1 Ɛhe ati, odikyɛ yɛfa y’adwene yesie nningyein bɔ yɛte naso paa, na yandwe yɛ nwo. 2 Ofikyɛ, sɛ edwirɛ bɔ bɛmaa abɔfo mɔ hane ne yɛle nahorɛ, na mmerato ne asoserɛ biala nyane ye asotwe bɔ ɔfata ye a, 3 ye de, sɛ yɛbu yɛ nye yɛgua atee pirikua bɔ ɔkɔfa so kole yɛ naso a, yɛkɔyɛ sɛɛ ne yafa yɛ nwo yali? Awurade bɔbɔ yeɛ oli moa hane ye nwo dwirɛ ɔ, na bɛ bɔ bɛtele ne ha tole so kyɛ ɔte nahorɛ, 4 na Nyameɛ koso nate nzɛngyerɛneɛ ne anwanwadeɛ ne honhom krongron akyɛdeɛ bɔ ɔkyekyɛle kyɛbɔ ye pɛ te naso lili ye nwo adanzeɛ.

5 Ewiase bɔ ɔba, bɔ yɛka ye nwo dwirɛ ne, nná abɔfo yeɛ Nyameɛ afa awura bɛ sa ɔ. 6 Mmom bɛlili ye nwo adanzeɛ wɔ nekaa bie kyɛ:

"Sona po te nzu bɔ ɛkaye ye ne,

na dasaniɛ te nzu bɔ ɛdwene ye nwo ne?

7 Amaa wawa ase kaa watra abɔfo nemɔ;

afa anuonyam ne nidie abɔ ye abotire

na afa wɔ sa anoa adwuma awura ye sa.

8 Afa nikye biala agua ye gya bo."

Mmerɛ bɔ Nyameɛ fale nikye biala wurale ye sa ne, nikye fee nne berɛ bɔ wamva wanwura yebo ɔ. Kesaalae de, yɛnnwu nningyein bɔ wafa wawura ye sa ne. 9 Nakoso Yesu bɔ bɛmaa ɔwale ase kaa trale abɔfo nemɔ ne, yɛnwu kyɛ ɔnate amaneɛ bɔ onwuni ye tonn oodwuli ewue nu nati, bafa anuonyam ne nidie babɔ ye abotire, kyɛbɔ ɔkɔyɛ a ɔnate Nyameɛ adom so kɔha ewue kɔnea kɔma ebiala.

10 Bɔ ɔkɔyɛ ne wahyɛ mmeni pee anuonyam ne, né ɔte pa kyɛ Nyameɛ bɔ ɔbɔle nikye biala, na yeti yeɛ nikye biala wɔ berɛ ne maa Yesu bɔ otira bɛ ngoa nzafoa ne nwu amaneɛ, kyɛbɔ ɔkɔyɛ a okoli mu, na wahyɛ ye mmaa pee anuonyam. 11 Na Yesu bɔ ɔte mmenia nwo ne, ɔne bɛ bɔ ɔte bɛ nwo namukoraati fi neka-horɛ, yeti ɔnyɛ ye fɛle kyɛ ɔkɔfrɛ bɛ aliemaa mɔ. 12 Na ɔhane kyɛ:

"Ngɔbɔ wɔ dumaa ngohyire nniema mɔ;

ngɔfa ayɛyie dwein ngɔye wɔ ayɛ wɔ asafo nanu."

13 Yeɛ osa hane kyɛ:

"Ngɔfa me nwo ngɔto ye so."

Na ɔhane ye bieku kyɛ:

"Nea, mene ngwalaa bɔ Awurade afa bɛ ama me ne."

14 Na ɔnate kyɛ ngwalaa ne te mogya ne anwoɔnaen nati, ye koso ɔɔyɛle mogya ne anwoɔnaen, kyɛbɔ ɔkɔyɛ a, ɔnate ye wue naso kɔsɛkye Abɔnzam bɔ ɔfa ewue ba ne. 15 Ná wamaa bɛ bɔ ewue nwo suronyi ti, bafa bɛ ngoa mukoraati bayɛ ngoaa ne anya ahofadie.

16 Bɔ ɔte yeɛ ole kyɛ, nná abɔfo yeɛ ɔboka bɛ ɔ, mmom ɔboka Abraham bosofoɛ. 17 Ye sɔ nati, né odikyɛ ɔyɛ kyɛ oliema nemɔ wɔ nikye biala nu, kyɛbɔ ɔkɔyɛ a, ɔkɔyɛ sɔfo panyi bɔ onwu anwunvoin na odi nahorɛ wɔ ɔsom bɔ ɔfa ma Nyameɛ nanu, na wamaa wabɔ afɔleɛ wapata mmenia né bɔne. 18 Na ɔnate kyɛ bɛsɔle ye bɛneane maa onwuni amaneɛ nati, ɔkora boka bɛbɔ bɛsɔ bɛ bɛnea ne.