1 Ɛhemɔ si ne, Yesu sa yele ye nwo ali hyirele asuafoɛ nemɔ wɔ Tiberia po nanwo. Ná sɔa yeɛ ɔyɛle ye ɔ. 2 Né Simon Petro ne Tomas (bɔ bɛfrɛ ye Atta ne), Natanael bɔ ofi Kana bɔ ɔwɔ Galilea ne, Sebedeo mmaa nemɔ, ne asuafoɛ nyɔ yeɛ né bɛwɔ berɛ ɔ. 3 Yeɛ Simon Petro ha hyirele bɛ kyɛ: "Me kwaahye gyein." Na bɛha bɛhyirele ye kyɛ: "Yɛ ne wɔ kɔhɔ." Yeti bɛfite bɛɛfole ɛlɛen bɛhɔle, nakoso kɔngɔen namu, bannya kõ po.

4 Na aleɛ baahe ne, né Yesu gyi ɛpo ne noa berɛ, nakoso asuafoɛ nemɔ annwu kyɛ Yesu ane. 5 Yeɛ Yesu ha hyirele bɛ kyɛ: "Me mmaa mɔ, ɛmɔ anya naen ne bie?" Bɛhane kyɛ: "Daabi oo!" 6 Yeɛ ɔha hyirele bɛ kyɛ: "Ɛmɔgua nɛt ne wɔ ɛlɛen ne famaa so, na ɛmɔ konya bie." Yeti bɛyɛle ye sɔ, na egyein bɔ bɛhyele bɛ ne, né bɛngora nɛt ne po twetwe. 7 Ɛberɛ yeɛ suaniɛ bɔ Yesu dɔ ye ne ha hyirele Simon Petro kyɛ: "Awurade ane!" Simon Petro tele kyɛ Awurade yeɛ ogyi dɔ ne, ɔfale ye atadeɛ ne wurale (ofikyɛ ne ye nwo la so), na ɔtole ye nwo tole nzue nanu. 8 Nakoso bɛ ngaa ne de, bɛfale ɛlɛen kamba ne bɛwale, na bɛhwene nɛt bɔ naen wɔ nu ne bɛwale, ofikyɛ nekaa bɔ ne bɛwɔ ne, né ɔne aseɛ ne afia nwale, né ɔte kɔyɛ kyɛ 90 mitɛs.*

9 Bɛwale ɛpo ne noa ne, bɛnwuni kyɛ bahũa see bɔ naen gua so, na bɛnwuni paanoo koso. 10 Yesu ha hyirele bɛ kyɛ: "Egyein bɔ ɛmɔ ahye ye kesaalae ne, ɛmɔfa bie bɛbra." 11 Yeti Simon Petro dwɔsole, na ɔɔhwene nɛt ne wale, né egyein mbiri-mbiri 153 ayi ye dɛen, nakoso nɛt ne andete. 12 Yesu ha hyirele bɛ kyɛ: "Ɛmɔbra bɛɛdidi." Nakoso bɛ nu biala annya akukuduro ammisa ye kyɛ: "Wɔ yeɛ ɛle nwa?" Ofikyɛ né bɛse kyɛ Awurade ane. 13 Yesu fale paanoo ne mane bɛ, na sɔ ala yeɛ ɔyɛle egyein ne ɔ. 14 Yesu tingye fili ewue nu ne, né ɛhe te ye pɛn nza so bɔ waye ye nwo ali wahyire asuafoɛ nemɔ ɔ.

15 Bɛdidi bɛyiele ne, Yesu bisale Petro kyɛ: "Simon, Yohane awa, ɛdɔ me tra ɛhemɔ?" Petro hane kyɛ: "Yoo, Awurade, ɛse kyɛ medɔ wɔ." Yesu ha hyirele ye kyɛ: "Ma me mmoan ne aleɛ." 16 Yesu sa bisale ye bieku kyɛ: "Simon, Yohane awa, ɛdɔ me?" Petro hane kyɛ: "Yoo, Awurade, ɛse kyɛ mekuro wɔ dwirɛ." Yesu ha hyirele ye kyɛ: "Nea me mmoan naso." 17 Osa bisale ye pɛn nza so kyɛ: "Simon, Yohane awa, ɛkuro me dwirɛ?" Na Petro wora bɔle kyɛ wabisa ye pɛn nza kyɛ, "Aso ekuro me dwirɛ?" Yeti ɔha hyirele ye kyɛ: "Awurade, ɛse nikye biala, ɛse kyɛ mekuro wɔ dwirɛ." Yesu ha hyirele ye kyɛ: "Ma me mmoan ne aleɛ. 18 Nahorɛ paa bɔ meka mekyire wɔ yeɛ ole kyɛ, mmerɛ bɔ ne ɛte abrandeɛ ne, wɔ bɔbɔ yeɛ ne ewura wɔ atadeɛ nate kɔ nekaa biala bɔ ekuro ɔ, nakoso sɛ ɛyɛ aworowaa a, ɛkɔ tengyɛ wɔ sa, ná ebie awura wɔ atadeɛ, ná wafa wɔ wahɔ nekaa bɔ okuro ɔ." 19 Ɔhane ɛhe fa hyirele ewue horɛ bɔ ne Petro kowu kɔhyɛ Nyameɛ anuonyam ne. Ɔhane ɛhe yiele ne, ɔha hyirele ye kyɛ; "Di me si."

20 Petro pɛle ye nye, na onwuni suaniɛ bɔ Yesu kuro ye dwirɛ ne kyɛ oli bɛ si. Sɔ Suaniɛ ne yeɛ nnɔsoa bɔ bɛdidi, né watena wakisa Yesu, na obisale ye kyɛ: "Awurade, nwa yeɛ ɔbaaye wɔ ma ne?" 21 Yeti, mmerɛ bɔ Petro nye bɔle ye so ne, obisale Yesu kyɛ: "Awurade, nná ɛhe koso ɛ?" 22 Yesu ha hyirele ye kyɛ: "Sɛ mepena kyɛ ɔtena berɛ kodwu kyɛ ngɔwa a, ɔfa wɔ nwo nzu? Wɔ de, kɔ so di me si." 23 Yeti, né bɛkeka ye wɔ aliemaa nemɔ nu kyɛ, sɔ suaniɛ he ngowu. Nakoso Yesu anga angyire ye kyɛ ongowu, mmom bɔ ɔhane yeɛ ole kyɛ: "Sɛ mepena kyɛ ɔtena berɛ kodwu kyɛ ngɔwa a, ɔfa wɔ nwo nzu?"

24 Sɔ suaniɛ ne yeɛ odi ɛhemɔ nwo adanzeɛ ne, na ye yeɛ ɔhworɔle ɛhemɔ ne, na yɛse kyɛ ye adanzeɛ ne te nahorɛ.

25 Nahorɛ dwirɛ yeɛ ole kyɛ, Yesu yɛle nningyein pee; sɛ bɛhane kyɛ bɛtworɔ ye mukoraati a, nwomaa bɔ ahaa bɛkɔhworɔ ye wɔ nu ne, menne menni kyɛ ɔkɔhɔ wiase po.