1 ಘನ್ನೊ ಟೈಮ ಥಯೊತಬಿ ಮೊಶೆ ಡೊಂಗರ ಪರ್ತೊ ಹೆಟೊ ನೈ ಆಯಲಕ್ಹು ಇಸಾಯೆಲೊ ಆರೊನಕನ ಮಳಿನ ಐನ, "ದೆಕ, ಮೊಶೆ ಅಪೊನೆ ಐಗುಪ್ತತೊ ಭಾರೊ ಲಾಯೊ. ತೆನೈಸೊ ತಿನೆ ಸು ಥಯು ಅಪೊನೆ ಗ್ವತ್ತ ನತ್ತಿ. ತಿನಾಹುತಿ ಹಮೊನೆ ಅಗೊ ಚಲಾವಾನೆ ದಕ್ಹಾ ಕ್ಹುದಾವೊನೆ ಕರಿನ ದೆ" ಕೈನ ಕದ್ಯಾ. 2 ಆರೊನ ತ್ಯುನೊನೆ, "ತುಮಾರಾ ಬಾಕ್ಡಿಯೊನಾ ವರಿ ಗಂಡ ಹೆಣ್ಣ ಬಚ್ಚಾವೊಮಾ ರ‍್ಹವಾನಾ ಕ್ಹೊನಾನಾ ಕಾನೊಮಾನಾ ಮನೆ ಲೈನ ದಿವೊ" ಕೈನ ಕದ್ಯೊ. 3 ತಿನಾಹುತಿ ತ್ಯುನೆ ಕ್ಹಾರಾ ತ್ಯುನಾ ಕ್ಹೊನಾನಾ ಕಾನೊಮಾನಾ ಲೈನ ದಿದ್ಯಾ. 4 ಆರೊನ ಬೈಲನಿ ಮುರ್ತಿ ತೆ ಕ್ಹೊನಾಕ್ಹು ಕರಾಲಗಾಡ್ಯೊ. ಪಾಚಲ್ತಾ ತ್ಯುನೆ, "ಇಸ್ರಾಯೆಲೊ, ತುಮಾರಾ ಕ್ಹುದಾವೊ ನ್ಹ್ಯಾ ಛೆ! ತುಮೊನೆ ಐಗುಪ್ತತೊ ಬಲೈಲಿನ ಆಯಲ ಕ್ಹುದಾವೊ ಎಜ ವ್ಹೈ" ಕೈನ ಕದ್ಯಾ. 5 ಆರೊನ ಎ ಕ್ಹಾರು ದೆಕಿನ, ಬೈಲನಾ ಕ್ಹಾಮೊ ಯಕ್ಕ ಯಜ್ಞವೆದಿ ಭಂದಾಯೊ. ಪಾಚ಼ಲ್ತೊ,

"ವಂತಾ ಯಹೊವಾನೆ ಸನ್ಮಾನ ಕರಾನೆ ಯಕ್ಕ ಕ್ಹಾಸ ಸನ್ನ ರ‍್ಹವಸ" ಕೈನ ಕದ್ಯಾ. 6 ಮರ್ನಾ ದಿನ್ನೆ ಕ್ಹಾರಾ ಮನಕ್ಹೊ ಜಲ್ದಿ ಉಟಿನ ತ್ಯುನಾ ಪಶುವೊನೆ ಕತ್ರಿನ ಸರ್ವಾಂಗ ಹೊಮಾಬಿ, ಸಮಾಧಾನ ಯಜ್ಞಬಿ ಕರಿನ ಕ್ಹಾವಾ ಪಿವಾನೆ ಬೆಟ್ಯಾ. ಪಾಚಲ್ತಾ ಉಟಿನ ನ್ಹಾಚ್ಯಾ ವರಿ ಮಜಾ ಕರ‍್ಯಾ. 7 ತೆಜ಼ ಟೈಮಮಾ ಯಹೊವಾ ಮೊಶೆನೆ, "ಡೊಂಗರ ಪರ್ತೊ ಉತ್ರಿನ ಜಾ಼. ತು ಐಗುಪ್ತತೊ ಬಲೈಲಿನ ಆಯಲ ತಾರಾ ಮನಕ್ಹೊ ಘನ್ನು ಮ್ಹೊಟು ಪಾಪ ಕರ‍್ಯಾಸ ವರಿ ಮಕ್ಹು ದುರ ಥಯಾಸ. 8 ಮಿ ತ್ಯುನೊನೆ ಆಗನ್ಯಾ ದಿದಲ ಕ್ಹಾರಾನೆ ಘನ್ನ ಜಲ್ದಿ ಅವಿದೆಯ ಥಯಾಸ. ಕ್ಹೊನು ಕರಗೈನ ತಿಕ್ಹು ಬಸವಣ್ಣಾನೆ ಕರಿಲಿನ ತಿನೆ ಪುಜಾ ಕರ್ತಾ ತಿನೆ ಯಜ್ಞ ಕರಾಡಾಸ ‘ಇಸ್ರಾಯೆಲೊ ತುಮೊನೆ ಐಗುಪ್ತತೊ ಬಲೈಲಿನ ಆಯಲ ಕ್ಹುದಾವೊ ಎಜ ವ್ಹೈ’ ಕೈನ ಮನಕ್ಹೊ ಕವಾಡಾಸ" ಕದ್ಯೊ. 9 ಯಹೊವಾ ಮೊಶೆನೆ, "ಮಿ ಎ ಮನಕ್ಹೊನೆ ದೆಕ್ಯೊಸ. ತ್ಯುನೆ ಘನ್ನ ಉಂಬ ಶೆ ಕೈನ ಮನೆ ಗ್ವತ್ತ ಛೆ." 10 ತಿನಾಹುತಿ ಮಿ ತ್ಯುನೊನೆ ಶಿಟ್ಟಕ್ಹು ನಾಶ ಕರುಸ. ಮನೆ ಹುಬ್ರಾಡು ನಕೊ. ಪಾಚ಼ಲ್ತೊ ಮಿ ತಾರಾಕ್ಹು ಯಕ್ಕ ಮ್ಹೊಟು ಜನಾಂಗ ಕರುಸ" ಕೈನ ಕದ್ಯೊ.

11 ತೆನೈಸೊ ಮೊಶೆ ತಿನೊ ಕ್ಹುದಾ ಥಯಲ ಯಹೊವಾನೆ, "ಯಹೊವಾ, ತಾರಿ ಶಿಟ್ಟ ತಾರಾ ಮನಕ್ಹೊನೆ ನಾಶ ನಕೊ ಕರಾದೆ. ತಾರಿ ಮ್ಹೊಟಿ ತಾಕತಕ್ಹು ಬಲಾಕ್ಹು ಎ ಮನಕ್ಹೊನೆ ಐಗುಪ್ತತೊ ಭಾರೊ ಲಿನ ಆಯೊತೊ. 12 ತೆನೈಸೊ ತು ತಾರಾ ಮನಕ್ಹೊನೆ ನಾಶ ಕರ‍್ಯೊಮ, ಐಗುಪ್ತನಾ, ‘ಯಹೊವಾ ತಿನಾ ಮನಕ್ಹೊನೆ ಕೆಟ್ಟ ಕರಾನಾಹುತಿಜ಼ ಐಗುಪ್ತತೊ ಬಲೈಲಿನ ಗಯೊ. ತೆ ತ್ಯುನೊನೆ ಡೊಂಗರೊಮಾ ಖಲಾಸ ಕರು ಕೈನ ವ್ಹತ್ತೊ; ತಿನಾ ಮನಕ್ಹೊನೆ ಜಿಮಿನ ಪರ್ತೊ ಖಲಾಸ ಕರು ಕೈನ ವ್ಹತ್ತೊ’ ಕೈನ ಕವಸ. ತಿನಾಹುತಿ ತಾರಾ ಮನಕ್ಹೊನಾ ಉಪ್ಪರ ಶಿಟ್ಟ ಥೌ ನಕೊ. ತಾರಿ ಶಿಟ್ಟ ಛೊಡಿಪಡ. ತಾರಾ ಮನಕ್ಹೊನೆ ನಾಶ ಕರು ನಕೊ. 13 ತಾರಿ ಸೆವಾ ಕರಲ ಅಬ್ರಹಾಮನೆ, ಇಸಾಕನೆ, ಯಾಕೊಬನೆ, ಇಸ್ರಾಯೆಲೊನೆ ಶೆಂ ಕರಿಲೆ. ತು ತಾರು ನಾಮ ಉಪಯೊಗ ಕರಿನ ತೆ ಮನಕ್ಹೊನೆ ವಾಗ್ದಾನ ಕರ‍್ಯೊತೊ ‘ಮಿ ತಾರಾ ಸಂತತಿವಾಲಾವೊನೆ ಹಬಾಳನಾ ಚಿಕ್ಕಿಯೊನಾ ತೆಕ್ಲು ಕರುಸ. ಮಿ ವಾಗ್ದಾನ ಕರಲ ತಿಮ್ಮ ಎ ಕ್ಹಾರಾ ದೆಶನೆ ತಾರಾ ಸಂತತಿ ಲಕ್ಕಾ ದ್ಯುಸ. ಎ ದೆಶ ಹಮೆಶಾಬಿ ತ್ಯುನುಜ ಥೈನ ರ‍್ಹವಸ’ ಕೈನ ತು ತಾರಾ ನಮಾಪರ ವಾಗ್ದಾನ ಕರ‍್ಯೊತೊತೊ" ಕದ್ಯೊ. 14 ತಿನಾಹುತಿ ಯಹೊವಾ ಮನಕ್ಹೊನಾಹುತಿ ಮರ್ಗಾ ಖೈನ ತಿನಾ ಮನಸನೆ ಬದ್ಲಿ ಕರಿ ಲಿದ್ಯೊ; ತೆ ಕದಲ ಕೆಟ್ಟ ಕರ‍್ಯೊ ನೈ; ತಿನಾ ಮನಕ್ಹೊನೆ ನಾಶ ಕರ‍್ಯೊ ನೈ. 15 ಪಾಚ಼ಲ್ತೊ ಮೊಶೆ ಡೊಂಗರಪ್xರೊ ಉತ್ರಿನ ಗಯೊ. ಮೊಶೆನಾ ಕ್ಹಾತೆ ಆಗನ್ಯಾ ಶಾಸನನಾ ಬೆ ದಗ್ಡಾನಾ ಹಲಗಿಯೊ ವ್ಹತ್ತಾ. ಎ ಆಗನ್ಯಾ ಶಾಸನನಾ ಆಗಾಬಿ ಪಾಚಾಬಿ ಲಿಕ್ಕಲ ವ್ಹತ್ತು. 16 ಯಹೊವಾ ತೆಜ಼ ತೆ ದಗ್ಡಾ ಕರಿನ ತ್ಯುನಾ ಉಪ್ಪರ ಲಿಕ್ಯೊತೊ. 17 ಇಸ್ರಾಯೆಲೊನಿ ಗದ್ದಲನೆ ವರಿ ಅಡ್ಡಾನು ಯೆಹೊಶುವಾ ಐಕಿನ ಮೊಶೆನೆ, "ಪಾಳೆಕಂತಾ ಯುದ್ದನಿ ಅವಾಜ ಐಕು ಆವಾಡಿಸ" ಕದ್ಯೊ.

18 ತಿನಾಹುತಿ ಮೊಶೆ, "ತೆ ಸೈನ್ಯ ಜಿತ್ತಲ ಅವಾಜ ನ್ಹವೈ. ತೆ ಹಾರಕ್ಹು ಅಡ್ಡಾನು ಸೈನ್ನನು ಅವಾಜಬಿ ನ್ಹವೈ. ಮಿ ಐಕಾನು ಗೊಷ್ಟಿನು ಅವಾಜ ವ್ಹೈ" ಕೈನ ಜವಾಬ ದಿದ್ಯೊ. 19 ಮೊಶೆ ಪಾಳೆನಾ ನಜಿಕ ಆಯೊ. ತೆ ಕ್ಹೊನಾನು ಬಸವಣ್ಣಾನೆ ಮನಕ್ಹೊ ನ್ಹಾಚಾನು ದೆಕಿನ ಘನ್ನೊ ಶಿಟ್ಟ ಥೈನ ದಗ್ಡಾನಾ ಹಲಗಿಯೊನೆ ಹೆಟೊ ನಾಕಿಪಡ್ಯೊ; ತೆ ಪುಡಿ ಪುಡಿ ಥೈನ ಫುಟಿಗಯಾ. 20 ಪಾಚ಼ಲ್ತೊ ಮೊಶೆ ತೆ ಬಸವಣ್ಣಾನಿ ಮುರ್ತಿನೆ ಆಗಮಾ ಕರಗೈನ ತಿನಾ ಕ್ಹೊನಾನೆ ಧುಳ ಲಿಂಗತ ಪಾನಿಮಾ ಘಾಲಿನ ತೆ ಪಾನಿನೆ ಇಸ್ರಾಯೆಲವಾಲಾವೊನೆ ಪಿಲಾಯೊ. 21 ಮೊಶೆ ಆರೊನನೆ, "ಎ ಮನಕ್ಹೊ ತುನೆ ಸು ಕರ‍್ಯಾ? ಹವು ಕೆಟ್ಟ ಪಾಪ ಕರೆಲಿಂಗತ ಕಾ ತ್ಯುನೊನೆ ಚಲಾಯೊ? ಕೈನ ಕದ್ಯೊ. 22 ಆರೊನ, "ಶಿಟ್ಟ ಥೌ ನಕೊ. ಇವ್ನೆ ಕೆಳಾಮಾಬಿ ಪಾಪ ಕರಾನೆ ತಯ್ಯಾರ ರ‍್ಹವಾನು ತುನೆ ಗ್ವತ್ತ ಛೆ. 23 ತ್ಯುನೆ ಮನೆ, ‘ಮೊಶೆ ಹಮೊನೆ ಐಗುಪ್ತತೊ ಭಾರೊ ಚಲಾಯೊ. ತೆನೈಸೊ ತಿನೆ ಸು ಥಯು ಕವಾನು ಹಮೊನೆ ಗ್ವತ್ತ ನತ್ತಿ. ತಿನಾಹುತಿ ಹಮೊನೆ ಅಗೊ ಚಲಾವಾನೆ ಕ್ಹುದಾವೊನೆ ಕರಿನ ದೆ’ ಕೈನ ಪುಚ್ಯಾ. 24 ತಿನಾಹುತಿ ಮಿ ತ್ಯುನೊನೆ, "ತುಮೊಮಾ ಕ್ಹೊನಾನಾ ಸಮನೊ ರ‍್ಹಯಾಮ ಮನೆ ದಿವೊ’ ಕೈನ ಕದ್ಯೊ. ತ್ಯುನೆ ಸಾಮನೊ ಮನೆ ಲೈನ ದಿದ್ಯಾ. ಮಿ ತೆ ಆಗಮಾ ಕರಗೈನ ಎ ಬಸವಣ್ಣಾನಿ ಮುರ್ತಿ ಕರಿನ ದಿದ್ಯೊ" ಕೈನ ಉತ್ತರ ದಿದ್ಯೊ. 25 ಮನಕ್ಹೊ ವಾಟ ಚುಕಿನ ತ್ಯುನೊನೆ ಪಸಂದ ಆಯೆಲಿಂಗತ ಕರಾನೆ ಆರೊನ ತ್ಯುನೊನೆ ಛೊಡಿಪಡಲ ಮೊಶೆನೆ ಗ್ವತ್ತ ಥಯು. ಮನಕ್ಹೊ ಕ್ರಮಾ ನೈ ರ‍್ಹಯಲ ಖುದ್ದನಿ ಇಚ್ಯಾವೊಕ್ಹು ಚಾಲಾಡಾತಾ; ತ್ಯುನಿ ಮುರ್ಖತನಾ ತ್ಯುನಾ ವಿರೊದಿವಾಲಾವೊನೆ ಉಟಿನ ದಿಕ್ಹಾಡುತು! 26 ತಿನಾಹುತಿ ಪಾಳೆನಾ ಬಾಕಲಕನ ಮೊಶೆ ಹುಬ್ರೈನ, "ಯಹೊವಾನಾ ಪಕ್ಷವಾಲಾ ಮಕನ ಔ" ಕೈನ ಕದ್ಯೊ. ಲೆವಿ ಕುಲವಾಲಾ ಕ್ಹಾರಾ ಮೊಶೆಕನ ಆಯಾ. 27 ತೆಳಾಮಾ ಮೊಶೆ ತ್ಯುನೊನೆ, "ಇಸ್ರಾಯೆಲನೊ ಕ್ಹುದಾ ಥಯಲ ಯಹೊವಾ ಕವಾನು ತುಮೊನೆ ಕೌಸ! ತುಮೊಮಾ ಹರಯಕ್ಲೊ ತಲ್ವಾರ ಲಿನ ಪಾಳೆನಾ ಯಕ್ಕ ಮುಲಾತಾ ವರಿಯಕ್ಕ ಮುಲಾ ಲಕ್ಕಾ ಗೈನ ಮನಕ್ಹೊನೆ ಶಿಕ್ಷಾ ದ್ಯು. ತುಮಾರಾ ಭಾಯೊ ಥಯಾತುಬಿ ದೊಸ್ತೊ ಥಯಾತುಬಿ ತೆನಯೊ ಆಜು಼ ಬಾಜು಼ವಾಲಾ ರ‍್ಹಯಾತುಬಿ, ಖಲಾಸ ಕರೊ" ಕೈನ ಕದ್ಯೊ. 28 ಲೆವಿ ಕುಲಾ ಮೊಶೆನಾ ವಾತೆ ವಿದೆಯ ಥಯಾ. ತೆ ದಿನ್ನೆ ಇಸ್ರಾಯೆಲೊಮಾ ಕಮ್ಸಿಕಮ್ಮ ತನ್ನ ಹಜಾ಼ರ ಮನಕ್ಹೊ ಮರ‍್ಯಾ. 29 ತೆಳಾಮಾ ಮೊಶೆ ತ್ಯುನೊನೆ, "ಆಜ ತುಮೆ ಯಹೊವಾನೆ ನೆಮ್ಸಲ ಮನಕ್ಹೊ ಥಯಾ; ಕಾಕದ್ಯಾಮ ತುಮೆ ತುಮಾರಾ ಸ್ವಂತ ಗಂಡ ದಿಕ್ರಾನೆಬಿ ಭೈನೆಬಿ ವಿರುದ್ದ ಥಯಾ. ಆಜ ತೆ ತುಮೊನೆ ಆಶಿರ್ವಾದ ಕರ‍್ಯೊಸ" ಕದ್ಯೊ.

30 ಮರ್ನಾ ದಿನ್ನ ಮೊಶೆ ಮನಕ್ಹೊನೆ, "ತುಮೆ ಘನ್ನು ಮ್ಹೊಟು ಪಾಪ ಕರ‍್ಯಾಸ. ತೆನೈಸೊ ಹಮ್ನಾ ಮಿ ಯಹೊವಾ ಕನ ಗೈನ, ತೆ ತುಮಾರಾ ಪಾಪೊನೆ ಮಾಫ ಕರಾನಾಹುತಿ ಮಿ ಸುಬಿ ಕರ ಸಕುಸ ಸು ಕೈನ ಪುಚ್ಚುಸ" ಕದ್ಯೊ. 31 ತಿನಾಮಲಿಂಗತಜ಼ ಮೊಶೆ ಯಹೊವಾಕನ ಫರಿನ ಗೈನ, "ದಯಾ ಕರಿನ ಐಕ! ಎ ಮನಕ್ಹೊ ಘನ್ನು ಕೆಟ್ಟ ಪಾಪ ಕರ‍್ಯಾಸ. ಕ್ಹೊನಾಕ್ಹು ಮುರ್ತಿ ಕರಿಲಿದ್ಯಾಸ. 32 ತ್ಯುನಾ ಎ ಪಾಪನೆ ಮಾಫ ಕರ. ತು ತ್ಯುನೊನೆ ಮಾಫ ನೈ ಕರ‍್ಯೊಮ ತಾರಾ ಜಿವಭಾದ್ಯನಾ ಪಟ್ಟಿಮಾತೊ ಮಾರು ನಾಮ ಉಕ್ಲಿ ಪಡ" ಕೈನ ಪ್ರಾರ್ಥನಾ ಕರ‍್ಯೊ. 33 ತೆನೈಸೊ ಯಹೊವಾ ಮೊಶೆನೆ, "ಮನೆ ವಿರುದ್ದ ಥೈನ ಪಾಪ ಕರಾನಾ ಮನಕ್ಹೊನಾ ನಾಮೊ ಯಕ್ಕಜ ಮಾರಾ ಪುಸ್ತಕತು ಉಕ್ಲುಸ. 34 ತಿನಾಹುತಿ ಹಮ್ನಾ ಹೆಟೊ ಉತ್ರಿನ ಮಿ ತುನೆ ಕವಾನಿ ಜ಼ಗಾ ಮನಕ್ಹೊನೆ ಚಲಾ. ಮಾರೊ ದುತ ತಾರಾ ಅಗೊ ಗೈನ ತುನೆ ಚಲಾವಸ. ಪಾಪ ಕರಲ ಮನಕ್ಹೊನೆ ಶಿಕ್ಷಾ ದಿವಾನೊ ಟೈಮಾ ಆಯಲ್ಪರ ತ್ಯುನೆ ಶಿಕ್ಷಾ ಹೊಂದಿಲಿವಸ" ಕೈನ ಕದ್ಯೊ. 35 ತಿನಾಹುತಿ ಯಹೊವಾ ಮನಕ್ಹೊನೆ ಘನ್ನು ಮ್ಹೊಟು ತ್ರಾಸ ಲಾಯೊ. ತ್ಯುನೆ ಆರೊನಕ್ಹು ಕ್ಹೊನಾನಿ ಬೈಲನೆ ಕರಿಲಿದಲಜ ಅನೆ ಕಾರಣ ವ್ಹೈ.