ಯಜ್ಞವೆದಿನೆ ತಯ್ಯಾರ ಕರಾನು
1 ತೆ ಯಜ್ಞವೆದಿನೆ ಕಾಟಾವೊನಾ ಝಾಡಕ್ಹು ಕರ್ಯೊ. ತೆ ಪಾಂಚಮಾರ ಲಾಂಬುಬಿ ಪಾಂಚಮಾರ ರುಂದಮಾಬಿ ಚೌಕ ಥೈನ ವ್ಹತ್ತು; ತಿನು ಉಚ್ಚು ತನ್ನ ಮಾರ ಥಯುತು. 2 ತಿನಾ ಚಾರೆ ಮೂಲಾವೊಮಾ ಚಾರ ಶಿಂಗ್ಡಾವೊನೆ ಕರ್ಯೊ; ತೆ ಯಜ್ಞವೆದಿನೆ ಯಕ್ಕ ಥೈನ ವ್ಹತ್ತು. ತೆ ವೆದಿನೆ ತಾಂಬಾನಾ ತಗಡೊ ವರಾಡ್ಯೊ. 3 ವೆದಿನಾ ಕ್ಹಾರಾ ಸಾಮ್ನೊ ಕದ್ಯಾಮ ತಿನಾ ಥಾಳಾ, ಸಲಕಿಯೊ, ಕುಂಡಾ, ಕಾಟಾ ನಿಂಗತ ರ‍್ಹಯಲ ಚಮಚಾ, ಅಗಿಷ್ಟೆ, ಆ ಕ್ಹಾರು ತಾಂಬಾಕ್ಹುಜ ಕರ್ಯೊ. 4 ವೆದಿನೆ ಸಿವ್ವಾನಾ ಕಾಮಕ್ಹು ತಾಂಬಾನಿ ಜಾಳಗಿ ಕರ್ಯೊ.ತೆ ವೆದಿನಾ ಸುತ್ತೆ ರ‍್ಹಯಲ ವೆದಿನಾ ಬುಡತು ವಚ್ಮಾಲಕ್ಕಾ ರ‍್ಹವಾದೆ ಕೈನ ಘಾಲ್ಯೊ. 5 ವೆದಿನೆ ಉಚಾವಾನಾ ಲಾಕ್ಡಿಯೊನೆ ಮಳಾವಾನಾಹುತಿ ಚಾರ ಬಾಂಗ್ಡಿಯೊನೆ ಧವಾಲಗಾಡ್ಯೊ. 6 ವೆದಿನೆ ಉಚಾವಾನಾ ಲಾಕ್ಡಿಯೊನೆ ಕಾಟಾವೊನಾ ಝಾಡಕ್ಹು ಕರಿನ ತಾಂಬಾನಾ ತಗಡೊ ವರಾಡಿನ 7 ತಿನಾ ಬಾಜು಼ಮಾ ರ‍್ಹವಾನಾ ಬಾಂಗ್ಡಿಯೊಮಾ ಮಾಳಾಯೊ. ತೆ ವೆದಿನೆ ಢೊಲ್ಗಾವೊಕ್ಹು ಪೆಟಕಿ ನಿಂಗತ ಕರ್ಯೊ.
ತಾಂಬಾನಿ ಮೊಟಿ ಕುಂಡೊ ಕರಾನು
8 ಕ್ಹುದಾನಾ ದರ್ಶನಾ ಗುಡಾರನಾ ಬಾಕಲಮಾ ಸೆವಾ ಕರ್ತಾ ರ‍್ಹಯಲ ಬಾಕ್ಡಿಯೊ ದಿದಲ ತಾಂಬಾನಾ ಅರ್ಕಾಕ್ಹು ಥಾಳಾನೆ ತಿನಾ ಪಿಠನೆ ಕರ್ಯೊ.
ಯಹೊವಾನಿ ಸನ್ನಿದಿಮಾ ಗುಡಾರನು ಆವರಣ
9 ಗುಡಾರನಾ ಅಂಗಳನೆ ಕರ್ಯೊ. ತೆ ಅಂಗಳನಾ ತ್ಯಾ ರ‍್ಹಯಲ ತೆರೆ ಹುರಿನಾರಿನಾ ಪಡ್ಕಾವೊಕ್ಹು ಉಂಟ ಥಯಲ ಕ್ಹೊಮಾರ ಲಾಂಬಾ ಥಯಲ ವ್ಹತ್ತಾ. 10 ತೆ ಜ಼ಗಾಕನ ಇಕ್ಹ ಕ್ಹಂಬಾವೊ ತಿನೆ ಇಕ್ಹ ತಾಂಬಾನಾ ಗದಗಿನಾ ದಗ್ಡಾ ವ್ಹತ್ತಾ; ಕ್ಹಂಬಾವೊನಾ ಕೊಂಡಿಯೊ ಕಟ್ಟಾವೊ ರುಪ್ಪಾನಾ ವ್ಹೈ. 11 ಉತ್ತರಮಾಬಿ ಕ್ಹೊಮಾರ ಲಾಂಬಾ ಥಯಲ ಪಡ್ಕಾ ಇಕ್ಹ ಕ್ಹಂಬಾ ಇಕ್ಹ ತಾಂಬಾನಾ ಗದಗಿನಾ ದಗ್ಡಾ ವ್ಹತ್ತಾ; ಕ್ಹಂಬಾವೊನಾ ಕೊಂಡಿಯೊ ಕಟ್ಟವೊ ತಾಂಬಾನಾ ವ್ಹೈ. 12 ಪಶ್ಚಿಮಾ ಐವತ್ತಮಾರ ಉಚ್ಚು ರ‍್ಹಯಲ ಪಡ್ಕು ದಕ್ಹ ಕ್ಹಂಬಾವೊ ದಕ್ಹ ಗದಗಿನಾ ದಗ್ಡಾ ವ್ಹತ್ತಾ; ಕ್ಹಂಬಾವೊನಾ ಕೊಂಡಿಯೊ ಕಟ್ಟವೊ ರುಪ್ಪನಾ ವ್ಹೈ 13 ಪೂರ್ವ ದಿಕ್ಕಮಾಬಿ ಅಂಗಳನು ರುಂದ ಐವತ್ತಮಾರ ವ್ಹತ್ತು. 14 ತ್ಯಾ ಬಾಕಲನಾ ಭಂಬಿ ಜ಼ಗಾವೊಮಾ ಪಂದ್ರಾ ಮಾರ ಲಾಂಬು ರ‍್ಹಯಲ ಪಡ್ಕು ತಿನೆ 15 ತನ್ನ ತನ್ನ ಕ್ಹಂಬಾ ತನ್ನ ತನ್ನ ಗದಗಿನಾ ದಗ್ಡಾ ವ್ಹತ್ತಾ. 16 ಅಂಗಳನಾ ಸುತ್ತೆಬಿ ರ‍್ಹಯಲ ಪಡ್ಕಾಕ್ಹಾರಾ ಹುರಿನಾರಿನಾ ವಣ್ಣಾ; 17 ಕ್ಹಂಬನಾ ಗದಗಿನಾ ದಗ್ಡಾ ತಾಂಬಾನಾ ವ್ಹೈ; ಕ್ಹಂಬಾನಾ ಕೊಂಡಿಯೊ ಕಟ್ಟೊ ತಾಂಬಾನಾ ವ್ಹೈ; ತಿನಾ ಬೊದಿವೊ ರುಪ್ಪಾನಾ ತಗಡೊಕ್ಹು ವರಾಡ್ಯಾ. ಅಂಗಳನಾ ಕ್ಹಾರಾ ಕ್ಹಂಬಾವೊ ರುಪ್ಪನಾ ಕಟ್ಟೊ ವ್ಹತ್ತಾ. 18 ಅಂಗಳನಾ ಬಾಕಲಮಾ ರ‍್ಹಯಲ ಪಡ್ದೊ ಹುರಿನಾರಿನಾ ಪಡ್ಕಾಕ್ಹುಬಿ ನಿಲಿ ಧ್ರುಮ ರಗತನಾ ದೊರಾಕ್ಹು ಬುಟೆದಾರಿ ಕಾಮವಾಲಾವೊನಾ ಹತ್ತಕ್ಹು ತಯ್ಯಾರ ಥಯು. ತಿನು ಉಚ್ಚು ಇಕ್ಹಮಾರ ಥಯುತು. ತಿನು ರುಂದಮಾಬಿ ಅಂಗಳನಾ ಉಗ್ರಲ ಪಡ್ಕಾನಿಂಗತ ಪಾಂಚಮಾರ. 19 ಬಾಕಲನೆ ಚಾರ ಕ್ಹಂಬಾವೊ ಚಾರ ತಾಂಬಾನಾ ಗದಗಿನಾ ದಗ್ಡಾ ವ್ಹತ್ತಾ; ಕ್ಹಂಬಾವೊನಿ ಕೊಂಡಿಯೊ ಕಟ್ಟೊ ಬೊದಿಗೆನೆ ವರಾಡಲ ತಗಡೊ ರುಪ್ಪಾನಾ ವ್ಹೈ. 20 ಗುಡಾರನಾ ಗುಟೊ ಅಂಗಳನಾ ಗುಟೊ ಕ್ಹಾರಾ ತಾಂಬಾನಾ ವ್ಹೈ.
ಗುಡಾರ ತಯ್ಯಾರ ಕರಾನೆ ಉಪಯೊಗ ಕರಲ ಲ್ಹೊಡಾ
21 ಕ್ಹುದಾನಾ ದರ್ಶನಾ ಗುಡಾರನೆ ಕರಾನೆ ಉಪಯೊಗ ಥಯಲ ಸಮ್ನೊನ ಲಕ್ಕಾ ಮೊಶೆನಾ ಆಗನ್ಯಾಹುತಿ ಮ್ಹೊಟೊ ಯಾಜಕ ಥಯಲ ಆರೊನೊ ದಿಕ್ರೊ ಇತಮಾರ ಲೆವಿವಾಲೊವೊಕ್ಹು ಲೆಕ್ಕಾ ಕರಾಲಗಾಡ್ಯೊ. 22 ಯಹೊವಾ ಮೊಶೆನೆ ಅಗನ್ಯಕರಲಕ್ಹಾರು ಕರಲವಾಲಾ ಕುನ್ನ ಕುನ್ನ ವ್ಹೈ ಕದ್ಯಾಮ ಯಹುದ ಕುಲನಾ ಹುರನೊ ನಾತ್ನೊ ಉರಿಯನೊ ದಕ್ರೊ ಥಯಲ ಬೆಚಲನ; 23 ತಿನಾ ಕ್ಹಾತೆ ದಾನ ಕುಲನೊ ಅಹಿಸಾಮಾಕನೊ ದಿಕ್ರೊ ಥಯಲ ಒಹೊಲಿಯಾಬ ಶೆರ್ಯೊತೊ; ಆ ಚೊಕಿ ವಿದ್ಯಾ ವಾಲೊ ವ್ಹೈ ಅಜಬ ಕಜಬ ಥಯಲ ಕಾಮೊನೆ ಯೊಚನೆ ಕರಅಲೊ ನಾರಿನ ಪಡ್ಕಾಮಾಜ ನಿ ಧ್ರುೂಮ ರಗತ ನಿಂಗತ ನೂಲಕ್ಹು ಬುಟೆದಾರಿ ಕಾಮಕರಾಲೊಬಿ ಥಯೊತೊ. 24 ಕ್ಹುದಾನಿ ಮಂದಿರಮಾ ಬಿಜಾ಼ಬಿಜಾ಼ ಕಾಮೊಮಾ ಉಪಯೊಗ ಕರಲ ಕಾಣಿಕೆನಾ ಕ್ಹೊನಾನಾ ಕ್ಹುದಾನಾ ಸೆವೆನೆ ನೆಮಕ ಥಯಲ ಶೆಕೆಲನಾಹುತಿ ಇಕ್ಹಪರ ನೌ ತಲಾಂತ ಕ್ಹಾತಕೊನ ಮೂವತ್ತ ಶೆಕೆಲ. 25 ರುಪ್ಪಾನು ಲೆಕ್ಕಾ ಲೆಕ್ಕಾಕರಲವಾಲಾವೊನಾ ಇಕ್ಹ ವರಕ್ಹವಾಲಾ ಹೆಚ್ಕಿ ವೈಸ ರ‍್ಹಯಲವಾಲಾ ರುಪಾಯಿನಾಹುತಿ ಯಕ್ಕ ಯಕ್ಕ ಚಾ಼ಯೆ ಕದ್ಯಾಮ ಅರ್ದಿ ಅರ್ದಿ ರುಪಾಯಿ ಕಪ್ಪನೆ ದಿವಾನು ರ‍್ಹಯಲಕ್ಹು 26 ಸಮೂಹಮಾ ಲೆಕ್ಕಾ ಕರಲ ಅಕ್ಲಾ ಛೆಲಾಕ ತನ್ನ ಹಜಾ಼ರ ಪಾಂಚಕ್ಹೊನ ಐವತ್ತ ಮನಕ್ಹೊ ಉಸುಲ ಥಯಲ ಕ್ಹೊ ತಲಾಂತ ಯಕ್ಕಹಜಾ಼ರ ಕ್ಹಾತಕ್ಹೊನ ಸತ್ತರಪಾಂಚ ಶೆಕೆಲ. 27 ಕ್ಹುದಾನಾ ಮಂದಿರನಾ ಗದಗಿನಾ ದಗ್ಡಾವೊನೆ ಧವಾವೊಮಾ ಯಕ್ಕ ಯಕ್ಕ ಗದಗಿನಾ ದಗ್ಡಾನೆ ಯಕ್ಕ ಯಕ್ಕ ತಲಾಂತನಾ ನಿಂಗತ ಕ್ಹೊ ತಲಾಂತ ರುಪ್ಪು ವ್ಹೈ. 28 ಉಗ್ರಲ ಯಕ್ಕ ಹಜಾ಼ರ ಕ್ಹಾತಕ್ಹೊನಾ ಸತ್ತರ ಪಾಂಚ ತೊಲಾಕ್ಹು ಕ್ಹಂಬಾವೊನೆ ಕೊಂಡಿಯೊನೆ ಕಟ್ಟೊನೆ ಕರಿನ ತಿನಾ ಬೊದಿಗೆನೆ ತಗ್ಡೊ ವರಾಡ್ಯಾ. 29 ಮನಕ್ಹೊ ಕಾಣಿಕೆ ದಿದಲ ತಾಂಬಾನೊ ಲೆಕ್ಕೊ ಸತ್ತರ ತಲಾಂತ ಬೆಹಜಾ಼ರ ಚಾರಕ್ಹೊ ಶೆಕೆಲ. 30 ಇನಾಕ್ಹು ಕ್ಹುದಾನಿ ದರ್ಶನಿ ಗುಡರನಾ ಬಾಕಲನಾ ಗದಗಿನಾ ದಗ್ಡಾವೊನೆ ತಾಂಬಾನಿ ಯಜ್ಞವೆದಿನೆ ತಿನಾ ತಾಂಬಾನಿ ಜಾಳಗಿನೆ 31 ಯಜ್ಞವೆದಿನಾ ಕ್ಹಾರಾ ಸಾಮ್ನೊನೆ ಅಂಗಳನಾ ಸುತ್ತೆ ರ‍್ಹಯಲ ಗದಗಿನಾ ದಗ್ಡಾವೊನೆ ಅಂಗಳನಾ ಬಾಕಲನಾ ಗದಗಿನಾ ದಗ್ಡಾವೊನೆ ಗುಡಾರನಾ ವರಿ ಅಂಗಳನಾ ಕ್ಹಾರಾ ಗುಟೊನೆ ಕರ್ಯೊ.