ಮೊಶೆನು ಗಿದ್ದ
1 ತೆಳಾಮಾ ಮೊಶೆ ಇಸ್ರಾಯೆಲವಾಲಾ ಯಹೊವಾನೆ ಸ್ತುತಿ ಕರಾನಾಹುತಿ ಆಂ ಗಿದ್ದನೆ ಕದ್ಯಾ: ಯಹೊವಾನೆ ಸ್ತೊತ್ರ ಗಿದ್ದ ಕರಿಯೆ; "ತೆ ಮಹಾ ಜಯ ಶಾಲಿ ಥಯಲವಾಲೊ ವ್ಹೈ; ಘೊಡಾವೊನೆ ವರಿ ರಥೊ ಚ಼ಲಾವಾಲಾವೊನೆ ಸಮುಂದರಪರ ಢಕ್ಲಿನ ನಾಶ ಕರ‍್ಯೊಸ. 2 ಮಾರಿ ಶಕ್ತಿ, ಕಿರ್ತನೆಬಿ ಯಾಹುವೆಜ಼ ವ್ಹೈ, ತಿನಾಕ್ಹು ಮನೆ ರಕ್ಷನೆ ಥಯು. ಮಾರೊ ಕ್ಹುದಾ ತೆಜ಼ ವ್ಹೈ, ತಿನೆಜ಼ ಸುತ್ತಿ ಕರುಸ; ಮಾರಾ ಪೂರವಿಕೊನೊ ಕ್ಹುದಾ ತೆಜ಼ ವ್ಹೈ, ತಿನಿ ಮಹಿಮಾನೆ ಪ್ರಕ್ಯಾತಿ ಪಡಸುಸ. 3 ಯಹೊವಾ ಯುದ್ದ ವಿರ ವ್ಹೈ; ಯಹೊವಾ ಕೈನ ತಿನು ನಾಮ ವ್ಹೈ." 4 ತೆ ಫರೊಹನನಾ ರಥೊನೆ, ಸೈನಿಕೊನೆ ಸಮುಂದರಮಾ ಢಕ್ಲಿ ಪಡ್ಯೊ. ಫರೊಹನನಾ ಚೊ಼ಕಾ ಅದಿಕಾರಿಯೊನೆ ಲಾಲ ಸಮಂದರಮಾ ಡುಬೈ ಪಡ್ಯೊ. 5 ಉಂಡು ರ‍್ಹಯಲ ಸಮುಂದರ ತ್ಯುನೊನೆ ಝಾಕಿ ಪಡ್ಯುತು. ತ್ಯುನೆ ದಗ್ಡಾ ನಿಂಗತ ಸಮುಂದರನಾ ಥಳಮಾ ಡುಬ್ಯಾ. 6 "ಯಹೊವಾ ತಾರಾ ಸಿದಾ ಹತ್ತಮಾ ರ‍್ಹಯಲ ತಾಕತ ಕೆಕ್ಲಿಕಿ ಮಹಿಮಾಕ್ಹು ಛೆ; ತಾರಾ ಸಿದಾ ಹತ್ತನಿ ತಾಕತಕ್ಹು ತು ವೈರಿಯೊನೆ ಛೆಟಿನ ಪುಡಿ ಪುಡಿ ಕರಶಿ. 7 ತು ಮ್ಹೊಟಿ ಮಹತ್ವ ರ‍್ಹಯಲವಾಲೊ ಥೈನ ತಾರಾ ಕ್ಹಾಮಾ ಹುಬ್ರ್ಯಾವಾಲಾವೊನೆ ನಾಶ ಕರಿ ಪಡ್ಯೊಸ. ತಾರಿ ಶಿಟ್ಟ ಗೈನ ತ್ಯುನೊನೆ ಕ್ಹುಕ್ಹಾಯಲ ಚಾರೊ ನಿಂಗತ ಬಾಳಿನ ಬಸ್ಮ ಕರಿ ಪಡಿಸ. 8 ತಾರಾ ನಾಕನಾ ಸ್ವಾಸಕ್ಹು ಸಮಂದರನು ಪಾನಿ ಮಳಿಗಯು; ಪ್ರವಾಹಬಿ ಗೊಡಿ ನಿಂಗತ ಹುಬ್ರಯುತು; ಸಮುಂದರನಾ ಥಳನು ಪಾನಿ ಘಟ್ಟ ಥಯು. 9 ದುಶ್ಮನೊ, ‘ಹಮೆ ಇವ್ನೊನೆ ಪಾಚಾ಼ ಲಾಗಿನ ಧರಿಯೆಸ, ತ್ಯುನಾ ಸೊತ್ತನೆ ಅಪಹರಸಿನ ವಾಟಿಲಿಯೆಸ; ಹಮೆ ತಲ್ವಾರ ಧರಿನ; ತಾಕತಕ್ಹು ತ್ಯುನೊನೆ ಕತ್ರಿ ಪಡೆಸ’ ಕೈನ ಬೊಲ್ಲಿವಾಡಾತಾ. 10 ತೆನೈಸೊ ತು ವಾರಾನೆ ಫುಕ್ಕಲಪರ, ಸಮಂದ ತ್ಯುನೊನೆ ಘಾಕಿಲಿದ್ಯತು; ತ್ಯುನೆ ಮಹಾ ಸಾಗರನಾ ಮ್ಹೈ ಸಿಸನಿ ಗೊಲಿ ನಿಂಗತ ಡುಬಿಗಯಾ. 11 ಎ ಯಹೊವಾ, ಕ್ಹುದಾವೊಮಾ ತುನೆ ಕುನ್ನ ಸಮಾನ ವ್ಹೈ? ತಾರಾ ನಿಂಗತ ಪರಶುದ್ದಮಾ ಮಹಿಮಾ ಹೊಂದಲವಾಲೊ ಕುನ್ನ ಛೆ? ಅದ್ಬುತ ಕಾಮೊನೆ ಕರಲವಾಲೊ ಥಯಲ ಪರಾಕ್ರಮ ಶಾಲಿಬಿ ತುನೆ ಸಮಾನ ಕುನ್ನ ರ‍್ಹವಸ? 12 ತು ತಾರೊ ಸಿದಾ ಹತ್ತನೆ ಅಗೊ ಕರಲ್ಪರ, ಜಿಮಿನಬಿ ಮ್ಹೊಡು ಕ್ಹೊಲಿನ ಶತೃವೊನೆ ಗಳಿಗಯುತೊ. 13 ತಾರಾ ಒಡಂಬಡಿಕೆನಾ ನಂಬಿಗಸ್ತಮಾ ತು ತಾರಾ ಪ್ರಜೆನೆ ಛೊಡಾಯೊಸತೊ. ತಾರಾ ತಾಕತಕ್ಹು ತ್ಯುನೊನೆ ತು ವಾಸ ಕರಾನಾ ಪರಿಶುದ್ದ ನಿವಾಸನೆ ಚಲಾಯೊಸ. 14 ಜನಾಂಗೊ ಆಂ ಐಕಿನ ಕಾಪಸ. ಪಿಲಿಷ್ಟಯಮಾ ರ‍್ಹಯಲವಾಲ ಭಯಬಿತ ಥಾವಸ. 15 ಎದ್ಯೊಮಾನಾ ಅದಿಕಾರಿಯೊ ಭುಚ್ಕಸ; ಮೊವಾಬ್ಯರನಾ ಸೈನಿಕೊ ಕಾಪಸ; ಕಾನಾನ್ಯವಾಲಾ ನಿವಾಸಿಯೊ ಕ್ಹಾರಾ ಧೈರ್ಯ ಜವೈಲಿವಸ. 16 ಭಯಬಿ, ಬುಚಕಬಿನ, ತ್ಯುನೊನೆ ಉಂಟಥಾವಸ. ತಾರಾ ಕ್ಹಾದಾನಿ ತಾಕತಕ್ಹು ತ್ಯುನೆ ದಗ್ಡಾ ನಿಂಗತ ಸ್ತಬ್ಧ ತಾವಾಸ. ತೆಕ್ಲಾಮಾಜ ಯಹೊವಾ, ಯೆಹೊವನೆ, ತು ವಚಾ಼ಡಲ ತಾರಾ ಪ್ರಜೆವೊ ದಾಡಿನ ಗೈನ ದೆಶನೆ ಸೆರಸ. 17 ತು ತ್ಯುನೊನೆ ತಾರಾ ಸ್ವಕಿಯ ದೆಶ ಥಯಲ ಡೊಂಗರನಾ ಉಪ್ಪರ ಲೈನ ಬಲ ಪಡಸುಸ, ಯಹೊವಾ, ತು ಸ್ವಂತ ನಿವಾಸನಾ ಹುತಿ ಭಾಂದಿಲಿದಲ ಜ಼ಗಾಲಕ್ಕಾ ಕರ್ತಾ, ತು ಮಾರಾಹುತಿ ಸಿದ್ದ ಕರಲಿದಲ ಪವಿತ್ರ ಪರ್ವತಲಕ್ಕಾ ತ್ಯುನೊನೆ ಆಯೆಲಿಂಗತ ಕರಶಿ. 18 ಯಹೊವಾ ಯುಗಯುಗಾಂತರಮಾ ರಾಜೊ ಥೈನ ಆಳಸ,"
ಮಿರ್ಯಾಮನು ಗಿದ್ದ
19 ಫರೊಹನನಾ ಘೊಡಾ, ರಥಾವೊ, ರಾಹುತರೊ ಸಮುಂದರನಾ ಮ್ಹೈ ಆಯಲ್ಪರ ಯಹೊವಾ ಸಮುಂದರನಾ ಪಾನಿನೆ ತ್ಯುನಾ ಉಪ್ಪರ ಫರಿನ ಆವಾಲಗಾಡಿನ ಡುಬೈಜ ಪಡ್ಯೊ. ತೆನೈಸೊ ಇಸ್ರಾಯೆಲೊ ರ‍್ಹಯತಬಿ ಸಮುಂದರನಾ ವಚ್ಮಾ ಕ್ಹುಕ್ಹಿ ಜಿಮಿನಪರ ಚಾಲಿನ ಗಯಾ. 20 ತೆಳಾಮಾ ಪ್ರವಾದಿ ಥಯಲ ಆರೊನನಿ ಬ್ಹೆನ ಮಿರ್ಯಾಮಳ ಹತ್ಮಾ ತಾಳಾವೊನೆ ಕಾಡಿಲಿದಿ. ಹೆಣ್ಣಮನಕ್ಹೊ ಕ್ಹಾರಾ ಹತೊಮಾ ತಾಳವೊನೆ ಧರಲಿನ ಗಿದ್ದ ಕಾತಾ ನ್ಹಾಚತಾ ತಿನಾ ಪಾಚಾ ಗಯಾ. 21 ಮಿರ್ಯಾಮಳ ತ್ಯುನೊನೆ ಅಮ್ಮ ಕದಿ: "ಯಹೊವಾನೆ ಗಿದ್ದ ಕವೊ, ತೆ ಮಹೊನ್ನತ ಥಯಲ ಕ್ಹುದಾ ಥಯಸೊ. ಘೊಡಾವೊನೆ, ರಾಹುತರೊನೆ ಸಮಂದರಮಾ ಡುಬೈನ ನಾಶ ಕರ‍್ಯೊ."
ಕಡು ಪಾನಿ
22 ತೆ ಥಯಲ್ಪರ ಮೊಶೆ ಇಸ್ರಾಯೆಲೊನೆ ಲಾಲ ಸಮುಂದರನಾ ಮೂಲಕ ಥೈನ ಚಲಾಯೊ. ತ್ಯುನೆ ಶುರ ಉಸಕನಿ ಜಿಮಿನಮಾ ತನ್ನ ದಿನ ಪಾನಿ ನೈಸೊ ಪ್ರಮಾಣ ಕರ‍್ಯಾ. ತೆನೈಸೊ ತ್ಯುನೊನೆ ಕಿಜಾಜ ಮಳ್ಯು ನೈ. 23 ಪಾಚತಾ ತ್ಯುನೆ ಮಾರಾ ಕವಾನಾ ಜ಼ಗಾಕನ ಆಯಾ. ತೆ ನೈಸೊ ತೆ ಜ಼ಗಾನು ಪಾನಿ ಕಹಿ ಥಯಲಕ್ಹು ತ್ಯುನೊನೆ ತಿನೆ ಪಿವಾನಾಹುತಿ ಥಯಜ ನೈ. ತಿನಾಹುತಿ ತೆ ಜ಼ಗಾನೆ ಮಾರಾ ಕೈನ ನಾಮ ಥಯು. ಮಾರಾ ಕದ್ಯಾಮ ಕಡು ವ್ಹೈ. 24 ಮನಕ್ಹೊ ಮೊಶೆನೆ, "ಹಮೆ ಸು ಪಿಯು? ಕೈನ ತಿನೆ ವಿರುದ್ದ ಥೈನ ಗುಣಗುಟ್ಯಾ. 25 ಮೊಶೆ ಯಹೊವಾನೆ ಪ್ರಾರ್ಥಾನಾ ಕರ‍್ಯೊ. ತೆಳಾಮಾ ಯಹೊವಾ ತಿನೆ ಯಕ್ಕ ಝಾಡನೆ ದೆಕಾಡ್ಯೊ. ತೆ ತಿನೆ ಪಾನಿಮಾ ಘಾಲಲ್ಪರ, ಪಾನಿ ಗಳು ಥಯು. ತ್ಯಾ ಯಹೊವಾ ಇಸ್ರಾಯೆಲೊನಾ ಹುತಿ ಯಕ್ಕ ನಿಯಮ ಕರಿನ ತ್ಯುನೊನೆ ಪರಿಕ್ಷಾ ಕರ‍್ಯೊ. 26 ಯಹೊವಾ ತ್ಯುನೊನೆ, "ತುಮೆ ತುಮರಾ ಕ್ಹುದಾ ಥಯಲ ಯಹೊವಾನಾ ವಾತೊನೆ ಶ್ರದ್ದಾಕ್ಹು ಐಕಿನ, ತಿನಾ ನಜರನೆ ಚೊ಼ಕು ರ‍್ಹವಾನು ಕರಿನ, ತಿನಾ ಆಜ್ಞಾನೆ ವಿದೆಯೆ ಥೈನ, ತಿನಾ ಕಟ್ಟಡೊನೆ ಕ್ಹಾರಾ ಅನುಸರಸಿನ ಚಾಲ್ಯಾಮ, ಮಿ ಐಗುಪ್ತೊನೆ ಉಂಟಕರಲ ವ್ಯಾದಿಯೊಮಾ ಯಕ್ಕನೆಬಿ ತುಮೊನೆ ನೈ ಆವಾಲಗಾಡತೊ. ಯಹೊವಾ ಕವಾಲೊ ಮಿಜ಼ ತುಮೊನೆ ಆರ‍್ಯೊಗ್ಯ ದಾಯಕ ವ್ಹೈ, ತುಮೊನೆ ಅರಾಮ ಕರಾಲೊ ಥಯೊಸ ಕೈನ" ಕದ್ಯೊ. 27 ತೆ ಥಯಲ್ಪರ ತ್ಯುನೆ ಎಲಿಮಿನೆ ಆಯಾ. ತ್ಯಾ ಬಾರಾ ಪಾನಿನಾ ಕ್ಹಾಡಿಯೊ ಸತ್ತರ ಖಜುರನಾ 15:27 ಝಾಡೊ ವ್ಹತ್ತಾ. ತೆ ಪಾನಿನಾ ಬಾಜು಼ಮಾ ತ್ಯುನೆ ಉತ್ರ್ಯಾ.