1 Aliemaa mɔ, bɔ ɔla m’ahone so, ɔne bɔ mesrɛ Nyameɛ yeɛ ole kyɛ bekonya ngoa. 2 Ofikyɛ medi bɛ nwo adanzeɛ kyɛ bɛyere bɛ nwo bɛsõ Nyameɛ, nakoso nná nahorɛ nimdeɛ yeɛ bɛfa bɛyɛ sɔ ɔ. 3 Na ɔnate kyɛ ne bɛnze Nyameɛ tenenee nati, bɔ b’adwene yɛ bɛ kyɛ ɔtengyɛ ne, ɛhene yeɛ ne bɛli ye si ɔ. Yeti bammerɛ bɛ nwo ase banwura Nyameɛ tenenee nabo. 4 Na Kristo yeɛ ɔte mmeraa ne awieɛ ɔ, kyɛbɔ ɔkɔyɛ a, bɛkobu ebiala bɔ ole gyidie ne kyɛ ɔte teneneeniɛ.

5 Mose hworɔle tenenee bɔ ɔnate mmeraa so nanwo dwirɛ kyɛ: "Sona bɔ ɔkɔyɛ ɛhemɔ ne, ɔnate so konya ngoa." 6 Nakoso tenenee bɔ ɔnate gyidie so ne ka kyɛ: "Nnɛka ye wɔ w’ahone nu kyɛ, ‘Nwa yeɛ ɔkɔfo kɔhɔ anwuro ɔ?’ Kyire kyɛ, ɔkɔɔfa Kristo kɔwa ase, 7 anaa ‘Nwa yeɛ okodwu kɔhɔ kumaa kuron-kuron nanu ɔ?’ Kyire kyɛ ɔkɔɔfa Kristo kofi awufo nu kɔwa ɔ." 8 Mmom nzu yeɛ ɔka ɔ? Yenwa "Edwirɛ ne pingye wɔ, ɔwɔ wɔ noa ne w’ahone nu"; ɛhene yeɛ ole gyidie dwirɛ bɔ yɛka ne; 9 na sɛ ɛfa wɔ noa ka kyɛ Yesu te Awurade, na sɛ enya gyidie wɔ w’ahone nu kyɛ Nyameɛ atingye ye afi ewue nu a, bɛkole wɔ ngoa. 10 Ofikyɛ sona ahone yeɛ ɔfa dɛ́ di maa bɛbu ye teneneeniɛ, na ye noa yeɛ ɔfa pakye nu ka kyɛbɔ ɔkɔyɛ a okonya ngoa ɔ. 11 Na tworɔnzɛm ne ka kyɛ: "Ebiala bɔ okonya ye nu gyidie ne, ye sa ngosi ase." 12 Na nzonzonyɛ biala nne Yudaniɛ ne Greekniɛ nu. Awurade komapɛ nala yeɛ odi bɛ mukoraati so, na obukye yesa nu ma ebiala bɔ ɔfrɛ ye ne. 13 Ná "ebiala bɔ ɔkɔbɔ Awurade dumaa kɔfrɛ ye ne, okonya ngoa."

14 Nakoso, ɔkɔyɛ sɛɛ ne babɔ bɔ benne ye benni ne dumaa? Na ebie bɔ bɛtelle ye nwo dwirɛ ne, ɔkɔyɛ sɛɛ ne balɛ́ ye bali? Na sɛ ebie anga edwirɛ ne a, ɔkɔyɛ sɛɛ ne bate? 15 Na sɛ banzoma bɛ a, ɔkɔyɛ sɛɛ ne baha edwirɛ ne? Na kyɛbɔ bahworɔ ne: "Bɛ bɔ bɛka nningyein pa nwo nzɛmba ne, bɛ gya bo yɛ nyemene kyɛ." 16 Nakoso, nná bɛ mukoraati yeɛ betiele edwirɛ pa ne ɔ. Ofikyɛ Isaiah hane kyɛ: "Awurade, nwa yeɛ wale yɛ dwirɛ ne wali ɔ?" 17 Yeti sɛ ebie konya gyidie a, ɔnate bɔ ɔkɔte naso, na bɔ ɔkɔte ne koso nate Kristo nwo dwirɛ so.

18 Ye de, ma mmisa oo: Bannde? Bɛtele! Nahorɛ dwirɛ yeɛ ole kyɛ:

"Bɛtele bɛ konvi wɔ wiase mukoraati,

na bɛ dwirɛ ne hɔle aseɛ ne noa nekaa biala."

19 Mesa me bisa kyɛ, né Israelfoɛ nemɔ nze hɔ? Né bɛse! Mose limoa hane kyɛ:

"Ngɔmaa ɛmɔ nye kɔboro bɛ bɔ bɛtte maen ne;

na nnate maen bɔ bɛnze nworɛ so ngɔmaa ɛmɔ kɔfɛ yaa."

20 Nakoso Isaiah nyane akukuduro hane kyɛ:

"Bɛ bɔ bambena me ne yeɛ bɛnwuni me ɔ,

na bɛ bɔ bammisa me boso ne yeɛ maye me nwo ali mahyire bɛ ɔ."

21 Na ɔhane Israel nwo dwirɛ kyɛ:

"Kyẽa namukoraati, ndrɛle me sa nu mmane mmenia bɔ bɛ so yɛ se,

ná basenze bɛ kɔme ne."