1 Homeda bie, né ɔnate hwiit bo bie nu, na ye asuafoɛ nemɔ tetele hwiit ne bie, na bɛposale ye wɔ bɛ sa nu belili. 2 Ɛhe ati, Farisifoɛ nemɔ bie bisale ye kyɛ: "Nzuati yeɛ ɛmɔyɛ nikye bɔ mmeraa mma atee kyɛ bɛyɛ ye Homeda ne?" 3 Nakoso Yesu yele bɛ noa kyɛ: "Bɔ David yɛle, mmerɛ bɔ ne ɛhɔen ku ɔne ye mmrandeɛ nemɔ ne, ɛmɔ kenngale? 4 Ɔhɔle Nyameɛ awuro berɛ oolɛle paanoo bɔ bafa bawa Nyameɛ nyunu ne lili, na ɔfale bie mane ye mmrandeɛ nemɔ. Né mmeraa mma atee kyɛ ebiala di sɔ paanoo ne bie, sana sɔfo nemɔ ngome." 5 Yeɛ ɔha hyirele bɛ kyɛ: "Sona Awa ne yeɛ ɔte Homeda ne Wura ɔ."

6 Homeda foforɛ koso, ɔhɔle sua bɔ beyia nu nanu, na ɔhyɛle yebo kyɛ ɔyɛ ngyerɛkyerɛ. Né biaa bie bɔ ye sa awu wɔ berɛ. 7 Né atwerɛfoɛ ne Farisifoɛ nemɔ nea ye haa, né bɛnea kyɛ ɔkɔsa biaa ne anwonyerɛ homeda ne, na banya edwirɛ bie bafa babɔ ye sommoɛ. 8 Ye de, né ɔse adwene bɔ ɔwɔ bɛ tianu ɔ, yeti ɔha hyirele baba bɔ ye sa awu ne kyɛ: "Dwɔso bagyina afia wa." Yeti, odwɔso oogyinane berɛ. 9 Yeɛ Yesu ha hyirele ye kyɛ: "Me bisa ɛmɔ, aso mmeraa ma atee maa bɛyɛ nikye pa anaa nikye tɛɛ homeda? Kyɛ bɛkole ebie ngoa anaa bɛkɔsɛkye ebie?" 10 Ɔneane bɛ mukoraati yiale ne, ɔha hyirele biaa ne kyɛ: "Tengyɛ wɔ sa nanu." Na ɔyɛle sɔ ne, ye sa ne yɛle yé. 11 Nakoso bɛ de, bɛfɛle yaa paa, na bɛne bɛ nwo susuli bɔ bɛkɔfa bɛkɔyɛ Yesu nanwo.

12 Sɔ ngyẽa nemɔ nu ne, ɔhɔle bokaa bie so ɔɔbɔle mbaeɛ, na ɔbɔle Nyameɛ mbaeɛ kɔngɔen namukoraati. 13 Aleɛ hene ne, ɔfrɛle ye asuafoɛ nemɔ, na ɔyele bɛ nu 12, na osa frɛle bɛ asomafoɛ. Bɛ dumaa yeɛ ole: 14 Simon bɔ ɔtole ye dumaa Petro ne, oliema Andrea, Yakobo, Yohane, Filipo, Bartolomeo, 15 Mateo, Tomas, Alfeo awa Yakobo, Simon bɔ bɛfrɛ ye mmɔden-bɔfoɛ ne, 16 Yakobo awa Yuda, yeɛ Yuda Iskariot, bɔ yesi ne, ɔyele ye mane ne.

17 Na ɔne bɛ dwu wale, yeɛ bɛɛgyinane aseɛ frɛtɛɛ bie aso; né ye asuafoɛ pee ne mmenia bɔ bɛfi Yudea ne Yerusalem, ne bɛ bɔ bɛfi Sidon ne Tiro ɛpo ne noa dɔ namukoraati wɔ berɛ, bɛwale kyɛ bɛbaatie ye, ná bɛmaa ɔsa b'anwonyerɛ. 18 Na bɛ bɔ sunzummɔne wɔ bɛ so ne po, ɔsale bɛ anwonyerɛ. 19 Na ne mmeni lɔen namukoraati pena kyɛ bɛfa bɛ sa bɛka ye, ofikyɛ ne tumi fi ye nu ba, na ɔsale bɛ mukoraati anwonyerɛ.

20 Na ɔtole ye nye neane ye asuafoɛ nemɔ, yeɛ ɔhyɛle yebo hane kyɛ:

"Anigye yeɛ ole ahiafoɛ,

ofikyɛ Nyameɛ Ahennie ne te ɛmɔ deɛ.

21 Anigye yeɛ ole ɛmɔ bɔ kesaalae ɛhɔen ku ɛmɔ ne,

ofikyɛ ɛmɔ ko koyi.

Anigye yeɛ ole ɛmɔ bɔ kesaalae ɛmɔsu ne,

ofikyɛ, ɛmɔ kɔsere.

22 "Anigye yeɛ ole ɛmɔ, mmerɛ biala bɔ mmenia tane ɛmɔ nye, bɛye ɛmɔ bɛfi mmenia nu, bɛbɔ ɛmɔ alapaa, na Sona Awa nati, bɛsɛkye ɛmɔ dumaa bɛka kyɛ ɛmɔte nnipa-bɔnefoɛ ne. 23 Sɔ kyẽa ne, ɛmɔma ɛmɔ nye gye, ofikyɛ ɛmɔ akatua bɔ ɔwɔ anwuro ne te piri, na sɔ ala yeɛ bɛ baba mɔ yɛle adiifoɛ nemɔ ɔ.

24 Nakoso ɛmɔ bɔ ɛmɔte asikafoɛ ne de, ɛmɔ yaakɔ,

ofikyɛ, ɛmɔ anya ɛmɔ awerɛkyekye mukoraati bayie.

25 Ɛmɔ bɔ kesaalae ɛmɔ ko ayi ne, ɛmɔ yaakɔ,

ofikyɛ ɛhɔen kohu ɛmɔ.

Ɛmɔ bɔ kesaalae ɛmɔsere ne, ɛmɔ yaakɔ,

ofikyɛ ɛmɔ wora kɔbɔ maa ɛmɔ kosu.

26 Sɛ mmenia mukoraati ka ɛmɔ nwo dwirɛ pa a, ɛmɔ yaakɔ,

ofikyɛ sɔ ala yeɛ bɛ nana mɔ yɛle ngondombo adiifoɛ nemɔ ɔ.

27 "Na meka mekyire ɛmɔ bɔ ɛmɔtie me ne kyɛ: Ɛmɔhɔ so bɛlɔ ɛmɔ atamfo, na ɛmɔyɛ bɛ bɔ bɛkyi ɛmɔ ne pa, 28 ɛmɔhyira bɛ bɔ bɛdome ɛmɔ ne, na ɛmɔbɔ mbaeɛ bɛma bɛ bɔ bɛpɛ ɛmɔ nzoaa ne. 29 Sɛ ebie bɔ wɔ so kõ anu a, kakyi kõ ne koso ma ye; na bɔ okole w'atadeɛ bɔ ogua wɔ so ne, fa bɔ owura yebo ne boka so ma ye. 30 Ebiala bɔ ɔkɔsrɛ wɔ nikye ne, ma ye bie, na nikye bɔ okole kofi wɔ berɛ ne, nnedɛ ye kõ.

31 "Afei koso, bɔ ɛmɔpena kyɛ mmenia yɛ ma ɛmɔ ne, ɛmɔyɛ sɔ ala bɛma bɛ.

32 "Sɛ ɛmɔdɔ bɛ bɔ bɛdɔ ɛmɔ ngome a, mvasoɛ beni yeɛ ɔwɔ so ɔ? Abɔnefoɛ po dɔ bɛ bɔ bɛdɔ bɛ ne. 33 Na sɛ bɛ bɔ bɛyɛ ɛmɔ pa yeɛ ɛmɔyɛ bɛ pa a, mvasoɛ beni yeɛ ɔwɔ so ɔ? Sɔ ala yeɛ abɔnefoɛ po yɛ ɔ. 34 Afei koso, sɛ ɛmɔma bosea, na ɛmɔfa bɛma bɛ bɔ ɛmɔnea atee kyɛ bɛkotua bɛkɔma ɛmɔ a, mvasoɛ beni yeɛ ɔwɔ so ɔ? Abɔnefoɛ po ma abɔnefoɛ bosea, kyɛbɔ ɔkɔyɛ a, bɛkotua bɛkɔma bɛ ɔ. 35 Nakoso ɛmɔ de, ɛmɔlɔ ɛmɔ atamfo, ɛmɔyɛ bɛ pa, ná ɛmɔbɔ bɛ bosea, bɔ ɛmɔnnea atee kyɛ bɛkɔyɛ bie bɛkosi ɛmɔ gya nu ɔ. Ɛhene yeɛ ɛmɔ akatua kɔyɛ piri, ná ɛmɔ ayɛ Anwuro-Anwuroniɛ ne mmaa; ofikyɛ ɔyɛ boniayɛfoɛ ne abɔnefoɛ mukoraati pa. 36 Ɛmɔhɔ so bɛnwu mmenia anwunvo, kyɛbɔ ɛmɔ Baba nwu anwunvo nala.

37 "Afei koso, ɛmɔyakyi atɛn bɔ ɛmɔbu mmenia ne, ná bammu ɛmɔ atɛn; nnɛmɔ dwudwo betia mmenia, na ebiala koso ngodwudwo ngotia ɛmɔ. Ɛmɔfa mmenia bɔne bɛhyɛ bɛ, na bɛkɔfa ɛmɔ deɛ bɛkɔhyɛ ɛmɔ. 38 Ɛmɔhyɛ nikye, na bɛkɔhyɛ ɛmɔ nikye. Bɛkowura kongo ne maa okoyi, ná bamia so, bawoso ye maa wabu wafa ye nwo kora ne bafa bagua ɛmɔ tena nu. Ofikyɛ kongo bɔ ɛmɔfa bɛsusu nikye bɛma mmenia ne, ɛhene ala yeɛ bɛkɔfa bɛkosusu bɛkɔma ɛmɔ ɔ."

39 Yeɛ ɔmane bɛ mvandoho kyɛ: "Ɛmɔnea a, anyesiniwaaniɛ kɔhora kohyire anyesiniwaaniɛ atee? Nná kumaa nu yeɛ bɛkoogua ɔ? 40 Suaniɛ biala nne berɛ bɔ ɔtra ye kyerɛkyerɛniɛ ɔ, nakoso ebiala bɔ bahyirehyire ye yé ne, ɔkɔwa kɔɔyɛ kyɛ ye kyerɛkyerɛniɛ ne. 41 Nzuati yeɛ ɛkora nwu ndɛtɛ * bɔ ɔla eliema nye so ne, ná mbuna bɔ ɔla wɔ bɔbɔ wɔ nye so ne de, ɛnnwu ye ɔ? 42 Ɔkɔyɛ sɛɛ na ahora aha ahyire eliema kyɛ, ‘Nniema, ma nye ndɛtɛ * bɔ ɔla wɔ nye so ne,’ aberɛ bɔ ɛnnwu mbuna bɔ ɔla wɔ nye so ne ɔ? Nyaatwomniɛ, di moa ye mbuna bɔ ɔla wɔ nye so ne, ɛhene kɔmaa ekonwu nikye yé, na ahora aye ndɛtɛ * bɔ ɔla eliema ne nye so ne.

43 "Bakaa pa biala nne berɛ bɔ osu mmaa tɛɛ ɔ, na sɔ ala yeɛ bakaa tɛɛ biala nzu mmaa pa. 44 Bakaa biala mmaa yeɛ ɔmaa bɛnwu bakaa horɛ ɔ. Ebie yeɛ ole kyɛ, bɛnndete borɔdoma wɔ mmowie so, na sɔ ala yeɛ bɛnndete bobe koso wɔ ɛfone so. 45 Sona pa de, nningyein pa bɔ waboɔboa ye noa wɔ y'ahone nu ne, ɛhene bie yeɛ ɔye fite ɔ, nakoso nnipa-bɔneniɛ de, nningyein tɛɛ bɔ waboɔboa ye noa wɔ y'ahone nu ne bie, yeɛ ɔye fite ɔ; ofikyɛ bɔ wabu so wɔ ahone nanu ne, yeɛ noa ne ka ɔ.

46 "Nzuati yeɛ ɛmɔfrɛ me ‘Awurade, Awurade’, nakoso ɛmɔnyɛ bɔ meka ne? 47 Ebiala bɔ ɔba me berɛ, ɔte me dwirɛ, na odi so ne, ngɔmaa ɛmɔ konwu bɔ ɔte ɔ: 48 Ɔte kyɛ biaa bie bɔ osi sua, na otuli bɔen maa ɔhɔle ase paa tole ye fapem ne siele nyɔboɛ so ne. Mmerɛ bɔ nzue yili ne, ɔɔbɔle sua ne, nakoso wangora wanwoso ye, ofikyɛ, osili ye yé. 49 Nakoso bɔ ɔte, na ɔnyɛ ye nwo hwee ne, ɔte kyɛ ebie bɔ osili ye sua siele ase, bɔ wando fapem ne. Nzue ne yi bɔle ne, ɛberɛ ala obu guale, na sua ne sɛkyele koraa."