Mateus 14

1 Sɔ mmerɛ ne, Herode bɔ ɔte manzini soafoɛ ne tele Yesu nwo dwirɛ, 2 yeɛ ɔha hyirele ye ngoaa nemɔ kyɛ, "Yohane Suboniɛ yeɛ watingye wafi ewue nu ne! Yeti yeɛ wanya tumi bɔ ɔfa yɛ anwanwadeɛ sɔ ne." 3 Herode aliemaa Filipo aye Herodia ti, né Herode ahye Yohane akyekye ye ato prizin. 4 Ofikyɛ daa né Yohane ka kyire ye kyɛ: "Mmeraa mma atee kyɛ egya ye." 5 Yeti né Herode pena kyɛ oku Yohane, nakoso ne osuro mmenia ne, ofikyɛ né bɛnwu Yohane kyɛ ɔte diifoɛ. 6 Nakoso, kyẽa bɔ Herode di ye awoda ne, Herodia awa brasua gole maa ɔyɛle ye nyemene paa, 7 yeti, ɔhane ndaen kyɛ, bɔ okobisa biala ne, ɔkɔfa kɔma ye. 8 Yeɛ abayaa ne maame tutu guale ye so anu alaa maa ɔhane kyɛ: "Fa Yohane Suboniɛ ti to plɛte so ma me." 9 Edwirɛ ne yɛle ɔhene ne yea, nakoso ndaen bɔ waha, ɔne mmenia bɔ né bɛwɔ berɛ nati, ɔhane kyɛ bɛyɛ bɔ wabisa ne bɛma ye, 10 yeti ɔsomane maa bɛɛpɛle Yohane ti wɔ prizin dɔ. 11 Na bɛfale ye ti ne bɛtole plɛte so bɛbrɛle abayaa ne, na ye koso ɔfa ɔɔmane ye maame. 12 Afei, Yohane asuafoɛ ne wale bɛɛfale fuin ne, ná beesiele ye. Yeɛ bɛɛbɔle Yesu amaneɛ ɔ.

13 Yesu tele Yohane dwirɛ ne, ɔfale ɛlɛen fili berɛ kyɛ ɔkwaawura nekaa bɔ ɛberɛ te dinn. Nakoso mmenia ne tele ye nwo dwirɛ, na bɛfili nguro nanu bɛfale ase bɛhɔle nekaa bɔ ɔwɔ ne. 14 Ofili ɛleɛn nanu dwuli bɔ onwuni mmenia ne, bɛyɛle ye anwunvo na ɔsale bɛ bɔ bafokyɛ ne anwonyerɛ. 15 Odwuli nnɔsoa ne, asuafoɛ nemɔ wale ye berɛ, yeɛ bɛha bɛhyirele ye kyɛ: "Ɛwa ate ye nwo, na aleɛ asa. Gua mmenia ne atee ma bɛhɔ nnamue nemɔ nu bɛɛtɔ aleɛ bie bɛli." 16 Nakoso, Yesu ha hyirele bɛ kyɛ: "Nnɛmɔ maa bɛkɔ, ɛmɔma bɛ nikye ma bɛli." 17 Yeɛ bɛhane kyɛ, "Paanoo nnu ne egyein nyɔ pɛ yeɛ ɔwɔ wa ɔ." 18 Yesu hane kyɛ: "Ɛmɔfa bɛbrɛ me." 19 Yeɛ ɔha hyirele mmenia nemɔ kyɛ bɛtena-tena nzenzaen naso. Na ɔfale paanoo nnu ne egyein nyɔ ne, na ɔneane anwuro hyirale so, na obubule nu fa mane asuafoɛ nemɔ, na bɛ koso bɛfa bɛmane mmenia nemɔ. 20 Yeti, bɛlili maa bɛ ko yili, na bɛsesale ye boso kɛndɛn 12 tɛkyɛ. 21 Mmrienzua 5,000 yeɛ bɛlili ɔ, bannga mmrasua ne ngwalaa bammoka so.

22 Ɛberɛ nala, Yesu maa asuafoɛ nemɔ fole ɛleɛn ne hɔle nzue ne si dɔ, yeɛ oguale mmenia nemɔ atee ɔ. 23 Oguale bɛ atee yiele ne, ɔhɔle bokaa naso, na ye ngome oowurale dɔ bɔle mbaeɛ. Né aleɛ asa, nakoso ye ngome yeɛ ne owura berɛ ɔ. 24 Sɔ mmerɛ ne, né ɛleɛn ne wɔ ɛpo ne afia, na né ɔmbingye aseɛ koraa. Né asorɔkye ne amaa bɛ nwo ahyere bɛ, ofikyɛ ne mvrama ne bɔ yia bɛ. 25 Na odwuli alobahene ne, ɔfale nzue naso wale bɛ nwo berɛ. 26 Asuafoɛ nemɔ nwuni kyɛ ɔnate ɛpo naso ne, bɛ nwo dwirili bɛ, na bɛhane kyɛ: "Ɛhe de, gya yɛkye nnaleɛ!" Na esuronyi ti, né bɛteɛtea nu. 27 Ɛberɛ ala yeɛ Yesu ha hyirele bɛ kyɛ: "Ɛmɔha ɛmɔ ahone bɛto ɛmɔ kunu, me ɛne, nnɛmɔ suro."

28 Yeɛ Petro hane kyɛ: "Awurade, sɛ wɔ ahɔ a, ka ma mva nzue naso mmra wɔ nwo berɛ." 29 Yesu hane kyɛ, "Bra." Yeɛ Petro dwu fili ɛlɛen nanu ɔ, na ɔhyɛle yebo kyɛ ɔnate nzue naso kɔ Yesu nwo dɔ. 30 Nakoso onwuni kyɛ asorɔkye ne noa ayɛ se ne, ye kunu tele ye, na ɔhyɛle yebo kyɛ ɔme, yeɛ ɔteane nu kyɛ: "Awurade, dɛ́ me!" 31 Ndɛ nala, Yesu tengyɛle ye sa sɔle ye nu, na ɔha hyirele ye kyɛ: "Wɔ bɔ wɔ gyidie te kaa, nzuati yeɛ ɛmaa w’adwene nu yɛle wɔ naa ne?" 32 Na bɛfole ɛlɛen ne, asorɔkye ne yɛle dinn. 33 Ná bɛ bɔ bɛwɔ ɛleɛn nanu ne kotole ye, na bɛhane kyɛ, "Amba, wɔ yeɛ ɛle Nyameɛ Awa ne!"

34 Na bɛpɛle nzue ne bɛwale Genesaret. 35 Mmerɛ bɔ mmenia bɔ bɛwɔ berɛ ne nwuni Yesu ne, bɛsoma mmenia maa bɛɛbɔle amaneɛ wɔ mandanu berɛ mukoraati, na bɛfale bɛ bɔ bɛnde apɔ namukoraati bɛbrɛle ye. 36 Na bɛsrɛle ye kyɛ ɔma bɛfa bɛ sa bɛha ye atadeɛ ne noa mbaen, na bɛ bɔ bɛyɛle sɔ ne nwo tɔle bɛ koraa.