1 Ikhaa jngó, tsíne̱-waba-mijnáxo̱ꞌ, numuu rí ga̱jma̱á majñu̱u̱ rí nañáwíin a̱kui̱in Ana̱ꞌlóꞌ jaꞌyaxo̱ꞌ, nixnángawaxo̱ꞌ rí mu̱ne̱xo̱ꞌ ñajun ríge̱ꞌ. 2 Tsíne̱xo̱ꞌ nimbá ná ngu̱ꞌwa̱ ni máꞌ rí mate̱ꞌ. Na̱nguá e̱ne̱-ku̱maaxo̱ꞌ ajngáa kajngó mu̱ne̱-nduwiinxo̱ꞌ xa̱bo̱, ni máꞌ tsíriꞌkhuííxo̱ꞌ ajngáa rawuun Ana̱ꞌlóꞌ. A̱ꞌkhue̱n gakon, nu̱tha̱nxo̱ꞌ rí gakon, jamí ndaꞌyoo Ana̱ꞌlóꞌ rí xkuaꞌnii máꞌ nu̱xna̱xí-mijnáxo̱ꞌ ná inúú mbá xúgíin xa̱bo̱. 3 Maske máꞌ xkuaꞌnii, xí xóó máꞌ júgoo ajngáa máján rí nu̱tha̱n-ráꞌaxo̱ꞌ, i̱ndo̱ó máꞌ júgoo ne̱ ná inúú tsí nandáti̱gi̱in. 4 Numuu rí gixa̱a̱, tsí naꞌthán-ñájun ná numbaa ríge̱ꞌ, nirugoo̱ inúú xa̱bo̱ tsí tsínimbu̱únꞌ kajngó ma̱xáfruꞌúu̱n, ni máꞌ ma̱xámbiꞌñúu̱ gáꞌne aguu ajngáa máján rí phú wáá drígo̱o̱ Krísto̱, tsí jaꞌnii xómá jaꞌnii jayu Ana̱ꞌlóꞌ. 5 Ído̱ rí nu̱tha̱n-ráꞌaxo̱ꞌ, tsítha̱n-ráꞌaxo̱ꞌ ga̱jma̱á máꞌ numa ikháanꞌxo̱ꞌ, rí nu̱tha̱n-ráꞌaxo̱ꞌ rí Jesukrísto̱ ñajuun Táta̱. Jamí ikháanꞌxo̱ꞌ ñajwanxo̱ꞌ yumbáá tsí nune̱-mba̱ꞌwáanꞌlaꞌ, ga̱jma̱á numuu Jesús. 6 Numuu rí jmína̱a̱ꞌ máꞌ Ana̱ꞌlóꞌ tsí nixná-ñájun nákhí wajyúú rí ga̱ri̱gá agu ná mijína, niꞌnii̱ rí ma̱mbiꞌi aguu̱ ná awúun a̱kia̱nꞌlóꞌ, kajngó ma̱goo mbu̱ꞌyáálóꞌ rí phú wáá rí jaꞌnii Ana̱ꞌlóꞌ ga̱jma̱á majñu̱u̱ rí nduꞌyáálóꞌ inuu Jesukrísto̱.

7 Xómáꞌ Ana̱ꞌlóꞌ nirakhuáa̱ agu rúꞌkhue̱n, rí phú gíꞌdoo numuu, ná awúun daan ju̱ba̱ꞌ, rí ñajwanxo̱ꞌ ikháanꞌxo̱ꞌ. Kajngó ma̱kujma rí Ana̱ꞌlóꞌ ñajuun tsí phú mba̱a̱ ski̱yu̱u̱ꞌ, ra̱ꞌkhá ikháanꞌxo̱ꞌ. 8 Ikhaa jngó, maske máꞌ na̱ꞌkha̱ mbá xúgíí inii gaꞌkho̱ inaxo̱ꞌ, na̱nguá máꞌ eꞌne ma̱mbá ski̱ya̱ꞌxo̱ꞌ. Maske máꞌ phú najmáxo̱ꞌ, na̱nguá máꞌ eꞌne ma̱wabáanꞌxo̱ꞌ. 9 Maske máꞌ nuxkaxo̱ꞌ xa̱bo̱, na̱nguá máꞌ iniñaxo̱ꞌ Ana̱ꞌlóꞌ. Maske máꞌ nangáxáanꞌxo̱ꞌ ene̱ xa̱bo̱, tsíꞌngúu̱n máꞌ gúne̱-gámbáa̱nꞌxo̱ꞌ. 10 Asndo náá máꞌ nakuáxo̱ꞌ, jámba̱ miꞌtsú ngamí ma̱ja̱ñáxo̱ꞌ xómá rí nijáñuu Jesús numuu rí nu̱míni̱íxo̱ꞌ xómá rí nimínu̱u̱ꞌ ikhaa̱, kajngó ma̱kujma mangaa rí Jesús xtáa ndaꞌya ga̱jma̱á majña̱ꞌ ikháanꞌxo̱ꞌ. 11 Numuu rí ikháanꞌxo̱ꞌ tsáanꞌ ndu̱ya̱xo̱ꞌ, jámba̱ miꞌtsú ngamí ma̱ja̱ñáxo̱ꞌ ga̱jma̱á numuu Jesús, kajngó ma̱kujma mangaa rí Jesús xtáa̱ ga̱jma̱á majñu̱u̱ xuyaxo̱ꞌ rí wéje̱ máꞌ rí ma̱ja̱ñúu. 12 Ikhaa jngó, ikháanꞌxo̱ꞌ ngamí ma̱ja̱ñáxo̱ꞌ, jamí rúꞌkhue̱n naꞌne rí ikháanꞌlaꞌ ma̱juwalaꞌ jámuu.

13 Ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Ninimbo̱ꞌ, ikhaa jngó ni̱tha̱nlo̱ꞌ».* Xkuaꞌnii máꞌ mangáanꞌxo̱ꞌ, wéje̱ a̱kia̱nꞌxo̱ꞌ ná inuu Ana̱ꞌlóꞌ, ikhaa jngó nanimba̱ꞌxo̱ꞌ jamí nu̱tha̱nxo̱ꞌ. 14 Numuu rí ndu̱ya̱áxo̱ꞌ rí Ana̱ꞌlóꞌ neꞌne rí mbayáa mbiꞌyuu Táta̱ Jesús, jamí ikhaa̱ máꞌ ma̱ꞌnii̱ rí mbu̱ya̱a mbiꞌyaxo̱ꞌ ikháanꞌxo̱ꞌ mangaa ga̱jma̱á nindxu̱u̱ Jesús, a̱ꞌkhue̱n ma̱ꞌga jaguáa̱nꞌxo̱ꞌ ná inuu̱ máꞌ ikhaa̱ ga̱jma̱á nindxa̱ꞌlaꞌ ikháanꞌlaꞌ. 15 Mbá xúgíí ríge̱ꞌ nu̱gíꞌnííxo̱ꞌ ga̱jma̱á numuu rí mambáyálaꞌ ikháanꞌlaꞌ, kajngó xómá rí na̱ka̱-raꞌne mbaꞌiin tsí na̱gu̱ma-tsakun-rámii eꞌne Ana̱ꞌlóꞌ, xkuaꞌnii máꞌ ma̱ꞌga-raꞌne mbaꞌiin tsí mu̱rígu̱u la gamaku inuu̱, kajngó ma̱gu̱ma-mba̱a̱ Ana̱ꞌlóꞌ.

16 Ikhaa numuu rúꞌkhue̱n, tsíꞌne níꞌnga̱ꞌxo̱ꞌ. Maske na̱ka̱-raꞌne wayuu máꞌ xúꞌkhue̱n xuyaxo̱ꞌ, xómáꞌ a̱kia̱nꞌxo̱ꞌ mbámbá mbiꞌi na̱ka̱-raꞌne nuxi̱iꞌ ne̱. 17 Numuu rí na̱nguá máꞌ gakhe̱ rí nu̱míni̱íxo̱ꞌ ná numbaa ríge̱ꞌ, mbá nanújngoo máꞌ ne̱. I̱ndo̱ó máꞌ numuu rí ikhaa ne̱ ma̱ꞌne rí phú mba̱a̱ jamí jámuu ma̱gi̱ꞌdoo numaxo̱ꞌ nda̱wa̱á. 18 Ikhaa jngó, ikháanꞌxo̱ꞌ tsíya̱xi̱íxo̱ꞌ rí nakujma xúge̱ꞌ, rí nu̱ya̱xi̱íxo̱ꞌ rí tsíkujma. Numuu rí nandoo nduꞌyáálóꞌ, mbégo máꞌ ríga̱ ne̱, xómáꞌ rí tsíkujma mbu̱ꞌyáálóꞌ rá, jámuu ríga̱ ne̱.