ಬದಲಿ ದಿವಾನಾಹುತಿ ನಿಯಮ
1 ಯಕ್ಲೊ ಬೈಲನೆ ರ‍್ಹವಾದೆ, ಬಕ್ರಾನೆ ರ‍್ಹವಾದೆ ಕಾಳ್ಳಿಲಿನ ಕಾಟ್ಯಾಮ ನೈತೊ ಇಕ್ಕ್ಯಾಮ ತೆ ಯಕ್ಕ ಬೈಲನಾ ಬದಲ ಪಾಂಚ ಬೈಲೊನೆ ದ್ಯು ಯಕ್ಕ ಬಕ್ರಾನಾ ಬದಲಿ ಚಾರ ಬಕ್ರಾ ದ್ಯೂ. 2 ಯಕ್ಲೊ ಚ್ವಟ್ಟೊ ಚೊರಿ ಕರ್ತಾಮಾ ಹತೆ ಮಳಲಪರ ತಿನೆ ಕಲಾಸ ಕರ‍್ಯಾಮ ತೆನಿ ನರಹತ್ಯಾ ಮೊಜಿನ ನೈ ದೆತಾ. 3 ಸೂರ‍್ಯೊ ಹುಟ್ಟಲಪರ ಯಕ್ಲೊ ಚೊರಿ ಕರಿನ ಮಳ್ತಾಮಾ, ತೆನೆ ಮಾರಿನ ಕ್ಹಲಾಸ ಕರ‍್ಯಾಮ ತೆ ನರಹತ್ಯಾ ವ್ಹೈ ಕೈನ ಮೊಜು. 4 ಚೊರಿ ಕರಲ ಬೈಲ ರ‍್ಹವಾದೆ, ಗದ್ಡೂ ರ‍್ಹವಾದೆ, ಬಕ್ರು, ಕಯು ಥೈತಬಿ ಜಿವಕ್ಹು ಚೊರಿ ಕರಲವಾಲಾಕನ ಮಳ್ಯಾರೆ ತೆ ಬೆ ಪಟ್ಟ ಅಕ್ಲು ದ್ಯೂ. 5 ಯಕ್ಲೊ ತಿನಾ ಕ್ಹೆತರಮಾ ರ‍್ಹವಾದೆ, ದ್ರಾಕ್ಷಿನಾ ಮಳಾಮಾ ರ‍್ಹವಾದೆ ತಿನಾ ಬೈಲೊನೆ ಚರೈನ, ಹಜಿಯಕ್ಲಾನಾ ಕ್ಹೆತರಮಾ ರ‍್ಹವಾದೆ, ದ್ರಾಕ್ಷಿನಾ ಮಳಾಮಾ ರ‍್ಹವಾದೆ ಚರಾವಾ ನಿಂಗತ ಕರ‍್ಯಾಮ, ತಿನಾ ಖೆತರನಾ ನೈತೊ ದ್ರಾಕ್ಷಿನಾ ಮಳಾಮಾ ಚೊಕೊ ಭಾಗನೆ ತಿನೆ ಇಡ ದ್ಯೂ. 6 ಯಕ್ಲೊ ಲಗಾಡಲ ಆಗ ಅಕಸ್ಮಾ ಕಾಟಾವಾನಾ ಝಾಡೊನೆ ಆಗ ಲಾಗಿನ ದವಸನಾ ರಾಶಿಯೊ ರ‍್ಹವಾದೆ, ಬೆಳೆ ರ‍್ಹವಾದೆ, ಕ್ಹೆತರ ರ‍್ಹವಾದೆ, ಬಳಿನ ಗಯಾಮ ಆಗ ಲಗಾಡಲವಾಲೊ ತಿನೆ ಇಡ ದ್ಯೂ. 7 ಯಕ್ಲೊ ದೊಕ್ಡಾ ರ‍್ಹವಾದೆ, ಕ್ಹೊನೊ ರ‍್ಹವಾದೆ ವಚಾ಼ಡಾನಾಹುತಿ ಹಜಿಯಕ್ಲಾನೆ ಒಪ್ಸಾಯಲ್ಪರ ತೆ ತಿನಾ ಮನಕ್ಹನಾ ಘರಮಾ ಚೊರಿ ಥಯಲ್ಪರ, ಚೊಟ್ಟೊ ಕ್ಹಾಪಡೊಮ ಬೆ ಪಟ್ಟ ದಂಡ ದ್ಯೂ. 8 ಚೊಟ್ಟೊ ನೈ ಮಳ್ಯಾಮ ತೆ ಘರನೊ ಮಾಲಕ ತೆಜ಼ ತೆ ಕ್ಹೊನಾನೆ ಚೊರಿ ಕರ‍್ಯೊಸು ನೈ ಕವಾನು ದೃಡಪಡಸಾನಾಹುತಿ ಕ್ಹುದಾನೆ ಆರಾದನಾ ಕರಾನಿ ಜ಼ಗಾಮಾ ದಿಕ್ಹು. 9 ವಂಚನೆ ಥಯು ಕೈನ ಅವಮಾನ ಹುಟ್ಟಲ ಹರಯಕ್ಕ ವಿಷಯಮಾ, ತೆ ಬೈಲ, ಗದ್ಡೂ, ಬಕ್ರು ನೈತೊ ವಣ್ಣಾವೊನಾ ವಿಶಯಮಾ, ಜವೈಲಿದ್ಯಾಮ ಬಿಜಾ಼ ಕಯಾ ವಸ್ತುನಾ ವಿಶಯಮಾ, ಬೆಜ಼ನಾ ತೆ ತ್ಯುನುಜ ವ್ಹೈಕೈನ ಕತಾಮಾ ತೆ ಬೆ ಜ಼ನಾನಾ ವ್ಯಾಜ್ಯ ಕ್ಹುದಾನಾ ಸನ್ನಿದಿನೆ ಔ. ಕ್ಹುದಾಬಿ ಕಿನೆ ದ್ರೊಹಿ ಕೈನ ನಿರ್ಣಯ ಕರ‍್ಯೊಸ ತೊ ತೆ ಬೆ ಪಟ್ಟ ತಿನಾ ನೆರೆವಾಲಾನೆ ದ್ಯೂ. 10 ಯಕ್ಲೊ ತಿನಾ ನೆರೆವಾಲಾನೆ ಗದ್ಡೂ ರ‍್ಹವಾದೆ, ಬೈಲ ರ‍್ಹವಾದೆ, ಬಕ್ರು ರ‍್ಹವಾದೆ ಬಿಜಾ಼ ಕಯಾ ರ‍್ಹವಾದೆ ಪಶುನೆ ರ‍್ಹವಾದೆ ವಚಾ಼ಡಾನಾಹುತಿ ದಿದಲ, ತೆ ಮರ‍್ಯಾಮ ನೈತೊ ಡುಕ್ಕ ಥಯಾಮ ನೈತೊ ಕುನಬಿ ತಿಳದ್ಯಾ ನೈಸೊ ಚೊರಿ ಥಯಾಮ, 11 ತೆ ಮನಕ್ಹ ತೆಜ಼ ತೆ ಸೊತ್ತನಾ ವಿಷಯಮಾ ಮೊಸ ಕರ‍್ಯೊ ನೈ ಕವಾನಾಹುತಿ ದೃಡಪಡಸಾನಾಹುತಿ ಯಹೊವಾನಾ ಉಪ್ಪರ ಕ್ಹಮ್ಮ ಘಾಲು. ತೆಳಾಮಾ ತೆ ಪಶುನಾ ಒಡೆಯೊ ಕ್ಹರಿನಿ ವ್ಯಾಕ್ಯಾ ನಂಬು. ಕ್ಹಮ್ಮ ಘಾಲಲವಾಲೊ ತಿನೆ ಇಡ ದಿವಾನಾಹುತಿ ಅಗ್ಯತ ನತ್ತಿ. 12 ತೆ ನೈಸೊ ತೆ ಪಶು ತಿಕನಂತು ಚೊರಿ ಥಯಾಮಾ ತೆ ಮನಕ್ಹ ತಿನಾ ಮಾಲಕನೆ ಯಕ್ಕ ಥೈನ ಇಡ ದ್ಯೂ. 13 ಜಂಗಲನಾ ಪ್ರಾಣಿಯೊ ತೆ ಪಶುವೊನೆ ಕ್ಹಲಾಸ ಕರ‍್ಯಾಮ, ತಿನೊ ಮೂರ್ದಾನೆ ಗುರತ ಥೈನ ದೆಕ್ಲಾಡಾದೆ. ಜಂಗಲನಾ ಪ್ರಾಣಿನೆ ಕಲಾಸ ಕರಲಕ್ಹು ಇಡ ದಿವಾನು ಅಗತ್ಯ ನತ್ತಿ. 14 "ಯಕ್ಲೊ ಹಜಿಯಕ್ಲೊ ಪಶುನೆ ದಕ್ಹಾ ಟೈಮ ಭಾಡೆ ಲಿದಲಕ್ಹು ತೆ ಪಶುನೊ ಮಾಲಕ ತಿನಾ ಬಾಜು಼ ನೈ ರ‍್ಹಯಲ ಟೈಮಾ ತಿನೆ ದುಃಖ ಥಯಾಮ ನೈತೊ ಮರ‍್ಯಾಮ ಸಾಲಾ ಲಿದಲವಾಲೊ ಇಡ ದ್ಯೂ. 15 ಮಾಲಕ ತಿನಾ ಬಾಜು಼ಮಾ ರ‍್ಹವತ್ತೊ, ತಿನೆ ಇಡ ದಿವಾನು ಅಗತ್ಯ ನತ್ತಿ. ತೆ ಭಾಡೆ ಲಿದಲ ರ‍್ಹಯಾಮಾ ತಿನೆ ಥಯಲ ನಷ್ಟ ಭಾಡಾನಾ ಇಸಾಬಮಾ ಮೊಜು.
ಸಾಮಾಜಿಕ ನಿಯಮೊ
16 ಘಟ್ಟ ಥಯಲ್ಪರ ಹೆಣ್ಣನೆ ಯಕ್ಲೊ ಉಸಕ ಜಮಾ ಕರಿನ ಸಂಗ ಮಿಸ್ಯಾಮ ತಿನಾಹುತಿ ಕರೆಟ್ಟ ತೆರನೆ ದಿನ ತಿನೆ ಹಿವಾ ಕರಲ್ಯೂ. 17 ತೆನೈಸೊ ತಿನೊ ಬಾಪ ಅನೆ ತಿನೆ ದಿವಾನಾಹುತಿ ನೈ ಒಪ್ಪ್ಯಾಮ ತೆ ಮನಕ್ಹನಾ ತಕ್ಕ ದೊಕ್ಡಾ ತೆರನೆ ದ್ಯೂ. 18 ಮಾಟಾಮಂತ್ರಾ ಕರಾಲಿನೆ ಉಗ್ರಾಡುಜ ನೈ 19 ಪಶುನೂ ಸಂಗ ಕರಲವಾಲಾನೆ ಮರಣನಿ ಶಿಕ್ಷಾ ಥವು. 20 ಯಹೊವಾ ಯಕ್ಲಾನೆಜ ನೈಸೊ ಬಿಜಾ಼ ದೆವಸ್ಥಾನನೆ ಯಜ್ಞ ಕಾರಾಲೊ ಸಂಪೂರ್ಣ ನಾಸ ಥವು. 21 "ಪರದೆಶಿವಾಲಾನೆ ಅನ್ಯಾಯ ಕರುನೈ ಉಪದ್ರವ ದ್ಯೂ ನಯ ತುಮೆ ಐಗುಪ್ತ ದೆಶಮಾ ಪರದೆಶಿ ಥಯಾಸ ತೊ? 22 ವಿದೆಯೆನೆ ರ‍್ಹವಾದೆ ದಿಕ್ಕ ನಯಸೊ ಬಚ್ಚಾ಼ವೊನೆ ರ‍್ಹವಾದೆ ಕಸ್ಟ ದ್ಯೂ ನೈ. 23 ತುಮೆ ಹವಾವೊನೆ ಕಸ್ಟ ದಿದ್ಯಾಮ ತ್ಯುನೆ ಮೊರೆ ಮ್ಹೆಲಸ ತೆ ಮೊರೆನೆ ಮಿ ಕಾನ ದ್ಯೂಸ ಕೈನ ತಿಳದಿ ಲಿವೊ. 24 ಮಿ ಸಿಟ್ಟೆ ಉಟಿನ ತುಮಾರಾ ಶತ್ರುವೊನೆ ತಲ್ವಾರಕ್ಹು ಕತ್ರಿ ಪಡುಸ. ತುಮಾರಾ ಬಯಕೊ ವಿದವೆ ಥಾವಸ. ತುಮಾರಾ ಬಚ್ಚಾ ದಿಕ್ಕ ನಯಸೊ ಥಾವಸ. 25 ಮಾರಾ ಮನಕ್ಹೊಮಾ ಯಕ್ಲಾ ಗರಿಬನೆ ತು ದೊಕ್ಡಾ ದಿದ್ಯಾರೆ ತಿನೆ ಸಾಲಾ ಲಿವಾಲೊ ನಿಂಗತ ದಿಕ್ಹು ನೈ. ತಿಕಂತೊ ಬಡ್ಡಿ ಪುಚ್ಚು ನೈ. 26 ತು ಯಕ್ಲಾನೆ ಕಂಬಳಿ ವತ್ತಿ ಮ್ಹೆಲ್ಲಿದ್ಯಾರೆ ಸುರ್ಯೊ ಡುಬೆಲಕ್ಕಾ ತಿನೆ ಪಾಚೊ ದ್ಯೂ. 27 ಕಾ ಕದ್ಯಾಮ ತೆ ತಿನೆ ಯಕ್ಕಜ ಹೊದಿಕೆ ಥಯಿಸ. ತೆಜ಼ ತಿನಾ ಅಂಗನೆ ವಣ್ಣಾ.ತೆ ಬಿಜು಼ ಕಯು ವಳ್ಳಿನ ಕ್ಹುರೌ? ತೆ ಮನೆ ಮೊರೆ ಮ್ಹೆಲ್ಯಾಮ ಮಿ ಕಾನ ದಿನ ಐಕುಸ. ಕಾ ಕದ್ಯಾಮ ಮಿ ದಯಾವಾಲೊ ವ್ಹೈ. 28 ಕ್ಹುದಾನೆ ದೊಷ ದ್ಯೂ ನೈ. ತಾರಾ ಮನಕ್ಹೊನಾ ಅದಿಕಾರೊನೆ ಶಾಪ ದ್ಯೂ ನೈ. 29 ತುಮಾ ಕಣಕ್ಹು ವರಿ ದ್ರಾಕ್ಷಾ ಲತಕ್ಹು ಮನೆ ಸಲ್ಲಿಸಾನೂ ಸಮರ್ಪಿಸ ಕರಾನೆ ಲೆಟ ಕರು ನೈ. ತಾರಾ ಪಸ್ಟ ಗಂಡ ಬಚ್ಚಾ಼ನೆ ಮನೆ ಸಮರ್ಪಿಸ ಕರು. 30 ತಿನಾ ನಿಂಗತಜ಼಼ ತುಮಾರಾ ಬಕ್ರಾ, ಬೈಲೊನಾ ಪಸ್ಟ ಬಚ್ಚಾ಼ವೊನೆ ಸಮರ್ಪಿಸ ಕರು. ಕ್ಹಾತ ದಿನ ಲಕ್ಕಾ ತೆ ಬಚ್ಚು ತಿನಿಯಾನಾ ಕ್ಹಾತೆ ರ‍್ಹವಾದೆ. ಆಟವಾ ದಿನಮಾ ತಿನೆ ಮನೆ ಸಮರ್ಪಿಸು. 31 ತುಮೆ ಮನೆ ಪರಶುದ್ದ ಮನಕ್ಹೊ ಥೈನ ರ‍್ಹೌ. ತಿನಾಹುತಿ ಜಂಗಲನೂ ಪ್ರಾಣಿ ಕತ್ರಲ ತುಮೆ ಕ್ಹೌ ನೈ, ತೆ ಕುತ್ರಾವೊನೆ ಛೊಡೂ.