1 Yesu yɛle mvandoho bie maa bɛnwuni kyɛ, ye nwo hia kyɛ bɛbɔ mbaeɛ daa bɔ bɛngɔma bɛ abanu ngobu ɔ. 2 Ɔhane kyɛ: "Né temmufoɛ bie wɔ kuro bie nu, ye ahɔ a onzuro Nyameɛ, yeɛ ommu sona koso. 3 Né kunaniɛ bie wɔ kuro nanu, na ne ɔtaa kɔ ye berɛ kɔka kyire ye kyɛ: ‘Edwirɛ bɔ wawa mene me tamfo ne afia ne, mesrɛ wɔ, bu atɛn tenenee ma me.’ 4 Ahyɛaseɛ ne, né ɔndɛ ye so, nakoso ye si ne, ɔha hyirele ye nwo kyɛ: ‘Ɔwɔ nu, menzuro Nyameɛ, yeɛ memmu sona, 5 nakoso ɔnate kunaniɛ he halɛ bɔ ɔha me nati, ngobu atɛn tenenee ngɔma ye, kyɛbɔ ɔkɔyɛ a, ɔngɔfa ye dwirɛ ne ngodwane me nwo kõ ɔ.’ " 6 Yeɛ Awurade hane kyɛ: "Temmufoɛ ne bɔ ɔndengyɛ ne po, ɛmɔtie bɔ ɔhane ɔ. 7 Ye de, bɛ bɔ Nyameɛ aye bɛ ne, sɛ besu bɛfrɛ ye eyia ne kɔngɔen a, ongobu atɛn tenenee ngɔma bɛ anaa? Ɛmɔnea a, ɔkɔhyɛ kora ne waboka bɛ? 8 Meka mekyire ɛmɔ kyɛ, okobu atɛn tenenee kɔma bɛ ndɛ-ndɛ. Nakoso sɛ Sona Awa ne ba a, aso okonwu gyidie sɔa bie wɔ aseɛ naso?"

9 Na bɛ bɔ bedɛ bɛ nwo bɛdi kyɛ bɛte teneneefoɛ, na bɛbu afoforɛ animtia ne, ɔyɛle mvandoho bie hyirele bɛ kyɛ: 10 "Mmenia nyɔ bie hɔle asɔre awuro berɛ kyɛ bɛkwaabɔ mbaeɛ, né kõ te Farisiniɛ, yeɛ ne kõ dide toɔ. 11 Farisiniɛ ne gyinane berɛ bɔle mbaeɛ mane ye nwo kyɛ, ‘O Nyameɛ, meda wɔ ase kyɛ nnde nnipa-bɔneniɛ, asisie, na menzɛkye agyaa te kyɛ mmenia bɔ baha ne. Ná meda wɔ ase kyɛ nnde kyɛ biaa he bɔ odidɛ ɛtoɔ ne koso ɔ. 12 Dapɛn biala meyɛ akɔngyere pɛn nyɔ, na bɔ menya ye biala, metua ye nwo taet.’ 13 Nakoso sona bɔ odidɛ toɔ ne de, ɔtele ye nwo gyinane nekaa bie, wampagya ye ti so wannea anwuro po, mmom ɔfale ye sa bobɔle ye hue so hane kyɛ, ‘Nyameɛ, nwu me anwunvo, ofikyɛ nde nnipa-bɔneniɛ.’ 14 Meka mekyire ɛmɔ kyɛ, biaa he kɔ ye awuro ne, né ɔte teneneeniɛ tra Farisiniɛ ne. Ofikyɛ ebiala bɔ ɔma ye nwo so ne, bɛkɔbrɛ ye ase, na ebiala bɔ ɔbrɛ ye nwo ase ne, bɛkɔma ye so."

15 Né bɛfa ngwalaa mmaa-mmaa bɛbrɛ ye kyɛ ɔfa ye sa ha bɛ. Na asuafoɛ ne nwuni ye sɔ ne, bɛteɛteane bɛ. 16 Nakoso Yesu frɛle ngwalaa nemɔ wale ye nwo berɛ, na ɔhane kyɛ: "Ɛmɔma ngwalaa nemɔ atee ma bɛbra me berɛ, nnɛmɔsi bɛ atee; ofikyɛ ɛhemɔ yeɛ Nyameɛ ahennie ne ɔte bɛ deɛ ɔ. 17 Nahorɛ bɔ meka mekyire ɛmɔ yeɛ ole kyɛ, ebiala bɔ wanne Nyameɛ Ahennie ne wandonu te kyɛ akwalaa ne, ɔngɔhɔ nu bie."

18 Yeɛ panyi bie bisale ye kyɛ: "Kyerɛkyerɛniɛ pa, nzu yeɛ meyɛ a, ngonya daa ngoa ɔ?" 19 Yesu ha hyirele ye kyɛ: "Nzuati yeɛ ɛka kyɛ nde sona pa ɔ? Ebiala nne berɛ bɔ ɔte pa ɔ, sana Nyameɛ ngome. 20 Nnaa ɛse mmeraa ne: ‘Nnɛsɛkye agyaa, nnɛdi awue, nnɛwia, nnɛdi adanzewia, bu wɔ baba ne wɔ maame.’ " 21 Yeɛ biaa ne hane kyɛ: "Mvi me ngwalaa nu, yeɛ mali ɛhe amukoraati so ɔ." 22 Yesu tele sɔ dwirɛ ne, ɔha hyirele ye kyɛ: "Waha nikye kõ bɔ odikyɛ ɛyɛ ɔ. Tɔne bɔ ɛle ye biala, na fa sikaa ne ma ahiafoɛ, sɛ ɛyɛ sɔ a, ekonya agyapadeɛ wɔ anwuro; afei bra bali me si." 23 Biaa ne tele sɔ dwirɛ ne, ye wora bɔle pa-pa, ofikyɛ né ole sikaa paa.

24 Yesu nwuni ye sɔ ne, ye wora bɔle, na ɔhane kyɛ: "Nea kyɛbɔ ɔyɛ se kyɛ asikafoɛ kɔhɔ Nyameɛ Ahennie nanu ɔ! 25 Nahorɛ, ɔkɔyɛ mmerɛ kyɛ afupɔngɔ kowura paneɛ bɔen nu, tra kyɛ sikaniɛ kɔhɔ Nyameɛ Ahennie nu ɔ." 26 Bɛ bɔ bɛtele sɔ dwirɛ ne hane kyɛ: "Ye de, nwa paa yeɛ okonya ngoa ɔ?" 27 Nakoso Yesu hane kyɛ: "Nikye bɔ sona ngora ye yɛ ne, Nyameɛ de, ɔnyɛ se mma ye." 28 Yeɛ Petro ha hyirele ye kyɛ: "Nea, yayakyi bɔ yɛle ye biala berɛ yaali wɔ si." 29 Yesu ha hyirele bɛ kyɛ: "Nahorɛ bɔ meka mekyire ɛmɔ yeɛ ole kyɛ, ebiala bɔ Nyameɛ Ahennie nati, wayakyi ye awuro, ɔye, oliema mɔ, ye awofo, ne ye mmaa mɔ berɛ ne, 30 bɛkɔbɔ ye nwo pee bɛkɔma ye wɔ wiase he anu, na okonya daa ngoa wɔ wiase bɔ ɔba nanu."

31 Yeɛ ɔfrɛle 12 ne hɔle ahameɛ, na ɔha hyirele bɛ kyɛ, "Ɛmɔnea, yɛfo yɛkɔ Yerusalem, na bɔ adiifoɛ nemɔ ha fale Sona Awa nanwo namukoraati kɔwa nu. 32 Bɛkɔfa ye bɛkɔma maen-maen nanufoɛ ne, na bɛkɔgoro ye nwo, bɛkɔpepɛ ye nzoaa, na batete ngɔserɛ bagua ye nwo. 33 Afei bɛkogwa ye, na bahu ye, na ye ɛlɛsa naso ne, ɔkɔdwɔso." 34 Nakoso asuafoɛ nemɔ ande sɔ dwirɛ nabo. Né bafa sɔ dwirɛ ne bafea bɛ, na ne bɛnze bɔ ɔka ye nwo dwirɛ ne po.

35 Opingye Yeriko ne, né anyesiniwaaniɛ bie te atee ne noa ɔsrɛ-srɛ sikaa. 36 Mmerɛ bɔ ɔtele kyɛ mmeni pee pɛ nu ne, né ɔpena kyɛ onwu bɔ ɔkɔso ɔ. 37 Bɛha behyirele ye kyɛ: "Nazerɛtniɛ Yesu yeɛ ɔpɛ nu ne." 38 Yeti ɔteane nu kyɛ: "Yesu, David awa, nwu me anwunvo!" 39 Bɛ bɔ bɛwɔ ye nyunu ne teɛteane ye, na bɛha bɛhyirele ye kyɛ ɔyɛ dinn. Nakoso ɛhene po maa ɔteɛteane nu serɛ kyɛ: "David awa, nwu me anwunvo!" 40 Yesu gyinane, na ɔha hyirele bɛ kyɛ, bɛfa ye bɛbra. Ɔwale ye nwo berɛ ne, Yesu bisale ye kyɛ: 41 "Nzu yeɛ ɛpena kyɛ meyɛ mema wɔ ɔ?" Yeɛ ɔhane kyɛ: "Awurade, ma nwu nikye." 42 Na Yesu hane kyɛ: "Nwu nikye; wɔ gyidie amaa wɔ nwo atɔ wɔ." 43 Na ɛberɛ nala, ye nye tele, na olili Yesu si yele Nyameɛ ayɛ. Mmerɛ bɔ mmenia ne nwuni ye ne, bɛyele Nyameɛ ayɛ.