1 Meka yɛliema brasua Foibe bɔ ɔsõ wɔ asafo bɔ ɔwɔ Kenkrea nanu nanwo dwirɛ mekyire ɛmɔ. 2 Ɛmɔle ye wɔ Awurade nu, kyɛbɔ ɛmɔdɛ akrongronfoɛ ne, na mmokalɛ biala bɔ ohia ne, ɛmɔfa bɛma ye. Ofikyɛ waboka mmeni pee, na me koso, waboka me paa.

3 Ɛmɔhyea Priska* ne Akwila bɛma me, bɛte me mmango bɔ mene bɛ yɛ adwuma wɔ Kristo Yesu nu; 4 bɛfale bɛ ngoa po bɛtole berɛ bɛmane me. Meda bɛ ase paa, nná me ngome, asafo ahoroɛ bɔ bɛwɔ maen-maen nanu namukoraati koso nwa bɛda bɛ ase. 5 Ná ɛmɔhyea asafo bɔ beyia nu wɔ b’awuro berɛ ne koso bɛma me.

Ɛmɔhyea me dɔfo Epaineto bɛma me; Kristofoɛ bɔ bɛli moa wɔ Asia ne, ɔboka so.

6 Ɛmɔhyea Mary bɛma me, wayɛ adwuma serɛ paa wama ɛmɔ.

7 Ɛmɔhyea Androniko ne Junias bɛma me, bɛte m’abusuafoɛ ne me mmango bɔ né mene bɛ la prizin. Sɔ mmrienzua hemɔ de, asomafoɛ ne se bɛ paa, na bɛɛyɛle Kristofoɛ kora yeɛ mebaayɛ Kristoniɛ ɔ.

8 Mekyea Ampilato, ɔte me damvo bɔ medɔ ye wɔ Kristo nu.

9 Ɛmɔhyea Urbano bɛma me, ɔte me mmango bɔ mene ye yɛ adwuma wɔ Kristo nu; me dɔfo Staki koso, ɛmɔhyea ye bɛma me.

10 Ɛmɔhyea Apele bɔ balɛ́ ye bato nu wɔ Kristo nu ne bɛma me.

Mekyea Aristobulo awurofoɛ koso.

11 Ɛmɔhyea m’abusuaniɛ Herodion bɛma me.

Ɛmɔhyea Narkiso awurofoɛ bɔ bɛwɔ Awurade nu ne bɛma me.

12 Ɛmɔhyea Trifena ne Trifosa, mmrasua bɔ bɛyɛ adwuma serɛ bɛma Awurade ne bɛma me.

Ɛmɔhyea yɛ dɔfo Persis koso bɛma yɛ, ofikyɛ wayɛ adwuma serɛ wama Awurade.

13 Mekyea Rufus bɔ baye ye wɔ Awurade nu ne, ɔne ye maame, bɔ wafa me wayɛ ɔwa ne.

14 Ɛmɔhyea Asinkrito, Flegon, Herme, Patroba, Herma, ne mmrienzua bɔ bɛboka bɛ so ne bɛma me.

15 Ɛmɔhyea Filologo ne Julia, Nereo ne oliema brasua ne, ɔne Olimpa ne akrongronfoɛ bɔ bɛboka bɛ so namukoraati bɛma me.

16 Ɛmɔfa mveanoɛ krongron bɛhyeɛhyea ɛmɔ nwo.

Kristo asafo namukoraati nwa bɛkyea ɛmɔ.

17 Aliemaa mɔ, kesaalae de mesrɛ ɛmɔ, ɛmɔnea ɛmɔ nwo yé wɔ bɛ bɔ bɛfa mbakye-mbakye-muɛ bɛba, na bɛto sintidua bɔ ɔne ngyerɛkyerɛ bɔ ɛmɔ asua ne nnyia nanwo, na ɛmɔhwe ɛmɔ nwo bɛfi bɛ nwo. 18 Ofikyɛ sɔ mmenia nemɔ, bɛtte Awurade Kristo ngoaa, mmom bɛte ngoaa bɛma bɛ bɔbɔ bɛ ko, na bɛ bɔ adwemmɔne biala nne bɛ tianu ne, bɛfa edwirɛ bɔ ɔyɛ fɛ ne nnɛdɛɛ so bɛlaka-laka bɛ. 19 Ebiala anwu sotie bɔ ɛmɔyɛ ne, na me nye agye ama ɛmɔ. Nakoso mepena kyɛ ɛmɔyɛ anyanzafoɛ wɔ nningyein pa nwo, na ɛmɔtwe ɛmɔ nwo koraa bɛfi bɔne nwo. 20 Ɔngɔhyɛ, asomdwie Nyameɛ ne kɔpɛkyɛ Satan koraa wɔ ɛmɔ gya bo.

Y’Awurade Yesu Kristo adom ne ɛmɔ tena.

21 Timoteo bɔ ɔte me mmango bɔ mene ye yɛ adwuma ne nwa ɔkyea ɛmɔ, na sɔ ala yeɛ m’abusuafoɛ Lukio, Yason ne Sosipata koso nwa bɛkyea ɛmɔ.

22 Me Tertio yeɛ ndworɔle krataa he ɔ, me koso mekyea ɛmɔ wɔ Awurade nu.

23 Gaius bɔ ndenane ye awuro, na asafo namukoraati yia nu wɔ ye awuro ne nwa ɔkyea ɛmɔ.

Erasto bɔ ɔnea kuro ne sikaa so ne nwa ɔkyea ɛmɔ, na oliema Kwarto koso nwa ɔkyea ɛmɔ. 24 *—

25 Nyameɛ bɔ ɔkɔhora kɔmaa ɛmɔ kɔyɛ se ne nate nzɛmba bɔ meka, ɔne Yesu Kristo nwo asɛnka naso, kyɛbɔ edwirɛ krongron bɔ wafea mmerɛ-tende, 26 na kesaalae waye ye ali ne te ne; ɔnate ngɔmhyɛ bɔ ɔwɔ Tworɔnzɛm nanu naso ala ye ali maa maen-maen namukoraati anwu ye, kyɛbɔ Nyameɛ bɔ ɔte ase daa ne ahyɛ kyɛ bɛfa gyidie so bɛyɛ sotie ne. 27 Nyameɛ bɔ ye ngome yeɛ ɔse nworɛ ne, ye yeɛ anuonyam fa y’Awurade Yesu Kristo ha ye daa daa! Amen.