1 ಮನೆ ಯಾಜಕನಿ ಸೆವೆ ಕರಾನಾಹುತಿ ತು ತಾರಾ ಮ್ಹೊಟೊ ಭೈ ಥಯಲ ಆರೊನನೆ, ತಿನಾ ಬಚ್ಚಾ ಥಯಲ ನಾದಾಬ, ಅಬಿಹು, ಎಲ್ಲಾಜಾರ, ಇತಾಮಾರ ಕವಾನಾ ಇಸ್ರಾಯಲತೊ ತುಕನ ಬಲೈಲಿನ ಆ. 2 ತಾರಾ ಮ್ಹೊಟೊ ಭೈ ಥಯಲ ಆರೊನನೆ ಮರಯಾದಿ, ಅಲಂಕಾರ ಉಂಟಥವೊಕೈನ ತಿನೆ ದಿಕ್ಷಾ ವಸ್ರ್ತೊನೆ ಪರಶುದ್ದ ಸಾಮ್ನೊನೆ ಕರೌ. 3 ಕೆನೆ ಮಿ ಜ್ಞಾನನಾ ವರನೆ ಪರಿಪೂರ್ಣ ಥೈನ ಅನುಗ್ರಹಿಶೊಸ ತ್ಯವಾ ಜ್ಞಾನಿಯೊ ಕ್ಹಾರಾ ಕ್ಹಾತೆ ತು ಬೊಲಿನ ತ್ಯುನಾ ಹತ್ತಕ್ಹು ತೆ ವಸ್ತ್ರೊನೆ ಸಿದ್ದ ಕರು. ಆರೊನನ ತಿನೆ ಘಾಲ್ಲಿಲಿನ ಮಾರಾ ಯಾಜಕ ಥಾವಾನಾಹುತಿ ಪ್ರತಿಷ್ಠ ಥಾವಸ. 4 ತ್ಯುನೆ ಕರಾನಾ ಸಾಮನೊ ಕಯಾ ವ್ಹೈ ಕದ್ಯಾಮ; ಛಾತಿ ಪದಕನಿ ಪಿಸಿ, ಎಫೊದ, ನಿಲುವಂಗಿ, ಕೆತ್ತಾನಾ ಕಾಮನಾ ಮೆಲಂಗಿ, ಮೂಂಡಾಸ ವರಿ ನಡಕಟ್ಟ ಆಜವ್ಹೈ. ತಾರೊ ಭ್ಹೈ ಥಯಲ ಆರೊನ ತಿನಾ ಬಚ್ಚಾ ಮಾರಾ ಯಾಜಕಥಾವಾನಾಹುತಿ ತ್ಯುನಾಹುತಿ ಆ ದಿಕ್ಷಾ ವಸ್ತ್ರೊನೆ ಕರೌ. 5 ಮನಕ್ಹೊ ಕಾಣಿಕೆ ಥೈನ ದಿವಾನಾ ಕ್ಹೊನಾನೆ, ನಿಲಿ, ಜಾ಼ಮ್ಳಾನು, ಘನ್ನು ಲಾಲ ವರ್ಣೊನಾ ದೊರಾನೆ, ವರಿ ನವಾ ವಣ್ಣಾನೆ ತೆ ಕಾಮನಾಹುತಿ ಉಪಯೊಗ ಕರು. 6 ಎಪೊದ ಕವಾನು ಕವಚನೆ ನಯ ಥೈನ ಅಳ್ಳಿನಾ ದೊರಾಕ್ಹು ಕರೈನ ತಿನೆ ಕ್ಹೊನೂ, ನಿಲಿ, ಜಾ಼ಮ್ಳಾನೂ ವರಿ ಘನ್ನು ಲಾಲ ದೊರಾವೊಕ್ಹು ಕಸೂತಿ ಘಾಲಿನ ಅಲಂಕಾರ ಕರು. 7 ತೆ ಕವಚನೆ ಕ್ಹಾಂದಾನಾ ಉಪ್ಪರ ಬೆ ಪಟ್ಟಿಯೊನೆ ರ‍್ಹೌ. ತಿನಾ ಭಂಬಿಯೊ ತುದಿಯೊ ಜೊಡಸಲ ರ‍್ಹೌ. 8 ಕವಚನ ಉಪ್ಪರ ರ‍್ಹವಾನೂ ಕೆತ್ತಿನಾ ಕಾಮಕ್ಹು ನಡಕಟ್ಟಿ ಎಕ ಥಯಲ ತಿನಾನಿಂಗತ ನಯ ಥೈನ ನವಾ ಅಳ್ಳಿನಾ ದೊರಾಕ್ಹು ಕರಲ ಕ್ಹೊನಾನಾ ದೊರಾಕ್ಹು ನಿಲಿ, ಜಾ಼ಮ್ಳಾನಾ, ಘನ್ನುಲಾಲ ವರ್ಣೊನಾ ದೊರಾವೊಕ್ಹು ಅಲಂಕಾರ ಥಯಲ ರ‍್ಹೌ. 9 ವರಿ ತು ಬೆ ಗೊಮೆಧಕ ಅಮೂಲ್ಯ ರತ್ನೊನೆ ಕಾಡಿಲಿನ ತಿಮಾ ಇಸ್ರಾಯಲನಾ ಕುಲನಾ ನಾಮೊನೆ ಕೆತ್ತವು. 10 ಯಕ್ಕ ರತ್ನಮಾ ಛೆ ನಾಮೊನೆ ಹಜಿಯಕ್ಕ ರತ್ನಮಾ ಉಗ್ರಲ ಛೆ ನಾಮೊನೆ ತಿನಾತಿನಾ ಜನನಾ ಪ್ರಕಾರ ಕೆತ್ತವು. 11 ಮೂದ್ರೆವೊನೆ ಕೆತ್ತಾನಾ ನಿಂಗತ ತೆ ಶಿಲ್ಪಿಯೊಕ್ಹು ಬೆ ರತ್ನಮಾ ಇಸ್ರಾಯಲನಾ ಕುಲನಾ ನಾಮೊನೆ ಕೆತ್ತೈನ, ತಿನೆ ಕ್ಹೊನಾನೆ ತೆ ಮುದ್ರೆನಾ ಉಪ್ಪರ ಮ್ಹೆಲು. 12 ತೆ ಬೆ ರತ್ನೊನೆ ಕ್ಹಾಂದಾನಾ ಉಪ್ಪರ ರ‍್ಹಯಲ ಎಪೊದಿನ ಪಟ್ಟಿಯೊಮಾ ಘಲೌ. ತೆ ಇಸ್ರಯಲನಾ ಸ್ಹೆ ರ‍್ಹಯಲ ರತ್ನೊ ಥಾವಸ. ಅರೊನಬಿ ಯಹೊವಾನಾ ಸನ್ನಿದಿಮಾ ಜಾ಼ತಾಟೆಮಾ ಇಸ್ರಾಯೆಲೊನಾ ಕುಲೊನಾ ನಾಮೊನೆ ತಿನಾ ಸ್ಹೆನೆ ಲಾವಾನಾಹುತಿ ತಿನಾ ಭಂಬೆ ಕ್ಹಾಂದಾವೊನಾ ಉಪ್ಪರ ತಿನೆ ಘಾಲ್ಲಿಲಿನ ಜಾ಼ವಸ. 13 ತೆ ರತ್ನೊನೆ ಜೊಡಸಾನಾಹುತಿ ಕ್ಹೊನಾನಿ ಸರಿಗೆನೆ ಹೆಣದಿನ ಗುಡೊನೆ ಕರೌ. 14 ವರಿ ಹೆಣೆಗೆನಾ ಕಾಮಕ್ಹು ಹುರಿಯೊ ನಿಂಗತ ರ‍್ಹವಾನು ಬೆ ಚೊಕಾ ಕ್ಹೊನಾನಾ ಸರಪಣಿಯೊನೆ ಕರೈನ ರತ್ನೊನಾ ಗುಡೊನೆ ಅಟ್ಕಾಡೂ.

15 ಛಾತಿನಾ ಪದಕನಾ ಕವಚನೆ ಕೆತ್ತಾನಾ ಕಾಮಕ್ಹು ಕರೌ. ತಿನೆ ಎಪೊದ್ ನೆ ಕರೈನ ತಿಮ್ಮಜ಼ ಕ್ಹೊನಾನಾ ದೊರಾಕ್ಹುಬಿ ನಿಲಿ, ಜಾ಼ಮ್ಳಾನೂ, ಘನ್ನು ಲಾಲ ವರ್ಣೊನಾ ದೊರಾವೊಕ್ಹು ನಯ ಥೈನ ನವಾ ಅಳ್ಳಿನಾ ದೊರಾವೊಕ್ಹು ಕರೌ. 16 ತೆ ಯಕ್ಕ ಗೆಣುದ್ದ ಥೈನಬಿ ವರಿ ಯಕ್ಕ ಗೆಣಗಲ ಥೈನಬಿ ಬೆ ಪದರಕ್ಹು ಚೌಕ ಥಯಲರ‍್ಹೌ. 17 ತಿನಾ ಕ್ಹಾಮಲ್ಯಾ ಭಾಗಮಾ ಚಾರ ಸಾಲ ಥೈನಬಿ ರತ್ನೊನೆ ಹೆಚ್ಚಕರು. ಪೈಲಾ ಸಾಲಮಾ ಮಾಣಿಕ್ಯ, ಪುಷ್ಯರಾಗ ವರಿ ಸ್ಫಟಿಕೊ ರ‍್ಹೌ. 18 ಬೆವಾ ಸಾಲಮಾ ಪಚ್ಚೆ, ನಿಲ ರತ್ನ ವರಿ ಹಿರಾವೊ ರ‍್ಹೌ. 19 ತನ್ನವಾ ಸಾಲಮಾ ಸುವರ್ಣ ರತ್ನ, ಸುಗಂದಿ ವರಿ ಪದ್ಮಾನಾ ರಾಗೊ ರ‍್ಹೌ. 20 ಚಾರವಾ ಸಾಲಮಾ ಪಿತ ರತ್ನ, ಬೆರುಲ್ಲ, ವಡವೊನೆ ಮಣಿಯೊಮಾ ರ‍್ಹೌ. 21 ಇಸ್ರಾಯಲನಾ ಕುಲವೊ ಸಂಖ್ಯಾನೆ ಅನುಗುಣ ಥೈನ ಬಾರಾ ರತ್ನವೊ ರ‍್ಹೌ. ಮುದ್ರೆವೊನೆ ಕೆತ್ತಾನಾ ರಿತಿಮಾ ಯಕ್ಕ ಯಕ್ಕ ರತ್ನಮಾ ಯಕ್ಕಯಕ್ಕ ಕುಲನಾ ನಾಮೊನೆ ಕೆತ್ತಾಡೂ. 22 ತೆ ನೈಸೊ ತೆ ಪದಕನಾ ಉಪ್ಪರಲ್ಯಾಮಾ ಹುರಿಯೊ ನಿಂಗತ ರ‍್ಹವಾನು ಚೊಕಾ ಕ್ಹೊನಾನಾ ಸರಪಣಿನೆ ಹೆಣಿಗೆನಾ ಕಾಮಕ್ಹು ಕರೌ. 23 ಬೆ ಕ್ಹೊನಾನಾ ಕೊಂಡಿಯೊನೆ ಕರೈನ ಛಾತಿನಾ ಪದಕನಾ ಕವಚನಾ ಭಂಬೆ ಮುಲಾವೊಮಾ ಜೊಡಸು. 24 ತೆ ಭಂಬೆ ಸರಪಪಣಿಯೊನೆ ಛಾತಿನಾ ಪದಕನಾ ಕವಚನಾ ಮೂಲಾವೊಮಾ ಕೊಂಡಿಯೊನೆ ಅಟ್ಕಾಡು. 25 ತೆ ಸರಪಣಿನಾ ಕೊನಾವೊನೆ ಎಪೊದ ಕವಚನಾ ಕ್ಹಾಂದಾನಾ ಪಟ್ಟಿಯೊಮಾ ಬೆ ಕೊಂಡಿಯೊನೆ ಅಟ್ಕಾಡಿನ ಕ್ಹಾಮಾಲ್ಯಾ ಬಾಗಮಾ ರ‍್ಹೌ. 26 ತೆ ನೈಸೊ ಬೆ ಕ್ಹೊನಾನಾ ಕೊಂಡಿಯೊನೆ ಕರೈನ ಛಾತಿನಾ ಪದಕನಾ ಮ್ಹೈ ಅಂಚನಾ ಮೂಲಾವೊಮಾ ಕವಚನಾ ಬಾಜು಼ಮಾಜ ಮ್ಹೆಲಾ ಲಗಾಡೂ. 27 ವರಿ ಬಿಜಾ಼ ಕ್ಹೊನಾನಾ ಕೊಂಡಿಯೊನೆ ಕರೈನ ಎಪೊದ್ ಕವಚನಾ ಭಂಬೆ ಕ್ಹಾಂದಾನಾ ಕ್ಹಾಮಲ್ಯಾ ಭಾಗಮಾ ಹೆಟಾ ಕವಚನೆ ಜೊಡಲಸಲ ಜ಼ಗಾಮಾ ಬಾಜು಼ ಕಸೂತಿ ಘಾಲಲ ವಚ್ಮಾನಾ ಕಟ್ಟನಾ ಉಪ್ಪರ ಮ್ಹೆಲಲ ರ‍್ಹೌ. 28 ಛಾತಿನಾ ಪದಕಬಿ ಕಸೂತಿ ಘಾಲಲ ವಚ್ಮಾನಾ ಕಟ್ಟನಾ ಉಪ್ಪರಬಿ ಬಿಗಿಥಾವಾನಿಂಗತ, ಎಪೊದ್ ಕವಚಕ್ಹು ಕಳಚಿನ ಪಡೆವಾಚಿಬಿ ತಿನಾ ಕೊಂಡಿಯೊನೆ ಎಪೊದ್ ಕವಚನಾ ಕೊಂಡಿಯೊನೆ ನಿಲಿ ದೊರಾಕ್ಹು ಭಂದೌ. 29 ನ್ಯಾಯ ತಿರ್ಪನಾ ಛಾತಿನಾ ಉಪ್ಪರ ಇಸ್ರಾಯಲನಾ ಕುಲೊನಾ ನಾಮೊನೆ ಲಿಕ್ಕಲಕ್ಹು ಆರೊನ ಪವಿತ್ರ ಜ಼ಗಾನಾ ಮ್ಹೈ ಜಾ಼ತಾ ಟೈಮ್ಮಾ ತೆ ನಾಮೊನೆ ಸತತಥೈನ ಯಹೊವಾನಾ ಸೆನೆ ಲಾವಾನಾಹುತಿ ತಿನೆ ತಿನಾ ಛಾತಿನಾ ಉಪ್ಪರ ಹಮೆಶ್ಯಾಬಿ ಘಾಲ್ಲುಸ. 30 ನ್ಯಾಯ ತಿರ್ಪನೆ ತಿಳಸಾನಾ ಉರಿಮ ವರಿ ತುಮ್ಮಿಮ (ದೆಕಾಡಿನ ದಿದಲ ವರಿ ಕ್ಹರಿ) ತೆ ಛಾತಿನಾ ಪದಕಪರ ಮ್ಹೆಲು. ಆರೊನ ಯಹೊವಾನಿ ಸನ್ನಿದಿನೆ ಜಾ಼ತಾಮಾ ತೆ ತಿನಾ ಛಾತಿನಾ ಉಪ್ಪರ ರ‍್ಹವಸ. ಇಸ್ರಾಯಲನಾ ಮನಕ್ಹೊ ಸು ಕೈದಿಲಿನ ಜೌ಼ ಕದ್ಯಾಮ ನ್ಯಾಯ ತಿರ್ಪನೆ ಆರೊನಾ ಅಮ್ಮ ತಿನಾ ಮನಸನಾ ಉಪ್ಪರ ಯಹೊವಾನಾ ಸನ್ನಿದಿಮಾ ಕೆಳಾಮಾಬಿ ಘಾಲ್ಲಿಲಿದಲ ರ‍್ಹೌ.

31 ಮ್ಹೊಟೊ ಯಾಜಕ ಎಪೊದ ಕವಚನಾ ಕ್ಹಾತೆ ಘಾಲ್ಲಿ ಲಿವಾನು ಉಪ್ಪರಲ್ಯೂ ಅಂಗ್ಡೂ ತು ನಿಲಿ ರಂಗನಾ ಫಡ್ಕಾಕ್ಹು ಕರೌ. 32 ಮಾತು ಘಾಲಾನಹುತಿ ತಿಮಾ ಸಂದಿ ರ‍್ಹೌ. ತೆ ಫಾಟೆವಾಚಿ ತೆ ಸಂದಿನಾ ಸುತ್ತೆಬಿ ಸಿನ ತಿನಾಕ್ಹಾತೆ ಯಕ್ಕ ತೆ ಪಟ್ಟಿನೆ ಶ್ಯು. 33 ಉಪ್ಪರಲ್ಯಾ ಅಂಗ್ಡಾನಾ ಸುತ್ತೆಬಿ ನಿಲಿ, ಜಾ಼ಮ್ಳಾನೂಕಲರ, ಘನ್ನ ಲಾಲ ವರ್ಣೊನಾ ದೊರಾಕ್ಹು 34 ಕ್ಹೊನಾನಿ ಗೆಜ್ಜಿ ಅನಾರಬಿ ಯಕ್ಕನಾ ಉಪ್ಪರ ಯಕ್ಕ ತೆ ಉಪ್ಪರಲ್ಯೂ ಅಂಗ್ಡೂ 35 ಆರೊನಬಿ ಯಾಜಕ ಸೆವಾ ಕರ್ತಾ ಟಮ್ಮಾ ತಿನೆ ಘಾಲ್ಲಿಲಿವು. ತೆ ಯಹೊವಾನಾ ಸನ್ನಿದಿನೆ ಪವಿತ್ರ ಜ಼ಗಾನಾ ಮ್ಹೈ ಜಾ಼ತಾಟೈಮಾ ಆತಾಟೈಮಾ ಮರೆವಾಚಿ ತೆ ಗೆಜ್ಜಿನೊ ಆವಾಜ ಐಕೌ. 36 ಚೊಕಾ ಕ್ಹೊನಾಕ್ಹು ಯಕ್ಕ ಪಟ್ಟಿನೆ ಕರೈನ ಮುದ್ರೆನೆ ಕೆತ್ತಾನಾ ರಿತಿಮಾ ತಿನಾ ಉಪ್ಪರ "ಯಹೊವಾನೆ ಮಿಸಾನೆ" ಕವಾನಿ ಲಿಪಿನೆ ಕೆತ್ತಾ ಲಗಾಡೂ. 37 ತಿನೆ ಮುಂಡಾಸನೆ ಬಿಗದಾನಾಹುತಿ ನಿಲಿ ದೊರಾನೆ ತಿನೆ ಭಂದೌ. ತೆ ಮುಂಡಾಸನಾ ಕ್ಹಾಮಲ್ಯಾ ಭಾಗಮಾ ರ‍್ಹೌ. 38 ಇಸ್ರಾಯೆಲೊ ಕಾಣಿಕೆ ಥೈನ ಸಮರ್ಪಿಸಾನಾ ಕ್ಹುದಾನಾ ಕ್ಹಾರಾ ಪವಿತ್ರ ಸಾಮೊನೊನಾ ವಿಷಯಮಾ ದೊಷ ಸುಬಿ ರ‍್ಹೈತಬಿ ಆರೊನಬಿ ತೆ ಪಟ್ಟನೆ ಕೆಳಾಮಾಬಿ ಹಣಿನಾ ಉಪ್ಪರ ಘಾಲ್ಲಿನ ತೆ ದೊಷನಾ ಫಲನೆ ವಹಿಸಿಲಿವಾನಾಹುತಿ ತ್ಯುನೆ ಯಹೊವಾನೆ ಮಚ್ಚಿಕೆ ರ‍್ಹಯಲ ವಾಲಾ ಥಾವಸ. 39 ಆರೊನ ಘಾಲ್ಲಿ ಲಿವಾನಾ ಮ್ಹೈನಾ ಅಂಗ್ಡಾನೂ ಅಳ್ಳಿನಾ ದೊರಾಕ್ಹು ಕಾಮ ಕರೈನ ಸಿವಾ ಲಗಾಡು. ತೆ ಮುಂಡಾಸನೆ ಅಳ್ಳಿನಾ ದೊರಾಕ್ಹು ಕರೌ. ತಿನಾ ಕಂಬರನಾ ಕಟ್ಟನೆ ಸಿವಾನಾ ಕಾಮಕ್ಹು ಕರೌ. 40 ಆರೊನಾ ಬಚ್ಚಾವೊನಾ ತಕ್ಕ ಮರಯಾದಿನಾಹುತಿ, ಅಲಂಕಾರನಾಹುತಿ ತ್ಯುನೊನೆ ಉಪ್ಪರಲ್ಯು ಅಂಗ್ಡಾನೆ, ಕಂಬರನಾ ಕಟ್ಟನೆ ವರಿ ಮುಂಡಾಸನೊನೆ ಕರೌ. 41 ತ್ಯುನೆ ಮನೆ ಯಾಜಕನಿ ಸೆವೆ ಕರಾನಾಹುತಿ ತೆ ವಸ್ರ್ತೊನೊ ತಾರೊ ಮ್ಹೊಟೊ ಭೈ ಥಯಲ ಆರೊನನೆ, ತಿನಾ ಬಚ್ಚಾ಼ವೊನೆ ಘಾಲಿನ ,ತ್ಯುನೊನೆ ಅಬಿಷೆಕ ಕರಿನ, ಸೆವೆನಾಹುತಿ ಪ್ರತಿಷ್ಟ ಕರು. 42 ತೆನೈಸೊ ತ್ಯುನಾ ನಗ್ನತೆನೆ ಸೆ ಇಕ್ಹಾರಾನಾಹುತಿ ತ್ಯುನೊನೆ ಕಂಬರತು ಮಾಂಡಿಲಕ್ಕಾ ರ‍್ಹವಾನಾ ನವಾ ಚಡ್ಡಿವೊನೆ ಸಣಬಿನ ದೊರಾಕ್ಹು ಕರೌ. 43 ಆರೊನ, ತಿನಾ ಬಚ್ಚಾ ಕ್ಹುದಾನಾ ದರ್ಶನಾ ಝೊಪ್ಡಾನಾ ಮ್ಹೈ ಜಾ಼ತಾ ಟೆಮಾ, ಪವಿತ್ರ ಜ಼ಗಾಮಾ ಸೆವಾ ಕರಾನಾಹುತಿ ಯಜ್ಞವೆದಿನಾ ನಜಿಕ ಆವಾನಾಹುತಿ ತಿನೆ ಘಾಲ್ಲಿಲಿದಲ ರೌ. ನೈಥಯಾಮ ತ್ಯುನೆ ತೆ ಅಪರಾಧನಾ ಫಲನೆ ಅನುಭವ ಕರಿನ ಮರಿತಬಿ. ತಿನೆ ತಿನಾ ಕ್ಹಾಂದಾನಾವಾಲಾನೆಬಿ ಆ ಶಾಶ್ವತ ಥಯಲ ನಿಯಮ ಥಯುಸ.