1 Coríntios 7

Rí nithúún xa̱bekha jamí go̱ꞌo̱ tsí nida-mijná

1 Xúge̱ꞌ rí ma̱riꞌña̱a graxe̱ rí ni̱ñu̱ꞌlaꞌ ga̱jma̱á majñu̱u̱ i̱yi̱i̱ꞌ rá. Máján máꞌ xí tsínigúún xa̱biya̱. 2 I̱ndo̱ó máꞌ numuu rí phú nubúún xa̱bo̱ gajmíí tsí na̱nguá ndiya̱a̱, ikhaa jngó mbámbáa xa̱biya̱ gági̱ꞌdaa a̱ꞌgui̱i, jamí mbámbáa a̱ꞌgo̱ gági̱ꞌdaa a̱jmbe̱e. 3 Tsí xa̱biya̱ ga̱ꞌne-mbánuu̱ rí nandoo a̱ꞌguii̱, xúꞌkhue̱n máꞌ a̱ꞌgo̱ mangaa, ga̱ꞌne-mbánuu̱ rí nandoo a̱jmbee̱. 4 Numuu rí a̱ꞌgo̱ tsí ninújún ra̱jáꞌyoo̱ ikhaa̱ xuyuu̱, rí a̱jmbee̱ jaꞌyoo ne̱. Ni máꞌ xa̱biya̱ tsí ninigúún ra̱jáꞌyoo̱ ikhaa̱ xuyuu̱, rí a̱ꞌguii̱ jaꞌyoo ne̱. 5 Ikhaa jngó, ma̱xánga̱jwa̱ꞌlaꞌ rí mu̱ne̱-mbánu-mijnálaꞌ rí nandoo xuyalaꞌ, o i̱ndo̱ó máꞌ xí nu̱tha̱n-mijnálaꞌ rí mu̱xúne̱laꞌ rí nandoo xuyalaꞌ mbá wátha̱ wáa mbiꞌi kajngó mu̱tha̱n-jáñíílaꞌ Ana̱ꞌlóꞌ rá mbo̱ꞌ. Gu̱ru̱wa-mijnáalaꞌ mbu̱júꞌ xí ninújngoo máꞌ mbiꞌi rúꞌkhue̱n, ra̱ꞌkhá ma̱ꞌne-rájáanꞌlaꞌ Satanás rí mu̱ne̱laꞌ aꞌkhán ga̱jma̱á numuu rí tsíꞌnga̱ꞌlaꞌ mu̱waꞌthi̱ínlaꞌ mba̱yo̱ꞌ. 6 Mbá ju̱ma̱ jayu ñajuun rí na̱tha̱nlo̱ꞌ, ra̱ꞌkhá máꞌ mbá xtángoo. 7 Rí phú naꞌne a̱kui̱nꞌ ikhúúnꞌ ñajuun rí mbá xúgíin xa̱bekha gánindxu̱ún xómá ikhúúnꞌ. I̱ndo̱ó máꞌ numuu rí mbámbáa nijanáá xómá rí ma̱xtáa̱ neꞌne Ana̱ꞌlóꞌ. Mbá xó nijanáá mbáa, jamí i̱mba̱ xó nijanáá i̱mba̱a̱ꞌ.

8 Xómáꞌ xa̱bo̱ tsí xóó máꞌ tsíni̱gu̱nꞌ jamí go̱ꞌóxuáꞌa rá, na̱thúu̱nlo̱ꞌ ríge̱ꞌ: Maphú máján máꞌ rí ma̱nguanúu̱ xómá ikhúúnꞌ. 9 I̱ndo̱ó máꞌ numuu rí, xí tsíꞌngúu̱n rí mu̱xúbúu̱n gajmíi̱ xa̱bo̱ rá, gu̱ni̱gui̱i̱nꞌ jamí gu̱nu̱jwíi̱n máꞌ xúꞌkhue̱n rá. Numuu rí i̱tha̱án máꞌ máján rí manigúún o manújún xa̱bo̱ xó rí ma̱xáꞌngo̱o̱ gáꞌnii̱ gakhe̱ a̱kuii̱n.

10 Xómáꞌ tsí nida-mijná máꞌ rá, na̱thúu̱nlo̱ꞌ ríge̱ꞌ, (ra̱ꞌkhá máꞌ ikhúúnꞌ i̱tha̱nlo̱ꞌ, rí jmína̱a̱ꞌ máꞌ Táta̱ niꞌthán): Ma̱xániña̱a a̱jmbe̱e a̱ꞌgo̱. 11 Jamí xí naniñaa̱ a̱jmbaa̱ rá, náxánújwíi̱n, o i̱ndo̱ó máꞌ xí nambáxii̱ mbu̱júꞌ ga̱jmáa̱ a̱jmbaa̱ mbo̱ꞌ. Xúꞌkhue̱n máꞌ xa̱biya̱, ma̱xániñaa̱ a̱ꞌguii̱.

12 Xómáꞌ tsí i̱ꞌwíin rá, na̱thúu̱n ríge̱ꞌ (ra̱ꞌkhá máꞌ Táta̱ iꞌthán): Xí mbáa dxájwalóꞌ ꞌgí ga̱jma̱á mbáa a̱ꞌgo̱ tsí tsínimbo̱o̱ꞌ jaꞌyoo Jesukrísto̱, jamí nandoo máꞌ a̱ꞌgo̱ gáxtáa ga̱jma̱á nindxu̱u̱ rá, ma̱xániñaa̱ máꞌ a̱ꞌguii̱. 13 Jamí xí mbáa dxájwalóꞌ a̱ꞌgo̱ ꞌgí ga̱jma̱á mbáa xa̱biya̱ tsí tsínimbo̱o̱ꞌ jaꞌyoo Jesukrísto̱, jamí nandoo máꞌ xa̱biya̱ gáxtáa ga̱jma̱á nindxu̱u̱ rá, ma̱xániñaa̱ máꞌ a̱jmbaa̱. 14 Numuu rí xa̱biya̱ tsí tsínimbo̱o̱ꞌ jaꞌyoo Jesukrísto̱, na̱gu̱ma-tsakun-rámaa̱ ga̱jma̱á numuu a̱ꞌguii̱. Jamí a̱ꞌgo̱ tsí tsínimbo̱o̱ꞌ jaꞌyoo Jesukrísto̱, na̱gu̱ma-tsakun-rámaa̱ ga̱jma̱á numuu a̱jmbaa̱. Xí ra̱ꞌkhá xkuaꞌnii, na̱nguá máꞌ jaꞌwuun i̱jña̱ꞌlaꞌ mangiin xúꞌkhue̱n rá. I̱ndo̱ó máꞌ numuu phú gakon rí Ana̱ꞌlóꞌ gíꞌdii̱n xómá xa̱bii̱.

15 I̱ndo̱ó máꞌ numuu rí, xí xa̱biya̱ o a̱ꞌgo̱ tsí tsínimbo̱o̱ꞌ jaꞌyoo Jesukrísto̱ nandoo gáꞌne-wájí-mina̱ꞌ rá mbo̱ꞌ, ma̱goo máꞌ ma̱ꞌnii̱. A̱ꞌkhue̱n rí nánguá máꞌ iꞌyóo rí ga̱jma̱á tsiakhe̱ ma̱nguanúu dxájwalóꞌ ga̱jma̱á nindxu̱u̱ xúꞌkhue̱n rá, numuu rí Ana̱ꞌlóꞌ nindxaꞌwálóꞌ rí ma̱juwalóꞌ tsímáá. 16 Numuu rí tsiánguá xí ra̱ꞌkhá ga̱jma̱á numaaꞌ ikháánꞌ, nána̱, ma̱jríya̱a̱ꞌ a̱jmba̱aꞌ. Ni máꞌ tsiánguá xí ra̱ꞌkhá ga̱jma̱á numaaꞌ ikháánꞌ, táta̱, ma̱jríya̱a̱ꞌ a̱ꞌgia̱aꞌ.

17 Mbámbáa gáxtáa xómá nijanáá rí ma̱xtáa neꞌne Táta̱, jamí ga̱xtáa̱ xómá jaꞌnii̱ nákhí rí watsaꞌwáa̱ neꞌne Ana̱ꞌlóꞌ. Xkuaꞌnii máꞌ i̱tha̱nlo̱ꞌ rí ma̱gu̱ma ná mbá xúgíí kuthuun tsí nanimbu̱únꞌ juyáá Jesús. 18 Xí mbáa jayá máꞌ tsina jndi nákhí rí watsaꞌwáá, a̱nguanúu̱ máꞌ xkuaꞌnii. Xí mbáa na̱nguá máꞌ xóó jayá tsina jndi nákhí rí watsaꞌwáá, ma̱xáyée̱ máꞌ tsina jndi. 19 Na̱nguá máꞌ gíꞌdoo numuu rí mbayá o ma̱xáyá xa̱bo̱ tsina jndi. Rí phú i̱tha̱án gíꞌdoo numuu ñajuun rí ma̱ꞌne-mbánuu̱ ajngóo Ana̱ꞌlóꞌ. 20 Mbámbáa ánguanúu xómá jaꞌnii nákhí rí watsaꞌwáá neꞌne Ana̱ꞌlóꞌ. 21 Xí yumbáá tsí waꞌtsi̱i̱ ñajwaanꞌ nákhí rí watsaꞌwáaꞌ, ma̱xáxná-gamiéjwaanꞌ. Jamí xí ni̱ga̱nú mbiꞌi rí nandoo ma̱jríñáaꞌ rá, a̱ga̱jnáaꞌ máꞌ. 22 Tsí watsaꞌwáá neꞌne Táta̱ nákhí rí yumbáá tsí waꞌtsi̱i̱ ñajuun, Táta̱ neꞌne-jríya̱a̱ꞌ rí ma̱nindxu̱u̱ xa̱bii̱. Xúꞌkhue̱n máꞌ xa̱bo̱ tsí naꞌthán-ñájun-mina̱ꞌ máꞌ ikhaa nákhí rí watsaꞌwáá, yumbáá tsí waꞌtsi̱i̱ neꞌne Krísto̱ ñajuu̱n rí xúge̱ꞌ rá. 23 Phú tsída̱ꞌ neꞌne-numuu Ana̱ꞌlóꞌ ga̱jma̱á numalaꞌ. Ikhaa jngó, mu̱xúni̱ꞌñá-mijnálaꞌ rí ma̱nindxa̱ꞌlaꞌ yumbáá waꞌtsi̱in drígu̱ún xa̱bo̱ numbaa. 24 A̱ngui̱nꞌ, mbámbáa gáxtáa ná inuu Ana̱ꞌlóꞌ, xómá jaꞌnii̱ nákhí rí watsaꞌwáa̱.

25 Xómáꞌ i̱jín-go̱ꞌo̱ tsí xóó máꞌ túbúún gajmíí xa̱bo̱ rá, nda̱a̱ máꞌ rí nixnángaweꞌ Táta̱ rí ma̱thúu̱nlo̱ꞌ. Xómáꞌ ikhúúnꞌ ma̱tha̱n rí na̱ju̱mu̱ꞌlo̱ꞌ, ga̱jma̱á numuu rí nañáwíin a̱kui̱in Táta̱ e̱ne̱lo̱ꞌ, naꞌnii̱ rí ma̱nindxu̱ꞌ xa̱bo̱ tsí kuwiin. 26 Xáꞌnii i̱ju̱mu̱ꞌ ikhúúnꞌ: Máján máꞌ gáꞌne mbámbáa xí ma̱nguanúu xómá jaꞌnii xúge̱ꞌ, numuu rí phú gakhe̱ ma̱juwalóꞌ rí mbiꞌi xúge̱ꞌ. 27 Xí xa̱bo̱ tsí gíꞌdaa máꞌ a̱ꞌgui̱i ñajwaanꞌ, ma̱xátha̱ꞌgí-mina̱ꞌ máꞌ rí ma̱ta̱tsi̱ꞌñáa a̱ꞌgia̱aꞌ. Xí xa̱bo̱ tsí na̱nguá máꞌ xóó ninigúún ñajwaanꞌ, ma̱xátha̱ꞌgí-mina̱ꞌ máꞌ rí ma̱ta̱tsi̱ꞌgúún. 28 Jamí xí natatsigúún rá, ra̱ꞌkhá máꞌ aꞌkhán ithane̱. Jamí xí nanújún dxáꞌgú rá, ra̱ꞌkhá máꞌ aꞌkhán iꞌnii̱. I̱ndo̱ó máꞌ numuu rí xa̱bo̱ tsí nuda-mijná nune̱-gajmá-mijná guéñúu̱, jamí ikhúúnꞌ tsíyoꞌ rí mu̱gíꞌníílaꞌ rúꞌkhue̱n.

29 A̱ngui̱nꞌ, rí phú nandoꞌ gátha̱nꞌlaꞌ ñajuun ríge̱ꞌ: na̱nguá guáꞌdáálóꞌ mbaꞌa mbiꞌi. Ikhaa jngó, tsí ni̱ni̱gu̱nꞌ máꞌ guni̱i̱ ñajuun Táta̱ asndo xómá rí na̱nguá guáꞌdaa̱ a̱ꞌguíi̱n. 30 Tsí nu̱mbi̱ya̱ꞌ, guni̱i̱ ñajuun Táta̱ asndo xómá rí tsímbi̱ye̱e̱ꞌ. Tsí nadxu a̱kui̱ín, guni̱i̱ ñajuun Táta̱ asndo xómá rí tsídxu a̱kuíi̱n. Tsí nutse̱, guni̱i̱ ñajuun Táta̱ asndo xómá rí nda̱a̱ rí guáꞌdáa̱. 31 Jamí tsí nune̱-gagi a̱kui̱ín ga̱jma̱á rí ríga̱ ná tsu̱du̱u̱ numbaa ríge̱ꞌ, guni̱i̱ ñajuun Táta̱ asndo xómá rí nda̱a̱ numuu ne̱. Numuu rí xómá jaꞌnii numbaa xúge̱ꞌ, ma̱mbáa ne̱.

32 Ikhaa jngó, ikhúúnꞌ nandoꞌ rí mu̱xúxna̱-mijnálaꞌ gaꞌkho̱. Tsí xóó máꞌ tsínigúún naxná-gamiéjuu̱n rí ma̱ꞌnii̱ ñajuun Táta̱, kajngó ma̱ni̱gu̱u̱ꞌ Táta̱ gáꞌnii̱. 33 Xómáꞌ tsí ninigúún máꞌ rá, naxná-gamiéjuu̱n rí ma̱ꞌnii̱ ñajuun numbaa, jamí xáne gáꞌnii̱ rí ma̱ni̱gu̱u̱ꞌ a̱ꞌguii̱ jaꞌyoo̱. 34 Xkuaꞌnii máꞌ mangaa, kriꞌkhu rí naxná-gamiéjuun a̱ꞌgo̱ tsí ninújún máꞌ ga̱jma̱á dxáꞌgú tsí xóó máꞌ tsínújún. Dxáꞌgú tsí xóó máꞌ tsínújún naxná-gamiéjuu̱n rí ma̱ꞌnii̱ ñajuun Táta̱, jamí rí maxnáxe̱-mine̱e̱ꞌ mbá jayu ná ñawúun Ana̱ꞌlóꞌ. Xómáꞌ a̱ꞌgo̱ tsí ninújún máꞌ rá, naxná-gamiéjuu̱n rí ma̱ꞌnii̱ ñajuun numbaa, jamí xáne gáꞌnii̱ rí ma̱ni̱gu̱u̱ꞌ a̱jmbaa̱ jaꞌyoo̱. 35 Ra̱ꞌkhá numuu nandoꞌ gárikhalaꞌ kajngó na̱tha̱nꞌlaꞌ ríge̱ꞌ, rí numuu nandoꞌ ma̱mbáyálaꞌ rí ma̱juwalaꞌ mu̱ne̱ ñajuun Táta̱, jamí nda̱a̱ nitháan rí gáwe̱je̱-ꞌthu̱u̱n rí mu̱ne̱laꞌ rí nandoo̱.

36 Xí mbáa na̱ju̱mu̱u̱ rí jaꞌyoo máꞌ rí ma̱ꞌne-mbánuu mbayáa dxáꞌgú tsí nimbánuu máꞌ rí mbayáa numuu rí nikhi̱i̱ máꞌ rá, ga̱ꞌnii̱ xómá na̱ju̱mu̱u̱ rí ma̱ꞌnii̱. Numuu rí ra̱ꞌkhá máꞌ aꞌkhán ini̱i̱ rí muda-mijnée̱. 37 Jamí xí i̱mba̱a̱ꞌ naꞌne mbá jañii a̱kui̱in, jamí mbáko máꞌ naꞌgí-mina̱ꞌ rí ma̱xáyáa dxáꞌgú tsí wéje̱ máꞌ rí mbayáa, numuu rí na̱ꞌngo̱o̱ máꞌ naꞌnii̱ gakhe̱ a̱kuii̱n, jamí ikhaa̱ máꞌ naꞌthán-ñájun-mine̱e̱ꞌ rá, máján máꞌ eꞌne tsúꞌkhue̱n mangaa. 38 Ikhaa jngó, máján máꞌ eꞌne tsí ndayáa dxáꞌgú tsí wéje̱ máꞌ rí mbayáa, jamí i̱tha̱án máꞌ máján eꞌne tsí na̱nguá iyáa̱.

39 A̱ꞌgo̱ tsí ninújún, xtáa̱ xtoꞌwóo̱ ná inuu xtángoo ga̱jmáa̱ a̱jmbaa̱ awúun mbiꞌi rí xtáa ndaꞌya. Jamí xí nijáñuu a̱jmbaa̱ rá, ma̱goo manújúu̱n ga̱jmáa̱ tsí nandoo̱ máꞌ ikhaa̱, i̱ndo̱ó máꞌ numuu rí ndaꞌyóo rí xa̱bo̱ tsúꞌkhue̱n ma̱nindxu̱u̱ xa̱bi̱i Táta̱ mangaa. 40 Ikhúúnꞌ na̱ju̱mu̱ꞌ rí i̱tha̱án máꞌ gagi gáxtáa̱ xí tsínújúu̱n mbu̱júꞌ. Na̱tha̱nꞌlaꞌ ríge̱ꞌ numuu na̱ju̱mu̱ꞌ rí Xu̱u̱ꞌ Ana̱ꞌlóꞌ jayá ikhoꞌ mangúúnꞌ.