ಎಸ್ತೆರ್ 8

ಜುದೆವಾನಿ ಸ್ವತ್ಯಾಚ್ಯಾ ರಾಕ್ವನಿ ಸಾಟ್ನಿ ಝಗ್ಡೊ ಕರಲ್ಲೆ

1 ತ್ಯಾ ದಿಸಿ ಅಹಶ್ವೆರೊಶ್ ರಾಜಾನ್ ಜುದೆವಾಂಚ್ಯಾ ದುಶ್ಮನ್ ಹೊಲ್ಲ್ಯಾ ಹಾಮಾನಾಚೆ ಘರ್ ಎಸ್ತೆರ್ ರಾನಿಕ್ ದಿಲ್ಯಾನ್. ತನ್ನಾ ತಿನೆ ಮೊರ್ದೆಕೈ ಅಪ್ನಾಕ್ ಕಾಯ್ ಸಂಬಂಧ್ ಮನುನ್ ಸಾಂಗಲ್ಲ್ಯಾ ತನ್ನಾ ರಾಜಾನ್ ಮೊರ್ದೆಕೈಕ್ ಅಪ್ನಾಚ್ಯಾ ಇದ್ರಾಕ್ ಬಲ್ವುನ್ ಘೆವ್ನ್, 2 ಅಪ್ನಿ ಹಾಮಾನಾಕ್ನಾ ಕಾಡಲ್ಯಾ ಛಪ್ಪ್ಯಾಚಿ ಮುದ್ದಿ ಮೊರ್ದೆಕೈಕ್ ದಿಲ್ಯಾನ್, ತನ್ನಾ ಎಸ್ತೆರ್ ರಾನಿನ್ ಹಾಮಾನಾಚ್ಯಾ ಘರಾಚಿ ಜವಾಬ್ದಾರಿ ತೆಕಾ ದಿಲಿನ್.

3 ಅನಿ ಪರ್‍ತುನ್, ಎಸ್ತೆರ್ ರಾನಿನ್ ರಾಜಾಕ್ಡೆ ಜಾವ್ನ್ ತೆಚ್ಯಾ ಪಾಂಯಾಚ್ಯಾ ವರ್‍ತಿ ಡಬ್ಬ್ ಪಡುನ್, ರಡುನ್ಗೆತ್, ಅಗಾಗಾಚ್ಯಾ ಕುಳಿಚ್ಯಾ ಹಾಮಾನಾನ್ ಜುದೆವಾಂಚ್ಯಾ ಲೊಕಾಕ್ನಿ ನಾಶ್ ಕರುಚೆ ಮನುನ್ ಕರಲ್ಲೆ ಕಾನುನ್ ತಿಯಾ ರದ್ದ್ ಕರುಚೆ ಮನುನ್ ಮಾಗ್ತಾನಾ, 4 ರಾಜಾನ್ ಅಪ್ನಾಚೊ ಸುವರ್ನ್ ದಾಂಡೊ ಎಸ್ತೆರ್ ರಾನಿಕ್ಡೆ ದಾಕ್ವುತಾನಾ, ತಿ ಉಟುನ್ ತೆಚ್ಯಾ ಇದ್ರಾಕ್ ಇಬೆ ರಾವ್ನ್, ತೆಕಾ, 5 ರಾಜಾನ್ ಮಾಜ್ಯಾ ವರ್‍ತಿ ಕುರ್ಪಾ ದಾಕ್ವುನ್ ಮಾಕಾ ಮೆಚ್ಚುನ್ ಮಿಯಾ ಸಾಂಗುಲಾಗಲ್ಲಿ ಗೊಸ್ಟಿಯಾ ಬರಿ ಮನುನ್ ಚಿಂತುನ್, ಒಪ್ಕಿ ದಿತಲೆ ಹೊಲ್ಯಾರ್, ರಾಜಾಚ್ಯಾ ಸಗ್ಳ್ಯಾ ಸಂಸ್ತಾನಾತ್ನಿ ಹೊತ್ತ್ಯಾ ಜುದೆವಾಕ್ನಿ ನಾಶ್ ಕರ್‍ತಲ್ಯಾ ವಿಶಯಾತ್ ಅಗಾಗಾಚ್ಯಾ ಕುಳಿಚೊ ಹೆಮ್ಮೆದಾಚೊ ಲೆಕ್ ಹಾಮಾನಾನ್ ಲಿವಸಲ್ಲಿ ಚಿಟಿಯಾ ರದ್ದ್ ಕರ್ತಲೊ ಹುಕುಮ್ ಪರ್ಗಟುಚೆ, 6 ಮಾಜ್ಯಾ ಲೊಕಾಕ್ನಿ ತರಾಸ್ ಯೆತಲೆ ಬಗುನ್ ಕಸೆ ಸೊಸುನ್ಗೆವ್ನ್ ರಾವ್? ಅನಿ ಮಾಜಿ ಲೊಕಾ ಅನಿ ಕುಳಿ ನಾಶ್ ಹೊತಲೆ ಬಗುನ್ಗೆತ್ ಕಸೆ ಗಪ್ ರಾವ್? ಮಟ್ಲಿನ್. 7 ತನ್ನಾ ರಾಜಾ ಅಹಶ್ವೆರೊಶಾನ್, ಎಸ್ತೆರ್ ರಾನಿ ಅನಿ ಜುದೆವಾಂಚ್ಯಾ ಮೊರ್ದೆಕೈಯಾಕ್, ಜುದೆವಾಕ್ನಿ ಹಾಮಾನಾನ್ ವಿರೊದ್ ಕರಲ್ಯಾ ವೈನಾ ಮಿಯಾ ತೆಕಾ ಪಾಸೆಚ್ಯಾ ಖಾಂಬ್ಯಾಕ್ ಘಾಲುನ್ ತೆಚೆ ಸಗ್ಳೆ ಬದಿಕ್ ಎಸ್ತೆರ್ ರಾನಿಕ್ ದಿಲಾ ನ್ಹಯ್ ! 8 ಖರೆ ರಾಜಾಚ್ಯಾ ನಾವಾರ್ ಲಿವ್ನ್ ಛಪ್ಪೊ ಮಾರಲ್ಲೆ ಕೊನ್ಬಿ ರದ್ದ್ ಕರುಚೆ ನ್ಹಯ್ , ಅಸೆ ರ್‍ಹಾತಾನಾ ಜುದೆವಾಂಚ್ಯಾ ವಿಶಯಾತ್ ತುಮ್ಕಾ ಕಸೆ ದಿಸ್ತಾ ತಸೆ ರಾಜಾಚ್ಯಾ ನಾವಾರ್ ಲಿವ್ನ್ ರಾಜಾಚೊ ಛಪ್ಪೊ ಮಾರಾ, ಮಟ್ಲ್ಯಾನ್. 9 ತನ್ನಾ ತೆನಿ ತಿನ್ವ್ಯಾ ಮ್ಹೈನ್ಯಾತ್ ಇಸಾರ್ ತಿನ್ ದಿಸಾ ಹೊಲ್ಲ್ಯಾ ಮಾನಾ, ರಾಜಾಚ್ಯಾ ಬರ್ವನ್ಗಿ ಕಾರಾಕ್ನಿ ಬಲ್ವುನ್, ಮೊರ್ದೆಕೈನ್ ಹುಕುಮ್ ದಿಲ್ಲ್ಯಾ ಸಾರ್ಕೆ ಜುದೆವಾಕ್ನಿ, ಭಾರತಾಕ್ನಾ, ಎಥಿಪಿಯಾ ಪತರ್ ರ್‍ಹಾತಲ್ಯಾ ಎಕ್ಸೆ ಇಸಾರ್ ಸಾತ್ ಸಂಸ್ಥಾನಾಕ್ನಿ, ಉಪರಾಜಾಕ್ನಿ, ದೆಶಾಧಿಪತಿಕ್ನಿ, ಅನಿ ಅಧಿಕಾರಿಯಾಕ್ನಿ ಚಿಟಿಯಾ ಲಿವ್ನ್, ತಿ ಚಿಟಿಯಾ ಸಂಸ್ಥಾನಾಕ್ನಿ, ಲಿಕಿತ್ ರುಪಾನ್ ಹರ್ ಎಕ್ ಪಿಳ್ಗಿಚ್ಯಾ ಲೊಕಾಂಚ್ಯಾ ಭಾಶಾನಿ ಜುದೆವಾಂಚ್ಯಾ ಭಾಶೆನ್ ಲಿವಲ್ಲೆ ಹೊತ್ತೆ. 10 ಮೊರ್ದೆಕೈನ್ ರಾಜಾಚ್ಯಾ ನಾವಾರ್ ಲಿವ್ನ್ ಹೊಲ್ಲ್ಯಾ ಚಿಟಿಯಾಂಚ್ಯಾ ವರ್‍ತಿ ರಾಜಾಚೊ ಛಪ್ಪೊ ಮಾರುನ್, ರಾಜಾಚ್ಯಾ ಘರಾಚ್ಯಾ ಘೊಡ್ಕಿಯಾಂಚ್ಯಾ ಗೊಟ್ಯಾತ್ ಉಪ್ಜುನ್ ಮೊಟಿ ಹೊಲ್ಲ್ಯಾ ಘೊಡ್ಕಿಯಾಂಚ್ಯಾ ವರ್‍ತಿ ಚಡುನ್ ಬಸಲ್ಲ್ಯಾ ಖಬ್ರಿಯಾ ಪಾವಸ್ತಲ್ಯಾಂಚ್ಯಾಕ್ಡೆ ಧಾಡುನ್ ದಿಲ್ಯಾನ್, 11 ಹರ್ ಎಕ್ ಶಾರಾಚ್ಯಾ ಜುದೆವಾಕ್ನಿ ಎಕುಚ್ ದಿಸಾತ್ ಗೊಳಾ ಹೊವ್ನ್, ಅಪ್ನಾಚಿ ಜಿವಾ ಹುರ್ವುನ್ ಘೆವ್ಕ್ ಸಾಟ್ನಿ ಉಟುನ್, ತೆಂಚ್ಯಾ ವರ್‍ತಿ ಆಕ್ರಮನ್ ಕರುಕ್ ಯೆಲ್ಲ್ಯಾ ಖಲ್ಯಾಬಿ ರಾಸ್ಟ್ರ್ ನಾತರ್ ಪ್ರಾಂತ್ಯಾಚ್ಯಾ ಸೈನಿಕಾಕ್ನಿ ನಾತರ್ ತಾಂಡ್ಯಾಕ್ ತೆಂಚಿ ಬಾಯ್ಕಾ ಅನಿ ಪೊರಾಕ್ನಿ ಮಿಳ್ವುನ್ ಜಿವ್ ಕಾಡುನ್ ತೆಂಚಿ ಆಸ್ತಿ ಚೊರುನ್ ಘೆವ್ನ್ ಯೆವ್ಕ್ ರಾಜಾನ್ ತ್ಯಾ ಚಿಟಿಯಾಂಚ್ಯಾ ವೈನಾಜುದೆವಾಕ್ನಿ ಅಧಿಕಾರ್ ದಿಲ್ಯಾನ್. 12 ಹೆ ಸಗ್ಳೆ ಅಹಶ್ವೆರೊಶ್ ರಾಜಾನ್ ಪರ್ಶಿಯಾ ರಾಜ್ಯಾಚ್ಯಾ ತರಾಸಾಕ್ ತಯಾರ್ ಕರುನ್ ಥವಲ್ಲ್ಯಾ ದಿಸಾತ್ ಮಟ್ಲ್ಯಾರ್, ಬಾರಾವ್ಯಾ ಮ್ಹೈನ್ಯಾಚ್ಯಾ ಮಟ್ಲ್ಯಾರ್, ಆಧಾರ್ ಮ್ಹೈನ್ಯಾಚ್ಯಾ ತೆರಾವ್ಯಾ ದಿಸಿ, ಎಕುಚ್ ದಿಸಾತ್ ಹೊವ್ಚೆ ಮಟ್ಲ್ಯಾನ್. 13 ತೊ ದಿಸ್ ಯೆಲ್ಲ್ಯಾ ತನ್ನಾ ಜುದೆವಾನಿ ಅಪ್ನಾಚ್ಯಾ ವಿರೊಧಿಯಾಂಚ್ಯಾ ವರ್‍ತಿ ಸೆಡ್ ಕಾಡುನ್ ಘೆವ್ಕ್ ತರಾಯ್ ಹೊಯ್ ಸಾರ್ಕೆ ತೊ ಖಾಯ್ದೊ ಹೊವ್ನ್ ಪರ್ಗಟುನ್ ಹೊವ್ಚೆ ಅನಿ ಹರ್ ಎಕ್ ಪ್ರಾಂತ್ಯಾತ್ ಸಗ್ಳ್ಯಾಕ್ನಿ ಕಳ್ವುನ್ ಹೊವ್ಚೆ. 14 ಹ್ಯೊ ರಾಜಾಚೊ ಹುಕುಮ್ ಸುಸಾ ಶಾರಾಚ್ಯಾ ಕೊಟೆತ್ ಪರ್ಗಟ್ ಹೊಲ್ಲ್ಯಾ ತನ್ನಾಚ್ ರಾಜಾಚ್ಯಾ ಘರಾಚ್ಯಾ ಘೊಡ್ಕಿಯಾ ಚಾಲ್ವುತಲ್ಯಾನಿ ಘೊಡ್ಕಿಯಾ ವೈನಿ ಬಸುನ್ ಲಗ್ಗುನಾಚ್ ಗೆಲ್ಯಾನಿ. 15 ಮೊರ್ದೆಕೈ ಝಾಂಬ್ಳ್ಯಾ ನಿತಳ್ ಬನ್ನಾಚೆ ರಾಜಾಚೆ ಕಪ್ಡೆ ನೆಸುನ್, ಮೊಟಿ ಸೊನ್ಯಾಚೆ ಮುಕುಟ್ ಥವ್ನನ್ಗೆವ್ನ್, ರಗ್ತಾಚ್ಯಾ ಬನ್ನಾಚೊ ಪುಂಡಿಚ್ಯಾ ದೊರ್ಯಾಚೊ ಶಾಲ್ ಕಾಂಬ್ರುನ್ ಘೆವ್ನ್, ರಾಜಾಚ್ಯಾ ಇದ್ರಾಕ್ನಾ ಜಾವ್ಕ್ ಲಾಗ್ಲೊ, ತನ್ನಾ ಸುಸಾ ಶಾರಾಕ್ನಾ ಕುಶಿಚೊ ಆರ್ಬಾಟ್ ಆಯ್ಕೊ ಯೆಲೊ. 16 ಥೈ ಜುದೆವಾಂಚಿ ಲೊಕಾ ಸುಟ್ಕಾ ಹೊವ್ನ್, ಜಿಕಲ್ಲ್ಯಾ ಕುಶಿನ್ ಹೊಳ್ವುಲಾಗಲಿ. 17 ರಾಜಾಚ್ಯಾ ನಿರ್ಧಾರಾಚಿ ಚಿಟಿಯಾ ಪರ್ಗಟುನ್ ಹೊಲ್ಲ್ಯಾ ಹರ್ ಎಕ್ ಸಂಸ್ತಾನಾತ್ನಿ ಅನಿ ಶಾರ್‍ಹಾತ್ನಿ ಹೊತ್ತ್ಯಾ ಜುದೆವಾಕ್ನಿ ಬರೊ ದಿಸ್ ಹೊಲೊ, ತೆನಿ ಕುಶಿನ್ ಜೆವಾನ್ ಕರ್ಲ್ಯಾನಿ, ತ್ಯಾ ದೆಶಾಚ್ಯಾ ಲೈ ಲೊಕಾನಿ ಜುದೆವಾಕ್ನಿ ಭಿಂವ್ನ್ ತೆಂಚ್ಯಾ ತಾಂಡ್ಯಾಕ್ ಮಿಳ್ಯಾನಿ.