ವಿಮೊಚನಕಾಂಡ 2

ಮೊಶೆನು ಜನನ

1 ತೆ ಥಯಲ್ಪರ ಲೆವಿನೊ ಖಾಂದಾನವಾಲೊ ಯಕ್ಲೊ ಲೆವಿನಾ ಖಾಂದಾನವಾಲಿ ಯಕ್ಕ ಛೊಕ್ರಿನೆ ಹಿವಾ ಕರಲಿದ್ಯೊ. 2 ತೆ ಬಾಕ್ಡಿ ಪೆಟೆ ರ‍್ಹೈನ ಯಕ್ಕ ಪಟ್ಟಾನೆ ಜ಼ನ್ನಿ. ತೆ ಪಟ್ಟೊ ದೆಕಾನೆ ಚೊ಼ಕೊ ಶೆ ಕೈನ ತಿನೆ ತನ್ನ ಮ್ಹೈನಾ ಝಾಕಿನ ರಾಕಿ. 3 ತೆ ತಿನೆ ಜಾಸ್ತಿ ದಿನ್ನ ಝಾಕಾನೆ ನೈಥಾತಾಕ್ಹು ತಿನೆ ಯಕ್ಕ ಟೊಪ್ಲಿ ಲಿನ ತೆ ಟೊಪ್ಲಿಮಾ ಪಾನಿ ಗಯಾ ಬಗರ ತಿನೆ ಡಾಂಬರ ಲಗಾಡಿನ ತೆ ಟೊಪ್ಲಿಮಾ ತೆ ಪಟ್ಟಾನೆ ಕ್ಹುರಾಡಿನ, ನೈಲ ನದಿನಾ ದಂಡಿನಾ ಚಾರಾಪರ ಛೊಡಿ ಪಡಿ. 4 ತೆ ಪಟ್ಟಾನೆ ಸುಬಿ ಥಾಸ ಕೈನ ತಿಳ್ದಿಲಿವಾನಾಹುತಿ ತೆ ಪಟ್ಟಾನಿ ಮ್ಹೊಟಿ ಭೆನ ನಕ್ಕರ ದುರ ದೆಕಾನಾಹುತಿ ಹುಬ್ರೈತಿ. 5 ತೆಕ್ಲಾಕ್ಹುಜ಼ ಫರೊಹನನಿ ದಿಕ್ರಿ ಅಂಗ ಧವಾನಾಹುತಿ ನೈಲ ನದಿಕನ ಐ. ತಿನಿಯೊ ಸೆವಕಿಯೊ ತೆ ನದಿನಾ ದಂಡಿಕನ ಫರಾಡ್ಯೊತೊ. ತೆ ಟೊಪ್ಲಿನೆ ದೆಕಿನ, ತಿನಿ ಯಕ್ಕ ಸೆವಕಿನೆ ವಳೈನ ತೆ ಟೊಪ್ಲಿ ಮಂಗೈಲಿದಿ. 6 ತೆ ಟೊಪ್ಲಿ ಕಾಡಿನ ದೆಕ್ತಾಮಾ, ಆಹಾ! ರವಾನು ಬಚ್ಚು಼. ತಿನೆ ತಿಪರ ಮರ್ಗಾ ಐನ, "ಎ ಇಬ್ರಿಯಮಾನು ಯಕ್ಕ ಬಚ್ಚು಼ ವಸ" ಕೈನ ಕದಿ. 7 ಬಚ್ಚಾ಼ನಿ ಭೆನ ಪಾಚಿ ಹುಬರೈತಿ ತೆಳಾಮಾ ಅಗಿ ಐನ ಫರೊಹನನಿ ದಿಕ್ರಿನೆ ತಾರಾಹುತಿ "ಎ ಪಟ್ಟಾನೆ ದುದ್ದ ಪಿಲೈನ ರಾಕಾನಾಹುತಿ ಯಕ್ಕ ದಾದಿನೆ ಮಿ ಬಲೈ ಲೌ ಸು? ಕೈನ ಪುಚ್ಚಿ. 8 ಫರೊಹನನಿ ದಿಕ್ರಿ ತಿನೆ, "ಜಾ಼ ಬಲೈಲಿನ ಆ" ಕದಿ. ತೆ ಗೈನ ತೆ ಬಚ್ಚಾ಼ನಿ ಮಾನೆಜ಼ ಬಲೈಲಿನ ಐ. 9 ಫರೊಹನನ ದಿಕ್ರಿ ತೆ ಪಟ್ಟಾನಿ ಯಾನೆ, "ತು ಆಂ ಬಚ್ಚಾ಼ನೆ ಲಿನ ಗೈನ ತಿನೆ ದುದ್ದ ಪಿಲೈನ ಮಾರಾಹುತಿ ರಾಕ, ಮಿ ತುನೆ ಪಗಾರ ದ್ಯುಸ" ಕದಿ. ತೆ ಬಾಕ್ಡಿ ತೆ ಬಚ್ಚಾ಼ನೆ ಲಿನ ಗೈನ ರಾಕಿ. 10 ತೆ ಪಟ್ಟೊ ಮ್ಹೊಟೊ ಥಾತಾಮಾ, ತಿನೆ ಫರೊಹನನಿ ದಿಕ್ರಿಕನ ಲಿನೈ, ತೆ ತಿನೊ ದಿಕ್ರೊ ಥಯೊ. "ಅನೆ ಪಾನಿಮಾತಿ ಲೈಸ" ಕೈನ ತೆ ಪಟ್ಟಾನೆ "ಮೊಶೆ*2:10 ಮೊಶೆ ಕದ್ಯಾಮ ಪಾನಿಮಾತೊ ಎಳದಾಯಲವಾಲೊ ವ್ಹೈ." ಕೈನ ನಾಮ ಮ್ಹೆಲಿ.