ಐಗುಪ್ತಮಾ ಇಸ್ರಾಯೆಲೊ ತ್ರಾಸಕ್ಹು ಚಲಾಯಲ
1 ಯಾಕೊಬನಾ ಕ್ಹಾತೆ ಐಗುಪ್ತ ದೆಶನೆ ತ್ಯುನಾ ತ್ಯುನಾ ಘರವಾಲಾವೊನಾ ಕ್ಹಾತೆ ಆಯಲ ಇಸ್ರಾಯೆಲನಾ ಗಂಡ ಬಚ್ಚಾ಼ವೊನಾ ನಾಮೊ: 2 ರುಬೆನ, ಸಿಮೆಯೊನ, ಲೆವಿ, ವರಿ ಯೆಹುದ, 3 ಇಸ್ಸಾಕಾರ, ಜೆಬುಲುನ, ವರಿ ಬೆನ್ಯಾಮಿನ; 4 ದಾನ, ಗಾದ, ನಫ್ತಾಲಿ, ವರಿ ಅಶೆರ. 5 ಯಾಕೊಬನಾ ಕ್ಹಾರಾ ಸಂತತಿವಾಲಾ ಮಳಿನ ಸತ್ತರ ಜ಼ನಾ, ತೆನೈಸೊ ಯೊಸೆಫ ಪೈಲಾಜ ಐಗುಪ್ತಮಾ ವ್ಹತ್ತೊ. 6 ತೆ ಥಯಲ್ಪರ ಯೊಸೆಫ, ತಿನಾ ಭಾಯೊ ಕ್ಹಾರಾ ಜ಼ನಾ ವೈಸ ಥೈನ ಮರ‍್ಯಾ. 7 ತೆನೈಸೊ ಇಸ್ರಾಯೆಲ ವಂಶವಾಲಾ ಜಾಸ್ತ ಥೈನ, ತಾಕತವರ ಥಯಾ. ತೆ ಐಗುಪ್ತ ದೆಶಮಾ ನಿಸ್ತಾ ತ್ಯುನೆಜ಼ ಭರಿ ಗಯಾ. 8 ತೆ ಥಯಲ್ಪರ ಯೊಸೆಫನೆ ವಳಕ ನೈಸೊ ರ‍್ಹಯಲ ಯಕ್ಕ ನವೊ ರಾಜೊ಼ ಐಗುಪ್ತ ದೆಶ ಚ಼ಲಾವಾಡೊತೊ. 9 ತೆ ನವೊ ರಾಜೊ಼ ತ್ಯುನಾ ಮನಕ್ಹೊನೆ, "ದೆಕೊ, ಇಸ್ರಾಯೆಲನಾ ಮನಕ್ಹೊಜ಼ ಜಾಸ್ತ ಛೆ ವರಿ ತ್ಯುನೆ ಅಪ್ನೊತಿ ತಾಕತವರ ಛೆ." 10 ಅಪನಾ ವಿರೊದ್ದ ಕುನ್ನಬಿ ಯುದ್ದ ಕರಾನೆ ಆಯಾರೆ ತ್ಯುನೆ ಅಪನಾ ದುಶ್ಮನೊನಾ ಕ್ಹಾತೆ ಮಳಿನ ಅಪನಾ ಕ್ಹಾತೆ ಯುದ್ದ ಕರಿನ ಅಪ್ನು ದೆಶ ಛೊಡಿನ ಗೈ ಪಡಸ. ತಿನಾಹುತಿ ತ್ಯುನೆ ಅಪ್ನು ದೆಶ ಛೊಡಿನ ಗಯಾ ಬಗರ ಅಪೆ ಸುಬಿ ವಿಚಾರ ಕರು" ಕೈನ ಕದ್ಯೊ. 11 ತೆಳಾಮಾ ತ್ಯುನೊನೆ ಗುಲಾಮೊ ಕರಲಿನ ತ್ರಾಸ ದಿವಾನೆ ಚಾಲು ಕರ‍್ಯಾ, ವರಿ ತ್ಯುನೊಪರ ಅದಿಕಾರಿಯೊನೆ ಮುಕ್ಯಾ. ತ್ಯುನೆ ಫರೊಹನನಾಹುತಿ ಪಿತೊಮ ವರಿ ರಾಮ್ಸೆಸ ಕವಾನಾ ಸೆವೆ ಕರಾನಾ ಗಾಮೊ ಭಾಂದಾ ಲಗಾಡ್ಯೊ. 12 ತೆನೈಸೊ ಐಗುಪ್ತನಾ ಮನಕ್ಹೊ ಇಸ್ರಾಯೆಲ ಮನಕ್ಹೊನೆ ಕೆಕ್ಲು ತ್ರಾಸ ದಿದ್ಯಾತಬಿ ತ್ಯುನೆ ಬಿನಕ್ಕರ ಜಾಸ್ತ ಥಾತಾ ಪುರಾ ದೆಶಮಾ ಫೈಲಾಡಾತಾ, ಇಸ್ರಾಯೆಲನಾ ಮನಕ್ಹೊ ಫೈಲಾನು ದೆಕಿನ ಐಗುಪ್ತನಾ ಮನಕ್ಹೊ ಘನ್ನಾ ಬುಚ಼ಕ್ಯಾ. 13 ಐಗುಪ್ತನಾ ಮನಕ್ಹೊ ಇಸ್ರಾಯೆಲ ಮನಕ್ಹೊನೆ ಘನ್ನಾ ತ್ರಾಸ ದಿನ ತ್ಯುನೊಕನ ಕಾಮ ಕರೈಲಿದ್ಯಾ. 14 ಮಾತಿನಾ ಕಾಮೊಮಾಬಿ, ಇಟಂಗಿ ಕರಾನಾ ಕಾಮೊಮಾಬಿ, ವರಿ ಖೆತರನಾ ಕಾಮೊಮಾಬಿ ತ್ಯುನೊನೆ ತೆ ಕ್ಹಾರಾ ತರಾನಾ ಕಾಮೊ ಕರೈನ ತ್ರಾಸ ದಿನ ತ್ಯುನಿ ಜಿವ್ನಾಜ಼ ಬೆಜಾರ ಕರಿ ಪಡ್ಯಾ. ಐಗುಪ್ತನಾ ಮನಕ್ಹೊ ಇಸ್ರಾಯೆಲನಾ ಮನಕ್ಹೊಕ್ಹು ಕರಾವಾನಾ ಕಾಮೊ ಘನ್ನಾ ತ್ರಾಸನಾ ಕಾಮೊ ವ್ಹತ್ತಾ. 15 ತೆನೈಸೊ ಐಗುಪ್ತ ದೆಶನೊ ರಾಜೊ಼ ಇಬ್ರಿಯ ಬಾಕ್ಡಿಯೊನೆ ಜ಼ನ್ನಾ ಲಗಾಡಾಲ್ಯೊ ಬೆ ಬಾಕ್ಡಿಯೊನೆ ಮದತ ಕರ‍್ಯೊ. ತೆ "ಶಿಪ್ರಾ" ವರಿ "ಪುಗಾ" ಕವಾನಾ ಬಾಕ್ಡಿಯೊನಾ ಕ್ಹಾತೆ ಬೊಲಿನ, 16 ತೆ ತ್ಯುನೊನೆ, "ತುಮೆ ಇಬ್ರಿಯನಾ ಬಾಕ್ಡಿಯೊನೆ ಜ಼ನ್ನಾಡತಾಮಾ ತೆ ಬಚ್ಚು಼ ಪಟ್ಟೊ ರ‍್ಹಯಾರೆ ತುಮೆ ತಿನೆ ಖಲಾಸ ಕರಿಪಡು, ಛೊಕ್ರಿ ರ‍್ಹಯಾರೆ ಜಿವ್ತಾ ರ‍್ಹವಾನೆ ಛೊಡೊ" ಕೈನ ಕದ್ಯೊ. 17 ತೆನೈಸೊ ತೆ ಜನ್ನಾಡಾಲ್ಯೊ ಬಾಕ್ಡಿಯೊ ಕ್ಹುದಾನೆ ಬುಚ್ಕಿ಼ನ ಐಗುಪ್ತನಾ ರಾಜಾ಼ನಿ ವಾತ ಲಿಂಗತ ಕರ‍್ಯಾ ಬಗರ ಪಟ್ಟಾ ಹುಟ್ಯಾರೆ ತ್ಯುನೊನೆ ಖಲಾಸ ಕರ‍್ಯಾ ಬಗರ ರ‍್ಹಯಾ. 18 ತೆಳಾಮಾ ಐಗುಪ್ತನೊ ರಾಜೊ಼ ತೆ ಜನ್ನಾಡಾಲ್ಯೊ ಬಾಕ್ಡಿಯೊನೆ ಬಲೈನ, "ತುಮೆ ತ್ಯುನೊನೆ ಪಟ್ಟಾನೊ ಹುಟ್ಯಾರೆ ಕಾ ಖಲಾಸ ಕರ‍್ಯಾ ನೈ? ಕಾ ತುಮೆ ಮಾರಾ ಕ್ಹಾತೆ ಅಮ್ಮ ಕರ‍್ಯಾ? ಕೈನ ಪುಚ್ಯೊ. 19 ತೆ ಜನ್ನಾಡಾಲ್ಯೊ ಬಾಕ್ಡಿಯೊ ಫರೊಹನನೆ, "ಇಬ್ರಿಯನಾ ಬಾಕ್ಡಿಯೊ ಐಗುಪ್ತನಾ ಬಾಕ್ಡಿಯೊ ಲಿಂಗತ ನ್ಹವೈ, ತ್ಯುನೆ ಘನ್ನಾ ಚಾಲು ಶೆ ತ್ಯುನೆ ಹಮೆ ಜಾ಼ವಾತಿ ಪೈಲಾಜ ಜ಼ನ್ನಿ ಪಡಾಡಾತಾ" ಕೈನ ಕದ್ಯಾ. 20 ತಿನಾಹುತಿ ಕ್ಹುದಾ ತ್ಯುನೊನೆ ಮರ್ಗಾ ದೆಕಾಡ್ಯೊ, ತಿನಾಕ್ಹು ಇಸ್ರಾಯೆಲನಾ ಮನಕ್ಹೊ ಜಾಸ್ತ ಥಾತಾ ಗಯಾ ವರಿ ತಾಕತವರ ಥಾತಾ ಗಯಾ. 21 ತೆ ಬಾಕ್ಡಿಯೊ ಕ್ಹುದಾನೆ ಬುಚ಼್ಕಲಕ್ಹು ತ್ಯುನು ಘರದಾನಬಿ ಜಾಸ್ತ ಥಯು. ಇಸ್ರಾಯೆಲ ಮನಕ್ಹೊ ಜಾಸ್ತ ಥೈನ ತಾಕತವರ ಥಯಾ. 22 ತೆ ಥಯಲ್ಪರ ಫರೊಹನ ತ್ಯುನಾ ಮನಕ್ಹೊನೆ, "ಇಬ್ರಿಯನಾ ಹಮ್ನಾ ಹಮ್ನಾ ಹುಟ್ಟಲ ಪಟ್ಟಾವೊನೆ ಲಿನ ನೈಲ ನದಿಮಾ ನಾಕೊ, ತೆನೈಸೊ ಛೊಕ್ರಿಯೊನೆ ಸು ಕರೊ ನಕೊ" ಕೈನ ಆಗನ್ಯಾ ಕರ‍್ಯೊ.