Lucas 7

Jesús naꞌne-thanuu yumbée xa̱bo̱ tsí naꞌthán-ñájúún tsí ku̱ra̱tuun ajwa̱nꞌ

1 Ído̱ wámbo̱o̱ Jesús niꞌthúún xa̱bo̱, a̱ꞌkhue̱n ni̱to̱ꞌo̱o̱ ná xuajen Kapernaúm. 2 Ikhín xtáa mbáa xa̱bo̱ tsí naꞌthán-ñájúún tsí ku̱ra̱tuun ajwa̱nꞌ. Mbáa yumbée̱ tsí phú na̱ni̱gu̱u̱ꞌ jaꞌyoo̱, maphú níꞌngo̱o̱ kri̱ga̱a̱ najáñuu̱. 3 Ído̱ rí xa̱bo̱ tsí naꞌthán-ñájúún tsí ku̱ra̱tuun ajwa̱nꞌ nidxawuun rí nuthan xa̱bo̱ ga̱jma̱á numuu Jesús, a̱ꞌkhue̱n nixná-ñájúu̱n mbá tikhuun xa̱bo̱ buanuu judío̱ rí magóo̱ gúthán-jáñíi̱ Jesús rí ma̱ꞌkha̱ gáꞌne-thanuu yumbée̱. 4 Ído̱ niguáꞌnú xa̱bo̱ buanuu tsúꞌkhue̱n inuu Jesús, a̱ꞌkhue̱n rí maphú nithán-jáñíi̱ ga̱jma̱á gamaku. Xáꞌnii nitháa̱n: «Maphú ga̱náꞌyoo rí ma̱ta̱mbáyíí xa̱bo̱ tsí naꞌthán-ñájúún tsí ku̱ra̱tuun ajwa̱nꞌ. 5 Numuu rí nandoo̱ jaꞌñúu̱ xa̱bo̱ xuajñalóꞌ Israél, jamí ikhaa̱ máꞌ nixná-ñájwii̱n rí ma̱gu̱ma guꞌwá ná na̱gi̱mbáanꞌlóꞌ».

6 A̱ꞌkhue̱n ni̱ka̱ Jesús gajmíí xa̱bo̱ tsúꞌkhue̱n. I̱ndo̱ó máꞌ numuu rí ído̱ nangiyuu máꞌ rí ma̱guáꞌníi̱ guꞌwáá, a̱ꞌkhue̱n rí xa̱bo̱ tsí naꞌthán-ñájúún tsí ku̱ra̱tuun ajwa̱nꞌ, nixnángawúu̱n mbá tikhuun iyanga̱jwee̱ rí magóó gútháán Jesús ríge̱ꞌ: «Táta̱, ma̱xára̱xna̱-mína̱ꞌ gaꞌkho̱ ga̱jma̱á numuꞌ, numuu rí na̱nguá jaꞌyoꞌ rí ma̱ta̱ꞌa̱a̱ꞌ ná guꞌwóꞌ. 7 Ikhaa numuu rúꞌkhue̱n, ni máꞌ táꞌngo̱o̱ a̱kui̱nꞌ rí ma̱ꞌgá jmínu̱úꞌ gáya̱a̱ꞌlo̱ꞌ, Táta̱. I̱ndo̱ó máꞌ numuu rí nda̱yo̱o̱ rí mbájndi máꞌ mbóó ajngáa rí ma̱ra̱tha̱n ikháánꞌ, ma̱tha̱ne̱ rí ma̱ꞌni̱i a̱kui̱in yumbéꞌ. 8 Numuu rí xa̱bo̱ tsí nithán-ñájwíín máꞌ ñajunꞌ mangúúnꞌ, jamí gúꞌdiin xa̱bo̱ tsí ku̱ra̱tuun ajwa̱nꞌ tsí na̱tha̱n-ñájúún. Ído̱ na̱thu̱u̱n mbáa rí ma̱ꞌga, na̱ke̱e̱. Ído̱ na̱thu̱u̱n i̱mba̱a̱ꞌ rí ma̱ꞌkha̱, na̱ꞌkhe̱e̱. Jamí ído̱ na̱tha̱n-ñájuun yumbéꞌ rí ma̱ꞌne rí nandoꞌ, naꞌnii̱ ne̱».

9 Ído̱ nidxawuun Jesús ajngáa rí nithan xa̱bo̱ tsúꞌkhue̱n, maphú nimakuu̱. A̱ꞌkhue̱n nitangayii̱ niyaxúu̱n mbá xúgíin xa̱bo̱ tsí nagóó tsu̱du̱u̱, jamí niꞌthúu̱n: «Na̱tha̱nꞌ-jmbalaꞌ rí táxkamaa asndo nimbáa xa̱bo̱ ná numbaa Israél tsí nanimbo̱o̱ꞌ mi̱ndaꞌkho jaꞌyeꞌ xómá xa̱bo̱ tsíge̱ꞌ».

10 Ído̱ nithangi̱in guꞌwáá xa̱bo̱ tsí waxúngui̱inꞌ, a̱ꞌkhue̱n ndiyáa̱ rí niꞌni̱i mbá jayu máꞌ a̱kui̱in yumbáá tsí ndiyóo nandii.*7.10 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa «tsí ndiyóo nandii».

Jesús naꞌne rí mbayáa mbiꞌyuu a̱dée a̱ꞌgóxuáꞌa

11 Nda̱wa̱á a̱ꞌkhue̱n, ni̱ka̱ Jesús ná xuajen rí mbiꞌyuu Naín, ni̱ke̱e̱ gajmíi̱ mbaꞌiin tsí naꞌsngúu̱n, jamí phú mbaꞌiin i̱ꞌwíin xa̱bo̱ nagóó tsu̱du̱u̱. 12 Ído̱ niguáꞌníi̱ ná rawuun xuajen, a̱ꞌkhue̱n Jesús ndiꞌyoo rí inu na̱ka̱ jiꞌyáa mi̱ꞌdi̱i mbáa wa̱jen. Tsí nijáñuu ñajuun ada̱ mbáwíi jamí nánée̱ ñajuun mbáa a̱ꞌgóxuáꞌa. Phú mbaꞌiin xa̱bo̱ xuajen nagóó ga̱jma̱á nindxu̱u̱ a̱ꞌgóxuáꞌa. 13 A̱ꞌkhue̱n rí maphú niñáwíin a̱kui̱in Táta̱ jaꞌyoo nána̱ tsúꞌkhue̱n, jamí niꞌthúu̱n: «Ma̱xáta̱mbi̱ya̱ꞌ».

14 A̱ꞌkhue̱n Jesús nixuꞌma-mina̱ꞌ, jamí nixkajmee̱ e̱jnu̱u̱ wa̱jen. Xómáꞌ tsí nagóó juñu̱ú e̱jna̱ niwájwii̱n. A̱ꞌkhue̱n rí Jesús niꞌthúun wa̱jen: «Dxáma, ikhúúnꞌ i̱tha̱a̱nꞌ: ¡Araxu̱unꞌ!». 15 A̱ꞌkhue̱n ni̱tu̱xi̱i ni̱ge̱ꞌe̱ xa̱bo̱ tsí nijáñuu, jamí nigíꞌdu̱u̱n niꞌthée̱n. A̱ꞌkhue̱n rí Jesús nixnáxi̱i dxáma tsúꞌkhue̱n inuu nánée.

16 Mbá xúgíin xa̱bo̱ nimíñúú rí xkuaꞌnii ndiyáá, a̱ꞌkhue̱n ni̱gíꞌdíi̱n nene̱-mba̱a̱ Ana̱ꞌlóꞌ, jamí nithee̱n: «Xúge̱ꞌ rí nikujmaa mbáa xa̱bo̱ mba̱a̱ tsí na̱gu̱wíjnga̱a ajngóo Ana̱ꞌlóꞌ ná majña̱ꞌlóꞌ rá. Ana̱ꞌlóꞌ Mikhuíí ni̱ꞌkha̱ gámbáyálóꞌ, rí xa̱bo̱ xuajñuu̱ ñajwanlóꞌ». 17 Jamí mbá xúgíí numbaa Judéa̱ niwán rí neꞌne Jesús, xúꞌkhue̱n máꞌ mbá xúgíí xuajen rí triga̱ mbá nawa̱a̱ mangaa.

Juáán tsí naxúꞌdu-maꞌíin xa̱bo̱ ná awúun iya naraxe̱ numuu Jesús

18 Juáán tsí naxúꞌdu-maꞌíin xa̱bo̱ ná awúun iya nidxawuun mbá xúgíí rí naꞌne Jesús, numuu rí xa̱bo̱ tsí naꞌsngúu̱n ni̱rawíjnga̱a mbá xúgíí rúꞌkhue̱n inuu̱. A̱ꞌkhue̱n nindxaꞌwúu̱n a̱jmi̱i tsí naꞌsngúu̱n, 19 jamí nixuꞌmii̱ inuu Jesús kajngó mu̱ra̱xíi̱ ajngáa ríge̱ꞌ: «Á ikháánꞌ ñajwaanꞌ xa̱bo̱ tsí wéje̱ máꞌ rí ma̱ꞌkha̱, o mu̱waꞌthi̱ínxo̱ꞌ i̱mba̱a̱ꞌ dxe̱ꞌ».

20 Ído̱ niguáꞌnú xa̱bo̱ tsúꞌkhue̱n inuu Jesús, a̱ꞌkhue̱n nitháa̱n: «Juáán tsí naxúꞌdu-maꞌíin xa̱bo̱ ná awúun iya nixuꞌmáaꞌxo̱ꞌ rí mu̱ra̱xa̱a̱ꞌxo̱ꞌ: "Á ikháánꞌ ñajwaanꞌ xa̱bo̱ tsí wéje̱ máꞌ ma̱ꞌkha̱, o mu̱waꞌthi̱ínxo̱ꞌ i̱mba̱a̱ꞌ dxe̱ꞌ"».

21 Awúun máꞌ rí júwe̱e̱ꞌ ikhín, a̱ꞌkhue̱n rí maphú mbaꞌiin xa̱bo̱ na̱gu̱ma-thanúú neꞌne Jesús: tsí najáñúú, tsí naꞌkhui̱in, tsí guáꞌdiin gíñá ꞌguéen, jamí tsí tsífrigu̱únꞌ na̱ma̱ꞌtha̱a idúún iꞌnii̱. 22 A̱ꞌkhue̱n Jesús niriꞌñúú tsí waxúꞌmii neꞌne Juáán: «Aꞌgua̱aꞌlaꞌ gútha̱án Juáán rí ndi̱ya̱álaꞌ jamí rí ni̱dxawíínlaꞌ. Gu̱tháa̱nlaꞌ rí xa̱bo̱ tsí tsífrigu̱únꞌ na̱ma̱ꞌtha̱a la idúún, xa̱bo̱ tsí réngu̱un nangrigu̱ún, xa̱bo̱ tsí naꞌgajmuu xuñúú na̱gu̱ma-thanúú, xa̱bo̱ tsí tsídxawíín na̱ma̱ꞌtha̱a la ñaꞌwúún, tsí nijáñúú nduya̱a la mbiꞌñúú, jamí xa̱bo̱ tsí mingíníi nithúún ajngáa máján. 23 Jamí phú gagi xtáa xa̱bo̱ tsí mbá jañii a̱kui̱in jaꞌyeꞌ».

24 Ído̱ nigúun xa̱bo̱ tsí nixúꞌmii Juáán, a̱ꞌkhue̱n nigíꞌdu̱u̱n Jesús niꞌthúún mbá xúgíin xa̱bo̱ ga̱jma̱á numuu Juáán. Xáꞌnii niꞌthúu̱n: «Dí nikua ágúya̱álaꞌ ná mbaa niníí róꞌ. Á nikua ágúya̱álaꞌ mbá e̱ꞌe̱n rí naꞌba̱a̱n eꞌne gíñá dxe̱ꞌ. 25 Xí na̱nguá, dí nikua ágúya̱álaꞌ xúꞌkhue̱n róꞌ. Á nikua ágúya̱álaꞌ mbáa xa̱bo̱ tsí júwuun xtíin rí mitsaan dxe̱ꞌ. Ndu̱ya̱á máꞌ ikháanꞌlaꞌ rí xa̱bo̱ tsí júwúún xtíin rí mitsaan jamí júwa̱ꞌ mújúún guéñúú, i̱ndo̱ó máꞌ ná guꞌwá mba̱ꞌwo̱ drígu̱ún thúngaa júwa̱ꞌ tsúꞌkhue̱n. 26 Gu̱tha̱nlaꞌ, tsáa nikua ágúya̱álaꞌ róꞌ. Á mbáa xa̱bo̱ tsí na̱gu̱wíjnga̱a ajngóo Ana̱ꞌlóꞌ dxe̱ꞌ. Na̱tha̱nꞌlaꞌ rí ikhaa tsúꞌkhue̱n nikua ágúya̱álaꞌ, jamí ra̱ꞌkhá nikhuáa xa̱bo̱ tsí na̱gu̱wíjnga̱a ajngóo Ana̱ꞌlóꞌ. 27 Numuu rí ga̱jma̱á numuu̱ ikhaa̱ ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

"Athayáá lá rí ikhúúnꞌ na̱xu̱ꞌmáa xa̱bi̱ꞌ tsí ma̱gu̱wíjnga̱a ajngóꞌ, ikhaa̱ ma̱ꞌgee̱ inaaꞌ.

Ikhaa̱ ma̱ꞌne-mújúu̱n jamba̱a̱ꞌ ná mi̱dxo̱ꞌ".*7.27 Ajngáa ríge̱ꞌ na̱ꞌkha̱ ná I̱yu̱u̱ꞌ Malakía̱s 3.1.

28 Ikhúúnꞌ na̱tha̱nꞌlaꞌ rí mbá xúgíin xa̱bo̱ numbaa tsí nijúwa̱ꞌ, ndawa̱a̱ asndo nimbáa xa̱bo̱ tsí na̱gu̱wíjnga̱a ajngóo Ana̱ꞌlóꞌ*7.28 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «tsí na̱gu̱wíjnga̱a ajngóo Ana̱ꞌlóꞌ». tsí i̱wa̱á gíꞌdoo numuu xó rí Juáán. Maske máꞌ xkuaꞌnii, tsí na̱nguá gíꞌdoo numuu ná majñu̱ú xa̱bo̱ tsí naꞌthán-ñájúún Ana̱ꞌlóꞌ, tsúꞌkhue̱n i̱wa̱á gíꞌdoo numuu xó rí Juáán».

29 Mbá xúgíin xa̱bo̱ tsí ni̱dxawíín rí niꞌthán Juáán, asndo xa̱bo̱ tsí nu̱ru̱ma mbúkho̱o̱ guꞌwá-ñajun mangiin, waxúꞌdu-maꞌíi̱n ná awúun iya niꞌnii̱, numuu ndiyáa̱ rí májáan Ana̱ꞌlóꞌ. 30 Xómáꞌ tsí xa̱bo̱ fariséo̱ gajmíí xa̱bo̱ tsí na̱ma̱ñúú xtángoo, ra̱khúu̱n gúdri̱guíi̱ rí máján nandoo Ana̱ꞌlóꞌ gáꞌne ga̱jma̱á numúu̱, ikhaa jngó túni̱ꞌñá-mijnée̱ rí mi̱xúꞌdu-maꞌíi̱n ná awúun iya gáꞌne Juáán.

31 Jamí niꞌthán xóó Táta̱:*7.31 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Jamí niꞌthán xóó Táta̱». «Dí lá gáne̱ mbéꞌtháán ga̱jma̱á nindxu̱ún xa̱bo̱ tsí júwa̱ꞌ xúge̱ꞌ rá. Xáne lá jaꞌñúu̱ rá. 32 Xómá e̱je̱n tsí trigi̱in nutsín ná xuáá jaꞌñúu̱, tsí xáꞌnii nu̱ndxa̱ꞌwa̱ inúú a̱ngui̱ín: "Ni̱ndííxo̱ꞌ talalí inalaꞌ, jamí ikháanꞌlaꞌ túsianlaꞌ. Ni̱sian-jínáxo̱ꞌ ajmúú inalaꞌ, jamí na̱nguá ni̱mbi̱ya̱ꞌlaꞌ". 33 Numuu rí nákhí ni̱ꞌkha̱ Juáán tsí naxúꞌdu-maꞌíin xa̱bo̱ ná awúun iya, tákueꞌtso ni máꞌ tágáan iyoo úba̱ rí ni̱ga̱yu̱u̱ꞌ, a̱ꞌkhue̱n ni̱tha̱nlaꞌ rí gíñá ꞌguéen gíꞌdaa̱. 34 Nda̱wa̱á ni̱ꞌkha̱ A̱dée Xa̱bo̱ Numbaa, tsí nakueꞌtso jamí naꞌña̱a̱, a̱ꞌkhue̱n nu̱tha̱nlaꞌ: "Xa̱bo̱ tsúꞌkhue̱n nakueꞌtso guéñuu jamí naꞌña̱a̱ guéñuu iyoo úba̱ rí ni̱ga̱yu̱u̱ꞌ. Iyanga̱jwi̱ín xa̱bo̱ tsí nu̱ru̱ma mbúkho̱o̱ guꞌwá-ñajun ñajuu̱n, jamí xa̱bo̱ tsí nune̱ aꞌkhán". 35 I̱ndo̱ó máꞌ numuu rí nakujma rí máján rí na̱ma̱ñuu Ana̱ꞌlóꞌ, ga̱jma̱á majñu̱u̱ xó rí júwa̱ꞌ xa̱bo̱ tsí nune̱-mbáníí ne̱».

Jesús naꞌne mba̱a̱ a̱kui̱in jaꞌyoo mbáa a̱ꞌgo̱ tsí naꞌne aꞌkhán

36 Mbáa xa̱bo̱ fariséo̱ nindxaꞌwóo Jesús rí ma̱ꞌga gákueꞌtso ga̱jma̱á nindxu̱u̱. A̱ꞌkhue̱n ni̱ka̱ Jesús ná guꞌwóo xa̱bo̱ tsúꞌkhue̱n jamí ni̱gi̱ꞌi̱i̱ ma̱kuiꞌtsii̱. 37 A̱ꞌkhue̱n rí mbáa a̱ꞌgo̱ tsí naꞌne aꞌkhán ná xuajen rúꞌkhue̱n, ído̱ nidxawuu̱n rí gída̱ꞌ Jesús nakueꞌtso ná guꞌwóo xa̱bo̱ fariséo̱, a̱ꞌkhue̱n ni̱ꞌkha̱ jayóo̱ mbá tsíꞌtsún itsí miꞌxá ná gajno̱ꞌ iya ndaa thawuun. 38 Na̱mbi̱ye̱e̱ꞌ ni̱ga̱níi̱ asndo ná wáꞌwíi nakhúu Jesús. A̱ꞌkhue̱n nigíꞌdu̱u̱n na̱rma̱jee̱n ne̱ ga̱jma̱á yaꞌduu̱, jamí naxúdíi̱ ne̱ ga̱jma̱á tsu̱u̱n idxu̱u̱. Naraꞌnuu̱ jamí naxtájmuu̱ iya ndaa thawuun nakhúu Jesús. 39 Ído̱ ndiꞌyoo xa̱bo̱ fariséo̱ tsí nindxaꞌwóo Jesús rí ma̱kueꞌtso, rí xkuaꞌnii eꞌne a̱ꞌgo̱ tsúꞌkhue̱n, a̱ꞌkhue̱n nindxaꞌwá-mine̱e̱ꞌ: «Xí xa̱bo̱ tsí na̱gu̱wíjnga̱a ajngóo Ana̱ꞌlóꞌ ñajuun tsíge̱ꞌ, mba̱ꞌyoo̱ tsáa a̱ꞌgui̱i̱ ñajuun tsí naxkajmaa̱. Mba̱ꞌyoo̱ rí a̱ꞌgo̱ tsí naꞌne aꞌkhán ñajuu̱n». 40 A̱ꞌkhue̱n niꞌthán Jesús, niriꞌñuu̱ xa̱bo̱ fariséo̱:

—Simón, ríga̱ mbá rí ma̱tha̱a̱nꞌ.

Xómáꞌ xa̱bo̱ fariséo̱ niꞌthán:

—Arathúnꞌ, táta̱.

41 A̱ꞌkhue̱n niꞌthán Jesús:

—A̱jmi̱i xa̱bo̱ gíꞌmii inuu mbáa xa̱bo̱ tsí naxnátiꞌña mbúkha̱a̱. Mbáa gíꞌmaa witsu siénto̱ (500) mbúkha̱a̱ ajwa̱nꞌ, jamí i̱mba̱a̱ꞌ gíꞌmaa a̱jma̱ skíñú gu̱wa̱ꞌ (50) mbúkha̱a̱ ajwa̱nꞌ. 42 Nda̱wa̱á nimbáa na̱nguá gíꞌdoo mbúkha̱a̱ rí maxnáa xa̱bo̱ tsúꞌkhue̱n, a̱ꞌkhue̱n neꞌne mba̱a̱ a̱kuii̱n jaꞌñúu̱ mbá nájmi̱i tsí gíꞌmii inuu̱. Ikhaa jngó na̱ra̱xa̱a̱ꞌlo̱ꞌ: Náá tsí mbá nájmi̱i i̱wa̱á ma̱goo jaꞌyoo xa̱bo̱ tsúꞌkhue̱n, i̱ju̱ma̱a̱ꞌ ikháánꞌ rá.

43 A̱ꞌkhue̱n niriꞌña Simón:

—Táta̱, ikhúúnꞌ na̱ju̱mu̱ꞌ rí ikhaa xa̱bo̱ tsí i̱tha̱án mba̱a̱ gidxóó neꞌne mba̱a̱ a̱kuii̱n jaꞌyoo̱.

A̱ꞌkhue̱n Jesús niꞌthúun Simón:

—Maphú máján nirathán.

44 A̱ꞌkhue̱n nitangayii Jesús niyaxu̱u̱ a̱ꞌgo̱ tsúꞌkhue̱n, jamí niꞌthúu̱n Simón:

—Atiaxi̱í a̱ꞌgo̱ tsíge̱ꞌ. Nákhí nigánúlo̱ꞌ guꞌwáaꞌ, tára̱xnu̱ꞌ iya ma̱jña̱a nakhúꞌ. Xómáꞌ a̱ꞌgo̱ tsíge̱ꞌ niꞌjñáa nakhúꞌ ga̱jma̱á yaꞌduu jamí nixúdíi̱ ne̱ ga̱jma̱á tsu̱u̱n idxu̱u̱. 45 Ído̱ nitraxu̱únlo̱ꞌ tátraꞌníí inuꞌ. Xómáꞌ a̱ꞌgo̱ tsíge̱ꞌ tsíniñuu-raraꞌnuu nakhúꞌ asndo nákhí ni̱to̱ꞌo̱ꞌ ná guꞌwáaꞌ. 46 Ni máꞌ na̱nguá nitaxtájmáá yatsi̱i xndú olíbo̱ ná idxu̱ꞌ. Xómáꞌ a̱ꞌgo̱ tsíge̱ꞌ nixtájmuu iya ndaa thawuun nakhúꞌ. 47 Ikhaa jngó na̱tha̱a̱nꞌlo̱ꞌ, aꞌkhúu̱n rí mbaꞌa guéño, nakujma rí ningudi̱i máꞌ ne̱ mbá xúgíí, ikhaa numuu rúꞌkhue̱n phú nandoo̱ jaꞌyeꞌ. Xómáꞌ xa̱bo̱ tsí lájwíin máꞌ aꞌkhúun rí nangudi̱i rá, lájwíin máꞌ iyoo̱ jaꞌyoo̱ Ana̱ꞌlóꞌ mangaa.

48 A̱ꞌkhue̱n Jesús niꞌthúun a̱ꞌgo̱: «Ningudi̱i máꞌ aꞌkháanꞌ rá».

49 Xómáꞌ xa̱bo̱ tsí watsaꞌwúún trigi̱in ikhín ga̱jma̱á nindxu̱u̱ Jesús, ni̱gíꞌdíi̱n ni̱ndxa̱ꞌwa̱-mijnée̱: «Tsáa ñajuun tsíge̱ꞌ rí asndo naꞌne mba̱a̱ a̱kui̱in jaꞌyoo aꞌkhúún xa̱bo̱ róꞌ».

50 Xómáꞌ Jesús niꞌthúun a̱ꞌgo̱: «Nijríña̱áꞌ numuu rí ninimba̱a̱ꞌ xtayoꞌ. Tsímáá gídxúuꞌ rá».