1 Tiberio Kaesare ahennie né afoɛ bɔ ɔtɔ so 15 ne, né Pontio Pilato te amrado wɔ Yudea, né Herode di Galilea manzini naso, na ne oliema Filipo di Iturea ne Trakoniti manzini naso, yeɛ ne Lisania di Abilene manzini naso, 2 né Annas ne Kaiafa te sɔfo mbanyi. Sɔ mmerɛ ne, Nyameɛ dwirɛ wale Zakaria awa Yohane berɛ wɔ ɛserɛ so.

3 Na Yohane hyinini nguro bɔ wapɛ Yordan nwo wayia namukoraati nu, na ɔha hyirele mmenia ne kyɛ, bɛbɔ asu bɛfa behyire kyɛ basakra b'adwene na wamaa bafa bɛ bɔne bahyɛ bɛ; 4 kyɛbɔ bahworɔ ye wɔ diifoɛ Isaiah nwomaa nanu; bahworɔ kyɛ:

"Konviɛ bie tea nu wɔ ɛserɛ naso kyɛ:

‘Ɛmɔsiesie Awurade atee

ɛmɔma ye atee ne tengyɛ.

5 Ɛmɔtua bɔnza biala,

na ɛmɔdwiri mmokaa namukoraati bɛgua;

atee bɔ wahyea ne, ɛmɔma ɔyɛ tee,

na nekaa bɔ wayɛ mmɔnga-mmɔnga ne, ɛmɔma so yɛ trome-trome,

6 na anwoɔnaen biala konwu atee bɔ Nyameɛ kɔfa so kole ngoa ne.’ "

7 Na mmenia bɔ bɛwale ye berɛ kyɛ ɔbɔ bɛ asu ne, ɔha hyirele bɛ kyɛ: "Ɛkyerebene mmaa mɔ, nwa yeɛ ɔha hyirele ɛmɔ kyɛ, ɛmɔnwati ɛyaa bɔ ɔba ne? 8 Ɛmɔsu mmaa bɔ okyire adwene-sakra. Na nnɛmɔ keka bɛkyire ɛmɔ nwo kyɛ, ‘Yɛ baba yeɛ ole Abraham.’ Ofikyɛ meka mekyire ɛmɔ kyɛ, Nyameɛ kɔhora kɔmaa Abraham konya mmaa kofi nyɔboɛ hemɔ nu 9 Bɔ ɔte yeɛ ole kyɛ, bafa akumaa ne bato bakaa ne ndii nanwo dada, yeti bakaa biala bɔ onzu mmaa pa ne, bɛkɔpɛ na bagyi bagua see nu."

10 Yeɛ mmenia ne bisale ye kyɛ; "Ye de, nzu yeɛ yɛyɛ ɔ?" 11 Na ɔha hyirele bɛ kyɛ: "Sona bɔ ole ndadeɛ nyɔ ne, ɔma bɔ olle bie ne kõ, na bɔ ole aleɛ ne koso, ɔyɛ sɔ ala." 12 Bɛ bɔ bɛdide toɔ ne po wale maa ɔbɔle bɛ asu, na bɛbisale ye kyɛ: "Kyerɛkyerɛniɛ, nzu yeɛ yɛyɛ ɔ?" 13 Na ɔha hyirele bɛ kyɛ: "Ɛtoɔ bɔ bɛnwa ɛmɔle ne, nnɛmɔ de maa ɔbo so." 14 Afei koso, sogyafoɛ ne bisale ye kyɛ: "Nzu yeɛ yɛyɛ ɔ?" Na ɔha hyirele bɛ kyɛ: "Nnɛmɔ tee-tee ebiala, na nnɛmɔfa edwirɛ bɛto ebiala so, mmom ɛmɔma ɛmɔ nye sɔ bɔ ɛmɔle ye ne."

15 Sɔ mmerɛ ne, né mmenia ne nea Kristo né ate, na ne ebiala dwene Yohane nwo wɔ y'ahone nu kyɛ, "Anaa yeɛ ole Kristo ne?" 16 Yohane yele bɛ mukoraati noa kyɛ: "Me de, nzue yeɛ mefa mebɔ ɛmɔ asu ɔ, nakoso bɔ ole tumi tra me ne ba, na ye mmaboa nyamaa po, menvata kyɛ me sangye. Ye de, honhom krongron ne see yeɛ ɔkɔfa kɔbɔ ɛmɔ asu ɔ. 17 Otira nikye bɔ bɛfa behu hwiit so, na ɔkɔpra nekaa bɔ ohu hwiit gua ne kama-kama, na waboɔboa ye hwiit ne noa wagua pata so, na ndɛtɛ ne de, see bɔ onnua le yeɛ ɔkɔfa kɔyera ye ɔ."

18 Afei koso, ɔfale afutuo pee mane mmenia ne, na ɔhane nzɛmba ne hyirele bɛ. 19 Nakoso Yohane hwili Herode bɔ odi manzini naso ne nyunu, ofikyɛ ne wagya Herodia bɔ ɔte oliema brienzua aye, na ne wayɛ nningyein pee bɔ ɔttemaye. 20 Bɔ Herode yɛ bokale ye bɔne naso yeɛ ole kyɛ, ɔhyele Yohane tole prizin.

21 Mmerɛ bɔ bɛbɔ mmenia namukoraati asu ne, Yesu koso bɔle asu. Ná ɔbɔ mbaeɛ ne, anwuro bukyele, 22 na honhom krongron ne dwu wale ye so te kyɛ abubure, na konviɛ bie fili anwuro wale kyɛ: "Wɔ yeɛ ɛle mma bɔ medɔ ye ne; male wɔ mato nu."

23 Mmerɛ bɔ Yesu hyɛle ye adwuma bo ne, né wanya kɔyɛ afoɛ 30, na né mmenia nwu ye kyɛ ye baba yeɛ ole

Yosef, Heli,

24 Matat, Lewi, Melki, Jannai, Yosef,

25 Matatia, Amos, Nahum, Esli, Nagai,

26 Maat, Matatia, Semen, Josek, Joda,

27 Joanan, Resa, Zerubabel, Sealtiel, Neri,

28 Melki, Addi, Kosam, Elmadam, Er,

29 Yosua,* Eliezer, Jorim, Matat, Lewi,

30 Simeon, Yuda, Yosef, Yonam, Eliakim,

31 Melea, Menna, Matata, Natan, David,

32 Yese, Obed, Boas, Salmon, Nason,

33 Aminadab, Arni, Hesron, Peres, Yuda,

34 Yakob, Isaac, Abraham, Tera, Nahor,

35 Serug, Reu, Peleg, Eber, Sela,

36 Kainan, Arfaksad, Sem, Nowa, Lamek,

37 Metusala, Enok, Yared, Mahalalel, Kainan,

38 Enos, Seth, Adam, Nyameɛ.