1 Yesu hɔle Yeriko, na ɔnate kuro nanu ne, 2 né biaa bie bɔ bɛfrɛ ye Zakios wɔ berɛ, bɛ bɔ bɛdide ɛtoɔ ne, né ɔte bɛ mbanyi nanu kõ, na né ole sikaa paa. 3 Né ɔpena kyɛ onwu sona-horɛ bɔ bɛfrɛ ye Yesu ne, nakoso mmenia nati né onwu ye, ofikyɛ ne ɔte sii. 4 Yeti ɔhɔle anyunu ɔɔfole sikamore bakaa kyɛbɔ okonwu Yesu, ofikyɛ né Yesu kɔfa sɔ atee naso. 5 Yesu dwuli bakaa nabo ne, ɔtole ye nye neane anwuro, yeɛ ɔha hyirele Zakios kyɛ: "Zakios, yɛ ndɛ dwu ase, ofikyɛ ɛnɛ, odikyɛ metena wɔ awuro."

6 Ná Zakios yɛle ndɛ dwuli, na ɔfale anigye lɛle ye hɔle ye awuro. 7 Mmenia ne nwuni ɛhe ne, bɛhyɛle yebo bɛkekane kyɛ: "Ɔbɔnefoɛ he awuro yeɛ waatena ɔ." 8 Nakoso Zakios dwɔso gyinane berɛ, na ɔha hyirele Awurade kyɛ: "Awurade, nea, ngɔfa me agyapadeɛ ne bue ngɔma ahiafoɛ. Na bɔ masisi ebiala male ne, ngɔbɔ ye nwo nná ngɔma ye." 9 Yeɛ Yesu ha hyirele ye kyɛ: "Ɛnɛ, balɛ́ awuro he anufoɛ ngoa, ofikyɛ ye koso, ɔte Abraham awa. 10 Na Sona Awa ne wale kyɛ, ɔbaapena bɛ bɔ bamini ne, na odɛ́ bɛ."

11 Bɛguso betie ye ne, ɔyɛle mvandoho foforɛ bie; ɔyɛle sɔ mvandoho ne, ofikyɛ ne waha kaa maa odwu Yerusalem, na né mmenia ne adwene yɛ bɛ kyɛ, odwu Yerusalem a, ɛberɛ ala Nyameɛ Ahennie né kɔwa. 12 Ɔhane kyɛ: "Dehyeɛ bie tuli atee hɔle maen bie so wɔ dede kyɛ ɔkwaale tumi badi hene. 13 Ɔbaahɔ ne, ɔfrɛle ye ngoaa nanu buru mane bɛ nu biala mmɛnaa* kõ, yeɛ ɔha hyirele bɛ kyɛ: ‘Ɛmɔfa sikaa he bɛyɛ adwuma tonn maa odwu kyɛ ngosa ngɔwa.’ 14 Nakoso né ye maen nanufoɛ ne nguro ye dwirɛ, yeti bɛtuli mmenia maa bɛlili ye si bɛɛhane kyɛ: ‘Yɛnguro kyɛ biaa he di yɛ so hene.’

15 "Onyane tumi, ná osa wale ne, ɔfrɛle ngoaa bɔ ɔfale sikaa ne mane bɛ ne kyɛ bɛbra, na bɛma onwu mvasoɛ bɔ banya ye wɔ sikaa nanwo. 16 Bɔ oli moa ne wale, na ɔha hyirele ye kyɛ: ‘Me wura, mmɛnaa kõ bɔ ɛfa mane me ne, manya buru maboka so.’ 17 Yeɛ ɔha hyirele ye kyɛ: ‘Mo, ɛte akoaa pa! Ɔnate kyɛ ali kaa he anu nahorɛ nati, nea nguro buru so.’ 18 Bɔ ɔtɔ so nyɔ ne wale, yeɛ ɔhane kyɛ: ‘Me wura, manya mmɛnaa nnu maboka wɔ mmɛnaa kõ naso.’ 19 Na ye wura ne ha hyirele ye kyɛ: ‘Wɔ koso nea nguro nnu so.’ 20 Akoaa foforɛ wale ne, ɔhane kyɛ: ‘Me wura, wɔ mmɛnaa ne ɛhe, mva mveale ɛtena nu. 21 Bɔ ɔte yeɛ ole kyɛ, né mesuro wɔ, ofikyɛ wɔ dwirɛ yɛ se. Wɔ de, bɔ ɔtte wɔ deɛ yeɛ ɛfa ɔ, na bɔ elualle yeɛ ɛpɛ ɔ.’ 22 Yeɛ ye wura ne ha hyirele ye kyɛ: ‘Ɛtte akoaa pa! Wɔ noa dwirɛ abu wɔ fɔ. Nnaa ɛse kyɛ me dwirɛ yɛ se, bɔ ɔtte me deɛ yeɛ mefa ɔ, na bɔ nnuale yeɛ mepɛ ɔ? 23 Ye de, nzuati yeɛ amva me sikaa ne ando bank, na sɛ meba a, manya ye nwo nzihoɛ ɔ?’ 

24 "Yeɛ ɔha hyirele bɛ bɔ bɛgyigyi berɛ ne kyɛ: ‘Ɛmɔle mmɛnaa ne bɛfi ye sa nu, na ɛmɔfa bɛma bɔ onyane mmɛnaa buru ne.’ 25 Nakoso bɛha bɛhyirele ye kyɛ: ‘Yɛ wura, ole mmɛnaa buru oo!’ 26 Yeɛ ɔha hyirele bɛ kyɛ: ‘Meka mekyire ɛmɔ kyɛ, ebiala bɔ ole bie ne, bɛkɔfa pee bɛkɔboka ye so; nakoso bɔ olle bie ne de, kaa bɔ ole ye ne po, bɛkole bɛkofi ye sa nu. 27 Na me tamfo nemɔ, bɔ ne bɛnguro kyɛ medi bɛ so hene ne, ɛmɔfa bɛ bɛbra, na ɛmɔhũ bɛ wɔ me nyunu wala.’ "

28 Yesu hane ɛhe yiele ne, osili atee so kyɛ ɔkɔ Yerusalem. 29 Mmerɛ bɔ odwuli Olive Bokaa bɔ opingye Bɛtfage ne Betania naso ne, ɔsomane ye asuafoɛ nanu nyɔ, 30 yeɛ ɔha hyirele bɛ kyɛ: "Ɛmɔhɔ nnamue bɔ ɛmɔ nye ta ye dɔ nanu, ɛmɔwura nu a, ɛmɔ konwu kyɛ bamenda afunum ba bie bɔ ebiala tennane ye so lle. Ɛmɔ sangye ye, na ɛmɔfa ye bɛbrɛ me. 31 Na sɛ ebie bisa ɛmɔ kyɛ, ‘Nzuati yeɛ ɛmɔ sangye afunum ne?’ a, ɛmɔha behyire ye kyɛ: ‘Awurade hia ye.’ "

32 Bɛhɔle ne, bɛnwuni nikye biala kyɛbɔ baha bɛhyirele bɛ nala. 33 Bɛsangye afunum ne, ye mene ne bisale bɛ kyɛ: "Nzuati yeɛ ɛmɔ sangye afunum ne?" 34 Yeɛ bɛhane kyɛ: "Awurade hia ye." 35 Yeti bɛfale afunum ne bɛbrɛle Yesu, na bɛfale bɛ ndadeɛ bɛguale ye so maa ɔtenane so. 36 Ɔte afunum naso ne, mmenia fale bɛ ndadeɛ guale atee nanu maa ɔfale so. 37 Odwuli nekaa bɔ ɔtoro fi Olive Bokaa naso ne, ye asuafoɛ pembe namukoraati hyɛle yebo lili ahurusi, na nningyein mbiri-mbiri bɔ banwu ye nati, bɛbɔle ose bɛyele Nyameɛ ayɛ 38 kyɛ:

"Nhyira yeɛ ole bɔ ɔba kyɛ Ɔhene wɔ Awurade dumaa nu ne!

Asomdwie wɔ anwuro, na anuonyam wɔ anwuro-anwuro!"

39 Nakoso né Farisifoɛ ne biemɔ wɔ mmenia nanu, na bɛhane kyɛ: "Kyerɛkyerɛniɛ, dwudwo kyire w'asuafoɛ nemɔ." 40 Yeɛ ɔha hyirele bɛ kyɛ: "Meka mekyire ɛmɔ kyɛ, sɛ ɛhemɔ mua bɛ noa po a, nyɔboɛ kɔ teɛtea nu."

41 Opingye Yerusalem bɔ onwuni kuro ne, osuni, 42 na ɔhane kyɛ: "Wɔ, sɛ ɛnɛ kyẽa ye, ɛse bɔ ɔkɔmaa ekonya asomdwie a, ahaa ɔte pa! Nakoso kesaalae de, bafa bafea wɔ. 43 Ofikyɛ mmerɛ bie ba, bɔ w'atamfo kɔfa mmakaa bɔ yenoa te mvemveaa kɔyɛ ɛwaen kɔpɛ wɔ nwo koyia maa ɛkɔha afia, ná baha bamia wɔ. 44 Na bɛkɔdwiri ɛne wɔ mmaa bɔ bɛwɔ wɔ nu namukoraati bɛkogua ase, na bɛngɔyakyi nyɔboɛ wɔ nyɔboɛ so; ofikyɛ mmerɛ bɔ bɛɛneane wɔ ne, annwu ye."

45 Yesi ne, Yesu wurale asɔre awuro berɛ, na ɔfoane bɛ bɔ bɛtɔne nningyein wɔ berɛ namu, 46 yeɛ ɔha hyirele bɛ kyɛ: "Bahworɔ kyɛ, ‘M'awuro ne kɔyɛ mbaebɔ awuro,’ nakoso ɛmɔ de, ɛmɔ afa bayɛ awiefoɛ adwosuo."

47 Né Yesu yɛ ngyerɛkyerɛ wɔ asɔre awuro berɛ daa biala. Né sɔfo mbanyi, atwerɛfoɛ ne kuro nanu mbanyi ne pena ye ku ye; 48 nakoso bannya atee bangu ye, ofikyɛ né mmenia namukoraati ayɛ asoɛ betie edwirɛ bɔ ɔka ne.