LUKA 20

1 Ɛlɛho bie, ne Yesu ka nzɛmba ne kyire mmenia biemɔ wɔ asɔre awuro berɛ, na sɔfo mbanyi ne atwerɛfoɛ ne kuro nanu mbanyi ne wale ye berɛ, 2 yeɛ bɛbisale ye kyɛ: "Ka kyire yɛ, tumi beni yeɛ ɛfa yɛ sɔ nningyein hemɔ ne? Na nwa yeɛ ɔmane wɔ sɔ tumi ne?" 3 Yesu ha hyirele bɛ kyɛ: "Mepena kyɛ me bisa ɛmɔ dwirɛ bie. Ɛmɔha behyire me, 4 Yohane asubɔ ne, né ofi anwuro, anaa ofi sona?" 5 Na bɛdwenene ye nwo kyɛ: "Sɛ yɛka kyɛ, ‘ofi anwuro’ a, okobisa kyɛ, ‘Nzuati yeɛ né ɛmɔnne ye benni ne?’ 6 Nakoso sɛ yɛka kyɛ, ‘ofi sona’ a, mmenia ne kosi yɛ nyɔboɛ, ofikyɛ bɛ mukoraati bedɛ bɛdi kyɛ né Yohane te diifoɛ." 7 Yeti bɛha bɛhyirele ye kyɛ bɛnze nekaa bɔ ofi ɔ. 8 Yesu ha hyirele bɛ kyɛ: "Nzaade me koso, tumi bɔ mefa meyɛ sɔ nningyein hemɔ ne, mengɔha mengohyire ɛmɔ."

9 Yeɛ ɔyɛle mvandoho he hyirele mmenia nemɔ ɔ: "Baba bie yɛle bobe boo, na ɔfa wurale ahwɛsofoɛ sa tule atee, ɔhɔle ne, ɔhyɛle kaa. 10 Bobe ne mmerɛ sone ne, ɔsomane akoaa bie hɔle ahwɛsofoɛ ne berɛ, kyɛ oole bobe né mmaa ne bie berɛ ye. Nakoso ngoaa nemɔ bole ye, na bɛmaa ɔfale ye sa nzaa-nzaa hɔle. 11 Osa somane akoaa foforɛ, ye koso, bɛbole ye bɛguale ye nyunu ase, yeɛ bɛmaa ɔfale ye sa nzaa-nzaa hɔle ɔ. 12 Yeɛ ɔsomane bɔ ɔtɔ so nza, na ɛhe de, bɛpirale ye paa, yeɛ bɛfoane ye ɔ. 13 Yeɛ bobe boo wura ne bisale ye nwo kyɛ: ‘Nzu yeɛ nyɛ ɔ? Ngɔsoma me dɔba ne, ye de, bɛkɔfɛle ye.’ 14 Nakoso ahwɛsofoɛ nemɔ nwuni ye ne, bɛha bɛhyirele bɛ nwo kyɛ: ‘Koliagyaa ne ɛhe. Ɛmɔma yɛhu ye, ná agyapadeɛ né ayɛ yɛ deɛ.’ 15 Yeti, bɛfale ye bɛfili bobe boo nanu bɛɛhuni ye. Ɛmɔnea a, nzu yeɛ ɛboo ne wura ne kɔfa kɔyɛ bɛ ɔ? 16 Ɔkɔwa kɔɔsɛkye sɔ ahwɛsofoɛ nemɔ, ná wafa ɛboo ne wama mmenia foforɛ." Bɛtele ɛhe ne, bɛhane kyɛ: "Nyameɛ pa gua!" 17 Nakoso Yesu neane bɛ haa, yeɛ ɔhane kyɛ: "Ye de, edwirɛ he bɔ bɛhworɔle ne, yebo kyire sɛɛ?

‘Nyɔboɛ bɔ brekyafoɛ ne gyi tole ne,

ɛhene yeɛ waayɛ nyɔboɛ bɔ ye nwo hia paa ne.’

18 Ebiala bɔ okofĩ sɔ nyɔboɛ naso ne, okobubu pasaa; ná sɛ nyɔboɛ ne tɔ ebie so a, okotĩ ye muhu-muhu."

19 Atwerɛfoɛ ne sɔfo mbanyi nemɔ nwuni ye kyɛ, bɛ ti ala yeɛ Yesu yɛle sɔ mvandoho ne, yeti né bɛpena kyɛ bɛkye ye berɛ ala, nakoso né bɛsuro mmenia ne. 20 Yeti né bɛtetɛ ye. Na ye si ne, bɛbɔle mmenia biemɔ paa kyɛ, bɛyɛ bɛ nwo kyɛ bɛte mmeni pa, kyɛbɔ ɔkɔyɛ a, ɔkɔha edwirɛ bie maa bekonya ye, ná bafa ye bahɔ awaen ne atumvoɛ nemɔ nyunu. 21 Na bɛbisale ye kyɛ: "Kyerɛkyerɛniɛ, yɛse kyɛ wɔ dwirɛ ne wɔ ngyerɛkyerɛ te nahorɛ; ɛnnea sona nyunu, na bɔ ɛka fa Nyameɛ nwo ne koso te nahorɛ. 22 Mmeraa ma atee kyɛ yetua toɔ yɛma Kaesare, anaa ɔmma ate?" 23 Nakoso onwuni adwene bɔ otira bɛ ne, yeɛ ɔha hyirele bɛ kyɛ: 24 "Ɛmɔma me sikaa ne bie. Nwa foto ne ye sa noa yeɛ ɔwɔ so ne?" Bɛhane kyɛ: "Kaesare." 25 Yeɛ ɔha hyirele bɛ kyɛ: "Ye de ɛmɔtua Kaesare deɛ bɛma Kaesare, na ɛmɔtua Nyameɛ deɛ bɛma Nyameɛ." 26 Yeti, bangora bamma wanga edwirɛ tɛɛ biala wɔ mmenia ne nyunu. Mmon ye ngyerɛkyerɛ ne maa bɛ nwo dwirili bɛ, na bɛyɛle konn.

27 Yesi ne, Sadukifoɛ nanu bie wale ye berɛ, bɛ yeɛ ne bɛnwa ewue tingyele biala nne berɛ ne. Na bɛbisale ye kyɛ: 28 "Kyerɛkyerɛniɛ, Mose hworɔ mane yɛ kyɛ, sɛ brienzua bie wu yakyi ɔye, ná olle ba a, odikyɛ oliema brienzua gya ɔye ne, na ɔwo mmaa ma ye. 29 Né yɛne mmrienzua nzoo bie wɔ wa; bɔ oli moa ne gyale braa, nakoso ɔne ye anwo yeɛ owuli ɔ. 30 Bɔ ɔtɔ so nyɔ ne koso, sɔ ala; 31 yeɛ bɔ ɔtɔ so nza ne koso gyale ye. Aliemaa nzoo namukoraati gyale, nakoso ebiala ne ye anwo mmaa, yeɛ owuli ɔ. 32 Awieɛ koraa ne, maame ne koso wuli. 33 Yeti, sɛ bɛtingye bɛ a, brasua ne kɔyɛ nwa aye? Ofikyɛ mmenia nzoo namukoraati gyale ye."

34 Yeɛ Yesu ha hyirele bɛ kyɛ: "Mmenia bɔ bɛwɔ berɛ ɛnɛ ne de, bɛgya, na bɛfa mmrasua bɛma agyaa. 35 Nakoso bɛ bɔ bɛnwu bɛ kyɛ bɛfata kyɛ bɛtena ewiase bɔ ɔba nanu, ɔne bɛ bɔ bɛkotingye bɛ bɛkofi ewue nu ne de, bɛngogya, bɛngɔfa bɛ bɛngɔma agyaa, 36 na bɛngonwu kõ, ofikyɛ bɛkɔyɛ kyɛ abɔfo. Bɛte Nyameɛ mmaa, ofikyɛ bɛkotingye bɛ bɛkofi ewue nu. 37 Mose po maa yɛnwuni ye wɔ ndire bɔ né ɔsɔ nanwo dwirɛ nanu kyɛ, awufo kotingye; ofikyɛ ɛberɛ ne, ɔfrɛle Awurade kyɛ, Abraham Nyameɛ, Isaac Nyameɛ, yeɛ Yakob Nyameɛ. 38 Ɔtte awufo Nyameɛ, mmom ɔte ateasefoɛ Nyameɛ; ofikyɛ ye nye so de, bɛ mu bɛte ase." 39 Yeɛ Sadukifoɛ nanu bie hane kyɛ: "Kyerɛkyerɛniɛ, bɔ aha ne te nahorɛ kaenn." 40 Ofi sɔ mmerɛ ne, bɛ nu biala ammɔ ye nwo mmusue ammisa ye dwirɛ kõ.

41 Yeɛ Yesu bisale mmenia ne kyɛ: "Nzuati yeɛ bɛka kyɛ, Kristo né te David awa ɔ? 42 Ofikyɛ David bɔbɔ hane ye wɔ Edwein nwomaa nanu kyɛ:

‘Awurade ha hyirele me wura kyɛ,

tena me sa famaa so

43 kodwu kyɛ, ngɔfa w’atamfo ngogua wɔ gya bo.’

44 David frɛ ye me wura, ye de, ɔkɔyɛ sɛɛ ne wayɛ ɔwa?"

45 Mmenia namukoraati gu so betie ne, ɔha hyirele ye asuafoɛ ne kyɛ: 46 "Ɛmɔnea ɛmɔ nwo ye wɔ atwerɛfoɛ nemɔ nwo. Bɔ bɛkuro yeɛ ole kyɛ, bɛkowura ndadeɛ ndee–ndee bɛkohini, na balɛ́ dwaaso ngyeaa. Sɛ bɛkɔ sua bɔ beyia nu nanu a, bɛpena bia pa, na sɛ bɛkɔ paati bo a, bɛpena nekaa bɔ odi mu bɛtena. 47 Nakoso bɛsisi kunaniɛ bedɛ ye nwo nningyein, na nyaatwom ti, bɛbɔ mbaeɛ tendebaa. Asotwe bɔ ɔkɔwa bɛ so ne, ɔkɔtra ebiala deɛ."