ವಿಮೊಚನಕಾಂಡ 29

ಯಾಜಕೊನೆ ನೆಮಿಸಾನು

1 ತ್ಯುನೆ ಮನೆ ಯಾಜಕ ಥಯೆಲಿಂಗತ ತ್ಯುನೊನೆ ನೆಮಕ ಕರಾನೆ ತು ಕರಾನಾ ಕಾಮೊ ಸುವೈ ಕದ್ಯಾಮ; ಯಕ್ಕ ಬೈಲ ವರಿ ಬೈಲನು ಬಚ಼್ಚಾನೆ ಕಯುಜ಼಼ ದೊಶ ನೈಸೊ ಬೆ ಟಗರೊನೆ ಲಿವ್. 2 ವರಿ ಕ್ಹಾಟು ನೈಸೊ ರೊಕ್ಲಾ, ತೆಲಮಾ ಮಳಾಯಲ ಕ್ಹಾಟು ನೈಸೊ ಪೊಳಿಯೊ, ತೆಲಮಾ ತಳ್ಯಲ ಕ್ಹಾಟು ನೈಸೊ ಪೊಳಿಯೊ, ಘೌಂನಾ ಲೊಟಕ್ಹು ಕರಾಯಲ ಯಕ್ಕ ಟೊಪ್ಲಿಮಾ ಭರೌ. 3 ತೆ ಥಯಲ್ಪರ ತೆ ಟೊಪ್ಲಿನೆ, ಬೈಲನೆ ವರಿ ಬೆ ಟಗರೊನಾ ಕ್ಹಾತೆ ಲೌ. 4 ತೆಳಾಮಾ ಆರೊನನೆ ವರಿ ತಿನಾ ಬಚ಼್ಚಾವೊನೆ ದೆವದರ್ಶನನಾ ಗುಡಾರನಾ ಬಾಕಲಕನ ಬಲೈಲಿನ ಐನ ಪಾನಿಮಾ ಅಂಗ ಧವಾ ಲಗಾಡಿನ 5 ತೆ ವಣ್ಣಾ ಕದ್ಯಾಮ ಉಪ್ಪರ್ಲು ಅಂಗ್ಡು ಕವಚನಾ ಕ್ಹಾತೆ ಘಾಲಿಲಿವಾನು ಅಂಗ್ಡಾನೆ ಕವಚನಾ ಪಿಶಿನಾ ಪದಕ ಆರೊನನೆ ಘಾಲಿನ ವಿಚಿತ್ರ ಕಂಬರನಿ ಪಟ್ಟಿ ಭಾಂದಿನ 6 ತಿನಾ ಮಾತಾನೆ ಮುಂಡಾಸ ಘಲಾಲಗಾಡಿನ, ಮುಂಡಾಸನಾ ಉಪ್ಪರ ಪವಿತ್ರ ಪಟ್ಟೊ ಭಂದೈನ, 7 ಅಭಿಷೆಕನು ತೆಲ ತಿನಾ ಉಪ್ಪರ ರಿಚ಼ೈನ ತಿನೆ ಅಭಿಷೆಕ ಕರು. 8 ಪಾಚ಼ಲ್ತಾ ತಿನಾ ಬಚ಼್ಚಾವೊನೆ ನಜಿಕ ಬಲೈನ, ತ್ಯುನೊನೆ ಯಪ್ಪರಲ್ಯು ಅಂಗ್ಡಾ ಘಲೈನ 9 ಆರೊನನೆಬಿ ತಿನಾ ಬಚ಼್ಚಾವೊನೆಬಿ ನಡುಕಟ್ಟ ಭಂದೈನ ಮುಂಡಾಸೊ ಮ್ಹೆಲು. ತೆ ದಿನ್ನತು ಯಾಜಕತ್ವ ತ್ಯುನೊನೆ ಹಮೆಶಾನು ಹಕ್ಕ ಥೈನ ರ‍್ಹವಸ. ಇಮ್ಮ ಆರೊನ ತಿಮಾ ಬಚ಼್ಚಾ ಯಾಜಕನಾ ಸೆವೆನೆ ನೆಮಸಲವಾಲಾ ಥಾವಸ. 10 ಪಾಚ಼ಲ್ತೊ ತು ತೆ ಬೈಲನೆ ದೆವದರ್ಶನನಾ ಗುಡಾರಕನ ಲೈನ, ಆರೊನ ತಿನಾ ಬಚ್ಚಾ಼ ತಿನಾ ಮಾತಾನಾ ಉಪ್ಪರ ತ್ಯುನಾ ಹತೊ ಮ್ಹೆಲಾಲಗಾಡು. 11 ಪಾಚ಼ಲ್ಯೊ ತು ತಿನೆ ಯಹೊವಾನಿ ಸನ್ನಿಧಿಮಾ ದೆವದರ್ಶನನಾ ಗುಡಾರನಾ ಬಾಕಲಮಾಜ಼ ಖಲಾಸ ಕರೌ. 12 ತೆ ಬೈಲನಾ ರಗತಮಾನು ದಕ್ಹು ಲಿನ ಬೊಟಕ್ಹು ಯಜ್ಞವೆದಿನಾ ಶಿಂಗಡಾವೊನೆ ಲಗಾಡಿನ ಉಗ್ರಲ ಕ್ಹಾರಾ ರಗತನೆ ಯಜ್ಞವೆದಿನಾ ಹೆಟೊ ನಾಕು. 13 ತಿನಾ ಮ್ಹೈನಾ ಅಂಗೊ ರ‍್ಹವಾನಾ ಕಲ್ಜು ಬೆ ಕಿಡ್ನಿನೆ ತ್ಯುನಾ ಉಪ್ಪರ ರ‍್ಹವಾನಿ ಚರ್ಬಿನೆ ಲಿನ ಯಜ್ಞವೆದಿನಾ ಉಪ್ಪರ ಹೊಮಾ ಕರು. 14 ಬೈಲನಾ ಮಾಕ್ಹನೆ, ಚಾಂಬಡಾನೆ ವರಿ ಅತ್ತೊಡಾ ಪಾಳೆಯನಾ ಭಾರಾ ಆಗಕ್ಹು ಬಾಳಿಪಡು. ಕಾಕದ್ಯಾಮ ಎ ದೊಶಪರಿಹಾರಕ ಯಜ್ಞ ವ್ಹೈ. 15 ಪಾಚ಼ಲ್ತೊ ತು ತೆ ಟಗರೊಮಾನು ಯಕ್ಕ ಲಿನ ಆರೊನ ತಿನಾ ಬಚ಼್ಚಾ ತಿನಾ ಮಾತಾನಾ ಉಪ್ಪರ ತ್ಯುನಾ ಹತೊ ಮ್ಹೆಲು. 16 ತು ತಿನೆ ಲಿನ ತಿನಾ ರಗತನೆ ಯಜ್ಞವೆದಿನಾ ಚಾರೆ ಬಗಲಬಿ ಚಪಡು. 17 ತೆ ಥಯಲ್ಪರ ತು ತೆ ಟಗರನೆ ತುಕ್ಡಾ ಕತ್ರಿನ ತಿನಾ ಅತ್ತೊಡಾವೊನೆ, ಪಗೊನೆ ಧ್ಯಲಿನ ತಿನಾ ತುಕ್ಡಾವೊನೆ, ಮುಂಡಿನೆ ಕ್ಹಾತೆ ಮ್ಹೆಲ್ಯೂ. 18 ತೆ ಕ್ಹಾರು ಯಜ್ಞವೆದಿನಾ ಉಪ್ಪರ ಯಹೊವಾನೆ ಭುಂಜಿಲೆ ಬಲಿ ಥೈನ ಮ್ಹೆಲ್ಯೂ. ಆ ಯಹೊವಾನೆ ಚೊಕಿ ಬಾಸನೂ ಹೊಮಾ ಥಯುಸ. 19 ತೆ ಥಯಲ್ಪರ ತು ಬೆವಾ ಟಗರನೆ ಕಾಡಿಲಿನ ಆರೊನಬಿ ತಿನಾ ಬಚ್ಚಾ ತಿನಾ ಮಾತಾನಾ ಉಪ್ಪರ ತುಮಾರಾ ಹತೊನೆ ಮ್ಹೆಲ್ಯೂ. 20 ತೆ ಥಯಲ್ಪರ ವದಸಿನ ತಿನು ರಗತಮಾ ದಕ್ಹು ಆರೊನಾ ವರಿ ತಿನಾ ಬಚ್ಚಾನಾ ಸಿದಾ ಕಾನನಾ ತುದಿನೆ ಸಿದಾ ಹತ್ತನಾ ಹೆಬ್ಬೊಟನೆ, ಸಿದಾ ಪಗ್ಗನಾ ಹೆಬ್ಬೊಟನೆ ಲಗಾಡಿನ, ಉಗ್ರಲ ರಗತನೆ ಯಜ್ಞವೆದಿನಾ ಸುತ್ತೆಬಿ ಚುಪಡು. 21 ತೆ ನೈಸೊ ತು ಯಜ್ಞವೆದಿನ ಉಪ್ಪರ ರ‍್ಹವಾನು ರಗತಮಾಬಿ, ಅಬಿಷೆಕನಾ ತೈಲಮಾಬಿ ದಕ್ಹು ಕಾಡಿಲಿನ ಆರೊನಬಿ ವರಿ ತಿನಾ ಟುವಾಲೊ ತಿನಾ ಬಚ್ಚಾ ವರಿ ತ್ಯುನಾ ಟುವಾಲೊ ಉಪ್ಪರಬಿ ಚೂಪಡು. ಅಮ್ಮಜ ತೆ ವರಿ ತಿನಾ ಬಚ್ಚಾ ತ್ಯುನಾ ಟುವಾಲೊಬಿ ಪರುಶುದ್ದ ಥಾವಸ. 22 ಪ್ರತಿಷ್ಠೆನಾಹುತಿ ಸಮರಪಿಸ ಕರಲ ಟಗರ ಥಯಲಕ್ಹು ತಿನಾ ಚರಬಿನೆ ಕದ್ಯಾಮ ಪುಚಡಿನಾ ಚರಬಿನೆ, ಪಿತ್ತಕೊಶನಾ ಉಪ್ಪರಲಿ ಚರಬಿನೆ, ಭಂಬೆ ಮೂತ್ರ ಕೊಶೊನೆ ತಿನಾ ಉಪ್ಪರಲಿ ಚರಬಿನೆ ತಿಮ್ಮಜ಼ ಸಿದಾ ಮಾಂಡಿನೆ, 23 ವರಿ ಯಹೊವಾನಾ ಕ್ಹಾಮಾ ಥೈನ ಟೊಪ್ಲಿಮಾ ಮ್ಹೆಲಲ ಕ್ಹಾಟೂ ನೈ ರ‍್ಹಯಲ ಪದಾರ್ಥತೊಮಾ ಯಕ್ಕ ರೊಕ್ಲಾನೆ , ತೆಲನು ರ‍್ಹಯಲ ಯಕ್ಕ ಪೊಳಿನೆ ವರಿ ಯಕ್ಕ ಕನೂಲಾನೆ ಕಾಡಿಲಿನ, 24 ತೆ ಕ್ಹಾರು ಆರೊನಾ ವರಿ ತಿನಾ ಬಚ್ಚಾನಾ ಹತ್ಮಾ ದಿನ ಯಹೊವಾನಾ ಸನ್ನಿದಿಮಾ ಯೆಡಿ ಚಡೌ. 25 ತೆ ಥಯಲ್ಪರ ತೆ ಕ್ಹಾರು ತ್ಯುನಾ ಹತ್ತಕ್ಹು ಕಾಡಿಲಿನ ಯಜ್ಞವೆದಿನಾ ಉಪ್ಪರ ನಯೆ ಹೊವಾನಾಹುತಿ ಬಾಳು. ತೆ ಯಹೊವಾನೆ ಚೊಕಿ ಬಾಸನಿ ಹೊಮಾ ಥಯುಸ. 26 ವರಿ ಆರೊನಬಿ ಪಟ್ಟಾ ಅಭಿಶೆಕನಾಹುತಿ ಪ್ರತಿಷ್ಠ ಕರಲ ಟಗರನಾ ಛಾತಿನಾ ಭಾಗನೆ ಕಾಡಿಲಿನ ತೆ ಯಹೊವಾನಾ ಸನ್ನಿದಿಮಾ ಉತಾರು. ತೆ ತುನೆ ಸಲ್ಲಾನು ಪಾಲ ಥಾವಸ. 27 ಆರೊನನೆಬಿ ತಿನಾ ಬಚ್ಚಾ಼ವೊನೆಬಿ ಪ್ರತಿಷ್ಠೆ ಕರ್ತಾಮಾ ಚಡಾಯಲ ಟಗರನಾ ಮಾಕ್ಹಮಾ ಉತಾರಿನ ಛಾತಿನಾ ಭಾಗನೆ ಯಾಜಕನಾ ಭಾಗನೆ ದಿದಲ ಮಾಂಡಿನೆ ಕ್ಹುದಾನು ವ್ಹೈಕೈನ ಬಾವಿಸಿಲ್ಯೂ. 28 ಶಾಶ್ವತ ನಿಯಮ ಥಯಲ ಇಸ್ರಾಯೆಲೊ ತಿನೆ ಆರೊನನೆಬಿ ತಿನಾ ಕ್ಹಾಂದಾನಾವಾಲಾನೆಬಿ ದಿವಾನು ವ್ಹೈ. ತೆ ಯಾಜಕೊನೆ ಭಾಗನೆ ಮ್ಹೆಲಲ ಛೆ. ಇಸ್ರಾಯೆಲೊ ಸಮಾಧಾನನಾ ಯಜ್ಞನಾಹುತಿ ಪಶುವೊನೆ ಮ್ಹೆಲಿನ ಯಹೊವಾನೆ ಯೆಡಿ ಕರ್ತಾ ಟೈಮ್ಮಾ ತೆ ಭಾಗೊನೆ ಯಾಜಕೊನಾಹುತಿ ಕಾಡಿನ ಮ್ಹೆಲ್ಯೂ. 29 ಆರೊನಾ ಪವಿತ್ರ ಥಯಲ ಯಾಜಕದಿಕ್ಷಾನಾ ಟುವಾಲೊ ತಿನಾ ವರಿ ತಿನಾ ಖಾಂದಾನವಾಲಾನೆ ಉಪಯೊಗ ಥಯು. ತ್ಯುನೆ ತಿಮಾಜ ಮಾರಾಹುತಿ ಅಬಿಷೆಕ ಕರಿನ ಪ್ರತಿಷ್ಠಕರು. 30 ತಿನಾ ಬಚ್ಚಾವೊಮಾ ತಿನೆ ಬದಲ ಮಹಾ ಯಾಜಕ ಥಾವಸ ಪವಿತ್ರ ಜ಼ಗಾಮಾ ಕ್ಹುದಾನಿ ಸೆವಾನೆ ಚಲಾಡಾನಾಹುತಿ ಕ್ಹುದಾನಾ ದರ್ಶನಾ ಝೊಪ್ಡಾಮಾ ಪ್ರವೆಸ ಕರಲಕ್ಹು ಕ್ಹಾತ ದಿನ್ನಲಕ್ಕಾ ತೆ ವಣ್ಣಾ ಘಾಲ್ಲಿ ಲಿದಲ ರ‍್ಹೌ. 31 ಆರೊನಬಿ ಪ್ರತಿಷ್ಠನಾಹುತಿ ಚಡಾಯಲ ಟಗರನಾ ಮಾಕ್ಹನೆ ಕ್ಹುದಾನಾ ದರ್ಶನಾ ಝೊಪ್ಡಾನಾ ಅಂಗಳಮಾ ಚಡೌ. 32 ಆರೊನಬಿ ತಿನಾ ಬಚ್ಚಾ಼ವೊನೆಬಿ ತೆ ಟಗರನಾ ಮಾಕ್ಹನೆ ಟೊಪ್ಲಿಮಾ ರ‍್ಹವಾನು ರೊಕ್ಲಾನೆ ಕ್ಹುದಾನಾ ದರ್ಶನಾ ಝೊಪ್ಡಾನಾ ಬಾಕಲನಾ ಮ್ಹೈ ಕ್ಹೌ. 33 ತ್ಯುನೆ ಯಾಜಕೊನಾಹುತಿ ಕರಲ ತ್ಯುನಾ ಪಾಪನಾ ನಿವಾರಣಾಹುತಿ ಎ ಕ್ಹಾರು ಚಡಯಾ. ತಿನಾಹುತಿ ತೆ ಕ್ಹಾರು ಚಡಾಯಲ ಕ್ಹಾಲಿ ತ್ಯುನೆ ಕ್ಹೌ ತೆನೈಸೊ ಬಿಜಾ಼ ಕ್ಹೌ ನೈ; ಕಾ ಕದ್ಯಾಮ ತೆ ಪರುಶುದ್ದ ಥಯಾಸ ವರಿ ನೆಮ್ಸಲ ಥಯಾಸ. 34 ಟಗರನು ಮಾಕ್ಹ ತೆ ನೈಸೊ ರೊಕ್ಲಾವೊನೆಬಿ ಅಗಲ್ಯಾ ದಿನ ಪಾಟಲಕ್ಕಾ ಉಗ್ಯ್ರಾಮ ತಿನೆ ಬಾಳಿ ಪಡು. ತುಮೆ ತೆ ರೊಕ್ಲಾನೆ ರ‍್ಹೈತಬಿ ಮಾಕ್ಹನೆ ರ್ಹೈತಬಿ ಕ್ಹೌ ನೈ. ಕಾ ಕದ್ಯಾಮ ಕ್ಹಾಲಿ ತಿನೆ ಕ್ಹಾಸ ಸಂದರ್ಭಮಾ ಕ್ಹಾಸ ತರಿಕಾಮಾ ಕ್ಹೌ. 35 ಮಿ ತ್ಯುನೆ ಆಜ್ಞಾ ಕರಲ ಆಕ್ಹಾರು ಆರೊನ ವರಿ ತಿನಾ ಬಚ್ಚಾನಾಹುತಿ ಕರ ತ್ಯುನೊನೆ ಯಾಜಕ ಕೈನ ನೆಮ್ಸಾನೆ ಕಾರ್ಯಕ್ರಮ ಕ್ಹಾತ ದಿನ್ನ ಲಕ್ಕಾ ಚಾಲು. 36 ಕ್ಹಾತ ದಿನ ಲಕ್ಕಾ ಹರಯಕ್ಕ ದಿನ್ನೆ ಬೈಲನೆ ಬಲಿ ದಿನ. ಆ ಆರೊನನಾ ವರಿ ತಿನಾ ಬಚ್ಚಾವೊನಾ ಪಾಪ ನಿವಾರಣೆನಾ ಚಡಯಲ ರ‍್ಹವಸ. ತೆ ನೈಸೊ ಯಜ್ಞವೆದಿನೆ ಪರಶುದ್ದ ಕರಾನು ತಿನಾ ಉಪ್ಪರ ದೊಷನಾ ಪರಹಾರ ಯಜ್ಞನೆ ಚಡಾಯಲ ತಿನೆ ಕ್ಹುದಾನಾ ಸೆವೆನಾಹುತಿ ಅಬಿಶೆಕ ಕರು. 37 ಅಮ್ಮಜ ಕ್ಹಾತ ದಿನ್ನ ಲಕ್ಕಾ ಯಜ್ಞವೆದಿಕೆನೆ ಶುದ್ದ ಕರಿನ ಪವಿತ್ರ ಕರು. ತೆ ಟೈಮಾ ಯಜ್ಞವೆದಿಕೆಬಿ ಮಹಾ ಪವಿತ್ರ ಥಾವಸ. ಯಜ್ಞವೆದಿಕೆನೆ ಮುಟ್ಟಲ ಕ್ಹಾರು ಪವಿತ್ರ ಥಾವಸ.

ಹರಯಕ್ಕ ದಿನ್ನನಿ ಬಲಿ

38 ಯಜ್ಞೆದಿನಾ ಉಪ್ಪರ ಹರದಿನ ಬಲಿ ಚಡೌ. ಯಕ್ಕ ವರಕ್ಹನಾ ಬೆ ಬಕ್ರಾನಾ ಬಚ್ಚಾ಼ವೊನೆ ತು ಚಡೌ. 39 ಪಾಟೆ ಯಕ್ಕ ಬಕ್ರಾನಾ ಬಚ್ಚಾ಼ನೆ ವರಿ ಕ್ಹಾಂಜೆ ಹಜಿಯಕ್ಕ ಬಕ್ರಾನಾ ಬಚ್ಚಾ಼ನೆ ಚಡೌ. 40 ತು ಪೈಲಾನಾ ಬಕ್ರಾನಾ ಬಚ್ಚಾ಼ನೆ ಚಡಾತಾಮಾ ತನ್ನ ಸೆರ ಚೊಕಾ ಘೌನಾ ಲೊಟನೆ ಚಡೌ. ಯಕ್ಕ ಶೆರ ಒಲಿವ ತೆಲ ಮಳೈನ ತೆ ಲೊಟನೆ ದೆಡ ಸೆರ ದ್ರಾಕ್ಷಿನಾ ರಕ್ಹನೆ ಘಾಲು. 41 ತು ಕ್ಹಾಂಜ಼ನಾ ಟೈಮಾ ಹಜಿಯಕ್ಕ ಬಕ್ರಾನಾ ಬಚ್ಚಾ಼ನೆ ಚಡಾತಾಮ ತನ್ನ ಸೆರ ಚೊಕಾ ಘೌನೆ ವರಿ ಅರ್ದಾ ಸೆರ ದ್ರಾಕ್ಷಿನಾ ರಕ್ಹನೆ ಚಡಾ. ಆ ಯಹೊವಾನೆ ಚೊಕೊ ಹೊಮ ಥಾವಸ. 42 ತು ಹರ ದಿನ್ನೆ ಆ ಸರ್ವಾಂಗ ಹೊಮನೆ ಚಡಾವಾನಾಹುತಿ ಚಡೌ. ಕ್ಹುದಾನಾ ದರ್ಶನಾ ಝೊಪ್ಡಾನಾ ಬಾಕಲಮಾ ಯಹೊವಾನಾ ಕ್ಹಾಮೊ ಆ ಕರ. ತು ಚಡಾತಾಮಾ ಯಹೊವಾ ಥಯಲ ಮಿ ತ್ಯಾ ತುನೆ ಮಳಿನ ತಾರಾಕ್ಹಾತೆ ಬೊಲುಸ. 43 ತೆ ಜ಼ಗಾಮಾ ಮಿ ಇಸ್ರೆಲನೆ ಮಳುಸ. ಮಾರಾ ಪ್ರಬಾವಾಕ್ಹು ತೆ ಜ಼ಗಾ ಪವಿತ್ರ ಥಾವಸ. 44 ತೆ ನೈಸೊ ಮಿ ಕ್ಹುದಾನಾ ದರ್ಶನಾ ಝೊಪ್ಡಾನೆ ವರಿ ಯಜ್ಞವೆದಿನೆ ಪವತ್ರ ಕರುಸ. ಆರೊನಬಿ ವರಿ ತಿನಾ ಬಚ್ಚಾ಼ವೊನೆಬಿ ಪವಿತ್ರ ಕರುಸ; ತೆಳಾಮಾ ತ್ಯುನೆ ಯಾಜಕೊನೆ ಮನೆ ಸೆವಾ ಕರಾನೆ ತಾಕತವಾಲಾ ಥಾವಸ. 45 ಮಿ ಇಸ್ರಾಯಲನಾ ವಚ್ಮಾ ರ‍್ಹೌಸ ವರಿ ತ್ಯುನೊ ಕ್ಹುದಾ ಥೈನ ರ‍್ಹೌಸ. 46 ಮಿ ತ್ಯುನೊ ಕ್ಹುದಾ ಥಯಲ ಯಹೊವಾ ಥೊಸ ಕೈನ ಮನಕ್ಹೊ ತಿಳ್ದಿಲಿವಸ. ತ್ಯುನಾ ವಚ್ಮಾ ರ‍್ಹವಾನಾಹುತಿ ಇಜಿಪ್ಟ ತ್ಯುನೊನೆ ಬಲೈಲಿನ ಆಯಲವಾಲೊ ಮಿಜ಼ ವ್ಹೈ ಕೈನ ತ್ಯುನೆ ತಿಳ್ದಿಲಿವಸ. ಮಿ ತ್ಯುನಾ ಕ್ಹುದಾ ಥಯಲ ಯಹೊವಾ.