1 Sɔ mmerɛ nanu ne, Yohane Suboniɛ wale Yudea serɛ so kyɛ ɔbaaha nzɛmba. 2 Ɔhane kyɛ: "Ɛmɔsakra ɛmɔ adwene, ofikyɛ Anwuro Ahennie né apingye." 3 Ɛhe yeɛ diifoɛ Isaiah hane ye nwo dwirɛ kyɛ:

"Ebie tea nu wɔ ɛserɛ naso kyɛ,

Ɛmɔsiesie Awurade atee!

Ɛmɔma ye atee ne tengyɛ."

4 Atadeɛ bɔ owura Yohane ne, afunum nwiaa yeɛ né bafa bayɛ ɔ, na né wafa kaka nwomaa wayɛ ye bɛlɛt.* Aleɛ bɔ ne odi yeɛ ole mmɛbɛ ne woɛ bɔ ɔwɔ eburo ne. 5 Né mmenia fi Yerusalem ne Yudea ne Yordan mandanu berɛ mukoraati ba ye berɛ, 6 sɛ bɛka bɛ bɔne a, né wabɔ bɛ asu wɔ Yordan nzue nanu.

7 Nakoso onwuni kyɛ Farisifoɛ ne Sadukifoɛ pee ba nekaa bɔ ɔbɔ asu ne, ɔha hyirele bɛ kyɛ, "Ɛkyerebene mmaa mɔ, nwa yeɛ ɔha hyirele ɛmɔ kyɛ ɛmɔnwati ɛyaa bɔ ɔba ne? 8 Ɛmɔsu mmaa bɔ okyire adwene-sakra. 9 Na nnɛmɔ nya adwene kyɛ, ‘Yɛ baba yeɛ ole Abraham.’ Ofikyɛ meka mekyire ɛmɔ kyɛ, Nyameɛ kɔhora kɔmaa Abraham konya mmaa kofi nyɔboɛ hemɔ nu. 10 Bafa akumaa ne bato bakaa ne ndii nanwo dada, yeti bakaa biala bɔ onzu mmaa pa ne, bɛkɔpɛ na bagyi bagua see nu. 11 Me de, ɛmɔ adwene-sakra ti yeɛ mefa nzue mebɔ ɛmɔ asu ne, nakoso bɔ oli me si ɔba ne de, ole tumi tra me, na ye mmaboa po, menvata kyɛ me ye. Ye de honhom krongron ne see yeɛ ɔkɔfa kɔbɔ ɛmɔ asu ɔ. 12 Otira nikye bɔ bɛfa behu hwiit so, na ɔkɔpra nekaa bɔ ohu hwiit gua ne kama-kama, na waboɔboa ye hwiit ne noa wagua pata so, na ndɛtɛ ne de, see bɔ onnua le yeɛ ɔkɔfa kɔyera ye ɔ."

13 Sɔ mmerɛ ne, Yesu fili Galilea wale Yohane berɛ wɔ Yordan nwo kyɛ ɔbɔ ye asu. 14 Nakoso, né Yohane pena kyɛ osi ye atee, na obisale kyɛ: "Me mmom bɔ odikyɛ ɛbɔ me asu ne, afei de wɔ yeɛ ɛba me berɛ ɔ?" 15 Yesu ha hyirele ye kyɛ, "Sɔ mmerɛ he de, de to nu, ofikyɛ sɔ atee he yeɛ yɛnate so yɛkɔyɛ bɔ ɔtengyɛ ɔ." Yeti Yohane lɛ tole nu. 16 Yesu bɔle asu yiele, ná ofili nzue ne bo fitele ala pɛ, anwuro bukyele, na onwuni kyɛ Nyameɛ honhom ne ba ye so te kyɛ abubure. 17 Yeɛ konviɛ bie fili anwuro wale kyɛ: "Ɛhe yeɛ ole mma bɔ medɔ ye, ná male ye mato nu ne."