1 Sɔ kyẽa ne, Yesu fili awuro, na ɔɔtenane ɛpo ne noa. 2 Na mmeni pee wale berɛ bɛɛpɛle ye nwo beyiale, yeti ɔfo tenane ɛlɛen bie nu, na mmenia ne koso tenane ɛpo ne noa. 3 Na ɔfale mvandoho hane edwirɛ pee hyirele bɛ kyɛ: "Kuaniɛ bie hɔle kyɛ ɔkwaagua * ɛmo; 4 Ogua ne, ebie guale atee noa, na nnomaa susole. 5 Ebie koso guale nyɔboɛ so, né nnɛterɛ pee nne berɛ. Yeti ofifili, nakoso ɔnate kyɛ nnɛterɛ pee nne berɛ nati, 6 eyia fitele ne, ɔyerale ye, na ɔnate kyɛ olle ndii nati, owuli. 7 Ebie guale mmowie nu, na mmowie ne nyi miane ye. 8 Nakoso, ebie guale aseɛ pa so na osuli mmaa, ebie sule 100, ebie sule 60, yeɛ ebie sule 30. 9 Bɔ ole asoɛ bɔ ɔkɔfa kotie ne, ma otie."

10 Yeɛ asuafoɛ nemɔ wale ye berɛ, na bɛbisale ye kyɛ: "Nzuati yeɛ ɛfa mvandoho dwudwo kyire bɛ ne?" 11 Ɔha hyirele bɛ kyɛ: "Ɛmɔ de bafa bama ɛmɔ kyɛ ɛmɔte anwuro Ahennie nanwo dwirɛ krongron bɔ wafea nabo, nakoso bɛ de, bɛffa bɛmanne bɛ. 12 Ebiala bɔ ole bie ne, bɛkɔfa pee bɛkɔboka ye so, na okonya ye maa okobu so. Nakoso bɔ olle bie ne de, bɔ ole ye ne po, bɛkole bɛkofi ye sa nu. 13 Ɛhe ati yeɛ mefa mvandoho medwudwo mekyire bɛ ne, ofikyɛ:

‘Bɛnea po a, bɛnea ye mbaen;

Na sɛ bɛte po a, bɛte ye mbaen, bɛnde ye bo.’

14 Bɛ yeɛ diifoɛ Isaiah hyɛle bɛ nwo ngɔm kyɛ:

‘Ɛtelɛ de ɛmɔ kɔte, nakoso ɛmɔngɔte yebo;

Ɛneanɛ de ɛmɔ kɔnea, nakoso ɛmɔ ngonwu ye.

15 Ofikyɛ mmenia hemɔ ahone atiri,

na bɛfa bɛ so betie ye mbaen.

Bakata bɛ nye, kyɛbɔ ɔkɔyɛ a,

bɛngɔfa bɛ nye bɛngonwu ye,

ná bafa bɛ so bate,

ná bafa b’ahone bate yebo,

na basakra b’adwene maa masa b’anwonyerɛ.’ 

16 Nakoso ɛmɔ de, anigye yeɛ ole ɛmɔ nye, ofikyɛ onwu nikye, ɔne ɛmɔ so, ofikyɛ ɔte dwirɛ. 17 Nahorɛ, meka mekyire ɛmɔ kyɛ, né adiifoɛ ne ateneneefoɛ pee pena kyɛ bɛnwu bɔ ɛmɔnwu ye ne, nakoso bannwu ye, né bɛpena kyɛ bɛte bɔ ɛmɔte ne, nakoso bande.

18 "Afei, ɛmɔtie bɔ kuaniɛ nanwo mvandoho ne kyire ɔ: 19 Sɛ ebie te ahennie nanwo dwirɛ ne, ná wande yebo a, ɔbɔnefoɛ ne basesa fi ye ahone nu, ɛhe yeɛ ole bɔ oguale atee noa ne. 20 Na bɔ oguale nyɔboɛ so ne de, yeɛ ole bɔ ɔte edwirɛ ne a, ɔfa anigye dɛ́ to nu; 21 nakoso ɔnate kyɛ olle ndii biala nati, ɔtena berɛ mmerɛ kaa. Na edwirɛ nati, sɛ oyia ɔhaw anaa bɛtane ye nye a, ɔto ye sintidua ndɛ. 22 Na bɔ oguale mmowie nu ne yeɛ ole bɔ ɔte edwirɛ ne a, asetena nu dadwene ne ahonyadeɛ bɔ ɔpena kyɛ onya ye ne mia edwirɛ ne, yeti onzu mmaa ne. 23 Na bɔ oguale aseɛ pa nu ne yeɛ ole bɔ ɔtele edwirɛ ne, na ɔtele yebo ne. Ye de osu mmaa, ebie su 100, ebie su 60, yeɛ ebie su 30. "

24 Afei, osa yɛle mvandoho foforɛ kyɛ: "Anwuro ahennie ne te kyɛ biaa bie bɔ oluale mmaa pa wɔ ye boo nu. 25 Mmerɛ bɔ ebiala ala ne, ye tamfo bie wale, na ooluale ndire* frale hwiit ne, yeɛ ɔhɔle ɔ. 26 Hwiit ne nyini ná osuli ne, ndire ne koso yele ye nwo ali. 27 Yeti ye ngoaa ne wale ye berɛ, na bɛha bɛhyirele ye kyɛ: ‘Yɛ wura, nná mmaa pa yeɛ eluale ye wɔ boo nanu ɔ? Ye de, ndire he fi nisua?’ 28 Yeɛ ɔha hyirele bɛ kyɛ, ‘Ɔtamfo bie yeɛ ɔyɛle sɔ ne.’ Yeti, ngoaa ne bisale ye kyɛ, ‘Ɛpena kyɛ yɛtutu ndire ne anaa?’ 29 Ɔhane kyɛ, ‘Daabi, sɛ ɛmɔ tutu ndire ne kesaalae a, annea a né ɛmɔ atutu hwiit ne baboka ye. 30 Yeti ɛmɔma ye mukoraati bɔnu nyi oodwu mmerɛ bɔ bɛkɔpɛ ne, sɛ bɛpɛ a, ngɔha ngohyire apaafoɛ ne kyɛ, bɛli moa bɛboɔboa ndire ne noa, na bɛkyekye bɛyera ye, beyie a, né baboɔboa hwiit ne noa bagua me pata naso.’ "

31 Osa yɛle mvandoho foforɛ kyɛ: "Anwuro ahennie ne te kyɛ sinapi mmaa bɔ ebie fale, na ooluale ye wɔ ye boo nu. 32 Ɔwɔ nu, ye yeɛ ɔte kaa wɔ aba mukoraati nu ɔ, nakoso sɛ onyi a, ɔyɛ piri tra atɔsodeɛ bɔ bɛdua namukoraati, na ɔbayɛ bakaa maa ewienu nnomaa tena-tena ye sa naso."

33 Osa yɛle mvandoho foforɛ kyɛ: "Anwuro ahennie ne te kyɛ yiste* bɔ maame bie fa frale esam olonka* mbiri nza maa ye mukoraati tuli ɔ."

34 Mvandoho yeɛ Yesu fa hane sɔ dwirɛ he amukoraati hyirele mmenia ne ɔ. Nahorɛ nu, wandwudwo wangyire bɛ bɔ mvandoho bokka so ɔ. 35 Ɛhe maa edwirɛ bɔ adiifoɛ ne hane ne wale nu kyɛ:

"Mvandoho yeɛ ngɔfa ngɔ dwudwo ɔ,

Na nningyein bɔ wafea fi mmerɛ bɔ bɛbɔle ewiase ne, ngɔha."

36 Afei Yesu guale mmenia ne atee, na ɔhɔle awuro. Yeɛ asuafoɛ ne wale ye berɛ, na bɛha bɛhyirele ye kyɛ: "Kyirekyire ndire nanwo mvandoho nanu kyire yɛ." 37 Yeɛ ɔha hyirele bɛ kyɛ, "Bɔ oluale mmaa pa ne yeɛ ole sona Awa ne; 38 ɛboo ne yeɛ ole wiase ne. Mmaa pa ne yeɛ ole ahennie ne mmaa ne, na ndire ne yeɛ ole ɔbɔnefoɛ ne mmaa ne. 39 Yeɛ ɔtamfo ne yeɛ ole Abɔnzam. Mmerɛ bɔ bɛpɛle ne yeɛ ole wiase ne awieɛ mmerɛ ne. Na abɔfo nemɔ yeɛ bɛpɛle ɔ. 40 Na kyɛbɔ bɛboɔboale ndire ne noa bɛyerale ye ne, sɔ ala yeɛ wiase awieɛ mmerɛ ne kɔyɛ ɔ. 41 Sona awa ne kɔsoma ye abɔfo, na bɛkɔboɔboa nikye biala bɔ ɔto sintidua, ɔne abɔnefoɛ mukoraati noa kofi ye ahennie nanu. 42 Na bɛkogyi bɛ bɛkogua fonoo bɔ ɔsɔ buru-buru nanu. Ɛberɛ yeɛ bɛkosu na bɛ anwose bɛ gye ɔ. 43 Na ateneneefoɛ ne de, bɛkɔta te kyɛ eyia wɔ bɛ Baba Ahennie nanu. Bɔ ole asoɛ ne, ma otie.

44 "Anwuro Ahennie ne te kyɛ agudeɛ bie bɔ owura ɛboo bie nu, bɔ ebie nwuni ye ná ɔfa feale ɔ; na ye fɛɛ bɔ ɔyɛ ye nati, ɔtɔnene ye nwo nningyein mukoraati tɔle sɔ aseɛ ne.

45 "Afei Anwuro Ahennie ne te kyɛ dwadiniɛ bie bɔ otu atee kɔpena agudeɛ* pa. 46 Onwuni agudeɛ bie bɔ ɔsom bo paa ne, ɛberɛ ala ɔɔtɔnene bɔ ole ye mukoraati fa tɔle sɔ agudeɛ pa ne.

47 "Afei koso, anwuro ahennie ne te kyɛ nɛt bɔ bɛto bɛguale ɛpo nu maa ɔhyele egyein ahoroɛ pee. 48 Oyili ne, bɛtwetwe bɛwale ɛpo ne noa, na bɛtenane ase bɛyeyele pa ne bɛguale nikye nu, na bɔ ɔttemaye ne de, bɛgyi bɛguale. 49 Sɔ ala yeɛ awieɛ mmerɛ ne kɔyɛ ɔ. Abɔfo nemɔ kɔyeye abɔnefoɛ nemɔ kofi ateneneefoɛ nemɔ nu, 50 na bɛkogyi bɛ bɛkogua fonoo bɔ ɔsɔ buru-buru nanu, ɛberɛ yeɛ bɛkosu na bɛ anwose bɛ gye ɔ."

51 "Nnaa ɛmɔte ɛhe amukoraati bo?" Bɛhane kyɛ: "Yoo." 52 Yeɛ ye koso ɔha hyirele bɛ kyɛ: "Ye sɔ de a, kyerɛkyerɛniɛ biala bɔ bahyirehyire ye anwuro Ahennie nanwo nikye ne, ɔte kyɛ efiewura bie bɔ ɔye nningyein monɛ ne daa fi sua bɔ ɔfa ye nningyein gua nu nanu ɔ."

53 Yesu yiele sɔ mvandoho he mukoraati ne, ofili berɛ hɔle. 54 Na odwuli ye bɔbɔ ye kuro ne, ohyirehyirele mmenia ne wɔ sua bɔ beyia nu nanu, ná bɛ nwo dwirili bɛ. Yeti bɛbisale kyɛ: "Nisua yeɛ akoaa he nyane sɔ nyanza ne tumi bɔ ɔfa yɛ anwanwadeɛ ne ɔ?" 55 "Nná kapentaniɛ ne awa ne ɛhe? Nná ye maame yeɛ ole Mary, na nná oliema mmrienzua yeɛ ole Yakobo, Yosef, Simon ne Yuda? 56 Na oliema mmrasua koso, nná yɛne bɛ yeɛ ɛwɔ wa ne? Ye de, nisua yeɛ onyane ɛhe amukoraati fili ɔ?" 57 Yeti ɔyɛle sintidua mane bɛ. Nakoso Yesu ha hyirele bɛ kyɛ, "Diifoɛ biala nne berɛ bɔ ole anuonyam wɔ ye kuro ne ye awuro ɔ." 58 Na gyidie bɔ bɛlle ye nati, wanyɛ anwanwadeɛ pee wɔ berɛ.