12 Ihyo lelo mulekaje kutsilechela ndongwa ntsibi tsilongotse mivili jenyu jo jikufwa, kaha mulekaje kutsidichila mbwiniwo tsake. 13 Mulekaje kuchitawula nambe chilungo chimwe cha mivili jenyu chive cha kuditila ndongwa ntsibi. Lechelelo mwitawule henye kwa Mulungu kota vanu wo vatsilipulwe kuhuma mu chifo, lelo sambi mwitawule na kudita kota fyo an’gana Mulungu. 14 Ndongwa ntsibi sitsifuluche tsivatavale henye kahi, kwakuva si munlongotswa na malajitso ga Musa, ila munlongotswa na lusungu lwa Mulungu.

15 Mbe, sambi tulonje chichi? Tudite ndongwa ntsibi, kwasawuli tuna malajitso ga Musa awu kwasawuli tunlongotswa na lusungu lwa Mulungu? Ndaya bee! 16 Mbe, sinambemutsele kuta hila fyo mungitawula kuva vapogotsi va munu na kumuhulikitsa, munkuva va munu uyo? Manyi muve wapogotsi va ndongwa ntsibi hawudugo mukufwa. Manyi mwitawule na kuva vatantsi va kumuhulikitsa Mulungu, mukuva vawuya halutalo hake. 17 Nayivaje hala katali henye mwavaga vapogotsi va ndongwa ntsibi, lechelelo alumbwaje Mulungu kwasawuli sambi mwanuche kwa numbula tsenyu tseka na kugahulikitsa madahitso go mudahitswe. 18 Homwavaga kugombolwa na kuvikwa kutali na ndongwa ntsibi mukavaje vapogotsi vakudita ndongwa tso angutsigana Mulungu.