ಯಹೊವಾನಿ ಸನ್ನಿದಿಮಾ ಗುಡಾರ ಹುಬ್ರಾಡಿನ ನೆಮ್ಸಾನು
1 ಪಾಚ಼ಲ್ತೊ ಯಹೊವಾ ಮೊಶೆನೆ, 2 "ಪಸ್ಟಾನಾ ಮ್ಹೈನಾನಾ ಪಸ್ಟನಾ ದಿನ್ನಮಾ ದೆವದರ್ಶನ ಗುಡಾರ ಥಯಲ ಗುಡಾರನೆ ಉಟಾಡಿನ ಹುಬ್ರಾಡ. 3 ಗುಡಾರಮಾ ದಕ್ಹ ಆಗನ್ಯಾ ರ‍್ಹಯಲ ಒಡಂಬಡಿನಿ ಪೆಟಗಿ ಮ್ಹೆಲ. ಪೆಟಗಿನೆ ಪಡ್ದಾಕ್ಹು ಝಾಕಾಲಗಾಡ. 4 ಪಾಚ಼ಲ್ತೊ ಟೆಬಲನಾ ಮ್ಹೈ ಮಂಗೈನ ಟೆಬಲಪರ ರ‍್ಹವಾನಾ ಸಾಮನೊ ತಿನಾ ಉಪ್ಪರ ಮ್ಹೆಲಾ ಲಗಾಡ. ದಿವ್ವಾನಾ ಖಂಬಾನೆ ಗುಡಾರಮಾ ಮ್ಹೆಲ. ದಿವ್ವಾನಾ ಖಂಬಾಮಾ ಕರೆಟ್ಟ ಜ಼ಗಾವೊಮಾ ಸಮೈಯ್ಯೊ ಮ್ಹೆಲಾಲಗಾಡ. 5 ಗುಡಾರಮಾ ಧವಾಂಡೊ ಘಾಲಾನೆ ಕ್ಹೊನಾನಿ ವೆದಿಕೆ ಮ್ಹೆಲ. ವೆದಿಕೆನೆ ಒಡಂಬಡಿಕೆನಾ ಪೆಟಗಿನಾ ಕ್ಹಾಮೊ ಮ್ಹೆಲಾಲಗಾಡ. ಪಾಚ಼ಲ್ತೊ ಗುಡಾರನಾ ಕ್ಹಾಮಲಿ ವಾಟಮಾ ಪಡ್ದೊ ಘಲಾ. 6 "ದೆವದರ್ಶನ ಗುಡಾರ ಥಯಲ ಗುಡಾರನಾ ಮ್ಹೈ ಜಾ಼ವಾನಾ ವಾಟನಾ ಕ್ಹಾಮೊ ಬಲಿನೊ ಕಟ್ಟೊ ಮ್ಹೆಲಾಲಗಾಡ. 7 ದೆವದರ್ಶನಾ ಗುಡಾರನೆ ವರಿ ಬಲಿನಾ ಕಟ್ಟಾನಾ ವಚ್ಮಾ ಥಾಳೊ ಮ್ಹೆಲಿನ ತಿಮಾ ಪಾನಿ ಭರೌ. 8 ಅಂಗಳನಾ ಸುತ್ತೆಬಿ ಆವರಣನೆ ಹುಬ್ರಾಡಿನ ಅಂಗಳನಾ ಬಾಕಲನೆ ಪಡ್ದಾನೆ ಜೊತಾ ಲಗಾಡು.
9 ತೆಳಾಮಾ ಅಭಿಷೆಕನಾ ತೆಲನೆ ಲಿನ ಗುಡಾರನೆಬಿ ತಿಮಾ ರ‍್ಹವಾನು ಕ್ಹಾರುಜ಼ ತಿನಾ ಕ್ಹಾರಾ ಸಾಮ್ನೊನೆ ಅಭಿಷೆಕ ಕರು; ತೆಳಾಮಾ ತೆ ಪರಿಶುಧ್ಧ ಥಾವಸ. 10 ಬಲಿನಾ ಕಟ್ಟಾನೆ ತಿನಾ ಸಾಮ್ನೊನೆ ಅಭಿಷೆಕ ಕರಿನ ಬಲಿನಾ ಕಟ್ಟಾನೆ ಪ್ರತಿಷ್ಟಿ ಕರು; ತೆ ಬಲಿನೊ ಕಟ್ಟೊ ಚೊಕಿತರಾ ಪರಿಶುದ್ದ ಥಯಲ ರ‍್ಹೌ. 11 ಥಾಳಾನೆ ವರಿ ತಿನಾ ಪಿಠನೆ ಅಬಿಷೆಕ ಕರಿನ ಪ್ರತಿಷ್ಟಾ ಕರು.
12 ತೆನೈಸೊ ಆರೊನನೆ ತಿನಾ ಬಚ್ಚಾ಼ವೊನೆ ದೆವದರ್ಶನಾ ಗುಡಾರನಾ ಬಾಕಲನಾ ಕ್ಹಾಮೊ ಬಲೈನ ತ್ಯುನೊನೆ ಅಂಗ ಧವಾಲಗಾಡಿನ 13 ಆರೊನ ಮನೆ ಯಾಜಕ ಥಾವಸ ಕೈನ ತಿನೆ ತೆ ವಣ್ಣಾ ಘಾಲಿನ ತಿನೆ ಅಭಿಷೆಕ ಕರಿನ ಸರ್ಮಪಣೆ ಕರು. 14 ಪಾಚ಼ಲ್ತೊ ತು ತಿನಾ ಬಚ್ಚಾ಼ವೊನೆ ಆವಾಲಗಾಡಿನ ತ್ಯುನೊನೆ ಅಂಗ್ಡಾವೊ ಘಾಲಿನ 15 ತ್ಯುನೆ ಮಾರಾಹುತಿ ಯಾಜಕೊ ಥಾವಾನಾಹುತಿ ತಉ ತಿನಾಬಾನೆ ಕಿಮ್ಮ ಅಭಿಷೆಕ ಕರ್ಯೊ ತೊ ತ್ಯುನೊನೆಬಿ ತಿಮ್ಮ ಅಭಿಷೆಕ ಕರು. ಆ ಅಬಿಷೆಕಕ್ಹು ಯಾಜಕತ್ವಬಿ ತ್ಯುನೊನೆಬಿ ತ್ಯುನಾ ಸಂತತಿವಾಲಾವೊನೆಬಿ ಶಾಶ್ವತ ಥಾವಾಸ ಕೈನ ಕದ್ಯೊ. 16 ಯಹೊವಾ ಆಗನ್ಯಾ ದಿದಲ ನಿಂಗತಜ಼಼ ಮೊಶೆ ಕ್ಹಾರುಜ಼ ಕರ್ಯೊ.
17 ಬೆವಾ ವರಕ್ಹನಾ ಪಸ್ಟ ಮ್ಹೈನಾನಾ ಪಸ್ಟ ದಿನ್ನಮಾ ಮೊಶೆ ಗುಡಾರನೆ ಉಚೈನ ಹುಬ್ರಾಡ್ಯೊ. 18 ತೆ ಗುಡಾರನೆ ಉಚೈನ ತಿನಾ ಗದಗಿನಾ ದಗ್ಡಾವೊನೆ ಘಾಲಿನ ಚೌಕಟೊ ಹುಬ್ರಾಡಿನ ಅಗಳಿಯೊ ದಿನ ಕ್ಹಂಬಾವೊನೆ ಹುಬ್ರಾಡ್ಯೊ. 19 ಗುಡಾರನಾ ಉಪ್ಪರ ಪಡ್ಕು ವೈಚ್ಚೈನ ತೆ ಪಡ್ಕಾನೆ ಉಪ್ಪರಲಿ ಜ಼ಗಾಕನ ಸಿವನ ಘಾಲ್ಯೊ. ಯಹೊವಾ ಆಗನ್ಯಾ ದಿದಲ ನಿಂಗತಜ಼಼ ಮೊಶೆ ತೆ ಕ್ಹಾರುಜ಼ ಕರ್ಯೊ. 20 ತೆ ಆಜ್ಞಾ ಶಾಸನೊನೆ ಮಜುಷಮಾ ಮ್ಹೆಲಿನ ಮಂಜುಶನೆ ಲಾಕ್ಡಿಯೊ ದಿನ ತಿನಾ ಉಪ್ಪರ ಬೈಟಾನು ಆಸನ ಮ್ಹೆಲಿನ 21 ಮಂಜುಷನೆ ಗುಡಾರನಾ ಮ್ಹೈ ಲೈನ ತಿನಾ ಕ್ಹಾಮೊ ಪರ್ದಾ ತುಗ ಘಾಲಿನ ಯಹೊವಾ ಆಗನ್ಯಾ ದಿದಲ ನಿಂಗತಜ಼಼ ಆಜ್ಞಾ ಶಾಸನೊನಾ ಮಂಜುಷನೆ ಗಾಯಬ ಕರ್ಯೊ. 22 ತೆನೈಸೊ ಯಹೊವಾ ಆಗನ್ಯಾ ದಿದಲ ನಿಂಗತಜ಼಼ ಮೊಶೆ ದೆವದರ್ಶನಾ ಗುಡಾರನಾ ಮ್ಹೈ ಉತ್ತರಮಾಬಿ ತೆರೆನಾ ಭಾರೊ ಟೆಬಲ ಮ್ಹೆಲಿನ 23 ತಿನಾ ಉಪ್ಪರಯಹೊವಾ ಮೊಶೆ ಆಗನ್ಯಾ ದಿದಲ ತಿಮ್ಮ ಯಹೊವಾನಿ ಸನ್ನಿದಿಮಾ ಟೆಬಲಪರ ರೊಕ್ಲಾವೊನೆ ಮ್ಹೆಲ್ಯೊ. 24 ವರಿ ತೆ ದಿಪಸ್ತಂಬನೆ ದೆವ ದರ್ಶನಾ ಗುಡಾರನಾ ಮ್ಹೈ ಟೆಬಲನಾ ಕ್ಹಾಮೊ ಗುಡಾರನಾ ದಕ್ಷಿಣಮಾ ಮ್ಹೆಲಿನ 25 ಯಹೊವಾ ಆಗನ್ಯಾ ದಿದಲ ನಿಂಗತಜ಼಼ ತಿನಾ ಸಮಯೊನೆ ಯಹೊವಾನಾ ಸನ್ನಿದಿಮಾ ಮ್ಹೆಲ್ಯೊ. 26 ವರಿ ಕ್ಹೊನಾನಿ ಉದನೊ ಧುವಾಂಡೊ ದಿವಾನೊ ಕಟ್ಟಾನೆ ದೆವದರ್ಶನಾ ಗುಡಾರಮಾ ಬಾಕಲನಾ ಕ್ಹಾಮಾ ಮ್ಹೆಲಿನ 27 ಯಹೊವಾ ಆಗನ್ಯಾ ದಿದಲ ನಿಂಗತ ತಿನಾ ಉಪ್ಪರ ಚೊಕಿ ಬಾಸನು ದ್ರವ್ಯನಾ ಉದನೆ ಘಾಲ್ಯೊ. 28 ವರಿ ಮೊಶೆ ಗುಡಾರನಾ ಬಾಕಲನೆ ಪಡ್ದೊ ಘಾಲ್ಯೊ. 29 ಯಹೊವಾ ಆಗನ್ಯಾ ದಿದಲ ನಿಂಗತ ದೆವದರ್ಶನಾ ಗುಡಾರನಾ ಬಾಕಲನಾ ಕ್ಹಾಮೊ ಯಜ್ಞವೆದಿ ಮ್ಹೆಲಿನ ತಿನಾ ಉಪ್ಪರ ಸರ್ವಾಂಗ ಹೊಮ ಧಾನ್ಯ ಸಮರ್ಪಣೆನೆ ಕರ್ಯೊ. 30 ಮೊಶೆ ದೆವದರ್ಶನಾ ಗುಡಾರನೆಬಿ ಬಲಿನಾ ಕಟ್ಟಾನಾಬಿ ವಚ್ಮಾ ಥಾಳಾನೆ ತ್ಯಾ ಮ್ಹೆಲಿನ ಧ್ಯಲಿ ಲಿವಾನಾಹುತಿ ತಿಮಾ ಪಾನಿ ಭರಾಯೊ. 31 ತಿಮಾ ಮೊಶೆ ಆರೊನನ ತಿನಾ ಬಚ್ಚಾ ಹತೊ ಪಗೊ ಧ್ಯಲೆತಾತಾ. 32 ಯಹೊವಾ ಆಗನ್ಯಾ ದಿದಲ ನಿಂಗತ ದೆವದರ್ಶನಾ ಗುಡಾರಾನಾ ಮ್ಹೈ ಜಾ಼ತಾ ಟೈಮಾ ಯಜ್ಞವೆದಿನಾ ಸೆವೆನೆಬಿ ಆತಾಮಾ ಹತೊ ಪಗೊನೆ ಧ್ಯಲೆತಾತಾ. 33 ಗುಡಾರನೆಬಿ ಯಜ್ಞವೆದಿನಾಬಿ ಸುತ್ತೆಬಿ ಅಂಗಳನಾ ಕ್ಹಂಬಾ ಉಚೈನ ಹುಬ್ರಾಡಿನ ಅಂಗಳನಾ ಬಾಕಲನೆ ಪಡ್ದೊ ಘಾಲ್ಯೊ. ಅಮ್ಮ ಮೊಶೆ ತೆ ಕಾಮ ಕ್ಹಾರು ಮುಗ್ಸಾಯೊ.
ಯಹೊವಾನಿ ಸನ್ನಿದಿಮಾ ಗುಡಾರನಾ ಉಪ್ಪರ ಮ್ಹಾಡ ಝಾಕಿ ಪಡ್ಯುತು
34 ತೆ ಮ್ಹಾಡ ದೆವದರ್ಶನು ಗುಡಾರನೆ ಝಾಕಿಪಡ್ಯುತು; ಯಹೊವಾನೂ ಮಹಿಮಾ ಗುಡಾರಮಾ ಭರಿಗಯುತು. 35 ಮ್ಹಾಡ ದೆವದರ್ಶನಾ ಗುಡಾರನಾ ಉಪ್ಪರ ಬಾಜು಼ ರ‍್ಹಯಲಕ್ಹು ಯಹೊವಾನು ಮಹಿಮಾ ಗುಡಾರನಾ ಮ್ಹೈ ಭರಲಕ್ಹು ಮೊಶೆ ಗುಡಾರಮಾ ಗಯೆವಾಚಿಜ ವ್ಹತ್ತೊ. 36 ತೆ ಮ್ಹಾಡ ಗುಡಾರನೆ ಛೊಡಿನ ಉಪ್ಪರ ಗಯಲ್ಪರ ಇಸ್ರಾಯೆಲೊ ಕ್ಹಾಮಾ ಪ್ರಯಾಣ ಕರಸ; 37 ತೆ ಮ್ಹಾಡ ನೈಜ ಛೊಡ್ತಾಮಾ ತೆ ಛೊಡೆಲಕ್ಕಾ ಪ್ರಯಾಣ ಕರೆವಾಚಿ ರ‍್ಹವಸ. 38 ಇಸ್ರಾಯೆಲೊನಾ ಕ್ಹಾರಾ ಪ್ರಯಾಣಮಾಬಿ ತ್ಯುನಾ ಡೊಳಾ ಕ್ಹಾಮೊ ದಿನ್ನನಾ ಟೈಮೆ ಯಹೊವಾನಿ ಮ್ಹಾಡ ಗುಡಾರನಾ ಉಪ್ಪರ ವ್ಹತ್ತು; ರಾತನಾ ಟೈಮಾ ತೆ ಮ್ಹಾಡಮಾ ಆಗ ಲಾಗಲ ರ‍್ಹತಿತಿ.