1 Né bɛ bɔ bɛdide toɔ ne abɔnefoɛ taa ba Yesu berɛ batie ye. 2 Na Farisifoɛ ne atwerɛfoɛ nemɔ hyɛle yebo yɛle nwuhu-nwuhu kyɛ: "Sɔ akoaa he sosɔ abɔnefoɛ so, na ɔne bɛdidi." 3 Yeɛ Yesu yɛle mvandoho bie hyirele bɛ kyɛ: 4 "Ɛmɔ nu nwa yeɛ ole mmoan 100, na bɛ nu kõ mini a, ɔngɔyakyi 99 ne berɛ ngɔhɔ ngɔpena kõ ne tonn ngodwu kyɛ okonwu ye ɔ? 5 Na sɛ onwu ye a, anigye ti, ɔfa ye to ye kɔme anwo, 6 na ɔba awuro a, ɔfrɛ ye nnamvo ne ye mmango mɔ ka kyire bɛ kyɛ, ‘Ɛmɔma yɛgye yɛ nye, ofikyɛ manwu me boan bɔ ominini ne.’ 7 Sɔ ala yeɛ meka mekyire ɛmɔ kyɛ, sɛ ɔbɔnefoɛ kõ sakra a, anigye bɔ ɔba anwuro ne, ɔtra teneneefoɛ 99 bɔ benhia adwene-sakra ne deɛ ne.

8 "Anaa brasua beni yeɛ ole drakma buru bɔ enu kõ mini a, ɔngɔsɔ kanea ngɔpra awuro berɛ, na ɔngɔpena drakma ne tonn ngodwu kyɛ okonwu ye ɔ? 9 Na sɛ onwu ye a, ɔfrɛ ye nnamvo ne ye mmango mɔ ka kyire bɛ kyɛ, ‘Ɛmɔma yɛgye yɛ nye, ofikyɛ manwu me sikaa bɔ ominini ne.’ 10 Sɔ ala yeɛ meka mekyire ɛmɔ kyɛ, sɛ ɔbɔnefoɛ komapɛ sakra a, kyɛbɔ Nyameɛ abɔfo nye gye ne, ɔtte angorɛ."

11 Yesu toale so kyɛ: "Né biaa bie le mmaa mmrienzua nyɔ. 12 Ná kamba ne ha hyirele ye baba kyɛ, ‘Daa, kyɛ agyapadeɛ nanu na fa me deɛ ma me.’ Yeti, ɔhyɛle agyapadeɛ nanu mane bɛ. 13 Ngyẽa kaa bie si ne, ɔwa kamba ne boɔboale ye nningyein mukoraati noa, na ɔfale ye ti bɔle nu hɔle maen bie so wɔ dede. Ná ɔɔbɔle bra–bɔne sɛkyele ye agyapadeɛ namu. 14 Ye sikaa namukoraati yiele ne, ɛhɔen kandinga bie sili maen nanu, ná ohiane ye pa–pa. 15 Yeti ɔfale ye nwo bɔle kuromani bie wɔ maen nanu, na ɔfale ye hɔle ye aseɛ so kyɛ ɔɔnea ye mbrako. 16 Né ɛhɔen kora ku ye alaa maa onyane ye a, ahaa okoli aleɛ bɔ mbrako ne di ne bie, nakoso ebiala amma ye hwee. 17 Ye nye wale ye nwo so ne, ɔhane kyɛ, ‘Me baba ngoaa nanu beni, yeɛ aleɛ bulli ye so ɔ? Nakoso nea, ɛhɔen yeɛ oku me wa ne! 18 Ngosa ngɔhɔ me baba berɛ, na maha mahyire ye kyɛ, "Daa, mayɛ bɔne matia Nyameɛ ne wɔ. 19 Yeti, menvata kyɛ ɛfa me yɛ ɛwa, mesrɛ wɔ, wɔ de ma nyɛ wɔ ngoaa nanu kõ."’

20 "Na odwɔso hɔle ye baba dɔ. Ɔwɔ dedeede bɔ ye baba nye bɔle ye so ne, ɔyɛle ye anwunvo, yeti otuli mirika yiale ye, na ɔyɛle ye atuu fele ye noa nwo. 21 Yeɛ akwalaa ne ha hyirele ye baba kyɛ, ‘Daa, mayɛ bɔne matia Nyameɛ ne wɔ; yeti menvata kyɛ ɛka kyɛ nde ɛwa.’ 22 Nakoso baba ne ha hyirele ye ngoaa nemɔ kyɛ: ‘Ɛmɔha ɛmɔ nwo bɛɛfa atadeɛ bɔ ɔyɛ nyemene paa bɛwura ye, na ɛmɔfa kaa bɛgua ye sa, na ɛmɔwura ye mmaboa. 23 Afei ɛmɔye nandwie ba bɔ ɔte piri paa bɛhu ye, na ɛmɔma yɛdidi na yɛgye yɛ nye. 24 Ofikyɛ mma ne wuli, na wasa wawa ngoa nu, ominini, na manwu ye.’ Yeti bɛhyɛle yebo bɛgyele bɛ nye.

25 "Né ɔwa brienzua panyi ne ahɔ fiɛso, na ɔnate atee so ɔba bɔ waha ka maa odwu awuro ne, ɔtele dwein ne abilie wɔ awuro berɛ. 26 Yeti ɔfrɛle ngoaa nanu kõ bisale ye bɔ ɔkɔ so ɔ. 27 Na akoaa ne ha hyirele ye kyɛ: ‘Eliema ne awa, yeti wɔ baba ahu nandwie awa kandinga, ofikyɛ ye sa aha ye, na ɔte apɔ.’ 28 Ɛhe maa ɔwa panyi ne fɛle yaa paa, ná wangɔ awuro berɛ. Yeti ye baba wale ye berɛ kyɛ ɔbaapa ye kyerɛ. 29 Nakoso ɔha hyirele ye baba kyɛ: ‘Daa, afoɛ pee yeɛ mafa masõ wɔ ɔ, na mmuli wɔ mmeraa so ɛlɛhomapɛ po. Nakoso ɛhora manne me abɔngye ba kõ po kyɛ ngu ye, na mene me nnamvo mɔ fa gye yɛ nye. 30 Nakoso ɛwa he bɔ wasɛkye w'agyapadeɛ wɔ tuutuufoɛ nwo ne wale ala pɛ, ahu nandwie ba kandinga ne ama ye.’ 31 Yeɛ baba ne hane kyɛ: ‘Mma, wɔ de daa mene wɔ wɔ wa, na bɔ nne ye biala te wɔ deɛ. 32 Nakoso odikyɛ yɛdi ahurusi na yɛmaa yɛ nye gye, ofikyɛ eliema ne wuli, na wasa wawa ngoa nu, ominini, na yanwu ye.’ "