1 ತ್ಯಾ ರ್‍ಹಾತ್ತಿ ರಾಜಾಕ್ ನಿಜ್ ಯೆವ್ಕ್ ನಾ, ತೆನಿ ಎಕ್ ಸೆವಕಾಕ್ ಬಲ್ವುನ್ ತೆಕಾ ಇತಿಹಾಸಾಚೆ ಪುಸ್ತಕ್ ಹಾನುಕ್ ಅನಿ ವಾಚುಕ್ ಹುಕುಮ್ ದಿಲ್ಯಾನ್, ರಾಜಾಚ್ಯಾ ರಾಜ್ವಡ್ಕಿತ್ ಘಡಲ್ಲೆ ಸಗ್ಳೆ ತ್ಯಾತುರ್ ಲಿವ್ನ್ ಥವಲ್ಲೆ ಹೊತ್ತೆ, ತೆ ವಾಚಿತ್ ರ್‍ಹಾತಾನಾ, 2 ತ್ಯಾತುರ್ ಅಹಶ್ವೆರೊಶ್ ರಾಜಾಕ್ ಜಿವ್ ಕಾಡುಚೆ ಮನುನ್ ರಾಜಾಚ್ಯಾ ಘರಾಚೆ ದಾರ್ ರಾಕ್ತಲ್ಯಾ ಬಿಗೆತಾನ್ ಅನಿ ತೆರೆಶ್ ಮನ್ತಲ್ಯಾ ದೊಗ್ಯಾ ಅಧಿಕಾರಿಯಾನಿ ಭುತ್ತುರ್ಲ್ಯಾ ಭುತ್ತುರ್ ಚಿಂತಲ್ಲೆ ಮೊರ್ದೆಕೈಚ್ಯಾ ವೈನಾ ಕಳಲ್ಲಿ ಸಂಗತಿಯಾ ಲಿವಲ್ಲಿ ಹೊತ್ತಿ. 3 ತನ್ನಾ ರಾಜಾನ್, "ಹೆಚ್ಯಾ ಸಾಟ್ನಿ ಮೊರ್ದೆಕೈಕ್ ಖಲಿ ಮರ್ಯಾದ್ ದಿಲ್ಯಾನಿ?" ಮನುನ್ ಇಚಾರ್‍ಲ್ಯಾನಿ, ತನ್ನಾ ತೆಚ್ಯಾ ಸೆವಕಾನ್, "ತೆಕಾ ಕಾಯ್ಬಿ ದಿವ್ಕ್ ನಾತ್" ಮನುನ್ ಸಾಂಗ್ಲ್ಯಾನ್. 4 ತನ್ನಾ ರಾಜಾನ್, "ಭಾಯ್ಲ್ಯಾ ಭಾಜುಕ್ ಕೊನ್ ಹಾತ್?" ಮನುನ್ ಇಚಾರ್‍ಲ್ಯಾನಿ, ತ್ಯಾ ಎಳಾರ್ ಹಾಮಾನಾನ್ ಅಪ್ನಿ ತಯಾರ್ ಕರಲ್ಲ್ಯಾ ಪಾಶ್ಯಾಚ್ಯಾ ಖಾಂಬ್ಯಾಕ್ ಮೊರ್ದೆಕೈಕ್ ಲೊಂಬಾತ್ ಗಾಲುಕ್ ರಾಜಾಚೆ ಹುಕುಮ್ ಘೆವ್ಚೆ ಮನುನ್ ರಾಜ್ಯಾಚ್ಯಾ ಘರಾಚ್ಯಾ ಭಾಯ್ಲ್ಯಾ ಭಾಜುಕ್ ಇಬೆ ಹೊತ್ತೊ. 5 ತನ್ನಾ ರಾಜಾಚ್ಯಾ ಸೆವಕಾನಿ, ಭಾಯ್ಲ್ಯಾ ಭಾಜುಕ್ ಹಾಮಾನ್ ಯೆವ್ನ್ ಇಬೆ ಹಾಯ್ ಮನುನ್ ಸಾಂಗ್ಲ್ಯಾನಿ, ತನ್ನಾ ರಾಜಾನ್, ತೆಕಾ ಭುತ್ತುರ್ ಬಲ್ವಾ, ಮಟ್ಲ್ಯಾನ್. 6 ಹಾಮಾನ್ ಭುತ್ತುರ್ ಯೆಲ್ಲ್ಯಾ ತನ್ನಾ, ರಾಜಾನ್ ತೆಕಾ, ರಾಜಾನ್ ಕೊನಾಕ್ ತರಿಬಿ ಸನ್ಮಾನ್ ಕರುಚೆ ಮನುನ್ ಮನ್ ಕರ್ಲ್ಯಾರ್ ತೆಕಾ ಕಾಯ್ ಕರುಚೆ? ಮನುನ್ ಇಚಾರ್‍ಲ್ಯಾನಿ,

ತನ್ನಾ ಹಾಮಾನಾನ್ ರಾಜಾ ಮಾಕಾ ಸೊಡುನ್ ಅನಿ ಕೊನಾಕ್ ಸನ್ಮಾನ್ ಕರುಕ್ ಮನ್ ಕರ್ತಾ? ಮನುನ್ ಚಿಂತುನ್, 7 ತಸೆ ಹೊವ್ನ್ ತೆನಿ ರಾಜಾಕ್ ಜವಾಬ್ ದಿವ್ನ್, ರಾಜಾಕ್, ಎಕ್ಲ್ಯಾಕ್ ಕೊನಾಕ್ ತರಿಬಿ ಆಯಾರ್ ಕರ್‍ತಲೆ ಮನ್ ರಾಲ್ಯಾರ್, 8 ಅಪ್ನಿ ನೆಸ್ತಲೆ ರಾಜಾಚೆ ಕಪ್ಡೆ ನೆಸ್ವುನ್, ಅನಿ ರಾಜಾ ಬಸುನ್ ಜಾತಲೊ ಘೊಡ್ಕೆ ಮುಕುಟಾನ್ ಶಿಂಗಾರ್ ಕರುನ್ ಹಾನ್ವುನ್, 9 ತೆ ಕಪ್ಡೆ ಅನಿ ಘೊಡ್ಕೆ ರಾಜಾಚ್ಯಾ ಮುಖಂಡಾಚ್ಯಾ ಹಾತಿತ್ ದಿವ್ನ್, ರಾಜಾನ್ ಸನ್ಮಾನ್ ಕರುಚೆ ಮನುನ್ ಚಿಂತಲ್ಲ್ಯಾ ಘವ್ಮಾನ್ಸಾಕ್ ತೆ ರಾಜಾಚೆ ಕಪ್ಡೆ ನೆಸುಕ್ ಲಾವ್ನ್, ತೆಕಾ ತ್ಯಾ ಘೊಡ್ಕ್ಯಾ ವರ್‍ತಿ ಬಸ್ವುನ್, ಶಾರಾಚ್ಯಾ ಚವ್ಕಾತ್ನಿ ಮೆರ್ವನ್ಗಿ ಕರುನ್ಗೆತ್, ತೆಜ್ಯಾ ಫಿಡೆ ರಾಜಾನ್ ಸನ್ಮಾನ್ ಕರುಚೆ ಮನುನ್ ಚಿಂತಲ್ಲ್ಯಾಕ್ ಮಾನ್ ದಿತಲಿ ರಿತ್ ಅಸಿಚ್, ಮನುನ್ ಪರ್ಗಟುಚೆ ಮಟ್ಲ್ಯಾನ್. 10 ರಾಜಾನ್ ತಾಬೊಡ್ತೊಬ್ ಹಾಮಾಕ್, ತಿಯಾ ಸಾಂಗಲ್ಲೆ ಕಪ್ಡೆ ಅನಿ ಘೊಡ್ಕೆ ಘೆವ್ನ್ ಲಗ್ಗುನಾ ಯೆವ್ನ್, ರಾಜಾಚ್ಯಾ ಘರಾಚ್ಯಾ ದಾರಾತ್ ಬಸಲ್ಲ್ಯಾ ಮೊರ್ದೆಕೈ ಮನ್ತಲ್ಯಾ ಜುದೆವಾಂಚ್ಯಾ ಮಾನ್ಸಾಕ್ ತಿಯಾ ಸಾಂಗಲ್ಲೆ ಎಕ್ಬಿ ಚುಕಿನಸ್ತಾನಾ ಕರ್, ಮನುನ್ ಹುಕುಮ್ ದಿಲ್ಯಾನ್. 11 ಹಾಮಾನಾನ್ ಕಪ್ಡೆ ಅನಿ ಘೊಡ್ಕೆ ಹಾನುನ್, ಮೊರ್ದೆಕೈಕ್ ನೆಸ್ವುನ್, ಶಾರಾಚ್ಯಾ ಚವ್ಕಾತ್ನಿ ಮೆರ್ವನ್ಗಿ ಕರುನ್ಗೆತ್, ತೆಚ್ಯಾ ಇದ್ರಾಕ್, ರಾಜಾನ್ ಸನ್ಮಾನ್ ಕರುಚೆ ಮನುನ್ ಚಿಂತಲ್ಯಾಕ್ನಿ ಮಾನ್ ದಿತಲಿ ರಿತ್ ಅಸಿಚ್ ಮನುನ್ ಪರ್ಗಟ್ ಕರ್ಲ್ಯಾನ್. 12 ಮೊರ್ದೆಕೈಯ್ ಅನಿ ಪರ್‍ತುನ್ ರಾಜಾಚ್ಯಾ ಘರಾಚ್ಯಾ ದಡ್ಪ್ಯಾಚ್ಯಾ ಇದ್ರಾಕ್ ಯೆಲೊ, ಖರೆ ಹಾಮಾನ್ ಬೆಜಾರಾನ್ ಅಪ್ನಾಚೆ ತೊಂಡ್ ಧಾಪುನ್ ಘೆವ್ನ್ ಘರಾಕ್ ಗೆಲೊ. 13 ಮಾನಾ ಅಪ್ನಾಕ್ ಘಡಲ್ಲಿ ಸಂಗತಿಯಾ ಸಗ್ಳಿ ಅಪ್ನಾಚ್ಯಾ ಬಾಯ್ಕೊಕ್ ಅನಿ ತೆಚ್ಯಾ ವಾಂಗ್ಡಾ ಹೊತ್ತ್ಯಾಕ್ನಿ ಸಾಂಗ್ಲ್ಯಾನ್, ತನ್ನಾ ತೆಚ್ಯಾ ಬಾಯ್ಕೊನ್ ಅನಿ ಪಂಡಿತಾನಿ ತೆಕಾ, "ತಿಯಾ ಕೊನಾಚ್ಯಾ ಇದ್ರಾಕ್ ಹಾರುಲೈ, ತೊ ಮಾನುಸ್ ಜುದೆವಾಂಚೊ ಹೊಲ್ಲೊ ರಾಲ್ಯಾರ್, ತಿಯಾ ತೆಜ್ಯಾ ಇದ್ರಾಕ್ ಖರೆಚ್ ಪಡುನ್ ಹಾಳ್ ಹೊವ್ನ್ ಜಾತೈ" ಮಟ್ಲ್ಯಾನಿ.

14 ತೆನಿ ತೆಚ್ಯಾ ವಾಂಗ್ಡಾ ಬೊಲಿತ್ ರ್‍ಹಾತಾನಾ, ರಾಜಾಚಿ ಸೆವಕಾ ಯೆವ್ನ್ ಎಸ್ತೆರ್ ರಾನಿನ್ ತಯಾರ್ ಕರಲ್ಯಾ ಜೆವ್ನಾಕ್ ಲಗ್ಗುನಾ ಯೆವ್ಚೆ ಮನುನ್ ಹಾಮಾಕ್ ಬಲ್ವುಲ್ಯಾನಿ.