1 ತನ್ನಾ ರಾಜಾ ಹಾಮಾನಾಚ್ಯಾ ವಾಂಗ್ಡಾ ಎಸ್ತೆರ್ ರಾನಿಚ್ಯಾ ಘರಾಕ್ ಜೆವ್ನಾಕ್ ಗೆಲೊ. 2 ಹ್ಯಾ ದೊನ್ವೆಚ್ಯಾ ದಿಸಾ ದಿಸಿ ವಾಯ್ನ್ ಫಿಯ್ತ್ ರ್‍ಹಾತಾನಾ, ತೆನಿ ಎಸ್ತೆರ್ ರಾನಿಕ್, "ಎಸ್ತೆರ್ ರಾನಿ, ತುಜಿ ಮಾಗ್ನಿ ಕಾಯ್, ಸಾಂಗ್; ತೆ ಮಿಯಾ ಫುರಾ ಕರ್ತಾ, ತಿಯಾ ಮಾಜೊ ಅರ್ಧೊ ರಾಜ್ಯ್ ಮಾಗ್ಲ್ಯಾರ್ಬಿ ತುಕಾ ದಿತಾ", ಮಟ್ಲ್ಯಾನ್. 3 ತನ್ನಾ ರಾನಿನ್ ರಾಜಾಕ್, "ತಿಯಾ ಮಾಜ್ಯಾ ವರ್‍ತಿ ರಾಗ್ ಕರಿ ನಸ್ತಾನಾ ಕುರ್ಪಾ ದಾಕ್ವುನ್ ಮಾಜ್ಯಾ ಮಾಗ್ನಿಕ್ ಒಪ್ಕಿ ದಿತಲೆ ಹೊಲ್ಯಾರ್ ಹೆ ಆಯ್ಕುನ್ ಮಾಜೊ ಅನಿ ಮಾಜ್ಯಾ ಲೊಕಾಂಚೊ ಜಿವ್ ಹುರ್ವುನ್ ದಿವ್ಚೆ". 4 "ಲೊಕಾನಿ ಅಮ್ಕಾ ಜಿವ್ ಕಾಡುನ್ ನಾಶ್ ಕರುನ್ ಅನಿ ಸಂಪುರ್ನ್ ನಾಶ್ ಕರಿಸಾರ್ಕೆ ಅಮ್ಕಾ ಇಕಾತ್ ದಿವ್ನ್ ಹೊಲಾ, ಗುಲಾಮ್ ಕರುನ್ ಇಕಲ್ಲೆ ಹೊಲ್ಯಾರ್ ತ್ಯಾ ವಿಶಯಾತ್ ರಾಜಾಕ್ಬಿ ಸಾಂಗುನ್ ತರಾಸ್ ದಿತಲೆ ಸಮಾ ನ್ಹಯ್ ಮನುನ್ ಗಪ್ ರಾವ್ನ್ ಸೊಡಿ ಹೊತ್ತೊ", ಮನುನ್ ಜವಾಬ್ ದಿಲಿನ್. 5 ರಾಜಾನ್ ಎಸ್ತೆರ್ ರಾನಿಕ್, "ಅಸ್ಲಿ ಬುರ್ಶಿ ಕಾಮಾ ಕರಲ್ಲೊ ಕೊನ್ ತೊ? ತೊ ಖೈ ಹಾಯ್?" ಮನುನ್ ಇಚಾರ್‍ತಾನಾ, 6 ತಿನಿ ತನ್ನಾ, "ಅಮ್ಚೊ ವಿರೊಧಿ, ಹ್ಯೊ ದುಶ್ಟ್ ಹಾಮಾನುಚ್" ಮಟ್ಲಿನ್,

ತನ್ನಾ ಹಾಮಾನ್ ರಾಜಾಚ್ಯಾ ಅನಿ ಎಸ್ತೆರ್ ರಾನಿಚ್ಯಾ ಇದ್ರಾಕ್ ಭಿಂವ್ನ್ ಕಂಗಾಲ್ ಹೊಲೊ. 7 ತನ್ನಾ ರಾಜಾಕ್ ರಾಗ್ ಯೆವ್ನ್, ವಾಯ್ನ್ ಫಿತಲೆ ಸೊಡುನ್ ತೆಚ್ಯಾ ಘರಾಕ್ಡೆ ಹೊತ್ತ್ಯಾ ಮ್ಹಳ್ಯಾಕ್ ಗೆಲೊ, ಖರೆ ರಾಜಾಕ್ನಾ ಅಪ್ನಾಕ್ ತರಾಸ್ ಹಾಯ್ ಮನುನ್ ಯೆವ್ಜುನ್ ಹಾಮಾನಾನ್ ಎಸ್ತೆರ್ ರಾನಿಚ್ಯಾ ಜಗ್ಗೊಳ್ ಜಾವ್ನ್, ಅತ್ತಾ ಮಾಜೊ ಜಿವ್ ರಾಕ್ತಲೆ ತಿಯಾಚ್ ಮನುನ್ ಜಿವಾಚಿ ಭಿಕ್ ಮಾಗುನ್ಗೆತ್ ಇಬೆ ರಾಲೊ. 8 ರಾಜಾ ಮ್ಹಳ್ಯಾತ್ನಾ ಪರ್‍ತುನ್ ವಾಯ್ನ್ ಫಿವ್ಲಾಗಲ್ಲ್ಯಾ ಘರಾಕ್ ಯೆಲ್ಲೆ ತನ್ನಾ, ಹಾಮ್ ಎಸ್ತೆರ್ ರಾನಿಚ್ಯಾ ವಟ್ಕುನ್ ಬಸ್ತಲ್ಯಾ ಉಸ್ಸ್ಯಾ ವರ್‍ತಿ ಪಡುನ್ ಹೊತ್ತೆ ಬಗುನ್, "ಹ್ಯೊ ಮಾನುಸ್ ಮಾಜ್ಯಾ ಇದ್ರಾಕುಚ್ ರಾಜಾಚ್ಯಾ ಘರ್‍ಹಾತ್ ರಾನಿಚಿ ಮರ್ಯಾದ್ ಕಾಡುಚೆ ಮನುನ್ ಹಾಯ್, ಕಾಯ್?" ಮನುನ್ ಬೊಬ್ ಮಾರ್‍ಲ್ಯಾನ್,

ರಾಜಾಚ್ಯಾ ತೊಂಡಾತ್ನಾ ಹೆ ಬೊಲ್ನೆ ಯೆಲ್ಲೆ ತನ್ನಾಚ್, ಸೆವಕಾನಿ ಹಾಮಾಚ್ಯಾ ತೊಂಡಾಕ್ ಮುಸುಕ್ ಘಾಟ್ಲ್ಯಾನಿ, ಅನಿ ತೆಕಾ ಘೆವ್ನ್ ಗೆಲ್ಯಾನಿ. 9 ತಸೆ ರ್‍ಹಾತಾನಾ, ರಾಜಾಚಿ ಸೆವಾ ಕರುನ್ಗೆತ್ ಹೊತ್ತ್ಯಾ ಸೆವಕಾನಿತ್ಲೊ ಹರ್ಬೊನ್ ಮನ್ತಲ್ಯಾನ್, ಅಬಕ್, ಹ್ಯಾ ಹಾಮಾಚ್ಯಾ ಘರಾಚ್ಯಾ ಜಗ್ಗೊಳ್ ರಾಜಾಚ್ಯಾ ಜಿವಾಚ್ಯಾ ರಾಕ್ವನಾ ಸಾಟ್ನಿ ಖಬರ್ ಸಾಂಗಲ್ಯಾ ಮೊರ್ದೆಕೈಯಾಕ್ ಲೊಂಬಾತ್ ಘಾಲುಕ್ ಮನುನ್ ಪನ್ನಾಸ್ ಹಾತ್ ಉಪ್ಪರ್ ಹೊತ್ತೊ ಪಾಸೆಚೊ ಖಾಂಬೊ ಹಾಯ್ ನ್ಹಯ್ ಮನುನ್ ಸಾಂಗ್ತಾನಾ, ರಾಜಾನ್ ತ್ಯಾ ಖಾಂಬ್ಯಾಕ್ ಹಾಮಾನಾಕ್ ಲೊಂಬಾತ್ ಘಾಲಾ, ಮನುನ್ ಹುಕುಮ್ ದಿಲ್ಯಾನ್. 10 ತನ್ನಾ ಮೊರ್ದೆಕೈಕ್ ಮನುನ್ ತಯಾರ್ ಕರಲ್ಲ್ಯಾ ಪಾಸೆತ್ ಹಾಮಾನಾಕ್ ಗಳ್ಪಾಸ್ ದಿಲ್ಯಾನಿ, ತನ್ನಾ ರಾಜಾಚೊ ಪೆಟ್ತಲೊ ರಾಗ್ ಥಂಡ್ ಹೊಲೊ.