífiri Sandu le nídanbei, úabei ferudunawa lan ni lidan ubóu le, ni lidan le aban.

33 «Anhein buidu lubéi ídibu, buídubei giñe lin; anhein mabuidun lubéi ídibu, mabuidunbei giñe lin. Luagu lin ídibu lasubudirúa ka lan luwuyeribei. 34 Harasan hewe huguya le! Siñati hadimurehan katei buiti; wuribatünga. Katei le buinbei tidan anigi, ligía lariñagubei iyumaü. 35 Gürigia le buídubei, katei buiti lariñagubei ladüga tídanñein lan lanigi ubuiduni; gürigia le wuribabei, katei wuribati lariñagubei ladüga tídanñein lanigi wuribani. 36 Nariñahare hun luagu danme lan lachülürün luéyuri aguseruni, sun gürigia gefenbaña luagu sun dimurei málati le hariñagubei, 37 ladüga luáguba le bariñagubei baguseragüdüwa; ligíaba arufudei anhein gadurun bubéi lumoun madurun ban».

38 Aba hariñagun hádangiñe fariséugu hama arufudahatiña lilurudun Moisesi lun Hesusu:

—Máisturu, busentiwa warihin badügün aban seini arufudei luagu lúmagiñe lan Bungiu biabin.

39 Aba lariñagun Hesusu houn:

—Gürigia wuribatiña ani magunfuliruntiña amuriahatiña seini; gama lumoun michugúnbei amu seini houn luéi le asuseredubei lun profeta Honasi. 40 Ladüga kei lerederun Honasi ǘrüwa weyu ǘrüwa áriebu lurageirugu udu, ítara luba giñe nerederun, au le Wügüri Garaüwarügüti, lidan numuaha ǘrüwa weyu, ǘrüwa áriebu. 41 Ha meha aganóubaña Níniwe hásaaruba lidan luéyuri aguseruni danme haguseragüdüniwa gürigia ha lánina dan le, ábame híchugun hadurun ladüga sánsiguati hagaburi Níniwena dan le lapurichihanbalin Honasi luganute Bungiu houn; ani anahán, aban wéiriguti sügǘ lau Honasi, ani máhatün haganbunina. 42 Tásaaruba giñe lurúeite Suru lidan luéyuri aguseruni danme le haguseragüdüniwa gürigia ha lánina dan le, ábame tíchugun hadurun; ladüga ñǘbuintu lídangiñe lidise-agei ubóu lun taganbuni lichú lau Salomón, ani anahán, aban wéiriguti sügǘ lau Salomón, ani máhatün haganbunina.

43 «Dan le láfuridun aban sífiri wuribati lídangiñe aban gürigia, aba éibugañaha lan lidan fulasu mábeiti áluaha lemeraagun; dan madari lani, aba lariñagun lúnguarügü: 44 "Nagiribuda tidoun nuban to ñéingiñe lubéi náfurida". Dan le lagiribudun, aba ladariruni gürigia buga ligía keisi aban muna to málatu, abuidahóuaaru, aranserúa. 45 Ábati lidin, aba liabin hau sedü sífirigu wuribatimatiña sügǘ lau, aba hebelurun sun hagía aganawa lidan gürigia ligia; wuribatimahaliti le gádanbalin sügǘ lau meha furumiñe. Ítara luba giñeti lasuseredun houn gürigia wuribatiña ha lánina dan le».

46 Ñéingili Hesusu adimureha houn gürigia, ligía tiabin lúguchu hau lamulenu. Aba herederun bóugudi, busentiña yebe hadimurehan luma. 47 Aba lariñawagún lun Hesusu:

—Anuhán búguchu hama bamulenu ya bóugudi, busentiña hadimurehan buma.

48 Aba lariñagun Hesusu lun le awisarubalin:

—Ka núguchuboun, ka namulenubaña?

49 Aba larufudun hawagun lani disipulugu, aba lariñagun:

—Añaha núguchubaña, hagía giñe namulenubaña; 50 ladüga furumiñeguarügü le adügüti lugundan Núguchi le siélubei, ligía namulenbei, nitu, núguchu.