ಯಹೊವಾ ತಿನಾ ಮನಕ್ಹೊನಾ ಕ್ಹಾತೆ ರ‍್ಹೌಸ ಕೈನ ವಾಗ್ದಾನ ಕರಲ
12 ಮೊಶೆ ಯಹೊವಾನೆ, "ಎ ಮನಕ್ಹೊನೆ ಅಗೊ ಚ಼ಲೌ ಕೈನ ತು ಮನೆ ಕದ್ಯೊಸ. ತೆನೈಸೊ ಮಾರಾ ಕ್ಹಾತೆ ಕಿನೆ ವಳಾಶಿ ಕೈನ ತು ಕದ್ಯೊ ನೈ. ತು ಮನೆ, ‘ಮಿ ತುಮೆ ಚೊಕಿ ತರಾ ತಿಳ್ದಿಲಿದ್ಯೊಸ. ಮಿ ತುನೆ ಮೆಚ್ಯೊಸ’ ಕೈನ ಕದ್ಯೊಸ. 13 ಮಿ ತುನೆ ಕ್ಹರಿಮಾಜ಼ ಮೆಚ್ಚಿಸಾನೊ ರ‍್ಹೌ ಕದ್ಯಾಮ, ಮಿ ತುನೆ ತಿಳ್ದಿಲಿಯೆ ಲಿಂಗತ ಮಾರಿ ವಾಟ ಮನೆ ಶಿಕ್ಲಾ. ತೆಳಾಮಾ ಮಿ ತುೆ ಕೆಳಾಮಾಬಿ ಮೆಚ್ಚಿಸಾನೆ ಥಾವಸ. ಇವ್ನೆ ಕ್ಹಾರಾ ತಾರಾ ಮನಕ್ಹೊ ವ್ಹೈ ಕೈನ ಶೆಂ ಕರಿಲೆ" ಕೈನ ಮಾಂಗಿಲಿದ್ಯೊ. 14 ಯಹೊವಾ, "ಮಿ ತುಮಾರಾ ಕ್ಹಾತೆ ಔಸ. ಮಿಜ಼ ತುಮೊನೆ ವಿಶ್ರಾಂತಿ ದ್ಯುಸ" ಕೈನ ಉತ್ತರ ದಿದ್ಯೊ. 15 ತೆಳಾಮಾ ಮೊಶೆ ಯಹೊವಾನೆ, "ತು ಹಮಾರಾ ಕ್ಹಾತೆ ನೈ ಆಯೊಮ, ಎ ಜ಼ಗಾತೊ ಹಮೊನೆ ವಳೌ ನಕೊ. 16 ತೆನೈಸೊ ಮನೆಬಿ ಆಂ ಮನಕ್ಹೊನೆಬಿ ತಾರಿ ದಯಾ ಮಳಿಕೈನ ಹಮೆ ತಿಳ್ದಿಲಿವಾನು ಕಿಮ್ಮ? ತು ಹಮಾರಾ ಕ್ಹಾತೆ ಆಯೊಮ, ತೆಳಾಮಾ ಹಮೆ ಎ ಕ್ಹರಿ ತಿಳ್ದಿಲಿಯೆಸ. ತು ಹಮಾರಾ ಕ್ಹಾತೆ ನೈ ಆಯೊಮ, ತೆಳಾಮಾ ಹಮೊನೆಬಿ ದುನಿಯಾಮಾ ರ‍್ಹಯಲ ಬಿಜಾ಼ ಮನಕ್ಹೊನೆಬಿ ಕಯು ವ್ಯತ್ಯಾಸ ನೈ ರ‍್ಹತು" ಕೈನ ಕದ್ಯೊ. 17 ತೆಳಾಮಾ ಯಹೊವಾ ಮೊಶೆನೆ, "ತು ಮಾಂಗಿಲಿವಾನು ದ್ಯುಸ. ಮಿ ತುನೆ ಮೆಚ್ಯೊಸ ಕೈನ ಎ ಕರುಸ. ಮಿ ತುನೆ ಚೊಕಿ ತರಾ ತಿಳ್ದಿಲಿದ್ಯೊಸ" ಕದ್ಯೊ.