1 Ɛhene si mmerɛ kaa bie ne, ohyinini nguraa ne nguro nemɔ nu hane Nyameɛ Ahennie nanwo nzɛmba ne, né buru-ne-nyɔ ne boka ye so, 2 yeɛ né mmrasua biemɔ boka ye so; ɔsale sɔ mmrasua nemɔ anwonyerɛ na otuli sunzummɔne fili bɛ so. Sɔ mmrasua nemɔ yeɛ ole Mary bɔ bɛfrɛ ye Magdalene ne, ye yeɛ sunzummɔne nzoo fili ye nu fitele ne; 3 Joana bɔ ohu yeɛ ole Kuza bɔ ɔnea Herode awuro so ne, yeɛ Susana ne mmrasua foforɛ pee bɔ bɛfale b'ahodeɛ bɛsõne bɛ ne.

4 Mmerɛ bɔ mmeni pee boale bɛ noa, na mmenia bɔ bɛfi nguro ahoroɛ so wale ye berɛ ne, ɔfale mvandoho hyirehyirele bɛ kyɛ: 5 "Kuaniɛ bie hɔle kyɛ ɔkwaagua* ɛmo. Ogua ne, ebie guale atee noa, na mmenia tietiale so, ná ewienu nu nnomaa susole. 6 Ebie guale nyɔboɛ so, na ofifili, nakoso owuli ofikyɛ wannya nzue. 7 Ebie guale mmowie nu, na mmowie ne né ye nyini, na omiane ye. 8 Yeɛ ebie guale aseɛ pa so, na onyini ne, osuli mmaa 100." Ɔhane ɛhe yiele ne, ɔmane ye konvi so hane kyɛ: "Ebiala bɔ ole asoɛ bɔ ɔkɔfa kotie ne, ma otie."

9 Ye asuafoɛ nemɔ bisale ye bɔ mvandoho ne kyire ɔ. 10 Na ɔhane kyɛ: "Ɛmɔ de, bafa bama ɛmɔ kyɛ ɛmɔte Nyameɛ Ahennie nanwo dwirɛ krongron bɔ wafea nabo, nakoso bɛ ngaa ne de, mvandoho yeɛ bɛka bɛkyire bɛ ɔ. Yeti

bɛnea de, nakoso bɛnea ye mbaen,

na betie, nakoso bɛnde yebo.

11 Afei, mvandoho ne ɛhe: Mmaa ne yeɛ ole Nyameɛ dwirɛ ne. 12 Bɔ oguale atee noa ne yeɛ ole bɛ bɔ bɛtele edwirɛ ne, ná Abɔnzam wale ɔɔyele edwirɛ ne fili b'ahone nu, kyɛbɔ ɔkɔyɛ a, bɛngole bɛngoli na balɛ́ bɛ ngoa. 13 Bɔ oguale nyɔboɛ so ne yeɛ ole bɛ bɔ bɛte edwirɛ ne a, bɛfa anigye bɛsɔ nu ne. Nakoso ɛhemɔ lle ndii; yeti bedɛ bɛdi mmerɛ kaa, na sɛ beyia nzɔhwɛ a, bɛngora gyina. 14 Yeɛ bɔ oguale mmowie nu ne yeɛ ole bɛ bɔ bɛte edwirɛ ne, nakoso mmerɛ kɔ so ne, asetena nu dadwene, ahonyadeɛ ne anigye mia bɛ, yeti bɛ mmaa ne ndi. 15 Na bɔ oguale aseɛ pa so ne, yeɛ ole bɛ bɔ bɛte edwirɛ ne a, bɛfa ahone pa bɛsɔ nu yé, ná bɛfa aboterɛ besu mmaa ne.

16 "Ebiala nne berɛ bɔ ɔsɔ kanea a, ɔfa nikye kata so anaa ɔfa wura mba bo ɔ, mmom ɔfa sie kanea bakaa so, kyɛbɔ ɔkɔyɛ a, ebiala bɔ ɔkowura awuro berɛ ne konwu kanea ne. 17 Nikye biala nne berɛ bɔ wafea bɔ ye nwo ngɔla berɛ; na nikye fee nne berɛ bɔ bafa basie fee bɔ ongofite ma ebiala ngonwu ye ɔ. 18 Ɛmɔnea kyɛbɔ ɛmɔtie edwirɛ ne yé, ofikyɛ bɔ ole bie ne, bɛkɔfa pee bɛkɔboka ye so, na bɔ olle bie ne de, bɔ y'adwene yɛ ye kyɛ ole ye ne po, bɛkole bɛkofi ye sa nu."

19 Yeɛ ye maame ne oliema mmrienzua wale ye berɛ, nakoso mmeni lɔen nati bangora bamma nekaa bɔ ɔwɔ ne. 20 Na ebiemɔ ha hyirele ye kyɛ: "Wɔ maame ne eliema mɔ gyi aluo dɔ, bɛpena kyɛ bɛnwu wɔ." 21 Nakoso ɔha hyirele bɛ kyɛ: "Me maame ne nniema mɔ yeɛ ole bɛ bɔ betie Nyameɛ dwirɛ ne, na bɛfa bɛyɛ adwuma ne."

22 Ɛlɛho bie, ɔne ye asuafoɛ nemɔ fole ɛlɛen, yeɛ ɔha hyirele bɛ kyɛ: "Ɛmɔma yɛpɛ ɛkwaa ne yɛhɔ ye si dɔ." Yeti bɛsili nu kyɛ bɛkɔ. 23 Bɛnate nzue naso ne, ɔfale nu lale. Na mvrama kandinga bie hyɛle yebo tuli wɔ ɛkwaa naso, na nzue ne bu fale bɛ ɛlɛen naso maa ahaa ɔpena mono. 24 Yeti, bɛtingyele ye, na bɛha bɛhyirele ye kyɛ: "Owura, Owura! Yawu yayie oo!" Na odwɔso teɛteane mvrama ne asorɔkye bɔ obu fa so ne, na yenoa hɔle ase, na ɛberɛ yɛle dinn. 25 Yeɛ ɔha hyirele asuafoɛ nemɔ kyɛ: "Ɛmɔ gyidie ne wɔ nisɔa?" Nakoso esuronyi hane bɛ, na ɔyɛle bɛ nwanwa maa bɛbisale bɛ nwo kyɛ: "Sona beni po ɛhe, bɔ ɔkora dwudwo kyire mvrama ne nzue po maa betie ye ne?"

26 Na bɛpɛ bɛhɔle Gerasafoɛ aseɛ naso, ɛberɛ ne Galilea bɔ nhwɛ-anim. 27 Yesu dwuli ase nala pɛ, biaa bie yiale ye, né ole sunzummɔne, na né ofi kuro berɛ ala. Né owurale atadeɛ ahyɛ paa, afei ne ɔtte awuro, mmom né ɔte asieleɛ naso. 28 Onwuni Yesu nala, oteane nu fale ye nyunu butule ase, na ɔteɛteane nu kyɛ: "Yesu, Nyameɛ bɔ ɔwɔ Anwuro-Anwuro ne Awa, nzu yeɛ ɔwɔ mene wɔ afia ɔ? Mesrɛ wɔ, nnɛha me." 29 (Né Yesu aha ahyire sunzummɔne ne kyɛ ofi biaa ne nu. Né honhom ne taa bawura ye nu. Yeti ne bɛtaa bɛfa kyenyi bɛkyekye ye sa ne ye gya, na ne bɛnea ye so. Nakoso ɔtete kyenyi nanu, na honhom ne fa ye kowura nekaa bɔ ebiala nne berɛ.)

30 Yesu bisale ye kyɛ, wɔ dumaa li sɛɛ? Ɔhane kyɛ: "Ɛlɔen," ofikyɛ sunzummɔne pee yeɛ né ɔwɔ ye nu ɔ. 31 Na sunzummɔne nemɔ srɛle Yesu alaa kyɛ, nnɛmaa ɔhyɛ bɛ maa bɛkogua kumaa kuron-kuron nanu. 32 Sɔ mmerɛ nanu ne, né mbrako pee bie didi wɔ bokaa ne ngyɛnu dɔ, na bɛsrɛle ye kyɛ ɔma bɛɛwura mbrako nanu. Yeti ɔmane bɛ atee. 33 Yeɛ sunzummɔne nemɔ fili biaa nanu bɛɛwurale mbrako nanu ɔ, na mbrako nemɔ fale mirika fili bokaa naso beeguale nzue nanu, na bɛwuli.

34 Bɛ bɔ bɛnea mbrako ne nwuni bɔ wasi ne, bɛnwatili bɛɛhane bɔ wasi ne wɔ kuro ne, ɔne ye nnamue nemɔ nu. 35 Yeti mmenia hɔle kyɛ bɛkwaanea bɔ wasi ne. Bɛwale Yesu berɛ ne, bɛnwuni biaa bɔ sunzummɔne nemɔ fili ye nu ne kyɛ ɔte Yesu gya bo, na owura atadeɛ, na y'adwene nu la berɛ ne, ɛhe maa esuronyi hane bɛ. 36 Bɛ bɔ bɛnwuni ye ne hane kyɛbɔ biaa bɔ sunzummɔne wɔ ye so ne nwo tɔle ye ne hyirele bɛ. 37 Na bɛ bɔ bɛfi Gerasa mandanu berɛ nanu pee ha hyirele Yesu kyɛ, ofi bɛ berɛ hɔ, ofikyɛ ne esuronyi aha bɛ paa. Yeti ɔɔfole ɛlɛen ne kyɛ osa kɔ. 38 Biaa bɔ sunzummɔne nemɔ fili ye nu ne srɛle Yesu kyɛ ɔne ye kɔhɔ, nakoso Yesu maa osale, na ɔha hyirele ye kyɛ: 39 "Sa kɔ w'awuro, na ka bɔ Nyameɛ ayɛ ama wɔ ne kyire bɛ." Yeti ɔhɔle, na ɔhane bɔ Yesu ayɛ ama ye ne wɔ kuro nanu mukoraati.

40 Yesu sa wale ne, mmenia ne lɛle ye kama, ofikyɛ ne bɛ mukoraati bɛnwondɛ ye. 41 Na biaa bie bɔ bɛfrɛ ye Yairo wale ye berɛ, né ɔte panyi wɔ sua bɔ beyia nu nanu. Na ɔkotole Yesu gya bo srɛle ye kyɛ ɔbra ye awuro berɛ, 42 ofikyɛ ɔwa brasua komapɛ, bɔ wali kɔyɛ afoɛ 12 la awuso.

Yesu kɔ ne, né mmenia ahyere ye so paa. 43 Né brasua bie bɔ mogya atu ye afoɛ 12 wɔ berɛ, na né ebiala ngora nza ye anwonyerɛ ne. 44 Ɔfale Yesu si, na ɔfale ye sa hane ye atadeɛ ne noa ne, na ɛberɛ ala mogya ne pɛle. 45 Yeɛ Yesu hane kyɛ: "Nwa yeɛ ɔfale ye sa hane me ne?" Ebiala hane kyɛ nná ye ɔ, yeti Petro hane kyɛ: "Me wura, mmeni pee apɛ wɔ nwo ayia, na bahyere wɔ so." 46 Nakoso Yesu hane kyɛ: "Ebie afa ye sa aha me, menwu ye kyɛ tumi afi me nu." 47 Maame ne nwuni kyɛ banwu ye ne, ɔfale ahopopo buli ndwerɛ wɔ Yesu nyunu hane bɔ ɔmaa ɔfale ye sa hane ye namukoraati, ɔne kyɛbɔ ɛberɛ ala ye nwo tɔle ye ne wɔ mmenia nanu. 48 Yeɛ Yesu ha hyirele ye kyɛ: "Mma brasua, wɔ gyidie amaa wɔ nwo atɔ wɔ, fa asomdwie kɔ."

49 Ogu so odwudwo ne, ebie fili Yairo awuro berɛ wale, na ɔha hyirele ye kyɛ: "Ɛwa brasua ne awu, nnɛha kyerɛkyerɛniɛ ne kõ." 50 Yesu tele ɛhe ne, ɔhane kyɛ: "Nnɛsuro, wɔ de nya gyidie, na ye nwo kɔtɔ ye." 51 Ɔhɔle awuro berɛ ne, Petro, Yohane, Yakobo ne akwalaa ne maame ne ye baba ngome yeɛ ɔne bɛwurale sua nanu ɔ. 52 Né ebiala su akwalaa ne, na ne bɛpɛ awuye, nakoso Yesu hane kyɛ: "Ɛmɔyakyi sue, ofikyɛ akwalaa ne wulli, wala." 53 Bɛtele ɛhe ne, né bɛla ayanga, ofikyɛ ne bɛse kyɛ akwalaa ne awu. 54 Nakoso ɔsɔle ye sa nu, yeɛ ɔhane kyɛ: "Abayaa, dwɔso!" 55 Na ye ngoa sa wale ye nu, na ɛberɛ ala ɔdwɔsole. Na ɔhane kyɛ bɛma ye aleɛ ma oli. 56 Ye awofo nwo dwirili bɛ paa, nakoso ɔha hyirele bɛ kyɛ, nnɛmaa bɛka bɔ wasi ne bɛkyire ebiala.