1 ಇಸ್ರಾಯೆಲೊ ಐಗುಪ್ತ ದೆಶತಾ ಗೈನ ತನ್ನವಾ ಮ್ಹೈನಾನಾ ತೆಜ಼ ದಿನ್ನಮಾ ಸಿನಾಯಿನಾ ಡೊಂಗರನಿ ಉಸಕನಿ ಜಿಮಿನೆ ಆಯಾ. 2 ಇಸ್ರಾಯೆಲೊ ರೆಪೀದಿನೆ ಛೊಡಿನ ಉಸಕನಿ ನಿಮಿನೆ ಐನ ಉಸಕನಿ ಜಿಮಿನಮಾ ಝೊಪಡ್ಯು ಘಾಲ್ಲಿನ ಸಿನಾಯಿ ಡೊಂಗರನೆ ಕ್ಹಾಮಾ ಐನ ಉತ್ರ್ಯಾ. 3 ಮೊಶೆ ಡೊಂಗರ ಚಡಿನ ಕ್ಹುದಾನಾ ಸನ್ನಿದಿನೆ ಗಯೊ. ತೆಳಾಮಾ ಯಹೊವಾ ಡೊಂಗರನಾ ಉಪ್ಪರತೊ ಮೊಶೆನೆ ಬಲೈನ ತಿನೆ, " ತು ಯಾಕೊಬನಾ ಘರವಾಲಾ ರ‍್ಹಯಾಮ ಇಸ್ರಾಯೆಲೊನೆ ಆ ವಾತೊನೆ ತಿಳಸೈನ ಕವು. 4 ‘ಮಿ ಐಗುಪ್ತೊನೆ ಕರಲ ಕ್ಹಾರು, ಘಾರ ತಿನಾ ಬಚ್ಚಾ಼ವೊನೆ ರೆಕ್ಯಾವೊನಾ ಉಪ್ಪರ ಚಡೈಲ್ಯು ಕೈನ ಮಿ ತುಮೊನೆ ಉಚೈಲಿನ ಆ ಜ಼ಗಾನೆ ಆವಾಲಗಾಡೊಸತೊ ತುಮೆ ದೆಕ್ಯಾಸ. 5 ತಿನಾಹುತಿ ತುಮೆ ಮಾರಾ ವಾತೊನೆ ಶ್ರದ್ದಾಕ್ಹು ಐಕಿನ, ಮಾರಾ ಒಡಂಬಡಿಕೆನೆ ವಚಾ಼ಡಿ ಲಿದ್ಯಾಮ, ತುಮೆ ಕ್ಹಾರಾ ಜನಾಂಗೊಮಾ ಮನೆ ಸ್ವಕಿಯ ಮನಕ್ಹೊ ಥಾವೊಸಿ. ಕ್ಹಾರಿ ದುನಿಯಾ ಮಾರಿಜ ವ್ಹೈ. 6 ತುಮೆ ಮನೆ ಶ್ರೆಷ್ಟ ಯಾಜಕೊ, ಪರಿಶುದ್ದ ಮನಕ್ಹೊನೆ ಥಾವೊಸಿ’ ಕೈನ ತು ಇಸ್ರಾಯಲನೆ ತಿಳಸೌ" ಕದ್ಯೊ. 7 ತೆಳಾಮಾ ಮೊಶೆ ಐನ ಮನಕ್ಹನಾ ಮ್ಹೊಟಾವೊನೆ ಒಟ್ಟ ಥೈನ ಸೆರಸ್ಯೊ. ಯಹೊವಾ ಆಜ್ಞಾಕರಲ ಆ ವಾತೊನೆ ತ್ಯುನೊನೆ ತಿಳಸಾ. 8 ಮನಕ್ಹೊ ಒಗ್ಗಟ ಥೈನ, "ಯಹೊವಾ ಕದಲನಿಂಗತಜ಼಼ ಕರಿಯೆಸ. ಮೊಶೆ ಯಹೊವಾಕನ ಪಾಚೊ ಫರಿನ ಗೈನ ತ್ಯುನೆ ಕದಲ ವಾತೊನೆ ತಿಕನ ಕದ್ಯೊ 9 ಯಹೊವಾ ಮೊಶೆನೆ, " ಹಮ್ನಾ, ಮಿ ತಾರಾ ಕ್ಹಾತೆ ಬೊಲ್ತಾಮಾ, ಮನಕ್ಹೊ ಐಕಿನ ಕೆಳಾಮಾಬಿ ತುನೆ ನಂಬಾ ವರಕ್ಹು ಮಿ ಮ್ಹಾಡಮಾತೊ ತುಕನ ಔಸ" ಕೈನ ಕದ್ಯೊ. ಮೊಶೆ ಮನಕ್ಹೊನಾ ವಾತೊನೆ ಯಹೊವಾ ಕನ ಕದ್ಯೊ. 10 ಯಹೊವಾ ಮೊಶೆನೆ ಕದಲ ಸುವೈ ಕದ್ಯಾರೆ, " ತು ಮನಕ್ಹೊಕನ ಗೈನ , ಆ ದಿನ್ನೆ ವರಿ ವಂತಾ ತ್ಯುನೊನೆ ಶುದ್ದ ಕರ. ಮಿ ಆವಾನಾಹುತಿ ತ್ಯುನೊನೆ ಶುದ್ದ ಕರ. ತ್ಯುನೆ ತ್ಯುನು ವಣ್ಣಾ ಧೊಲಿನ, 11 ತನ್ನವಾ ದಿನ್ನಮಾ ತ್ಯುನೆ ಶುದ್ದ ಥವು. ತನ್ನವಾ ದಿನ್ನಮಾ ಯಹೊವಾ ಸಮಸ್ತ ಮನಕ್ಹೊನೆ ಪ್ರತ್ಯೆಕ್ಷ ಥೈನ ಸಿನಾಯಿನಾ ಡೊಂಗರಪರ ಉತ್ರನ ಆವಸ. ತುಮೆ ತ್ಯಾ ಮನೆ ದೆಕೊಶಿ. 12 ಮನಕ್ಹೊ ಕ್ಹಾಮಾ ಆಯೆವಾಚಿ ತು ಡೊಂಗರನಾ ಸುತ್ತೆಬಿ ಬೆಲಿ ಕರಿನ ಮನಕ್ಹೊನೆ, ‘ಎಚ್ಚರ ಥಾವೊ, ತುಮೆ ಆ ಡೊಂಗರ ಚಡೆವಾಚಿ ತಿನಿ ಬೆಲಿ ಮುಟ್ಟೆವಾಚಿ ಜಾಗ್ರತೆಕ್ಹು ರ‍್ಹೌ. ಡೊಂಗರನೆ ಮುಟ್ಟಲವಾಲಾ ಕ್ಹಾರಾ ಕ್ಹರಿಜ಼ ಮರಿ ಜಾ಼ವಸ. 13 ತ್ಯವಾನೆ ಕುನ್ನಜ ಮುಟ್ಟು ನೈ. ಡಗ್ಡೊ ನಾಕಿನ ನೈತೊ ಬಾಣಾ ಛೊಡಿನ ಕ್ಹರಿಜ಼ ತ್ಯವಾನೆ ಕಲಸಕರು. ಮನಕ್ಹ ರ‍್ಹವಾದೆ, ಪಶುವೊ ರ‍್ಹವಾದೆ ಮೂಟ್ಯಾಮ ಮರುಜ. ಸಿಂಗ್ಡಾನಿ ಅವಾಜ ದಿರ್ಘಥೈನ ಐಕ್ತಾಮಾ ತ್ಯುನೆ ಡೊಂಗರನಾ ನಜಿಕ ಔ" ಕೈನ ಕೆ ಕದ್ಯೊ. 14 ಮೊಶೆ ಡಂಗರತೊ ಉತ್ರಿನ ಮನಕ್ಹೊ ಕನ ಐನ, ತ್ಯನೊನೆ ಆರಾದನಾ ಕರಾನೆ ತಯ್ಯಾರ ಕರ‍್ಯೊ. ತ್ಯುನೆ ತ್ಯುನಾ ವಣ್ಣಾವೊನೆ ಧ್ಯಲಿನ ಶುದ್ದ ಥಯಾ. 15 ತೆಳಾಮಾ ಮೊಶೆ ಮನಕ್ಹೊನೆ, "ತನ್ನವಾ ದಿನಮಾ ಸಿದ್ದ ಥಾವೊ ಅನಾ ವಚ್ಮಾ ಕಯೊಬಿ ದಾಣ್ಗೊ ಬಾಕಡಿನಿ ಕ್ಹಾತೆ ಕ್ಹುರೌ ನೈ" ಕೈನ ಕದ್ಯೊ.

16 ತನ್ನವಾ ದಿನಮಾ ಸುರ‍್ಯೊದಯೊ ಥಾವಾನೆ ತೆ ಡೊಂಗರನಾ ಉಪ್ಪರ ಬಿಜಲಿ, ಮಿಂಚ, ಘನ್ನು ಮ್ಹಾಡ, ಪಿಪಿಯೊನಿ ಮ್ಹೊಟು ಅವಾಜ ಉಂಟಥಾವಾನೆ ಪಾಳೆಮಾ ರ‍್ಹಯಲ ಮನಕ್ಹೊ ಕ್ಹಾರಾ ಕಾಪ್ಯಾ. 17 ಕ್ಹುದಾನಾ ದರ್ಶನಾ ಹುತಿ ಮೊಶೆ ಮನಕ್ಹೊನೆ ಪಾಳೆಯನಾ ಭಾರಾ ಬಲೈನ ಆತಾಮಾ, ತ್ಯುನೆ ಡೊಂಗರನಾ ಹೆಟಾ ಹುಬ್ರಯಾ. 18 ಯಹೊವಾ ಆಗನಾ ಮ್ಹೈ ಸಿನಾಯಿನಾ ಡೊಂಗರನಾ ಉಪ್ಪರ ಉತ್ರಿನ ಆಯೊ. ತಿನಾಹುತಿ ತೆ ಡೊಂಗರ ಕ್ಹಾರು ಧವಾಂಡಾಕ್ಹು ಭಿರಿಗಯು. ತೆ ಧವಾಂಡೊ ಆಗನಾ ಧವಾಂಡಾ ನಿಂಗತ ಉಪ್ಪರ ಗಯೊ. ತೆ ನೈಸೊ ಡೊಂಗರ ಕ್ಹಾರು ಘನ್ನು ಹಲ್ಯು ಥಯು. 19 ಪಿಪಿಯೊನಿ ಅವಾಜ ಹೆಚ್ಚ ಥೈನ ಆತಾಮಾ, ಮೊಶೆ ಕ್ಹುದಾನಾ ಕ್ಹಾತೆ ಬೊಲ್ಯೊ. ತೆಳಾಮಾ ಕ್ಹುದಾ ಉಚ್ಚಿ ಅವಾಜಮಾ ತಿನೆ ಉತ್ತರ ದಿದ್ಯೊ. 20 ಯಹೊವಾ ಸಿನಾಯಿನಾ ಡೊಂಗರನಾ ಗೊಪುರನೆ ಉತ್ತಿನ ಆಯೊ. ತೆ ಡೊಂಗರನಾ ತುದಿಯೆ ಆ ಕೈನ ಮೊಶೆನೆ ಬಲಾತಾಮಾ ತೆ ಡೊಂಗರನೆ ಚಡ್ಯೊ. 21 ತೆಳಾಮಾ ಯಹೊವಾ ಮೊಶೆನೆ, "ತು ಉತ್ರಿನ ಗೈನ ಮನಕ್ಹೊನೆ ಎಚ್ಚರ ಕರು. ತ್ಯುನೆ ದೆಕುಸ ಕೈನ ಕದಲ ಆಶೆಕ್ಹು ಬೆಲಿ ದಾಟಿನ ಯಹೊವಾನಾ ಕನ ಆಯಾರೆ ತ್ಯುನಾಮಾ ಘನಾ ಮನಕ್ಹೊ ಮರಿ ಜಾ಼ವಸ. 22 ಯಹೊವಾನಾ ಸನ್ನಿದಿನೆ ಆವಾನಾ ಯಾಜಕೊ ತುಮೊನೆ ಶುದ್ದ ಕರಲಿವೊ. ನೈಸೊ ಯಹೊವಾ ಪಕ್ಕನೆ ತ್ಯುನೊನೆ ಕತ್ರಿ ಪಡುಸ" ಕೈನ ಕದ್ಯೊ.

23 ತಿನೆ ಮೊಶೆ ಯಹೊವಾನೆ, " ಮನಕ್ಹೊನೆ ಸಿನಾಯ ಡೊಂಗರನೆ ಚಡಾನೆ ನೈ ಥಾತು. ಕಾ ಕದ್ಯಾಮ ‘ ಡೊಂಗರನಾ ಸುತ್ತೆಬಿ ಬೆಲಿ ಘಾಲಿನ ತಾರಾಹುತಿ ಶುದ್ದಕರ"’ ಕೈನ ಕರ‍್ಯೊಸತೊ. 24 ಯಹೊವಾ ಮೊಶೆನೆ, " ತು ಉತ್ರಿನ ಗೈನ ಅರೊನನೆ ತಾರಾ ಕ್ಹಾತೆ ಬಲೈಲಿನ ಉಪ್ಪರ ಆ. ತೆ ನೈಸೊ ಯಾಜಕೊ, ಮನಕ್ಹೊನಿ ತೆ ಬೆಲಿನೆ ದಾಟಿನ ಯಹೊವಾಕನ ಔನೈ. ದಾಟಿನ ಆಯಾರೆ ಮಿ ತ್ಯುನೊನೆ ಗಪ್ಪನೆ ಕತ್ರಿಪಡುಸ" ಕೈನ ಕದ್ಯೊ. 25 ತೆನೈಸೊ ಮೊಶೆ ಮನಕ್ಹೊಕನ ಉತ್ರಿನ ಗೈನ ಕ್ಹುದಾ ಕದಲ ವಾತೊ ತ್ಯುನೊನೆ ತಿಳಸ್ಯೊ.