1 Dan le lararirunbei Hesusu luéigiñe wübü, saragu haña gürigia afalaruti. 2 Aba liabin aban wügüri gawaguti lépüra, aba láhuduragun ligibugiñe Hesusu, aba lariñagun lun:

—Nabureme, ánhabu busén, gayaraati bareidaguágüdünina.

3 Ábati laguurun Hesusu luagu lau lúhabu, ariñageina ligía:

—Busentina, areidaguabá.

Kei lariñagun ítara, aba lareidagun sánditi ligía. 4 Aba lariñagun Hesusu lun:

—Mariñagabéitia ni ka un, ñǘdünrügüba arufudagua bungua lun fádiri, rubeime idewesei le uágubei lariñaga Moisesi, lun harihini gürigia luagu areidaguaadibu lan.

5 Dan le lebelurunbei Hesusu lidoun fulasu le gíribei Kafarünaumu, aba liabin aban gumadan Rómana lubaroun, 6 aba layumuragun lun ítara:

—Nabureme, anihein nubúein roun lau sandi le deregüdaü, luma saragu gáriti luagu.

7 Aba lariñagun Hesusu lun:

—Néibuga agaraniha lun.

8 Aba lóunabun gumadan:

—Nabureme, madünatina lun bebelurun núbiñoun; ariñagarügübéi dimurei, ábame lareidagun nubúein. 9 Nariñagunbalin lira ladüga au lábugiñeñadina giñe gumadi le íñutimati, ani añahein giñe súdara lábugiñe nagumadihan. Dan le nariñagun lun aban hádangiñe lun lidin, ñǘdünti; dan le nariñagun lun aban lun liabin, ñǘbuinti; dan le nariñagun lun nubúein lun ladügün furumiñeguarügü katei, adüga lumuti.

10 Dan le laganbunbalin Hesusu le lariñagubei gumadan ligía aba taweiridun lanigi, aba lariñagun houn ha afalarubalin:

—Ninarün hau luagu madarigidina lan wügüri weiri tafiñen ni hadan numutuniña Ísüraelina kei wügüri le. 11 Nariñahare hun luagu saraguhaba lan ñǘbuintiña luéigiñe oubaü le ñéingiñe lubéi laboucha weyu, luma luéigiñe oubaü le ñeinhin lubéi lálüda, ábame hañuurun eiga luma Abüraámü, Isaakü luma Hakobu lidan arúeihani le siélubei. 12 Ánheinti ha yebe lúnbaña lidan hamá arúeihani ligía hasagarúba bóugudin, ábame hadarúniwa lidoun lueirin-agei luburiga, ábame hayahuahan, ábame lakünrinhan hari le lueirin hagarigu.

13 Aba lariñagun Hesusu lun gumadan ligía:

—Beiba búbiñoun; ladügǘba le uágubei bafiñera bun.

Aba lareidagun musu ligía lidan oura ligía.

14 Aba lidin Hesusu lúbiñe Féduru, aba ladarirunu límedi Féduru roun lau abiruaü. 15 Aba laguurun luagu túhabu, aba lagidarun abiruaü tuéi; aba tásaarun, aba tagumeserun eseriwidaña.

16 Dan le laguñeedunbei, aba hanügǘn saragu gürigia ha gawagutiña sífirigu wuribatiña lun Hesusu; aba lasagahaniña sífirigu wuribatiña hagía hawéi láurügü aban dimurei, areidaguagüda laña sun ha sándibaña. 17 Lasuseredunbei sun le lun lagunfulirun le meha uágubei ladimureha profeta Isaíasi dan le lariñagunbei luagu Hesusu: «Barǘ lumuti wasandi, gidaléi wagarigu».

18 Dan le larihinbei Hesusu luagu saragu haña lan gürigia geyegu lau, aba líchugun dimurei lun hánhiñuragun loubafurugun duna. 19 Aba layarafadun aban arufudahati lilurudun Moisesi lun Hesusu, aba lariñagun lun:

—Máisturu, busentina nafalarunibu le ñeinhin lumuti bidin.

20 Aba lóunabuni Hesusu, lariñaga lun:

—Daritiña gasigamu huyu lun haganóun ñein, gádibutiña giñe dunuru; ánheinti au le Wügüri Garaüwarügüti, madaritina ni halíaba lan nabalachagüdei nichügü.

21 Lariñaga aban hádangiñe lani disipulugu lun:

—Nabureme, busentina nafalarunibu; lárigiñeme lounwen núguchi, bunanéime, ábame nafalarunibu.

22 Aba lóunabuni Hesusu, lariñaga lun:

—Falabana guentó; ígirabaña hilaguaaña lun hábununiña hegeburi.

23 Aba ládinun Hesusu tidoun ugunei, aba houdin lani disipulugu luma. 24 Sódini aba láfuragun aban garabali héreti, aba lebeluhan lugudi barana tidoun ugunei. Larumuguñati Hesusu. 25 Aba hagagudahani lani disipulugu, aba hariñagun lun:

—Wabureme, sefubáwa! Wadibiragua!

26 Aba lóunabuniña, lariñaga houn:

—Ka san uagu hanufudeda? Lougua tafiñen huguya le!

Aba lásaarun, aba ladeinhan lun garabali luma barana, aba lagalumadun. 27 Aba taweiridun hanigi, aba hariñagun:

—Katei san wügüri le, aganba lubalin garabali luma barana?

28 Dan le lachülürünbei Hesusu loubafurugun duna, hageiroun Gadarana, aba háfuridun bián wügüriña gabusandugiñe, aba hayabin luagun. Biángubei hagía, háuñanu sífirigu wuribatiña ani hanarimetiti hagañi darí lun siñá lan hásügürün gürigia lídangiñe üma ligía. 29 Ábati hagúarahan, hariñaga:

—Ka san uagu bemetera wamoun, Hesusu Liráü Bungiu? Biábiña san asufuriragüdawa lubaragiñe lidaani asufuriruni?

30 Ñéinñanu saragu buíruhu eiga madise ñéingiñe; 31 aba hayumuragun sífirigu wuribatiña hagía lun Hesusu, hariñaga lun:

—Ánhawa basagara, ígiraba lun webelurun hadoun buíruhu ha.

32 Aba lariñagun Hesusu houn:

—Héibati hadoun!

Aba háfuridun sífirigu wuribatiña hagía hádangiñe wügüriña hagía, aba hebelurun hadoun buíruhu; aba háguragun buíruhu hagía houngua luéigiñe aban wübü, aba hábürühan dúnarugun, aba hañaradagun.

33 Aba hanufudedagun ha óunigirubaliña buíruhu, aba héibaagun; dan le hachülürün áüdübu, aba habahüdaguni le asuseredubei houn buíruhu luma houn wügüriña ha buga háubaña sífirigu wuribatiña. 34 Ábati hayabin sun lílana fulasu ligía lumoun Hesusu, aba hayumuragun lun lun láfuridun hageiragiñe.