1 Aba lanügüni Sífiri Sandu Hesusu lidoun fulasu mageirawati lun lóuchaguni Mafia.

2 Lárigiñe lerederun Hesusu bián-wein weyu luma bián-wein áriebu méiginga, aba lalamachun. 3 Ábati liabin Mafia lubadun lun lóuchaguni, lariñaga lun:

—Anhein liráü bubéi Bungiu, saliguagüdabéi dübü le feinme.

4 Aba lóunabun Hesusu: Tariñahare Lererun Bungiu: "Mámarügübei tau fein habagarida gürigia; habagariduba giñe lau sun dimurei le lariñagubei Bungiu".

5 Ábati lanügüni Mafia Hesusu Herusaléun, uburugu le sándubei houn huríu, aba lawariragüdüni tábulugun ténpulu, 6 aba lariñagun lun:

—Anhein liráü bubéi Bungiu, chubaba yáagiñe lun ǘnabun, ladüga tariñahare Lererun Bungiu:

"Lariñaguba Bungiu houn lani ánheligu lun hóunigirunibu.

Hanügübadibu háhaburugu lun machugeragun lan bugudi luagu dübü".

7 Aba lóunabuni Hesusu lariñaga lun:

—Ariñagatu giñe Lererun Bungiu: "Móuchaguabei Babureme Bungiu".

8 Aba lanügüni Mafia Hesusu luagun aban wübü íñuti, aba larufuduni sun arúeihani le ubouagubei lun luma burí luéirigun; 9 aba lariñagun lun:

—Níchugubei sun le bun ánhabu áhuduragua nun.

10 Ábati lariñagun Hesusu lun:

—Disebá nuéi, Mafia! Ladüga tariñahare Lererun Bungiu: "Lúnrügüba Babureme Bungiu báhuduragua, lúnrügüba giñe beseriwida".

11 Ábati ladisedun Mafia luéi, aba hayabin ánheligu eseriwidei.

12 Dan le laganbunbei Hesusu luagu anihein lan Huan furisunrugu, aba lidin lárigoun Galiléoun. 13 Meredeti Nasarétü, aba lidin aganawa Kafarünaumu, aban fulasu le lárubei duna lidan hageira rasa ha Sabulón luma Nefütalí. 14 Lasuseredunbei sun le lun lagunfulirun le labürühabei meha Isaíasi, le meha profeta le ariñagubei:

15 «Lageira Sabulón luma Nefütalí,

lidan üma lubadu barana, luéigiñe oubaü le ñéingiñe lubéi laboucha weyu libiti Hordán,

Galiléa le ñein lubéi haganawa ha mámabaña huríu:

16 Huguya ha meha lídanbei luburiga arihaadün aban óunwenbu larugounga;

huguya le meha lídanbei lamuñounga le lánina óunweni,

harugoungagüdawaali hau».

17 Lúmagiñe dan ligía, aba lagumeserun Hesusu apurichiha ñein, lariñaga: «Asaküriha humá, ladüga yarafaali larúeihan Bungiu».

18 Éibugeina liña Hesusu laru laru duna Galiléa, ligía larihin bián gamulenuguátiña; aban hádangiñe, Simón lememe gíribei Féduru, le aban, Andürési. Esenihani habagaribei, háguruñati. 19 Ábati lariñagun Hesusu houn:

—Falá humana, ábame mesenihanhadün lan úduraü, anaaharügaadünme gürigia nun lun nánigume.

20 Furese furese aba hígirunu hasenin, aba houdin luma.

21 Lubaruaguóun mémeraü Hesusu, ábaya larihin bián gamulenuguátiña, Hakobu luma Huan, lirahüñü Sebedéu. Tídanñanu aban ugunei luma háguchi aramadahoun hasenin. Aba lagúarun Hesusu houn lun lánime disipulugu; 22 lidan oura ligía aba hígirunu ugunei, ígira háguchi, aba houdin luma Hesusu.

23 Ábahei léibuguni Hesusu sun Galiléa arufudaheina tidan burí haligilisin huríu to lídanboun kada fulasu. Ábaha lapurichihani uganu buiti luagu larúeihan Bungiu, areidaguagüda ligía sun luwuyeri sandi le hawaguti gürigia. 24 Aba laganbúniwa luagu Hesusu lidan sun Siria, aba hanügüniña sun ha asufurirubaña lau ámuñegueinarügü sandi, igarigu, ha gawagubaña lagübüri sífiri, ha góunwehadibaña, hama ha deregüdaaña úgubu; aba lareidaguagüdüniña.

25 Saragu haña gürigia afalaruti Galiléagiñe, lídangiñe burí fulasu Dekapolina, Herusaléngiñe, lóubawagugiñe Hudéa luma luéigiñe oubaü le ñéingiñe lubéi laboucha weyu libiti Hordán.