10 ತು ಕಾಟಾನ ಝಾಡಕ್ಹು ಯಕ್ಕ ಮಂಜುಷನೆ ಕರೌ.ತೆ ಅಡಿ ಮಾರ ಲಾಂಬು ದೆಡ ಮಾರ ರುಂದ ದೆಡಮಾರ ಉಚ್ಚು ಥಯಲ ರ್ಹೌ. 11 ಚೊಕಾ ಕ್ಹೊನಾನಾ ತಗಡೊ ತಿನಾ ಭಾರಾಬಿ ಮ್ಹೈಬಿ ಲಗಾಡು. ತೆನಾ ಉಪ್ಪರ ವರಿ ತಿನಾ ಸುತ್ತೆಬಿ ಕ್ಹೊನಾನಿ ಪಟ್ಟಿಯೊ ಲಗಾಡು. 12 ಚಾರ ಕ್ಹೊನಾನಾ ಬಾಂಗ್ಡಿಯೊನೆ ಧವೈನ ತಿನಾ ಚಾರೆ ಮೂಲಾವೊಮಾ ಕದ್ಯಾಮ ಯಕ್ಕಯಕ್ಕ ಜ಼ಗಾವೊಕನ ಬೆಬೆ ಬಾಂಗ್ಡಿಯೊನೆ ಮ್ಹೆಲು 13 ತೆ ಮಂಜುಷನೆ ಉಚಾವಾನಾಹುತಿ ತು ಕಾಟಾವೊನಾ ಝಾಡಕ್ಹು ಲಾಕ್ಡಿಯೊ ಕರೈನ ತಿನೆ ಕ್ಹೊನಾನಾ ತಗಡೊ ಲಗಾಡಿನ 14 ವರಿ ಮಂಜುಷನಾ ಭಂಬೆ ಜಾ಼ಗಾವೊನಾ ಬಾಂಗ್ಡಿಯೊಮಾ ಸೆರಸು. 15 ತೆ ಲಾಕ್ಡಿಯೊನೆ ಮಂಜುಷನಾ ಬಾಂಗ್ಡಿಯೊಮಾತಾ ಕಾಡೆವಾಚಿ ತಿಮಾಜ ಮ್ಹೆಲೆಲ ರ‍್ಹೌ 16 ತೆ ಮಂಜುಷಮಾ ಮಿ ತ್ಯುನೆ ದಿವಾನಾ ಆಜ್ಞಾಶಾಸನೆ ಮ್ಹೆಲು. 17 ತೆನೈಸೊ ಚೊಕಾ ಕ್ಹೊನಾನಾ ಝಾಕಾನ ಕೃಪಾಸನನೆ ಕರೌ. ತೆ ಅಡಿ ಮಾರ ಲಾಂಬು ದೆಡ ಮಾರ ರುಂದ ಥಯಲ ರ‍್ಹೌ. 18 ಕೃಪಾಸನನಾ ಬೆ ಮುಲಾವೊಮಾ ಕೆರುಬಿನಾ ಬೆ ಕ್ಹೊನಾನಾ ಆಕಾರೊನೆ ನಕ್ಷಾನಾ ಕಾಮಕ್ಹು ಕರೌ. 19 ಕೃಪಾಸನೆ ಯಕ್ಕಯಕ್ಕ ಕೊನಾಮಾ ಯಕ್ಕಯಕ್ಕ ಕೆರುಬಿಯೊನೆ ಕರೈನ ಕೃಪಾಸನೆ ಜೊಡಸು. 20 ತೆ ಕೆರುಬಿನಾ ಉಪ್ಪರ ರೆಕ್ಯಾವೊನೆ ಫೈಲಾಯಾ ನಿಂಗತ ಕೃಪಾಸನ ತಿನಾ ರೆಕ್ಯಾವೊಕ್ಹು ಝಾಕಿಲಿವಾ ವರಕ್ಹು ರ‍್ಹೌ. ತಿನಾ ಮ್ಹೊಡಾವೊ ಆಮನಾ ಸಾಮನಾ ಥೈನ ಕೃಪಾಸನೆ ದೆಕ್ತಾ ರ‍್ಹೌ. 21 ತೆ ಕೃಪಾಸನೆ ಮಂಜುಶನಾ ಉಪ್ಪರ ಮ್ಹೆಲು. ಮಿ ತ್ಯುನೆ ದಿವಾನಾ ಆಜ್ಞಾನಾ ಶಾಸನೊನೆ ತೆ ಮಂಜುಷನಾ ಮ್ಹೈ ಮ್ಹೆಲು.