1 Na Farisifoɛ ne atwerɛfoɛ ne bie fili Yerusalem wale Yesu berɛ, na bɛbisale ye kyɛ: 2 "Nzuati yeɛ w’asuafoɛ nemɔ bu yɛ nana mɔ amammerɛ so ne? Nzuati yeɛ bɛdidi a, bɛnnwunzi bɛ sa ne?" 3 Yesu yele bɛ noa kyɛ: "Nzuati yeɛ ɛmɔ amammerɛ ti, ɛmɔbu Nyameɛ ahyɛdeɛ so ne? 4 Ofikyɛ Nyameɛ hane kyɛ, ‘Fa nidie ma wɔ baba ne wɔ maame,’ na ‘Ebiala bɔ ɔkɔha edwirɛ tɛɛ kotia ye maame anaa ye baba ne, odikyɛ bɛku ye.’ 5 Nakoso, ɛmɔka kyɛ: ‘Ebiala bɔ ɔkɔha kohyire ye maame anaa ye baba kyɛ: "Nikye biala bɔ nne ye, bɔ ahaa ekonya so mvasoɛ ne, ɔte akyɛdeɛ bɔ mafa mama Nyameɛ" ne, 6 nnɛmaa obu ye maame anaa ye baba koraa.’ Ɛmɔ amammerɛ ti, ɛmɔ mva Nyameɛ mmeraa ne bɛnyɛ hwee. 7 Nyaatwomfoɛ, yeti yeɛ Isaiah hyɛle ɛmɔ nwo ngɔm kyɛ:

8 ‘Maen he fa bɛ noa mbaen yeɛ bɛdi me ni ɔ,

nakoso b’ahone de, ɔnne me nwo koraa.

9 Bɛsõ me mbaen,

ofikyɛ sona ahyɛdeɛ yeɛ bekyirekyire ɔ.’ "

10 Yeti, Yesu frɛle mmenia ne wale ye nwo berɛ, yeɛ ɔha hyirele bɛ kyɛ: "Ɛmɔtie, na ɛmɔte yebo kyɛ: 11 ‘Nná bɔ ɔkɔ sona noa nu yeɛ ogua ye nwo fiɛ ɔ, mmom bɔ ofi ye noa nu ba ne.’ " 12 Yeɛ asuafoɛ ne wale ye nwo berɛ, na bɛha bɛhyirele ye kyɛ: "Bɔ ɛhane ne, ɛse kyɛ wanyɛ Farisifoɛ nemɔ fɛ ne?"* 13 Yeɛ ye koso ɔhane kyɛ: "Bakaa biala bɔ nná me anwuro Baba yeɛ oluale ne, yebo kɔtutu. 14 Nnɛmɔ tɛ bɛ so! Bɛkyire mmenia atee, nakoso bɛ nye asi. Na sɛ anyesiniwaaniɛ kyire anyesiniwaaniɛ atee a, bɛ munyɔ namukoraati koogua kumaa nu." 15 Petro ha hyirele ye kyɛ, "Kyirekyire sɔ dwirɛ* nanu kyire yɛ ee." 16 Yesu bisale kyɛ, "Ɛmɔ koso, ɛmɔnde ye bo?" 17 "Ɛmɔnze kyɛ, nikye biala bɔ ɔkɔ yɛ noa nu ne, ɔkogua yɛ kunu, na afei waagua ɛyaen nu? 18 Nakoso nningyein bɔ ofi yɛ noa nu ba ne, ofi y’ahone nu, na ɛhene yeɛ ogua sona nwo fiɛ ɔ. 19 Ebie yeɛ ole kyɛ, ahone nanu yeɛ adwemmɔne, awudie, agyaa sɛkyelɛ, adwaman, awie, adanzewia, ne mmusue fi ba ɔ. 20 Sɔ nningyein he yeɛ ogua sona nwo fiɛ ɔ, na sɛ ebie didi na wannwunzi ye sa de a, ɛhene ngua ye nwo fiɛ."

21 Yesu fili berɛ ne, ɔhɔle Tiro ne Sidon mandanu dɔ. 22 Na Kanaaniɛ* brasua bie bɔ ofi mandanu berɛ wale ye berɛ, na ɔteane nu kyɛ: "Ao me Wura, David Awa, nwu me anwunvo. Sunzummɔne ha mma brasua paa." 23 Nakoso, Yesu andɛ ye so. Yeti ye asuafoɛ nemɔ srɛle ye kyɛ: "Ma ɔhɔ, ofikyɛ osu teɛtea nu di yɛ si." 24 Na ɔhane kyɛ: "Israel awuro mmoan bɔ bamini ne ngome, yeɛ bɛsomane me bɛ berɛ ɔ." 25 Yeɛ brasua ne buli ndwerɛ wɔ ye nyunu, na ɔhane kyɛ: "Awurade, boka me!" 26 Na Yesu koso ha hyirele ye kyɛ, "Ɔttemaye kyɛ ɛkɔfa ngwalaa paanoo kɔma ngyea." 27 Ye koso, ɔhane kyɛ, "Yoo, Awurade, mmom ngyea ne di bɔ wafi bɛ wuramɔ tɛbulu naso wagua ase ne." 28 Yeɛ Yesu hane kyɛ: "Baa brasua, wɔ gyidie te piri! Ɔyɛ berɛ ma wɔ, kyɛbɔ ɛpena ne."

29 Yesu fili berɛ ne, ɔhɔle Galilea po ne noa, mmerɛ bɔ ɔfolo bokaa ne, ɔtenane ase. 30 Yeɛ mmeni pee wale ye berɛ, na bɛfale apakye, anyesiniwaafoɛ, bɛ bɔ babubu, ɛmumu, ne ayarefoɛ pee beeguale ye gya bo, na ɔsale bɛ anwonyerɛ. 31 Na mmenia nemɔ nwuni kyɛ ɛmumu dwudwo, apakye nate, na anyesiniwaafoɛ nwu nikye ne, ɔyɛle bɛ nwanwa, na bɛyele Israel Nyameɛ ne ayɛ.

32 Yeɛ Yesu frɛle ye asuafoɛ nemɔ, na ɔha hyirele bɛ kyɛ: "Mmenia nemɔ nwo yɛ me anwunvo, ɛlɛsa yeɛ bafa batena me nwo wa ɔ; ná bɛlle hwee bɔ bɛkoli ɔ. Menguro kyɛ bɛfa ɛhɔen bɛkɔ, annea a, né bapɛ bafi atee nu." 33 Yeɛ asuafoɛ nemɔ hane kyɛ: "Ɛwa ate ye nwo, na nisua paa yeɛ yɛkwaanya paanoo bɔ ɔkɔso mmenia somaa he ɔ?" 34 Yesu bisale bɛ kyɛ: "Paanoo nyɛɛ yeɛ ɛmɔle ye wɔ berɛ ɔ?" Bɛhane kyɛ: "Nzoo, yeɛ egyein kaa bie." 35 Yeɛ ɔha hyirele mmenia ne kyɛ bɛtena-tena ɛserɛ naso. 36 Na ɔlɛle paanoo nzoo ne egyein ne, yeɛ ɔlale ase bubule nu ɔ. Na ɔfa mane ye asuafoɛ nemɔ, na bɛ koso bɛfa bɛmane mmenia ne. 37 Na bɛ mukoraati bɛlili maa bɛ ko yili; na asuafoɛ nemɔ sesale ye boso ne, benyane kɛndɛn nzoo dɛen. 38 Mmrienzua 4,000 yeɛ bɛlili ɔ, banga mmrasua ne ngwalaa ne bammoka so. 39 Yesu guale mmenia nemɔ atee ne, ɔtenane ɛleɛn nu hɔle Magadan mandanu dɔ.