Êxodo 10

ಚಿಡ್ಡಾ

1 ತೆ ಥಯಲ್ಪರ ಯಹೊವಾ ಮೊಶೆನೆ, "ಫರೊಹನಕನ ಫರಿನ ವರಿ ಜಾ಼. ಮಿ ಫರೊಹನ ವರಿ ತಿನಾ ಅದಿಕಾರಿಯೊನು ಮನಸ ಮಂಡ ಕರ‍್ಯೊಸ. ಕಾಕದ್ಯಾಮ ಮಿ ತ್ಯುನಾ ಕ್ಹಾಮೊ ಅದ್ಬುತ ಕಾಮೊ ಕರಾನಾ ಹುತಿ . 2 ಮಿ ಅದ್ಬುತೊ ಕರ್ತಾಮಾ ಮಿ ಐಗುಪ್ತವಾಲಾವೊನೆ ಕಿಮ್ಮ ಪಿಸಾಳಾ ಕರ‍್ಯೊ ಕೈನ ತುಮಾರಾ ಬಚ್ಚಾ಼ವೊನೆ, ತುಮಾರಾ ನಾತನಾ ನಾತನಿಯೊನೆ ಕವಾನೆ ತುಮೊನೆ ಸಾದ್ಯ ಥಾವಾಸ. ಮಿಜ ಯಹೊವಾ ವ್ಹೈ ಕೈನ ತುಮೆ ಕ್ಹಾರಾ ತಿಳ್ದಿಲಿವೊಶಿ" ಕದ್ಯೊ. 3 ತೆಳಾಮಾ ಮೊಶೆ ವರಿ ಆರೊನ ಫರೊಹನಕನ ಗೈನ ತಿನೆ, "ಇಬ್ರಿಯವಾಲಾವೊನೊ ಕ್ಹುದಾ ಯಹೊವಾ ಸು ಕವಸ ಕದ್ಯಾಮ, "ತು ಹಜು ಮಾರಾ ಕ್ಹಾಮೊ ಡೊಗ್ಯಾ ಬಗರ ರ‍್ಹವಾನು ಕೆಳಕ್ಕಾ ವ್ಹೈ? ಮನೆ ಆರಾದನಾ ಕರಾನಾ ಹುತಿ ಮಾರಾ ಮನಕ್ಹೊನೆ ಜಾ಼ವಾನೆ ದೆ. 4 ಜಾ಼ವಾನೆ ನೈ ದಿದ್ಯಾರೆ ವಂತಾಜ಼ ತಾರಾ ದೆಶಮಾ ಚಿಡ್ಡಾ ಆವಾಲಗಾಡುಸ. 5 ತೆ ತುಮಾರಿ ಪುರಾ ಜಿಮಿನಪರ ಫೈಲಿ ಜಾ಼ವಸ. ತುನೆ ಜಿಮಿನ ನೈ ದಿಕ್ಹತಿ. ಬರಪನಾ ಪಾನಿಕ್ಹು ಸು ಸು ಅನಾಜ ವಾಚುಸ ತೆ ಕ್ಹಾರು ಅನಾಜ ತೆ ಚಿಡ್ಡಾ ಖೈ ಪಡಸ. ತುಮಾರಾ ಖೆತರೊಮಾ ರ‍್ಹಯಲ ಹರಯಕ್ಕ ಝಾಡನು ಪಾಲ ವರಿ ಚಿಗ್ರಾನು ಪಾಲ ತೆ ಚಿಡ್ಡಾ ಖೈ ಪಡಸ. 6 ತೆ ಚಿಡ್ಡಾ ತಾರಾ ಮಹೆಲಮಾಬಿ, ತಾರಾ ಮನಕ್ಹೊನಾ ಘರೊಮಾಬಿ, ಐಗುಪ್ತನಾ ಕ್ಹಾರಾ ಘರೊಮಾಬಿ ಭರಿಜಾ಼ವಸ. ತುಮಾರಾ ಪುರ್ವಿಕೊನಾ ಕಾಲತುಬಿ ಹಮ್ನಾ ಲಕ್ಕಾ ತ್ಯವಾ ಚಿಡ್ಡಾವೊನಾ ಗುಂಪನೆ ಕೆಳಾಬಿ ದೆಕ್ಯಾನೊತಾ" ಕೈನ ಕದ್ಯಾ. ಆ ಕೈನ ಮೊಶೆ ಫರಿನ ಫರೊಹನ ಕಂತೊ ಗೈ ಪಡೊ. 7 ತೆಳಾಮಾ ಫರೊಹನನಾ ಅಧಿಕಾರಿಯೊ ತಿನೆ, "ಆಂ ಮನಕ್ಹ ಕೆಕ್ಲಾ ದಿನ್ನ ಅಪೊನೆ ತ್ರಾಸ ದಿವಸ? ತೆ ಮನಕ್ಹೊ ತ್ಯುನಾ ಕ್ಹುದಾ ಥಯಲ ಯಹೊವಾನೆ ಆರಾದನಾ ಕರಾನಾಹುತಿ ಅಪ್ಪಣೆ ದೆ. ಐಗುಪ್ತ ದೆಶ ಹಾಳ ಥಯು ಕೈನ ಹಜಿ ತುನೆ ಗ್ವತ್ತ ಥಯು ನತ್ತಿ ಸು? ಕೈನ ಕದ್ಯಾ. 8 ತೆ ಐಕಿನ ಫರೊಹನ, ಮೊಶೆ ವರಿ ಆರೊನನೆ ಫರಿನ ಬಲೈನ ತ್ಯುನೊನೆ, "ತುಮೆ ಗೈನ ತುಮಾರೊ ಕ್ಹುದಾ ಥಯಲ ಯಹೊವಾನೆ ಆರಾದನಾ ಕರ ಸಕೊಶಿ, ತೆನೈಸೊ ಕುನ ಕುನ ಜೌ಼ ಕೈನ ಛೆ? ಕೈನ ಪುಚ್ಯೊ. 9 ಮೊಶೆ ತಿನೆ, "ಹಮೆ ಯಹೊವಾನೆ ಜತ್ರಾ ಕರು ಕೈನ ಛೆ. ತಿನಾಹುತಿ ನ್ಹಾನಾ ಮನಕ್ಹೊತಿ ಗಡಿಯಾ ಲಕ್ಕಾ ಕ್ಹಾರಾ ಜ಼ನಾ ಗಯೆಸ; ಗಂಡ ವರಿ ಹೆಣ್ಣ ಮನಕ್ಹೊನೆ, ಬೈಲೊ ಬಕ್ರಾನಾ ಗುಂಪನೆ ಲಿನ ಗಯೆಸ" ಕೈನ ಉತ್ತರ ದಿದ್ಯೊ. 10 ಯಹೊವಾ ಪುರ್ವ ದಿಕ್ಕನಾ ವಾರಾನೆ ಘನಿ ಜೊರ ರ‍್ಹಯಲ ಪಚ್ಚಿಮ ದಿಕ್ಕನಾ ವಾರಾ ನಿಂಗತ ಬದಲಿ ಕರ‍್ಯೊ. ತೆ ಚಿಡ್ಡಾವೊನೆ ಉಚೈಲಿನ ಲಾಲ ಸಮುಂದರಮಾ ಪಾಡೆ ನಿಂಗತ ಕರ್xಯು. ಐಗುಪ್ತ ದೆಶಮಾ ಯಕ್ಕ ಚಿಡ್ಡೊಬಿ ಉಗ್ರ್ಯೊ ನೈ. 11 ತುಮಾರಾಮಾ ಕ್ಹಾಲಿ ದಾಣ್ಗಾ ಗೈನ ಯಹೊವಾನೆ ಆರಾದನಾ ಕರಿನ ಆಸಕೊಶಿ. ತುಮೆ ಮಾಂಗಿಲಿದಲ ತೆಕ್ಲುಜ಼ ನವೈ ಸು? ಕೈನ ತ್ಯುನೊನೆ ಫರೊಹನ ತಿನಾ ಸನ್ನಿದಿತೊ ವಳೈಪಡ್ಯೊ. 12 ತೆಳಾಮಾ ಯಹೊವಾ ಮೊಶೆನೆ, "ಐಗುಪ್ತ ದೆಶನಾ ಉಪ್ಪರ ತಾರೊ ಹತ್ತ ಉಚಾ, ಚಿಡ್ಡಾವೊನೆ ಆವಾಲಗಾಡ. ಬರಪನಾ ಪಾನಿಕ್ಹು ನಾಶ ಥಯಾವಾಚಿ ಉಗ್ರಲ ಪೈರನೆ ಚಿಡ್ಡಾ ಖಾವಾದೆ" ಕೈನ ಕದ್ಯೊ. 13 ಮೊಶೆ ತಿನಾ ಲಾಕ್ಡಿನೆ ಐಗುಪ್ತ ದೆಶಪರ ಉಚಾಯಲಪರ, ಯಹೊವಾ ಪಾಟೆಬಿ ರಾತೆ ಪುರ್ವ ದಿಕ್ಕತು ವಾರಾನೆ ಅವಾವರಕ್ಹೊ ಕರ‍್ಯೊ. ತೆ ಪಾಟನಾ ವಾರಾನಾ ಝೊಕಾಕ್ಹು ಚಿಡ್ಡಾ ಆಯಾತಾ. 14 ಚಿಡ್ಡಾ ಕ್ಹಾರಾ ಐಗುಪ್ತ ದೆಶಮಾ ಐನ ಐಗುಪ್ತ ದೆಶನಾ ಕ್ಹಾರಿ ಜ಼ಗಾವೊಕನ ಘನ್ನಾ ಥೈನ ಉತ್ರ್ಯಾ. ತ್ಯವಾ ಚಿಡ್ಡಾವೊನು ಗುಂಪ ಪೈಲಾ ಐಯು ನ್ಹೊತು, ಅಗುಬಿ ಆವಾನೆ ಸಾದ್ಯ ನತ್ತಿ. 15 ತೆ ಕ್ಹಾರಿ ಜಿಮಿನನೆ ಝಾಕಿ ಲಿದಲಕ್ಹು ಜಿಮಿನಬಿ ಝಕೈ ಗೈ. ಬರಪನಾ ಪಾನಿಕ್ಹು ನಾಶ ನೈ ಥಯಲ ಕ್ಹಾರಾ ಪೈರನೆ, ಝಾಡೊಮಾ ರ‍್ಹಯಲ ಕ್ಹಾರಾ ಫಲ್ಲನೆ ತೆ ಖೈ ಪಡ್ಯಾತಾ. ಐಗುಪ್ತನಾ ದೆಶಮಾ ಝಾಡೊ ನೈಸೊ ಥಾವಾದೆ, ಖೆತರನಾ ನ್ಹಾನಾ ಝಾಡೊಮಾ ರ‍್ಹಯಾತಬಿ ಹಸರ ರ‍್ಹಯಲ ಯಕ್ಕಬಿ ಉಗ್ರ್ಯು ನೈ. 16 ತೆಳಾಮಾ ಫರೊಹನ, ಮೊಶೆ ವರಿ ಆರೊನನೆ ‍ಜಲ್ದಿ ಬಲೈನ , ಮಿ ತುಮಾರೊ ಕ್ಹುದಾ ಥಯಲ ಯಹೊವಾನೆ, ತುಮೊನೆ ವಿರುದ್ದ ಥೈನ ಪಾಪ ಕರ‍್ಯೊಸ. 17 ತೆನೈಸೊ ಆಂ ಯಕ್ಕ ಸಲಾ ಮಾರಾ ಪಾಪೊನೆ ಮಾಫ ಕರೊ "ತುಮಾರೊ ಕ್ಹುದಾ ಥಯಲ ಯಹೊವಾ ಆಂ ಮರಣಕರ ಥಯಲ ತ್ರಾಸನೆ ಮಕಂತು ಜೌ಼ ಕೈನ ತಿನೆ ಪ್ರಾರ್ಥನಾ ಕರೊ" ಕೈನ ಕದ್ಯೊ. 18 ಮೊಶೆ ಫರೊಹನ ಕಂತೊ ಗೈನ ಯಹೊವಾನೆ ಪ್ರಾಥನಾ ಕರೊ. 19 ಯಹೊವಾ ಪುರ್ವ ದಿಕ್ಕನಾ ವಾರಾನೆ ಜೊರ ಕರಿನ ಪಶ್ಚಿಮ ದಿಕ್ಕತೊ ಆಯೆ ಲಿಂಗತ ಕರ‍್ಯೊ. ತೆ ವಾರೊ ಚಿಡ್ಡವೊನೆ ಉಚೈಲಿನ ಗೈನ ಲಾಲ ಸಮಂದರಮಾ ಘಾಲಿಪಡ್ಯು. ಐಗುಪ್ತ ದೆಶಮಾ ಯಕ್ಕಬಿ ಚಿಡ್ಡೊ ಉಗ್ರ್ಯೊ ನೈ. 20 ತೆಳಾಮಾ ಯಹೊವಾ ಫರೊಹನನು ಮನಸ ಕಟಿನ ಕರಲಕ್ಹು ತೆ ಇಸ್ರಾಯೆಲೊನೆ ಮೊಕಲಾನೆ ವಪ್ಯೊ ನೈ.

ಮ್ಹೊಟು ಅಂದಾರು

21 ತೆ ಥಯಲ್ಪರ ಯಹೊವಾ ಮೊಶೆನೆ, "ಹಬಾಳಪರ ತಾರಾ ಹತ್ತನೆ ಉಚಾ. ತೆಳಾಮಾ ಐಗುಪ್ತ ದೆಶಮಾ ಕ್ಹಾರು ಅಂದಾರು ಥಾವಸ. ತೆ ಅಂದಾರಾಕ್ಹು ಮನಕ್ಹೊ ಗೊಡಿಯೊ ಮುಟ್ಟಿ ಮುಟ್ಟಿನ ಚಾ಼ಲಸ" ಕೈನ ಕದ್ಯೊ. 22 ಮೊಶೆ ಹಬಾಳಪರ ಹತ್ತ ಉಚಾಯಲಪರ ಐಗುಪ್ತ ದೆಶಮಾ ಕ್ಹಾರು ತನ್ನ ದಿನ್ನ ಮ್ಹೊಟಾ ಅಂದಾರಾಕ್ಹು ಝಕೈ ಗಯು. 23 ತನ್ನ ದಿನ್ನ ಲಕ್ಕಾ ತ್ಯುನೆ ಯಕ್ಲಾನೆ ಯಕ್ಲೊ ದೆಕ್ಯೊ ನೈ. ಕುನಬಿ ತ್ಯುನಾ ಜ಼ಗಾಕಂತೊ ಉಟ್ಯೊಜ಼ ನೈ. ತೆನೈಸೊ ಇಸ್ರಾಯೆಲೊ ರ‍್ಹಯಲ ಜ಼ಗಾವೊಮಾ ಉಜಾಲು ವ್ಹತ್ತು. 24 ತೆಳಾಮಾ ಫರೊಹನ ಮೊಶೆನೆ ಬಲೈನ, ತುಮೆ ಗೈನ ಯಹೊವಾನೆ ಆರಾದನಾ ಕರೊ. ತುಮಾರಾ ಘರವಾಲಾಬಿ ತುಮೆ ಜಾ಼ಸಕೊಸಿ. ತುಮಾರಾ ಬೈಲೊ ಬಕ್ರಾವೊನೆ ನ್ಹ್ಯಾಜ ಛೊಡಿನ ಜೌ಼" ಕದ್ಯೊ. 25 ತಿನಾಹುತಿ ಮೊಶೆ, ಹಮಾರೊ ಕ್ಹುದಾ ಥಯಲ ಯಹೊವಾನೆ ಹಮೆ ಯಜ್ಞಹೊಮ ಕರಾನೆ ಚಾ಼ಯೆ ಥಯಲ ಕ್ಹಾರಾ ಪಶುವೊನೆ ಲಿನ ಜಾ಼ವಾನೆ ಹಮೊನೆ ಅಪ್ಪಣೆ ದ್ಯು. 26 ಹಮಾರಾ ಕ್ಹಾರಾ ಪಶುವೊನೆ ಹಮಾರಾ ಕ್ಹಾತೆ ಬಲೈಲಿನ ಜ಼ೈಯೆಸ. ಯಕ್ಕಬಿ ಹಮೆ ಛೊಡಿನ ಜಾ಼ವಾನೆ ಥಾತು ನೈ; ತೆ ಪಶುವೊಕ್ಹು ಹಮಾರೊ ಕ್ಹುದಾ ಥಯಲ ಯಹೊವಾನೆ ಆರಾದನೆ ಕರುತೊ. ಕಯಾ ಪಶುವೊನೆ ದಿವ ಕವಾನು ಹಮೊನೆ ತ್ಯಾ ಗಯೆ ಲಕ್ಕಾ ಹಮೊನೆ ಸುಜ ಗ್ವತ್ತ ನತ್ತಿ ಕದ್ಯೊ. 27 ತೆಳಾಮಾ ಯಹೊವಾ ಫರೊಹನನು ಮನಸನೆ ಕಟಿನ ಕರಲಕ್ಹು ತ್ಯುನೊನೆ ಅಪ್ಪಣೆ ದಿವಾನೆ ವಪ್ಯೊ ನೈ. 28 ತೆಳಾಮಾ ಫರೊಹನ ಮೊಶೆನೆ, "ಮನೆ ಛೊಡಿನ ಜಾ಼. ಇತ್ತಿ ಉಪ್ಪರ ಮಾರು ಮ್ಹೊಡು ದೆಕೆವಾಚಿ ಎಚ್ಚರ ಥೈನ ರ‍್ಹೆ. ಕಾಕದ್ಯಾಮ ತು ಮಾರು ಮ್ಹೊಡಾನೆ ದೆಕಲ ದಿನ್ನೆಜ಼ ತು ಮರಶಿ!" ಕೈನ ಕದ್ಯೊ. 29 ತಿನಾಹುತಿ ಮೊಶೆ, "ತು ಕರೆಟ್ಟ ಕದ್ಯೊ. ಹಮ್ನಾತೊ ಮಿ ತಾರು ಮ್ಹೊಡು ದೆಕ್ತೊಜ಼ ನೈ" ಕೈನ ಕದ್ಯೊ.