1 Meka nahorɛ wɔ Kristo nu, membɛ anoanu; na m’ahonim koso di me adanzeɛ wɔ honhom krongron nu, 2 kyɛ medi aworaborɛ paa, na daa yealɛ wɔ m’ahone nu. 3 Ɔhale me ngome a, ahaa bate me bafi Kristo nwo kyɛ ebie bɔ badome ye, ná bafa me basi nniema nemɔ gya nu, nniema bɔ me ne bɛ bɔ abusua wɔ anwoɔnaen nu ne. 4 Bɛte Israelfoɛ, na bɛ yeɛ bafa bɛ bayɛ mmaa, ná anuonyam, apam ahoroɛ, mmeraa bɔ bɛfa bɛmane, ɔsom* ne bɔhyɛ nemɔ te bɛ deɛ. 5 Bɛ nana yeɛ ole abusua panyin nemɔ, na anwoɔnaen nu ne, bɛ bosoniɛ yeɛ ole Kristo. Na Nyameɛ bɔ odi nikye biala so ne, ye yeɛ ayɛyie ha ye daa daa. Amen.

6 Nakoso, ɔtte kyɛ ebia Nyameɛ dwirɛ ne amma nu, ofikyɛ nná bɛ bɔ bɛfi Israel nu namukoraati yeɛ bɛte Israelfoɛ ɔ. 7 Afei koso, ɔtte kyɛ bɛte Abraham bosofoɛ nati, bɛ mukoraati bɛte ye mmaa mɔ. Mmom "Bɔ bɛkɔfrɛ ye wɔ bosoniɛ ne, ɔnate Isaac so yeɛ ɔkɔwa ɔ." 8 Yeti nná anwoɔnaen nu mmaa yeɛ bɛte Nyameɛ mmaa ɔ, mmom bɔhyɛ mmaa ne yeɛ bɛbu bɛ kyɛ bɛte ye bosofoɛ ɔ. 9 Ofikyɛ bɔhyɛ ne ka kyɛ: "Afoɛ bieku bekye sɔa, ngɔwa ne, né Sara awo baa brienzua." 10 Nná ɛhe angome, mmom mmerɛ bɔ Rebeka ne sona-horɛ, yɛ nana Isaac nwonzɛle ndaafoɛ ne koso, 11 né benya bɛwolle bɛ, na né benya bɛyɛlle pa anaa bɔne, nakoso bɔ ɔkɔyɛ né Nyameɛ atirimbɔ ne anyina nyumaa so, na mmom wagyina bɔ ɔkɔye ye naso ne, 12 ɔha hyirele ye kyɛ: "Panyi ne kɔsõ kamba ne." 13 Sɔ ala yeɛ bahworɔ ye wɔ tworɔnzɛm nanu kyɛ: "Ne medɔ Yakob, na Esau de, né menguro ye dwirɛ."

14 Ye de, nzu yeɛ yɛka ɔ? Nyameɛ bu ndɛngyea anaa? Dabida! 15 Ofikyɛ ɔha hyirele Mose kyɛ:

"Bɔ mekuro ne yeɛ ngonwu ye anwunvo ɔ,

na bɔ mekuro ne yeɛ me kunu kɔtete me kɔma ye ɔ."

16 Yeti oggyi bɔ ebie kuro anaa ye mmɔdemmɔ so, mmom ogyi Nyameɛ bɔ onwu anwunvoin naso. 17 Ofikyɛ tworɔnzɛm ne ha hyirele Farao kyɛ: "Bɔ yeti yeɛ mayakyi wɔ maa ɛtɛ́ te berɛ ne yeɛ ole kyɛ, ngɔye me tumi ne ali ngohyire wɔ, ná wamaa babɔ me dumaa wɔ aseɛ mukoraati so." 18 Yeti ebiala bɔ Nyameɛ kuro ne, yeɛ onwu ye anwunvo ɔ, na bɔ okuro ne, yeɛ ɔmaa ɔyɛ asoserɛ ɔ.

19 Nakoso ebie kobisa me kyɛ: "Nzuati yeɛ ɔtɛ́ nwu mvomsoɛ wɔ sona nwo ɔ? Na nwa yeɛ ɔkɔhora kosi ye apɛdeɛ ne atee ɔ?" 20 Sona, wɔ yeɛ ɛle nwa bɔ ɛne Nyameɛ yeye ne? Aso kukue kɔhora kobisa bɔ onwone ye ne kyɛ: "Nzuati yeɛ ɛnwone me sɔa ɔ?" 21 Sona bɔ onwo ngukue ne, aso olle tumi kyɛ ɔfa nnɛterɛ komapɛ nala bie nwo nningyein bɔ ole anuonyam, na ɔfa bie yɛ bɔ olle anuonyam? 22 Nyameɛ koso, ɔwɔ nu kyɛ ɔpena kyɛ ɔye ye yaa ne ali na ɔmaa bɛnwu ye tumi, nakoso sɛ onya nningyein bɔ wafɛ bɛ so yaa bɔ wasiesie kyɛ ɔkɔsɛkye bɛ nanwo aboterɛ paa koso ɛ? 23 Sɛ ɔyɛle sɔ kyɛbɔ ɔkɔyɛ a, ɔkɔye ye anuonyam pembe ne ali kohyire anwenneɛ bɔ wanwu bɛ anwunvoin, bɔ wali moa wasiesie wato berɛ kyɛ ɔkɔhyɛ ye anuonyam, 24 bɔ yɛ bɔ ɔfrɛle yɛ fili Yudafoɛ ne maen-maen nanu ne boka so ne koso a, ahaa nzu yeɛ yɛkɔhora yɛkɔha ɔ? 25 Na sɔ ala yeɛ waha ye wɔ Hosea nwomaa nanu ɔ, ɔhane kyɛ:

"Bɛ bɔ ne bɛtte me maen ne, ngɔfrɛ bɛ ‘me maen.’

Na maen bɔ ne mennɔ ye ne, ngɔfrɛ ye ‘me dɔfo.’

26 Na nekaa bɔ bɛha bɛhyirele bɛ kyɛ, ‘Ɛmɔtte me mmenia ne,’

ɛberɛ yeɛ bɛkɔfrɛ bɛ ‘Nyameɛ teasefoɛ ne mmaa ɔ.’"

27 Afei koso, Isaiah hane Israel nwo dwirɛ kyɛ:

"Ɔwɔ nu Israelfoɛ dodoɔ te kyɛ ɛpo noa anweaa,

nakoso bɛ nu kaa bie yeɛ bɛkole bɛ ngoa ɔ.

28 Ofikyɛ Awurade kɔmaa bɛkobu aseɛ nanwo ngondaa bɛkohyire ye,

na okoyie ye ndɛ."

29 Afei koso, kyɛbɔ Isaiah ha tole berɛ ne:

"Sɛ asafo Awurade anyakyi yɛ bosofoɛ biemɔ berɛ a,

ahaa yayɛ kyɛ Sodom,

na ahaa yayɛ te kyɛ Gomora."

30 Ye de, nzu bieku yeɛ yɛka ɔ? Bɔ yɛka yeɛ ole kyɛ, ɔwɔ nu kyɛ maen-maen nanufoɛ anni tenenee si, nakoso banya tenenee, tenenee bɔ ɔnate gyidie so; 31 nakoso Israel bɔ ne bɛle tenenee mmeraa ne, bangora banni mmeraa ne si pɛpɛɛpɛ. 32 Nzuati ɔ? Bɔ ɔte yeɛ ole kyɛ, nná gyidie yeɛ bɛfa bɛlili ye si ɔ, na mmom nyumaa. Bɛfini "nyɔboɛ bɔ ɔto sintidua" naso; 33 na bahworɔ kyɛ:

"Nea, mefa nyɔboɛ bɔ ɔto sintidua

ne nyɔboɛ bɔ ɔmaa bɛfi ase meto Zion;

na bɔ okonya ye nu gyidie ne,

ye nyunu ngogua ase lle."