JOANI 9

Jesu aa oza unkosi naga zaligwa no buofwu

1 Jesu aa kajenda, kale ga bona unkosi naga zaligwa no buofu. 2 Abazigigwa bakwe kale bamu buza buti, "Muzigi, cibi cani, naca leta buti joju unkosi azaligwe nali ciofu? Cakwe kampa ca bazazi bakwe?"

3 Jesu kale ataba buti, "Tali neje joju unkosi naa tenda icibi kampa bazazi bakwe, kono naa zaligwa nali ciofwu buti imisebezi ja Nyambe ji bonaale aa jisebeza kwakwe. 4 Tuli botele uku beleka imisebezi jakwe ja jojo uju naa ni tuma, aano kusili kamwi. Amasiku gala keza ku muntu gense aa tana beleke. 5 Aano ni sikele mwilonga, nime tuba lye longa lyonse."

6 Aa salamani ku gamba bobo, Jesu kale asuwila ansi, mi kale akanda itapa komate gakwe. Mi kale alisinga mu mensho go nkosi go ciofu. 7 Jesu kale atyo kwakwe buti, "Ujende, uka shambe mukaziba ka Silowami." (Leli ijwi lyasa talusa kutumigwa). Cwale unkosi kale akaja no kashamba, kale abogola ku munzi buwene.

8 Aba kaba joja naje, na babo kaba mubonanga na kumbila, kale ba buza buti, "Tali neje joju unkosi uju kaka langa na kumbila?"

9 Bamwinya kale batyo buti, neje wawa. Kono bamwinya kale batyo buti, "Tali neje bulyo bali kozete." Kono ije wawa kale atyo, "Nime jojo unkosi."

10 Kale batyo kwakwe buti, "Cwale buti na kwa kezela buti amensho gako gatonde?"

11 Kale abetaba buti, "Unkosi akugigwa Jesu, naa kanda itapa no kunisinga mu mensho gangu no kutyo kwangu buti, "Ujende kwa Silowami ukashambe. Mi kale nakaja no kashamba no kutatika kutonda." 12 Kale batyo kwakwe buti, "Kwibo ali jojo unkosi?" Kale abetaba buti, "Tani zekelele."