1 ರಾಜಾಚಿ ಹುಕುಮಾಚಿ ನಿರ್ದಾರಾ ಫುರಾ ಕರ್ತಲೊ ಬಾರಾವ್ಯಾ ಮ್ಹೈನ್ಯಾಚೊ ತೆರಾವೊ ದಿಸ್ ಯೆಲೊ, ತ್ಯಾ ದಿಸಾತ್ ತೆಂಕಾ ಹಾರ್ವುನ್ ಗುಲಾಮಾ ಕರುನ್ ಘೆವ್ಕ್ ಹೊತಾ ಮನುನ್ ತೆಂಚ್ಯಾ ವಿರೊದಿಯಾನಿ ಚಿಂತಲ್ಯಾನಿ, ಖರೆ ತೆಜ್ಯಾ ಬದ್ಲಾಕ್ ಜುದೆವಾನಿಚ್ ಅಪ್ನಾಚ್ಯಾ ವಿರೊಧಿಯಾಕ್ನಿ ಹಾರ್ವುಲ್ಯಾನಿ. 2 ತಸೆ ಹೊವ್ನ್ ಅಹಶ್ವೆರೊಶ್ ರಾಜಾಚ್ಯಾ ಸಗ್ಳ್ಯಾ ಸಂಸ್ತಾನಾಂಚ್ಯಾ ಹರ್ ಎಕ್ ಶಾರ್‍ಹಾತ್ನಿ ಹೊತ್ತ್ಯಾ ಜುದೆವಾನಿ ಅಪ್ನಾಕ್ ಬುರ್ಸೆ ಕರುಚೆ ಮನುನ್ ಚಿಂತಲ್ಯಾಕ್ನಿ ಮಾರುಕ್ ಯೆಲ್ಲ್ಯಾ ತನ್ನಾ ತೆಂಚ್ಯಾ ಇದ್ರಾಕ್ ಕೊನ್ಬಿ ಇಬೆರಾವ್ಕ್ ನಾತ್. 3 ತೆಂಚ್ಯಾ ವೈನಾ ಸಗ್ಳ್ಯಾ ಲೊಕಾಕ್ನಿ ಭಿಂಯೆ ಗುಸ್ಲೆ, ತವ್ಡೆಚ್ ನಸ್ತಾನಾ ರಾಜಾಚ್ಯಾ ಘರಾತ್ ಮೊರ್ದೆಕೈಚಿ ಮಹಿಮಾ ವಾಡುನ್ಗೆತ್ ಗೆಲ್ಲ್ಯಾ ಸಾರ್ಕೆ ತೆಚಿ ಖಬರ್ ಸಗ್ಳ್ಯಾ ಸಂಸ್ತಾನಾತ್ನಿ ಪಗಳಲ್ಲ್ಯಾ ಸಾಟ್ನಿ, 4 ಸಗ್ಳೆ ಸಂಸ್ತಾನಾಚೆ ಅಧಿಕಾರಿಯಾ, ಉಪರಾಜಾ, ದೆಶಾಧಿಪತಿಯಾ, ಅನಿ ಹುರಲ್ಲೆ ರಾಜಾಚೆ ಕಾಮ್ ಕಾರಿ ಸಗ್ಳೆ ತೆಕಾ ಭಿಂವ್ನ್ ಜುದೆವಾಕ್ನಿ ಮಜತ್ ಕಾರಿ ಹೊಲೆ. 5 ಅಸೆ ಜುದೆವಾನಿ ಅಪ್ನಾಚ್ಯಾ ಸಗ್ಳ್ಯಾ ವಿರೊದಿಯಾಕ್ನಿ ಹಾರ್ವುನ್, ಕೊಯ್ತ್ಯಾನ್ ಮಾರುನ್, ಜಿವ್ ಕಾಡುನ್ ನಾಶ್ ಕರ್ಲ್ಯಾನಿ, ಅನಿ ಅಪ್ನಾಚ್ಯಾ ವಿರೊಧಿಯಾಕ್ನಿ ಮನಾಕ್ ಯೆಲ್ಲ್ಯಾ ಸಾರ್ಕೆ ತರಾಸ್ ದಿಲ್ಯಾನಿ. 6 ಜುದೆವಾನಿ ಸುಸಾನ್ ಕೊಟೆತುಚ್ ಪಾಂಸೆ ಲೊಕಾಕ್ನಿ ಜಿವ್ ಕಾಡ್ಲ್ಯಾನಿ. 7 ತೆನಿ ಮಾರಲ್ಲ್ಯಾತ್ ಪರ್ಶದಾಂತ್, ದಲ್ಪೊನ್, ಅನಿ ಅಸ್ಪಾತ್, 8 ಪೊರಾತ್, ಅದಲ್ಯ, ಅನಿ ಅರಿದಾತ್, 9 ಪರ್ಮಶ್ಟ್, ಅರಿಸೈ, ಅರಿದೈ, ಅನಿ ವೈಜಾತ್ ಹೆನಿ ಸಗ್ಳೆ ಹೊತ್ತೆ. 10 ಹೆನಿ ಸಗ್ಳೆ ಕೊನ್ ಮಟ್ಲ್ಯಾರ್ ಜುದೆವಾಕ್ನಿ ವಿರೊದ್ ಕರಿತ್ ಹೊತ್ತ್ಯಾ ಹೆಮ್ಮೆದಾಚೊ ಲೆಕ್ ಹಾಮಾಚಿ ಧಾ ಲೆಕಾ. ಜುದೆವಾನಿ ಯೆವ್ಡ್ಯಾ ಲೊಕಾಕ್ನಿ ಜಿವ್ ಕಾಡ್ಲ್ಯಾರ್ಬಿ ತೆಂಚೆ ಕಾಯ್ಬಿ ಚೊರುನ್ ಘೆವ್ಕ್ ನಾತ್. 11 ತ್ಯಾ ದಿಸಿ ತವ್ಡಿ ಲೈ ಲೊಕಾ ಜುದೆವಾಂಚ್ಯಾ ಹಾತಿತ್ ಮರ್ಲಿ ಮನ್ತಲೆ ರಾಜಾಕ್ ಕಳಲ್ಲ್ಯಾ ತನ್ನಾ, 12 ರಾಜಾನ್ ಎಸ್ತೆರ್ ರಾನಿಕ್, "ಜುದೆವಾನಿ ಸುಸಾನ್ ಕೊಟೆತುಚ್ ಪಾಂಸೆ ಲೊಕಾಕ್ನಿ ಅನಿ ಹಾಮಾಚ್ಯಾ ಧಾ ಲೆಕಾಕ್ನಿ ನಾಶ್ ಕರ್ಲ್ಯಾನಿ, ಅನಿ ಹುರಲ್ಲ್ಯಾ ಸಂಸ್ತಾನಾತ್ನಿ ಕವ್ಡಿ ಲೊಕಾ ಮರುಕ್ ಫಿರೆ? ತುಜಿ ಅನಿ ಕಸ್ಲಿ ಮಾಗ್ನಿ ರಾಲ್ಯಾರ್ಬಿ ಫುರಾ ಹೊತಾ, ತಿಯಾ ಕಾಯ್ ಮಾಗ್ಲ್ಯಾರ್ಬಿ ದಿತಾ" ಮಟ್ಲ್ಯಾನ್. 13 ತನ್ನಾ ಎಸ್ತೆರ್ ರಾನಿನ್, ರಾಜಾಕ್ ಮನ್ ರಾಲ್ಯಾರ್, ಆಜ್ ಹೊಲ್ಲ್ಯಾಸಾರ್ಕೆಚ್ ಉದ್ದ್ಯಾಬಿ ರಾಜಾಚ್ಯಾ ಹುಕುಮಾ ಸಾರ್ಕೆಚ್ ಕರುಕ್ ಅನಿ ಹಾಮಾಚ್ಯಾ ಧಾ ಲೆಕಾಂಚಿ ಮ್ಹಡಿ ಪಾಶ್ಯಾಚ್ಯಾ ಖಾಂಬ್ಯಾಕ್ ಲೊಂಬಾತ್ ಘಾಲುಕ್ ಜುದೆವಾಕ್ನಿ ಒಪ್ಕಿ ದಿವ್ಚೆ, ಮನುನ್ ಮಾಗ್ತಾನಾ, ರಾಜಾನ್ ತಸೆ ಕರುಕ್ ಒಪ್ಕಿ ದಿಲ್ಯಾನ್. 14 ತಾಬೊಡ್ತೊಬ್ ಸುಸಾನ್ ಕೊಟೆತ್ ಹ್ಯಾ ವಿಶಯಾಚೆ ರಾಜಾಚೊ ಹುಕುಮ್ ಪರ್ಗಟುನ್ ಹೊಲೆ, ಅನಿ ಹಾಮಾಚ್ಯಾ ಧಾ ಲೆಕಾಂಚಿ ಮ್ಹಡಿ ಪಾಶ್ಯಾಚ್ಯಾ ಖಾಂಬ್ಯಾಕ್ ಲೊಂಬಾತ್ ಘಾಲುನ್ ಹೊಲೆ. 15 ಸುಸಾನಿತ್ಲ್ಯಾ ಜುದೆವಾನಿ ಆಧಾರ್ ಮ್ಹೈನ್ಯಾಚ್ಯಾ ಚವ್ದಾವ್ಯಾ ದಿಸಾತ್ ಬಿ ಗೊಳಾ ಹೊವ್ನ್ ಯೆವ್ನ್, ಥೈ ತಿನ್ಸೆ ಲೊಕಾಕ್ನಿ ಜಿವ್ ಕಾಡ್ಲ್ಯಾನಿ, ಖರೆ ಕಾಯ್ಬಿ ಚೊರುನ್ ಘೆವ್ಕ್ ನಾತ್. 16 ತಸೆಚ್ ರಾಜಾಚ್ಯಾ ಸಗ್ಳ್ಯಾ ಸಂಸ್ತಾನಾತ್ನಿ ಹೊತ್ತ್ಯಾ ಸಗ್ಳ್ಯಾ ಜುದೆವಾನಿಬಿ ಅಪ್ನಾಚ್ಯಾ ವಿರೊಧಿಯಾಂಚೊ ತರಾಸ್ ಚುಕ್ವುನ್ ಘೆವ್ಕ್ ಸಾಟ್ನಿ ಅನಿ ಅಪ್ನಾಚಿ ಜಿವಾ ಹುರ್ವುನ್ ಘೆವ್ಕ್ ಸಾಟ್ನಿ, ಗೊಳಾ ಹೊವ್ನ್ ಅಪ್ನಾಚ್ಯಾ ವಿರೊಧಿ ಸತ್ತರಾರ್ ಪಾಂಚ್ ಹಾಜಾರ್ ಲೊಕಾಕ್ನಿ ನಾಶ್ ಕರ್ಲ್ಯಾನಿ, ಖರೆ ಕಾಯ್ಬಿ ಚೊರುನ್ ಘೆವ್ಕ್ ನಾತ್. 17 ಹೆ ಸಗ್ಳೆ ಆಧಾರ್ ಮ್ಹೈಚ್ಯಾ ತೆರಾವ್ಯಾ ದಿಸಾತ್ ಹೊಲೆ, ಅನಿ ತೆನಿ ಚವ್ದಾವ್ಯಾ ದಿಸಾತ್ ಆರಾಮ್ ಕರುನ್ ಘೆವ್ನ್ ತ್ಯಾ ದಿಸಿ ಸನಾಚ್ಯಾ ಜೆವ್ನಾಚೊ ದಿಸ್ ಕರ್ಲ್ಯಾನಿ. 18 ಖರೆ ಸುಸಾನಿತ್ಲ್ಯಾ ಜುದೆವಾನಿ ತೆರಾವ್ಯಾ ಅನಿ ಚವ್ದಾವ್ಯಾದಿಸಾತ್ನಿ ಅಪ್ನಾಚ್ಯಾ ವಿರೊಧಿಯಾಕ್ನಿ ನಾಶ್ ಕರುಕ್ ಮನುನ್ ಗೊಳಾ ಹೊಲ್ಲ್ಯಾ ಸಾಟ್ನಿ, ಪಂದ್ರಾವ್ಯಾ ದಿಸಾತ್ ಆರಾಮ್ ಕರುನ್ ಘೆವ್ನ್, ತೊ ದಿಸ್ ಸನಾಚ್ಯಾ ಜೆವ್ನಾಚೊ ಕರ್ಲ್ಯಾನಿ. 19 ತಸೆ ಹೊವ್ನ್, ಬಾರಿಕ್ ಗಾಂವಾತ್ನಿ ವಸ್ತಿ ರ್‍ಹಾತಲ್ಯಾ ಜುದೆವಾನಿ ಚವ್ದಾವ್ಯಾ ದಿಸಾತ್ ಅನಿ ಶಾರಾಂತ್ಲ್ಯಾ ಜುದೆವಾನಿ ಪಂದ್ರಾವ್ಯಾ ದಿಸಾಕ್ ಸನಾಚೊ ದಿಸ್ ಸನಾಚೆ ಜೆವಾನ್ ಕರುನ್ ಎಕಾಮೆಕಾಕ್ ಆಯಾರಾ ದಿವ್ನ್ ಘೆತಾತ್.

20 ಮೊರ್ದೆಕೈನ್ ಅಹೆಶ್ವೆರೊಶ್ ರಾಜಾಚ್ಯಾ ಜಗ್ಗೊಳ್ ಅನಿ ಧುರ್ ಹೊತ್ತ್ಯಾ ಸಂಸ್ತಾನಾಂಚ್ಯಾ ಜುದೆವಾಕ್ನಿ ಚಿಟಿಯಾ ಲಿವ್ನ್ ಸಾಂಗಲ್ಲಿ ಸಂಗತಿಯಾ ಖಲಿ ಮಟ್ಲ್ಯಾರ್, 21 ಹರ್ ಎಕ್ ವರಿಸ್ಬಿ ಆಧಾರ್ ಮ್ಹೈನ್ಯಾಚೊ ಚವ್ದಾವೊ ಅನಿ ಪಂದ್ರಾವೊ ದಿಸ್ ಸನಾಚೊ ಹೊವ್ಚೆ ಹ್ಯೊ ಜುದೆವಾಕ್ನಿ ಶಾಶ್ವತಾಚೊ ನೆಮ್ ಹೊವ್ನ್ ರಾವ್ಚೆ. 22 ಜುದೆವಾಕ್ನಿ ವಿರೊಧಿಯಾಂಚೊ ತರಾಸ್ ಕಮ್ಮಿ ಹೊವ್ನ್ ಆರಾಮ್ ಗಾವಲ್ಲೆ ತ್ಯಾಚ್ ದಿಸಾತ್ನಿ, ತ್ಯಾಚ್ ಮ್ಹೈನ್ಯಾತ್ ತರಾಸ್ ಧುರ್ ಹೊವ್ನ್ ತೆಂಕಾ ಖುಶಿ ಹೊಲ್ಲಿ, ತರಾಸ್ ಜಾವ್ನ್ ಆರಾಮಾಚೊ ಎಳ್ ಯೆಲೊ, ತಸೆ ಹೊವ್ನ್ ತೆನಿ ತ್ಯಾ ದಿಸಾತ್ನಿ ಸನಾಚೆ ಜೆವಾನ್ ಕರುನ್ ಎಕಾಮೆಕಾಕ್ ಆಯಾರಾ ದಿವ್ನ್, ಜೆವ್ನಾಚೊ ವಾಟೊ ಧಾಡುನ್, ಗರಿಬಾಕ್ನಿ ದಾನ್ ದಿವ್ಚೆ. 23 ಜುದೆವಾನಿ ಮೊರ್ದೆಕೈಚ್ಯಾ ಚಿಟಿತ್ ಹೊತ್ತ್ಯಾಕ್ ಒಪ್ಲ್ಯಾನಿ, ಅನಿ ತ್ಯಾ ವರ್ಸಾತ್ ಅಪ್ನಿ ಕರಲ್ಲೊ ಸನ್ ಹರ್ ಎಕ್ ವರ್ಸಾಬಿ ಹೊವ್ಚೆ ಮನುನ್ ವಳಕ್ ಕರುನ್ ಘೆಟ್ಲ್ಯಾನಿ.

24 ಸಗ್ಳ್ಯಾ ಜುದೆವಾಕ್ನಿ ತರಾಸ್ ದಿತಲೊ ಅಗಗಾಚ್ಯಾ ಕುಳಿಚೊ ಅನಿ ಹೆಮ್ಮೆದಾಚೊ ಲೆಕ್ ಹಾಮಾನ್ ಜುದೆವಾಕ್ನಿ ನಾಶ್ ಕರುಚೆ ಮನುನ್ ನಿರ್ದಾರ್ ಕರುನ್ ತೆಂಕಾ ಕಳ್ವಳೊ ಕರುನ್ ನಾಶ್ ಕರ್‍ತಲ್ಯಾ ವಿಶಯಾತ್ ಪುರ್ ಮಟ್ಲ್ಯಾರ್ ಚಿಟ್ ಲಿವಲ್ಲ್ಯಾನ್ ನ್ಹೈಯ್. 25 ಹೆ ರಾಜಾಚ್ಯಾ ಇದ್ರಾಕ್ ಯೆಲ್ಲ್ಯಾ ತನ್ನಾ, ತೆನಿ ಹಾಮಾನಾನ್ ಜುದೆವಾಕ್ನಿ ವಿರೊಧ್ ಕರಲ್ಲಿ ಕುತಂತ್ರಾ ತೆಜ್ಯಾಚ್ ಟಕ್ಲ್ಯಾ ವರ್‍ತಿ ಯೆಂವ್ದಿತ್, ತೆಕಾ ಅನಿ ತೆಜ್ಯಾ ಲೆಕಾಕ್ನಿ ಪಾಶ್ಯಾಚ್ಯಾ ಖಾಂಬ್ಯಾಕ್ ಲೊಂಬಾತ್ ಘಾಲುಚೆ ಮನುನ್ ಹುಕುಮ್ ದಿಲ್ಲ್ಯಾನ್. 26 ತ್ಯಾ ಪುರ್ ಮನ್ತಲ್ಯಾ ಶಬ್ದಾ ವೈನಾ ತ್ಯಾ ದಿಸಾಕ್ನಿ ಪುರಿಮ್ ಮನ್ತಲೆ ನಾವ್ ಯೆಲೆ, ಮೊರ್ದೆಕೈಚ್ಯಾ ಚಿಟಿಚ್ಯಾ ವೈನಾ ಅನಿ ಜುದೆವಾಕ್ನಿ ತ್ಯಾ ಚಿಟಿಚಿ ವಿಶಯಾ ಅನಿ ತ್ಯಾ ಚಿಟಿ ವೈನಾ ಅಪ್ನಿ ಘೆಟಲ್ಲೊ ತರಾಸ್ ಯಾದ್ ಕರುನ್ ಘೆವ್ನ್, 27 ಹರ್ ಎಕ್ ವರಿಸ್ಬಿ ತ್ಯಾ ದಿಸಾಂಚ್ಯಾ ವಿಶಯಾಚೊ ಶಾಸನಾಂಚ್ಯಾ ಸಾರ್ಕೆ ನೆಮ್ಸುನ್ ಹೊಲ್ಲ್ಯಾ ಎಳಾಕ್ ಪುರಿಮ್ ಸನ್ ಕರ್‍ತಲೆ ಅಪ್ನಾಕ್ನಿ ಅನಿ ಅಪ್ನಾಚ್ಯಾ ಪಿಳ್ಗಿಚ್ಯಾಕ್ನಿ ಅನಿ ಅಪ್ನಾಚ್ಯಾ ವಾಂಗ್ಡಾ ಗೊಳಾ ಹೊತಲ್ಯಾ ಕ್ನಿಬಿ ಚುಕಿನಸಲ್ಲಿ ಪದ್ದತ್ ಹೊವ್ಚಿ ಮನುನ್, 28 ಅನಿ ಸಗ್ಳ್ಯಾ ಸಂಸ್ತಾನಾಚ್ಯಾ ಕುಳಿಚ್ಯಾನಿ, ಅನಿ ಶಾರಾತ್ಲ್ಯಾನಿಬಿ ಸದಾಸರ್ವತಾಕ್ ಹಿ ದಿಸಾ ಯಾದ್ ಕರುನ್ ಘೆವ್ನ್ ಸನ್ ಕರುಚೆ, ಅನಿ ಹ್ಯೊ ಸನ್ ಜುದೆವಾತ್ನಿ ಕನ್ನಾಬಿ ಬಂದ್ ಕರುಚೆ ನ್ಹೈಯ್, ತೆಚಿ ಯಾದ್ ಹೆಂಚ್ಯಾ ಪಿಳ್ಗಿತ್ನಾ ಪುಸುನ್ ಜಾವ್ಚಿ ನ್ಹೈಯ್ ಮನುನ್ ವಳಕ್ ಕರುನ್ ಘೆಟ್ಲ್ಯಾನಿ. 29 ತವ್ಡೆಚ್ ನಸ್ತಾನಾ ಅಬಿಹೈಲಾಚಿ ಲೆಕ್ ಎಸ್ತೆರ್ ರಾನಿನ್, ಅಧಿಕಾರಾನ್ ಪುರಿಮಾಚ್ಯಾ ವಿಶಯಾತ್ ದೊನ್ವೆಚೊ ನೆಮ್ ಅನಿಬಿ ಘಟ್ ಕರುಕ್ ಸಾಟ್ನಿ, ಜುದೆವಾಂಚ್ಯಾ ಮೊರ್ದೆಕೈಚ್ಯಾ ಮಜತಿ ವೈನಾ ಚಿಟಿಯಾ ಲಿವ್ಲಿನ್. 30 ತೆನಿ ಅಹಶ್ವೆರೊಶ್ ರಾಜಾಚ್ಯಾ ಎಕ್ಸೆವಿಸಾರ್ ಸಾತ್ ಸಂಸ್ತಾನಾತ್ನಿ ಹೊತ್ತ್ಯಾ ಜುದೆವಾಕ್ನಿ ಚಿಟಿಯಾಂಚ್ಯಾ ಸಮಾಧಾನಾನ್ ಅನಿ ಖರೆಪಾನಾನ್ ಧಾಡ್ಲ್ಯಾನ್. 31 ತಿನಿ ದಯಾನ್ ಅನಿ ಖರೆಪಾನಾಚ್ಯಾ ಗೊಸ್ಟಿಯಾನಿ ತ್ಯಾ ಚಿಟಿಯಾತ್ನಿ, ಜುದೆವಾನಿ ಅಪ್ನಾಕ್ಡೆ ಅನಿ ಅಪ್ನಾಚ್ಯಾ ಪಿಳ್ಗಿಯಾತ್ನಿಬಿ ಉಪಾಸಾಚಿ ದಿಸಾ ಹರ್ ಎಕ್ ವರಿಸ್ಬಿ ಕರುಚೆ ಅನಿ ಅಪ್ನಿಚ್ ವಳಕ್ ಕರುನ್ ಘೆಟಲ್ಲ್ಯಾ ಸಾರ್ಕೆ, ಪುರಿಮಾಚಿ ದಿಸಾ ರಾನಿ ಎಸ್ತೆರ್ ಅನಿ ಜುದೆವಾಂಚ್ಯಾ ಮೊರ್ದೆಕೈನ್ ನಿರ್ದಾರ್ ಕರಲ್ಯಾ ಸಾರ್ಕೆ ಹರ್ ಎಕ್ ವರಿಸ್ಬಿ ನೆಮಲ್ಲ್ಯಾ ಯೆಳಾತ್ ಸನ್ ಕರುಚೆ ಮನುನ್ ಲಿವಲ್ಲಿನ್. 32 ಎಸ್ತೆರಾನ್ ಹುಕುಮ್ ಕರಲ್ಲೆ ಪುರಿಮ್ ಸನ್ ಕರುಕ್ ವಾಟ್ ಹೊಲಿ, ಅನಿ ತೆ ಪುಸ್ತಕಾತ್ ಲಿವ್ನ್ ಹೊಲೆ.