1 A̱ngui̱nꞌ, nandoꞌ rí ma̱ma̱ñalaꞌ ga̱jma̱á numuu ñajun rí naxnálóꞌ Xu̱u̱ꞌ Ana̱ꞌlóꞌ. 2 Ndu̱ya̱álaꞌ máꞌ rí nákhí xóó na̱nguá wéje̱ a̱kia̱nꞌlaꞌ ná inuu Jesús, ni̱ni̱ꞌñá-mijnálaꞌ rí ma̱ꞌga jiꞌdáanꞌlaꞌ ná tsu̱du̱ún tsí ra̱ꞌkháa Ana̱ꞌlóꞌ ñajúún, tsí na̱nguá ithan. 3 Ikhaa jngó, na̱tha̱nꞌlaꞌ rí asndo nimbáa tsí naꞌthán ga̱jma̱á majñu̱u̱ Xu̱u̱ꞌ Ana̱ꞌlóꞌ, ma̱xáxóo maxná-máꞌáa̱n Jesús. Jamí asndo nimbáa ma̱xáxóo maꞌthán «Jesús ñajuun Táta̱» xí ra̱ꞌkhá ga̱jma̱á majñu̱u̱ Xu̱u̱ꞌ Ana̱ꞌlóꞌ.

4 Ríga̱ mbaꞌa inii ñajun rí ma̱goo mu̱ꞌne̱lóꞌ kajngó mu̱ꞌne̱-mba̱a̱lóꞌ Ana̱ꞌlóꞌ, i̱ndo̱ó máꞌ numuu rí Xu̱u̱ꞌ Ana̱ꞌlóꞌ tsí naxná ne̱, ikhaa̱ máꞌ ñajuu̱n. 5 Xúꞌkhue̱n máꞌ ríga̱ mbaꞌa inii ñajuun Táta̱ rí ma̱goo mu̱ꞌne̱lóꞌ, i̱ndo̱ó máꞌ numuu rí Táta̱, ikhaa̱ máꞌ ñajuu̱n. 6 Jamí ríga̱ mbaꞌa inii ñajun rí ma̱goo mu̱ꞌne̱lóꞌ, i̱ndo̱ó máꞌ numuu rí Ana̱ꞌlóꞌ tsí naꞌne mbá xúgíí ná majña̱ꞌlóꞌ mbá xúgiáanꞌlóꞌ, ikhaa̱ máꞌ ñajuu̱n.

7 Xu̱u̱ꞌ Ana̱ꞌlóꞌ nasngájmuu mbámbáa rí ma̱ꞌne, kajngó mambáñúu̱ tsí i̱ꞌwíin. 8 Mbá tikhuun najanúú rí ma̱ma̱ñúú mu̱ndxákuun eꞌne Xu̱u̱ꞌ Ana̱ꞌlóꞌ. I̱ꞌwíin najanúú muthan rí nafruꞌu̱ún eꞌne ikhaa máꞌ Xu̱u̱ꞌ Ana̱ꞌlóꞌ. 9 I̱ꞌwíin najanúú rí ma̱we̱je̱ guéño a̱kui̱ín ná inuu Ana̱ꞌlóꞌ eꞌne ikhaa máꞌ Xu̱u̱ꞌ Ana̱ꞌlóꞌ. I̱ꞌwíin najanúú rí mune̱-thanúú xa̱bo̱ eꞌne ikhaa máꞌ Xu̱u̱ꞌ Ana̱ꞌlóꞌ. 10 I̱ꞌwíin najanúú rí mune̱ ma̱kujma rí phú wáá. I̱ꞌwíin najanúú rí mu̱rawíjnga̱a ajngóo Ana̱ꞌlóꞌ. I̱ꞌwíin najanúú rí mbuyáá xí gakon rí ajngóo Ana̱ꞌlóꞌ naꞌthán i̱mba̱a̱ꞌ. I̱ꞌwíin najanúú rí muthan ajngáa rí tsígu̱ma-nuwiin. I̱ꞌwíin najanúú rí muthan-wíi ajngáa rí tsígu̱ma-nuwiin. 11 Mbá xúgíí ríge̱ꞌ naꞌne mbáwíi ikhaa máꞌ Xu̱u̱ꞌ Ana̱ꞌlóꞌ, jamí ikhaa̱ naxnúu̱ mbámbáa rí ma̱ꞌne, xómá naꞌne a̱kuii̱n ikhaa̱.

12 Tsí xa̱bo̱ numbaa, maphú mbaꞌa dxájuu xuyuu̱, jamí mbá xúgíí rúꞌkhue̱n kuatun-mina̱ꞌ rí naꞌne mbáwíi xa̱bo̱ ñajuu̱n. Xkuaꞌnii máꞌ jaꞌnii xuyuu Krísto̱ mangaa. 13 Mbá xúgiáanꞌlóꞌ ni̱dríguíilóꞌ ikhaa máꞌ Xu̱u̱ꞌ Ana̱ꞌlóꞌ, kajngó ma̱nindxa̱ꞌlóꞌ mbáwíi xa̱bo̱. Ga̱nindxa̱ꞌlóꞌ xa̱bo̱ judío̱ o ra̱ꞌkháa xa̱bo̱ judío̱ mbo̱ꞌ, ga̱nindxa̱ꞌlóꞌ yumbáá waꞌtsi̱in o xa̱bo̱ tsí nuthan-ñajun-mijná máꞌ ikhiin mbo̱ꞌ. Mbá xúgiáanꞌlóꞌ nijanálóꞌ mbáwíi ikhaa máꞌ Xu̱u̱ꞌ Ana̱ꞌlóꞌ.

14 Rí mbáa xa̱bo̱, ra̱ꞌkhá mbóó rí ñajuun mbá xúgíí xuyuu̱, rí mbaꞌa dxájuu ne̱ kuatun-mina̱ꞌ. 15 Á gáꞌne xí nakhú maꞌthán: «Numuu rí ra̱ꞌkhá ñawún ñajunꞌ, ra̱ꞌkháa xuyuu xa̱bo̱ ñajunꞌ». Á rúꞌkhue̱n iꞌthán rí ra̱ꞌkhá xuyuu xa̱bo̱ ñajuun ne̱ rá dxe̱ꞌ. 16 Á gáꞌne xí ñaꞌwun maꞌthán: «Numuu rí ra̱ꞌkhá idu ñajunꞌ, ra̱ꞌkháa dxájuu xuyuu xa̱bo̱ ñajunꞌ». Á rúꞌkhue̱n iꞌthán rí ra̱ꞌkhá xuyuu xa̱bo̱ ñajuun ne̱ rá dxe̱ꞌ. 17 Xí mbá xúgíi xa̱bo̱ ñajuun idu, ma̱xáxóo madxawuu̱n. Xí mbá xúgíi xa̱bo̱ ñajuun ñaꞌwun, ma̱xáxóo manijñuu̱. 18 Xómáꞌ Ana̱ꞌlóꞌ nigíꞌma mbámbá dxájuu xuyuu xa̱bo̱ ná neꞌne a̱kuii̱n ikhaa̱. 19 Xí mbóó rí ñajuun mbá xúgíi xa̱bo̱, nda̱a̱ máꞌ dxájuu xuyuu xa̱bo̱ rí kuatun-mina̱ꞌ xúꞌkhue̱n rá. 20 Ikhaa jngó, phú mbaꞌa dxájuu xuyuu xa̱bo̱ nawa̱a̱ rí naꞌne mbáa xa̱bo̱ ñajuu̱n.

21 Rí idu ra̱jáꞌyoo maꞌthúun ñawún: «Tsíꞌyóꞌ máꞌ rí ma̱ta̱mbáyúꞌ». Ni máꞌ ede̱ ra̱jáꞌyoo maꞌthúun nakhú: «Tsíꞌyóꞌ máꞌ rí mu̱mbáyúꞌlaꞌ». 22 A̱ꞌkhue̱n gakon, ikhaa dxájuu xuyuu xa̱bo̱ rí phú nda̱a̱ ski̱yu̱u̱ꞌ jaꞌnii, ikhaa ne̱ phú i̱tha̱án ndaꞌyóo. 23 Jamí ikhaa dxájuu xuyuu xa̱bo̱ rí nda̱a̱ guéño máꞌ numuu jaꞌnii, ikhaa ne̱ phú i̱tha̱án máján i̱ña̱wa̱ánlóꞌ. Ikhaa rí ra̱jáꞌyoo ma̱kujma jaꞌnii, ikhaa ne̱ phú i̱tha̱án gíꞌdoo numuu e̱ꞌne̱lóꞌ. 24 Numuu rí tsíꞌyóo máꞌ mu̱ña̱wa̱án guéñalóꞌ dxájuu xuyalóꞌ rí mitsaan máꞌ ikujma. Xkuaꞌnii neꞌne-mújúun Ana̱ꞌlóꞌ xuyalóꞌ, niꞌnii̱ rí i̱tha̱án ma̱xná-gamiéjwanlóꞌ gáꞌne rí nda̱a̱ guéño máꞌ numuu jaꞌnii. 25 A̱ꞌkhue̱n rí ma̱xáxpíꞌthá-mina̱ꞌ xuyuu xa̱bo̱, rí mbá xúgíí dxájuu xuyuu̱ ma̱gi̱ꞌdoo tsiakhe̱ rí mambáyú-mina̱ꞌ. 26 Ikhaa jngó, xí mbá dxájuu xuyuu xa̱bo̱ naꞌkho̱, mbá xúgíi xa̱bo̱ namínu̱u̱ꞌ. Jamí xí mbá dxájuu xuyuu xa̱bo̱ nitiamakuíí, mbá xúgíi xa̱bo̱ nadxu a̱kui̱in.

27 Ikhaa jngó, mbá xúgiáanꞌlaꞌ ñajwanlaꞌ mbá xa̱bi̱i̱ xuyuu Krísto̱, jamí mbámbáa tsí ikháanꞌlaꞌ ñajuun mbáa dxájuu xuyuu̱. 28 Tsíge̱ꞌ ñajúún tsí niꞌgíin Ana̱ꞌlóꞌ ná majñu̱ú tsí nanimbu̱únꞌ juyáá Jesús: Ginii jayu júwa̱ꞌ tsí waxúngui̱inꞌ, rí riajmu̱u̱ tsí nu̱rawíjnga̱a ajngóo Ana̱ꞌlóꞌ, rí riatsú tsí nusngáá, nda̱wa̱á tsí nune̱ rí phú wáá, nda̱wa̱á tsí nune̱-thanúú xa̱bo̱, tsí nu̱mbáyíí, tsí nduya̱ ikhoo ñajun, jamí tsí nuthan ajngáa rí tsígu̱ma-nuwiin. 29 Ra̱ꞌkhá xúgíin ñajúún tsí waxúngui̱inꞌ, ni máꞌ ra̱ꞌkhá xúgíin ñajúún tsí nu̱rawíjnga̱a ajngóo Ana̱ꞌlóꞌ, ni máꞌ ra̱ꞌkhá xúgíin ñajúún tsí nusngáá, ni máꞌ ra̱ꞌkhá xúgíin ene̱ rí phú wáá. 30 Ni máꞌ ra̱ꞌkhá xúgíin guáꞌdáá ñajun rí mune̱-thanúú xa̱bo̱, ni máꞌ ra̱ꞌkhá xúgíin nuthan ajngáa rí tsígu̱ma-nuwiin, ni máꞌ ra̱ꞌkhá xúgíin nuthan-ri̱ya̱aꞌ ajngáa rí tsígu̱ma-nuwiin. 31 Ikhaa jngó, gu̱xna̱-míjnálaꞌ tsiakhe̱ rí ma̱janálaꞌ ñajun rí phú i̱tha̱án gíꞌdoo numuu.

Xómáꞌ ikhúúnꞌ ma̱snga̱jmálaꞌ rí phú i̱tha̱án gíꞌdoo numuu.